Máfíò 23
23
Jízɛ̀ po nyɔ ɓěɔ̀ náún ɓá Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ kè Fáɖòsíì-nyɔ̀ ɓěɔ̀ jè dyí
(Máà 12:38-39; Ɖúù 11:43, 46; 20:45-46)
1Sɔ̀ìn ɓóɛ gboɛɛ, Jízɛ̀ wùɖù ma nyɔ kúɖúú ɓěɔ̀ kè ɔ ɖeín-nà-nyɔ̀ ɓěɔ̀ gbo, ké ɔ ɖá, 2“Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ kè Fáɖòsíì-nyɔ̀ ɓěɔ̀ mɔ̀ nyɔ ɖú Mózèɛ̀ pá dyí. 3Ɔ jèɛɛ, ɓě mɛ wɔ̃́ ɓɛ́ ɓě ké ɖɛ séín wa cɛ̃ ɓě gboɛɛ nyu, ɓɛ́ ɓě ké waà tɛ̀mɛ̀ìn-ɖɛ̀ ɓěɔ̀ dyi kpɔ̃. Kɛɛ ɓě ní ɖá ɓɛ́ ɓě ké ɖɛ ɓě wa nyu xwaiɛɛ ɖò nyu, sepóɛɖé wa ní nyu ɖɛ ɓě wa tɛ̀mɛ̀ìn kà nyɔǔn wɛ̃ɛ ɖò. 4Wa kpɔ̃̀ìn nyɔǔn ganaún, ɓɛ́ wa ké ɖɛ kàmà múɛɛ nyu, kɛɛ wa ní nyu ɖɛ ɖò ɓɛ́ ɔ ké nyɔ ɓěɔ̀ gbo kpá fóɖóún dyɛ mɔ̀ùn ɓó ɖɛ kàmàǔn-kàmàǔnɔ̀ nyu jè. 5Ɖɛ séín wa nyuɛɛ mɔ̀ nyɔǔn ké wa dyé jè pū. Dyé kà wa nyu ɖɛ ɓě kɔ̃̀ kɔ̃ ɓɛ́ Gèɖèpɔ́ɔ̀ gmaɔ̀ céèɛɛ dyí ɓúáìn nyɛ. Wa po ɖɛ ɓěɛ̀ sɔ̃, ké wa jìnìɛ̀n ɓó waà dyúa-kpà ɓěɔ̀ kɔ̃. Ké wa tɔ̀mɔ̀ìn bù-bù ɓɛ́ wa nìà waà mú-po-ɖɔ̀ ɓěɔ̀ wĩin nyɛ. 6Wa dyi hwɔ kɔ̃ mu ní, wa ɖɛ̀ɓɛ̀ ɓɛ́ wa ké dà kpa ɖɛɔ̀ kò. Wa ɖɛ̀ɓɛ̀ ɓɛ́ wa ké dà kpa ɖɛ ɓě nì ɖé waà cɔ́cì-gbò ɓěɔ̀ múɛɛ kò. 7Wa ɖɛ̀ɓɛ̀ ɓɛ́ nyɔǔn ké wa nyíɔún zà ɖé kpéín-dyé-dyé mú, ɖé ɖɛ-pèɖèìn-naín ɓěɔ̀. Ké wa ɖɛ̀ɓɛ̀ ɓɛ́ nyɔǔn ké wa nyɔ-ɖɛ-tɛ̀mɛ̀ìn-nyɔ̀ ɖáìn. 8Kɛɛ ɓě mɛ ɓɔ́ wɔ̃́ɔ ɓɛ́ nyɔǔn ké ɓě nyɔ-ɖɛ-tɛ̀mɛ̀ìn-nyɔ̀ ɖáìn, sepóɛɖé ɓě séín mɔ̀ ɖíí ɓě, ké ɓě ɓéɖé ɖɛ-tɛ̀mɛ̀ìn-nyɔ̀ dyúáɖò. 9Ké ɓě mɛ ɓɔ́ nyɔ ɖò ɓě ɓǎ ɖáìn nɔ̄ ɓóɖó-kpàà kɔ̃, sepóɛɖé ɓě ɓéɖé Ɓǎ dyúáɖò nyɛ̀nɛ̀ɛ̀, ké ɔ nì ɖé dyɔún. 10Ké ɓě mɛ ɓɔ́ wɔ̃́ɔ ɓɛ́ nyɔ ɖò ké ɓě nyɔ-nàìn-nyɔ̀ ɖáìn, sepóɛɖé ɓěɛ̀ nàìn-nyɔ̀ dyúáɖòɔ̀ mɔ̀ Kɛ́ɖɛ́ìɔ̀. 11Nyɔ vɛ̀nɛ̀ ɓɛ́ ɔ mu ɖé ɓě hwìɛ̀ nììn nyɛɛ mɛ mɔ̀ ɓěɛ̀ gbo-nì-nyɔ̀. 12Nyɔǔn séín ɓě ɓɛ́ wa ɓúáìn wa mìɔùn dyíɛɛ, wa mu wa ɓíɖíi dyàùn. Ké nyɔǔn séín ɓě ɓɛ́ wa dyà wa mìɔùn ɓíɖíiɛɛ, wa mu wa dyií ɖúùn.”
Jízɛ̀ kpɔ̃̀ìn Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ kè Fáɖòsíì-nyɔ̀ ɓěɔ̀ zaa
(Máà 12:40; Ɖúù 11:39-42, 44, 52; 20:47)
13Hwɛ̀ ké Jízɛ̀ cɛ̃ɛ ma Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ kè Fáɖòsíì-nyɔ̀ ɓěɔ̀ gbo, ké ɔ ɖá, “Ɓě mɔ̀à Gèɖèpɔ́ɔ̀-cèè-ɖɛ̀ dyuò-nyɔ̀ ɓě kè Fáɖòsíì-nyɔ̀ ɓěɛɛ, gboò-wùɖù nì ɓě mɔ̀à dyéɖéi-nyu-nyɔ̀ ɓěɛɛ kɔ̃. Ɓě kã hwìè ɓɛ́ ɔ muà ɖé Gèɖèpɔ́ɔ̀ kã́á-ɓòɖò nìà ɖé dyɔún wɛ̃ɛ kɔ̃ɛ, ɓɛ́ nyɔǔn ké seɛ kpaa ɓɛ́ìn. Ɓě mìɔùn se ɖé muɛ ɓɛ́ìn, ké ɓě ní wɔ̃́ ɓɛ́ nyɔǔn ké ɖé mu.
[ 14“Ɓě mɔ̀à Gèɖèpɔ́ɔ̀-cèè-ɖɛ̀ dyuò-nyɔ̀ ɓě kè Fáɖòsíì-nyɔ̀ ɓěɛɛ, gboò-wùɖù nì ɓě mɔ̀à dyéɖéi-nyu-nyɔ̀ ɓěɛɛ kɔ̃. Ɓě zà jɔ̌ɔ̀-màà ɓěɔ̀ ɖɛ ɓě xwai nyɛ̀nɛ̀ɛ̀, ké ɓě nyu ɓaà-wùɖù zɛin, ɓɛ́ nyɔǔn ké ɓě dyé jè. Ɔ jèɛɛ, Gèɖèpɔ́ɔ̀ mu ɓě gǎ dyéìn mìɔ, ɓɛ́ ɔ ké nyɔ tɔ̀ɔ̀ ɓě dyí zi.]
15“Ɓě mɔ̀à Gèɖèpɔ́ɔ̀-cèè-ɖɛ̀ dyuò-nyɔ̀ ɓě kè Fáɖòsíì-nyɔ̀ ɓěɛɛ, gboò-wùɖù nì ɓě mɔ̀à dyéɖéi-nyu-nyɔ̀ ɓěɛɛ kɔ̃. Ɓě mu dà séín, ɓɛ́ ɓě ké nyɔ-kpò dyúáɖò ɓěɛ̀ ɖeín-nà-nyɔ̀ mú nyu jè. Ké ɓě dyi ɖò dyéín, ɓě nyuɛ ké ɔ nììn hɛ́ɛ̀ mu-muɔ̀ zi ɓě nììn hɛ́ɛ̀ mu-muɔ̀ kɔ̃.
16“Gboò-wùɖù nì ɓě mɔ̀à nyɔǔn hwìè-da-zàìn-nyɔ̀ kpè dyéɖéín dyi ɓěɛɛ kɔ̃. Ɓě tɛ̀mɛ̀ìn nyɔ ɓěɔ̀ ɖɛ, ké ɓě ɖá, ‘Nyɔ ɖò dyi Gèɖèpɔ́ɔ̀ gbǒɔ̀ dyí gboò ní, nìí, ɔ gboò-wùɖùɔ̀ se xwíníín ɖò kɔ̃̀. Kɛɛ nyɔ ɖò dyi góò nìà ɖé Gèɖèpɔ́ɔ̀ gbǒɔ̀ múɛɛ dyí gboò ní, nìí, ɔ ɓéɖé ɓɛ́ ɔ ké ɖɛ kɔ̃̀ jè ɔ gboòà kɛɛ nyu wɛ̃́ɛ́.’ 17Ɓě kpè dyéɖéín dyi, ké ɓě zuɖu. Ɖɛ́ mɔ̀ ɖɛ kpa ɖɛ mìɔ kɛ́? Góòɔ̀ mɔɔ Gèɖèpɔ́ɔ̀ gbǒ ɓɛ́ ɔ nyuà ɓɛ́ góòɔ̀ dyià wáká kpá ɓó Gèɖèpɔ́ɔ̀ bìì kɛɛ̀? 18Ɓě tɛ̀mɛ̀ìn nyɔǔn ɖɛ ɖe, ké ɓě ɖá, ‘Nyɔ ɖò dyi sáa-kɔ̃-zàìn-gbààɔ̀ dyí gboò ní, nìí, ɔ gboò-wùɖùɔ̀ se xwíníín ɖò kɔ̃̀. Kɛɛ ɔ jǔ ké nyɔ ɖò dyi nyíí-ɖɛ̀ ɓɛ́ ɔ nìà ɓó sáa-kɔ̃-zàìn-gbààɔ̀ kɔ̃ɛɛ dyí gboò ní, nìí, ɔ ɓéɖé ɓɛ́ ɔ ké ɖɛ kɔ̃̀ jè ɔ gboòà kɛɛ nyu wɛ̃́ɛ́.’ 19Ɓě kpè dyéɖéín dyi jǎà wà! Ɖɛ́ mɔ̀ ɖɛ kpa ɖɛ mìɔ kɛ́? Nyíí-ɖɛ̀ɔ̀ mɔɔ sáa-kɔ̃-zàìn-gbàà ɓɛ́ ɔ nyuà ɓɛ́ nyíí-ɖɛ̀ɔ̀ dyià wáká kpá ɓó Gèɖèpɔ́ɔ̀ bìì kɛɛ̀? 20Ɔ jèɛɛ, ɔ jǔ ké nyɔ ɖò dyi sáa-kɔ̃-zàìn-gbààɔ̀ dyí gboò ní, nìí, ɔ gboò sáa-kɔ̃-zàìn-gbààɔ̀ kè nyíí-ɖɛ̀ séín nìà ɓóɛ kɔ̃ɛɛ dyí. 21Ké ɔ jǔ ké nyɔ ɖò dyi Gèɖèpɔ́ɔ̀ gbǒɔ̀ dyí gboò ní, nìí, ɔ gboò Gèɖèpɔ́ɔ̀ gbǒɔ̀ kè Gèɖèpɔ́ɔ̀ mɔ̀ nyɔ ɓɛ́ ɔ cĩ́à ɖé gbǒɔ̀ múɛɛ dyí. 22Ké ɔ jǔ ké nyɔ ɖò dyi dyɔún dyí gboò ní, nìí, ɔ gboò Gèɖèpɔ́ɔ̀ zèèɔ̀ dè-naín kè Gèɖèpɔ́ɔ̀ ɓɛ́ ɔ dèɖěà dya ɖé ɔ zèèɔ̀ kɔ̃ɛɛ dyí.
23“Ɓě mɔ̀à Gèɖèpɔ́ɔ̀-cèè-ɖɛ̀ dyuò-nyɔ̀ ɓě kè Fáɖòsíì-nyɔ̀ ɓěɛɛ, gboò-wùɖù nì ɓě mɔ̀à dyéɖéi-nyu-nyɔ̀ ɓěɛɛ kɔ̃. Ɓě nyí Gèɖèpɔ́ɔ̀ ɓěɛ̀ cɔ́ɔ́-zɔ̃̌ìn-ɖɛ̀ ɓě mɔ̀à vàǎ-dù kò-kò ɓěɔ̀ kɛɛ ɓàɖàìn-bùè, kɛɛ ɓě wã̀ìn gmaɔ̀ nyɔ kpa ɖɛ ɓě dyéɖé kɔ̃in. Ɔ mɔ̀ gma ɓě cɛ̃à ɓɛ́ ɓě kéà ɓě mǔè ɖò jǎà-ɖɛ̀ bũ̌ nyu, ɓɛ́ ɓě kéà ɔ wìǐn dyé, ɓɛ́ ɔ kéà ɓě hwòɖǒ kɔ̃ dèɛ̀ ɓɛ́ìn nyɛ. Gma ɓě nìà kɛ kè gma tɔ̀ɔ̀ ɓěɔ̀, ɖéɛ̀ ɓě ɓéɖé ɓě kéɔ́ dyi kpɔ̃. 24Ɓě mɔ̀ nyɔǔn hwìè-da-zàìn-nyɔ̀ kpè dyéɖéín dyi ɓě. Ɓě nì kà nyɔ ɓě kéɔ́ kà waà náá-ɖɛ̀ ɓěɔ̀ ɖe, ɓɛ́ wa ní kɔ̃̀ ɖà pùdɛ̃ mana, kɛɛ wa mana sǒ-nì-gbu-kɔ̃ún wɛ̃.
25“Ɓě mɔ̀à Gèɖèpɔ́ɔ̀-cèè-ɖɛ̀ dyuò-nyɔ̀ ɓě kè Fáɖòsíì-nyɔ̀ ɓěɛɛ, gboò-wùɖù nì ɓě mɔ̀à dyéɖéi-nyu-nyɔ̀ ɓěɛɛ kɔ̃. Ɓě wɔɔ̀ kópòɔ̀ kè péɖétèɔ̀ kɔ̃ún dyi, kɛɛ ɓě dyíìn wa ɖii-ɖɛ̀ kè náá-ɖɛ̀ ɓě ɓɛ́ ɓě zàìn nyɔǔn gana xwa dyììn ɖé ɓě mìɔùn jè kàmà-kàmà múɛɛ múin. 26Ɓě mɔ̀à Fáɖòsíì-nyɔ̀ ɓěɛɛ, ɓě kpè dyéɖéín dyi. Ɓě mɛ wɔɔ̀ ɖɛ nìà kópòɔ̀ xwíníín nyɛɛ ɖé dyi kĩ́ín, nìí, ɔ kɔ̃únɔ̀ mu mú hwɛ̀ìn ɖekè.
27“Ɓě mɔ̀à Gèɖèpɔ́ɔ̀-cèè-ɖɛ̀ dyuò-nyɔ̀ ɓě kè Fáɖòsíì-nyɔ̀ ɓěɛɛ, gboò-wùɖù nì ɓě mɔ̀à dyéɖéi-nyu-nyɔ̀ ɓěɛɛ kɔ̃. Ɓě nì kà xwɛ́-gmàà ɓɛ́ wa poà tɛnɛɛ́-pɛ̀ɛ̀ bũ̌in nyɛɛ nìà kɛ. Nyɔ dyi wa kɔ̃in gmɔìn ní, nìí, wa nɔ̀mɔ̀ kɔ̃in, kɛɛ nyɔǔn-kpà kè ɖɛ zɔ̃̀ ɓě dyí ɖé wa xwíníín. 28Kà dyúáɖòɔ̀ kǎà nyɔǔn ɓě dyi ɓě dya gmɔ̀ ní, nìí, ɓě hwɔ dyí-sɛ́ɖɛ́ìn-nyɔ̀ ɓě, kɛɛ dyéɖéi-nyu-nyu kè ɖɛ gbà dyí ɖé ɓěɛ̀ hwòɖǒ-dyùàɔ̀ mú.
Jízɛ̀ cɛ̃ gǎ Gèɖèpɔ́ɔ̀ mu Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ kè Fáɖòsíì-nyɔ̀ ɓěɔ̀ kɔ̃ tòùn wɛ̃ɛ jè
(Ɖúù 11:47-51)
29“Ɓě mɔ̀à Gèɖèpɔ́ɔ̀-cèè-ɖɛ̀ dyuò-nyɔ̀ ɓě kè Fáɖòsíì-nyɔ̀ ɓěɛɛ, gboò-wùɖù nì ɓě mɔ̀à dyéɖéi-nyu-nyɔ̀ ɓěɛɛ kɔ̃. Ɓě nɔ̀mɔ̀ìn kpáá-ɖɛ̀-cɛ̃-nyɔ̀ ɓěɔ̀ xwɛ́-gmàà ɓěɔ̀ xwa, ké ɓě bɛ̃̀ìn dyí-sɛ́ɖɛ́ìn-nyɔ̀ ɓěɔ̀ xwɛ́-gmàà ɓěɔ̀. 30Ké ɓě ɖá, ‘À dyi zɔ̃̌ɔ̀ cĩ́ɛń nì ɖé à ɓǎ nììn ɓǎ ɓěɔ̀ tiín ní, nìí, à seɔ́ má wa hwìɛ̀ kpáa mu, ɓɛ́ à kéɔ́ kpáá-ɖɛ̀-cɛ̃-nyɔ̀ ɓěɔ̀ ɖáɓá.’ 31Ɖɛ ɓě ɓɛ́ ɓě cɛ̃à kɛɛ tɛ̀mɛ̀ìn nyɔǔn dyí kà ɓɛ́ ɓě mɔ̀ nyɔ ɓě ɖáɓá ma kà kpáá-ɖɛ̀-cɛ̃-nyɔ̀ ɓěɔ̀ kɛɛ dyú ɓě kɛ. 32Ɓě mu dyúa, ɓɛ́ ɓě ké ɖɛ ɓě ɓǎ nììn ɓǎ ɓěɔ̀ dè ma kà gbɔɛɛ mánáín hwɔ. 33Ɓě mɔ̀ sɛ kè sɛɛ̀ dyú ɓěɛɛ, xwɛ̌ ɓě ɓɛ́ìn zaa ɓɛ́ ɔ kpɔ̃à ɓě ɓɛ́ ɓě kéà hɛ́ɛ̀ muɛɛ xwaún póɛ kɛ́? 34Ɔ jèɛɛ, ḿ cɛ̃ɛ ɓě gbo, ní mu kpáá-ɖɛ̀-cɛ̃-nyɔ̀ ɓě kè hwòɖǒ-fɔ̀nɔ̀-nyɔ̀ ɓě ɔ kè Gèɖèpɔ́ɔ̀-cèè-ɖɛ̀ dyuò-nyɔ̀ ɓě ɓě gbo ɖoɓoùn. Ɓě mu wa ɖíɛ́ ɓě ɖáɓáùn, ké ɓě mu ɖíɛ́ ɓě kɔ́ɖɔ́sì ɓě kɔ̃in kɔ̀ìn. Ké ɓě mu ɖíɛ́ ɓě gbàtò ɓàɖàìn ɖé ɓěɛ̀ cɔ́cì-gbò ɓěɔ̀ mú, ké ɓě mu wa kúmúɛ kpaùn ɖé hwɔɖɔ ɓěɔ̀ mú. 35Ké ɔ muɛ nyuùn ké ɓě mu nyɔ séín ɓě ɓɛ́ wa se ma ɖɛ gbà ɖò nyu, ké nyɔǔn ɖáɓá ma kà wa kɛɛ nyɔmɔɔ wáɖáìn ma kà dyi kɛɛ kpa dyí ɖúùn. Ɔ mɔ̀ sɔ̀ìn ɖé Éɓò ɓɛ́ ɔ mɔ̀ zɔ̃̌ɔ̀ kà dyí-sɛ́ɖɛ́ìn-nyɔ̀ kɛɛ nììn nyɔmɔɔ wáɖáìn zɔ̃̌ɔ̀ kà dyiɛɛ gbo, ɓɛ́ ɔ ké Zɛ́kɔ̀wáɖádyà mɔ̀à Bɛ̀wéɖékìàà dyú-gààɔ̀ kɛɛ nììnɔ̀ gbo dyiɛ. Ɔ mɔ̀ nyɔ ɓɛ́ ɓě ɖáɓáìn zɔ̃̌ɔ̀ kà ɖé Gèɖèpɔ́ɔ̀ gbǒɔ̀ kè sáa-kɔ̃-zàìn-gbààɔ̀ pṹa kɛ. 36Ḿ cɛ̃ ɓě jǎà gbo, ɖɛ séín ɓě kpá zɔ̃̌ɔ̀ kà kɛɛ, ɓě mɔ̀ nyɔ ɓě nìà kàǔn wɛ̃ɛ mu wa kpa dyí ɖúùn.
Jízɛ̀ ɖɛ̀ɓɛ̀ Jùɖúsɛ̀ɖɛ̀ìn-hwɔ̀ɖɔ̀ɔ̀ mú
(Ɖúù 13:34-35)
37“Éé Jùɖúsɛ̀ɖɛ̀ìn-nyɔ̀ ɓě, Jùɖúsɛ̀ɖɛ̀ìn-nyɔ̀ ɓě! Ɓě mɔ̀ nyɔ ɖáɓáà kpáá-ɖɛ̀-cɛ̃-nyɔ̀ ɓěɔ̀, ké ɓě taɓaìn kíá ɓě ɓɛ́ Gèɖèpɔ́ɔ̀ ɖoɓo ma ɓě gboɛɛ sɔ́ɔ́-kpò dyi. Ti pàɖǎ múɛɛ, ní mɔ́ ɓɛ́ ḿ ké ma ɓě dyí poìn kà dyú-ɖɛ̌-sòò nyuà ɔ dyú ɓěɔ̀ dyí poɛ̀n ɖé ɔ pìɔ̌-kpàɔ̀ xwíɖíiɛ, kɛɛ ɓě se wɔ̃́ ɓɛ́ ḿ ké ma ɓě dyí poìn. 38Gmɔ̀ nɔ̄, Gèɖèpɔ́ɔ̀ mu ɔ gbǒ mɔ̀à ɓěɛ̀ ɓièìn-naínɔ̀ kɛɛ dyi táàùn, ké ɔ mu wáɖáùn. 39Ḿ cɛ̃ɛ ɓě gbo, sɔ̀ìn dà ɓó ké dyúa muɛɛ, ɓě se ḿ dyéɛ mu ɖe, ɔ sèìn ké ɓě cɛ̃ɛ, ké ɓě ɖǎ, ‘Mana mɛ nì nyɔ ɓɛ́ ɔ dyi kà ɖé Bounɓoɔ̀ nyɛ́nɛ́ɔ̀ múɛɛ kɔ̃o’ hwɛ̀.”
Currently Selected:
Máfíò 23: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
Máfíò 23
23
Jízɛ̀ po nyɔ ɓěɔ̀ náún ɓá Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ kè Fáɖòsíì-nyɔ̀ ɓěɔ̀ jè dyí
(Máà 12:38-39; Ɖúù 11:43, 46; 20:45-46)
1Sɔ̀ìn ɓóɛ gboɛɛ, Jízɛ̀ wùɖù ma nyɔ kúɖúú ɓěɔ̀ kè ɔ ɖeín-nà-nyɔ̀ ɓěɔ̀ gbo, ké ɔ ɖá, 2“Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ kè Fáɖòsíì-nyɔ̀ ɓěɔ̀ mɔ̀ nyɔ ɖú Mózèɛ̀ pá dyí. 3Ɔ jèɛɛ, ɓě mɛ wɔ̃́ ɓɛ́ ɓě ké ɖɛ séín wa cɛ̃ ɓě gboɛɛ nyu, ɓɛ́ ɓě ké waà tɛ̀mɛ̀ìn-ɖɛ̀ ɓěɔ̀ dyi kpɔ̃. Kɛɛ ɓě ní ɖá ɓɛ́ ɓě ké ɖɛ ɓě wa nyu xwaiɛɛ ɖò nyu, sepóɛɖé wa ní nyu ɖɛ ɓě wa tɛ̀mɛ̀ìn kà nyɔǔn wɛ̃ɛ ɖò. 4Wa kpɔ̃̀ìn nyɔǔn ganaún, ɓɛ́ wa ké ɖɛ kàmà múɛɛ nyu, kɛɛ wa ní nyu ɖɛ ɖò ɓɛ́ ɔ ké nyɔ ɓěɔ̀ gbo kpá fóɖóún dyɛ mɔ̀ùn ɓó ɖɛ kàmàǔn-kàmàǔnɔ̀ nyu jè. 5Ɖɛ séín wa nyuɛɛ mɔ̀ nyɔǔn ké wa dyé jè pū. Dyé kà wa nyu ɖɛ ɓě kɔ̃̀ kɔ̃ ɓɛ́ Gèɖèpɔ́ɔ̀ gmaɔ̀ céèɛɛ dyí ɓúáìn nyɛ. Wa po ɖɛ ɓěɛ̀ sɔ̃, ké wa jìnìɛ̀n ɓó waà dyúa-kpà ɓěɔ̀ kɔ̃. Ké wa tɔ̀mɔ̀ìn bù-bù ɓɛ́ wa nìà waà mú-po-ɖɔ̀ ɓěɔ̀ wĩin nyɛ. 6Wa dyi hwɔ kɔ̃ mu ní, wa ɖɛ̀ɓɛ̀ ɓɛ́ wa ké dà kpa ɖɛɔ̀ kò. Wa ɖɛ̀ɓɛ̀ ɓɛ́ wa ké dà kpa ɖɛ ɓě nì ɖé waà cɔ́cì-gbò ɓěɔ̀ múɛɛ kò. 7Wa ɖɛ̀ɓɛ̀ ɓɛ́ nyɔǔn ké wa nyíɔún zà ɖé kpéín-dyé-dyé mú, ɖé ɖɛ-pèɖèìn-naín ɓěɔ̀. Ké wa ɖɛ̀ɓɛ̀ ɓɛ́ nyɔǔn ké wa nyɔ-ɖɛ-tɛ̀mɛ̀ìn-nyɔ̀ ɖáìn. 8Kɛɛ ɓě mɛ ɓɔ́ wɔ̃́ɔ ɓɛ́ nyɔǔn ké ɓě nyɔ-ɖɛ-tɛ̀mɛ̀ìn-nyɔ̀ ɖáìn, sepóɛɖé ɓě séín mɔ̀ ɖíí ɓě, ké ɓě ɓéɖé ɖɛ-tɛ̀mɛ̀ìn-nyɔ̀ dyúáɖò. 9Ké ɓě mɛ ɓɔ́ nyɔ ɖò ɓě ɓǎ ɖáìn nɔ̄ ɓóɖó-kpàà kɔ̃, sepóɛɖé ɓě ɓéɖé Ɓǎ dyúáɖò nyɛ̀nɛ̀ɛ̀, ké ɔ nì ɖé dyɔún. 10Ké ɓě mɛ ɓɔ́ wɔ̃́ɔ ɓɛ́ nyɔ ɖò ké ɓě nyɔ-nàìn-nyɔ̀ ɖáìn, sepóɛɖé ɓěɛ̀ nàìn-nyɔ̀ dyúáɖòɔ̀ mɔ̀ Kɛ́ɖɛ́ìɔ̀. 11Nyɔ vɛ̀nɛ̀ ɓɛ́ ɔ mu ɖé ɓě hwìɛ̀ nììn nyɛɛ mɛ mɔ̀ ɓěɛ̀ gbo-nì-nyɔ̀. 12Nyɔǔn séín ɓě ɓɛ́ wa ɓúáìn wa mìɔùn dyíɛɛ, wa mu wa ɓíɖíi dyàùn. Ké nyɔǔn séín ɓě ɓɛ́ wa dyà wa mìɔùn ɓíɖíiɛɛ, wa mu wa dyií ɖúùn.”
Jízɛ̀ kpɔ̃̀ìn Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ kè Fáɖòsíì-nyɔ̀ ɓěɔ̀ zaa
(Máà 12:40; Ɖúù 11:39-42, 44, 52; 20:47)
13Hwɛ̀ ké Jízɛ̀ cɛ̃ɛ ma Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ kè Fáɖòsíì-nyɔ̀ ɓěɔ̀ gbo, ké ɔ ɖá, “Ɓě mɔ̀à Gèɖèpɔ́ɔ̀-cèè-ɖɛ̀ dyuò-nyɔ̀ ɓě kè Fáɖòsíì-nyɔ̀ ɓěɛɛ, gboò-wùɖù nì ɓě mɔ̀à dyéɖéi-nyu-nyɔ̀ ɓěɛɛ kɔ̃. Ɓě kã hwìè ɓɛ́ ɔ muà ɖé Gèɖèpɔ́ɔ̀ kã́á-ɓòɖò nìà ɖé dyɔún wɛ̃ɛ kɔ̃ɛ, ɓɛ́ nyɔǔn ké seɛ kpaa ɓɛ́ìn. Ɓě mìɔùn se ɖé muɛ ɓɛ́ìn, ké ɓě ní wɔ̃́ ɓɛ́ nyɔǔn ké ɖé mu.
[ 14“Ɓě mɔ̀à Gèɖèpɔ́ɔ̀-cèè-ɖɛ̀ dyuò-nyɔ̀ ɓě kè Fáɖòsíì-nyɔ̀ ɓěɛɛ, gboò-wùɖù nì ɓě mɔ̀à dyéɖéi-nyu-nyɔ̀ ɓěɛɛ kɔ̃. Ɓě zà jɔ̌ɔ̀-màà ɓěɔ̀ ɖɛ ɓě xwai nyɛ̀nɛ̀ɛ̀, ké ɓě nyu ɓaà-wùɖù zɛin, ɓɛ́ nyɔǔn ké ɓě dyé jè. Ɔ jèɛɛ, Gèɖèpɔ́ɔ̀ mu ɓě gǎ dyéìn mìɔ, ɓɛ́ ɔ ké nyɔ tɔ̀ɔ̀ ɓě dyí zi.]
15“Ɓě mɔ̀à Gèɖèpɔ́ɔ̀-cèè-ɖɛ̀ dyuò-nyɔ̀ ɓě kè Fáɖòsíì-nyɔ̀ ɓěɛɛ, gboò-wùɖù nì ɓě mɔ̀à dyéɖéi-nyu-nyɔ̀ ɓěɛɛ kɔ̃. Ɓě mu dà séín, ɓɛ́ ɓě ké nyɔ-kpò dyúáɖò ɓěɛ̀ ɖeín-nà-nyɔ̀ mú nyu jè. Ké ɓě dyi ɖò dyéín, ɓě nyuɛ ké ɔ nììn hɛ́ɛ̀ mu-muɔ̀ zi ɓě nììn hɛ́ɛ̀ mu-muɔ̀ kɔ̃.
16“Gboò-wùɖù nì ɓě mɔ̀à nyɔǔn hwìè-da-zàìn-nyɔ̀ kpè dyéɖéín dyi ɓěɛɛ kɔ̃. Ɓě tɛ̀mɛ̀ìn nyɔ ɓěɔ̀ ɖɛ, ké ɓě ɖá, ‘Nyɔ ɖò dyi Gèɖèpɔ́ɔ̀ gbǒɔ̀ dyí gboò ní, nìí, ɔ gboò-wùɖùɔ̀ se xwíníín ɖò kɔ̃̀. Kɛɛ nyɔ ɖò dyi góò nìà ɖé Gèɖèpɔ́ɔ̀ gbǒɔ̀ múɛɛ dyí gboò ní, nìí, ɔ ɓéɖé ɓɛ́ ɔ ké ɖɛ kɔ̃̀ jè ɔ gboòà kɛɛ nyu wɛ̃́ɛ́.’ 17Ɓě kpè dyéɖéín dyi, ké ɓě zuɖu. Ɖɛ́ mɔ̀ ɖɛ kpa ɖɛ mìɔ kɛ́? Góòɔ̀ mɔɔ Gèɖèpɔ́ɔ̀ gbǒ ɓɛ́ ɔ nyuà ɓɛ́ góòɔ̀ dyià wáká kpá ɓó Gèɖèpɔ́ɔ̀ bìì kɛɛ̀? 18Ɓě tɛ̀mɛ̀ìn nyɔǔn ɖɛ ɖe, ké ɓě ɖá, ‘Nyɔ ɖò dyi sáa-kɔ̃-zàìn-gbààɔ̀ dyí gboò ní, nìí, ɔ gboò-wùɖùɔ̀ se xwíníín ɖò kɔ̃̀. Kɛɛ ɔ jǔ ké nyɔ ɖò dyi nyíí-ɖɛ̀ ɓɛ́ ɔ nìà ɓó sáa-kɔ̃-zàìn-gbààɔ̀ kɔ̃ɛɛ dyí gboò ní, nìí, ɔ ɓéɖé ɓɛ́ ɔ ké ɖɛ kɔ̃̀ jè ɔ gboòà kɛɛ nyu wɛ̃́ɛ́.’ 19Ɓě kpè dyéɖéín dyi jǎà wà! Ɖɛ́ mɔ̀ ɖɛ kpa ɖɛ mìɔ kɛ́? Nyíí-ɖɛ̀ɔ̀ mɔɔ sáa-kɔ̃-zàìn-gbàà ɓɛ́ ɔ nyuà ɓɛ́ nyíí-ɖɛ̀ɔ̀ dyià wáká kpá ɓó Gèɖèpɔ́ɔ̀ bìì kɛɛ̀? 20Ɔ jèɛɛ, ɔ jǔ ké nyɔ ɖò dyi sáa-kɔ̃-zàìn-gbààɔ̀ dyí gboò ní, nìí, ɔ gboò sáa-kɔ̃-zàìn-gbààɔ̀ kè nyíí-ɖɛ̀ séín nìà ɓóɛ kɔ̃ɛɛ dyí. 21Ké ɔ jǔ ké nyɔ ɖò dyi Gèɖèpɔ́ɔ̀ gbǒɔ̀ dyí gboò ní, nìí, ɔ gboò Gèɖèpɔ́ɔ̀ gbǒɔ̀ kè Gèɖèpɔ́ɔ̀ mɔ̀ nyɔ ɓɛ́ ɔ cĩ́à ɖé gbǒɔ̀ múɛɛ dyí. 22Ké ɔ jǔ ké nyɔ ɖò dyi dyɔún dyí gboò ní, nìí, ɔ gboò Gèɖèpɔ́ɔ̀ zèèɔ̀ dè-naín kè Gèɖèpɔ́ɔ̀ ɓɛ́ ɔ dèɖěà dya ɖé ɔ zèèɔ̀ kɔ̃ɛɛ dyí.
23“Ɓě mɔ̀à Gèɖèpɔ́ɔ̀-cèè-ɖɛ̀ dyuò-nyɔ̀ ɓě kè Fáɖòsíì-nyɔ̀ ɓěɛɛ, gboò-wùɖù nì ɓě mɔ̀à dyéɖéi-nyu-nyɔ̀ ɓěɛɛ kɔ̃. Ɓě nyí Gèɖèpɔ́ɔ̀ ɓěɛ̀ cɔ́ɔ́-zɔ̃̌ìn-ɖɛ̀ ɓě mɔ̀à vàǎ-dù kò-kò ɓěɔ̀ kɛɛ ɓàɖàìn-bùè, kɛɛ ɓě wã̀ìn gmaɔ̀ nyɔ kpa ɖɛ ɓě dyéɖé kɔ̃in. Ɔ mɔ̀ gma ɓě cɛ̃à ɓɛ́ ɓě kéà ɓě mǔè ɖò jǎà-ɖɛ̀ bũ̌ nyu, ɓɛ́ ɓě kéà ɔ wìǐn dyé, ɓɛ́ ɔ kéà ɓě hwòɖǒ kɔ̃ dèɛ̀ ɓɛ́ìn nyɛ. Gma ɓě nìà kɛ kè gma tɔ̀ɔ̀ ɓěɔ̀, ɖéɛ̀ ɓě ɓéɖé ɓě kéɔ́ dyi kpɔ̃. 24Ɓě mɔ̀ nyɔǔn hwìè-da-zàìn-nyɔ̀ kpè dyéɖéín dyi ɓě. Ɓě nì kà nyɔ ɓě kéɔ́ kà waà náá-ɖɛ̀ ɓěɔ̀ ɖe, ɓɛ́ wa ní kɔ̃̀ ɖà pùdɛ̃ mana, kɛɛ wa mana sǒ-nì-gbu-kɔ̃ún wɛ̃.
25“Ɓě mɔ̀à Gèɖèpɔ́ɔ̀-cèè-ɖɛ̀ dyuò-nyɔ̀ ɓě kè Fáɖòsíì-nyɔ̀ ɓěɛɛ, gboò-wùɖù nì ɓě mɔ̀à dyéɖéi-nyu-nyɔ̀ ɓěɛɛ kɔ̃. Ɓě wɔɔ̀ kópòɔ̀ kè péɖétèɔ̀ kɔ̃ún dyi, kɛɛ ɓě dyíìn wa ɖii-ɖɛ̀ kè náá-ɖɛ̀ ɓě ɓɛ́ ɓě zàìn nyɔǔn gana xwa dyììn ɖé ɓě mìɔùn jè kàmà-kàmà múɛɛ múin. 26Ɓě mɔ̀à Fáɖòsíì-nyɔ̀ ɓěɛɛ, ɓě kpè dyéɖéín dyi. Ɓě mɛ wɔɔ̀ ɖɛ nìà kópòɔ̀ xwíníín nyɛɛ ɖé dyi kĩ́ín, nìí, ɔ kɔ̃únɔ̀ mu mú hwɛ̀ìn ɖekè.
27“Ɓě mɔ̀à Gèɖèpɔ́ɔ̀-cèè-ɖɛ̀ dyuò-nyɔ̀ ɓě kè Fáɖòsíì-nyɔ̀ ɓěɛɛ, gboò-wùɖù nì ɓě mɔ̀à dyéɖéi-nyu-nyɔ̀ ɓěɛɛ kɔ̃. Ɓě nì kà xwɛ́-gmàà ɓɛ́ wa poà tɛnɛɛ́-pɛ̀ɛ̀ bũ̌in nyɛɛ nìà kɛ. Nyɔ dyi wa kɔ̃in gmɔìn ní, nìí, wa nɔ̀mɔ̀ kɔ̃in, kɛɛ nyɔǔn-kpà kè ɖɛ zɔ̃̀ ɓě dyí ɖé wa xwíníín. 28Kà dyúáɖòɔ̀ kǎà nyɔǔn ɓě dyi ɓě dya gmɔ̀ ní, nìí, ɓě hwɔ dyí-sɛ́ɖɛ́ìn-nyɔ̀ ɓě, kɛɛ dyéɖéi-nyu-nyu kè ɖɛ gbà dyí ɖé ɓěɛ̀ hwòɖǒ-dyùàɔ̀ mú.
Jízɛ̀ cɛ̃ gǎ Gèɖèpɔ́ɔ̀ mu Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ kè Fáɖòsíì-nyɔ̀ ɓěɔ̀ kɔ̃ tòùn wɛ̃ɛ jè
(Ɖúù 11:47-51)
29“Ɓě mɔ̀à Gèɖèpɔ́ɔ̀-cèè-ɖɛ̀ dyuò-nyɔ̀ ɓě kè Fáɖòsíì-nyɔ̀ ɓěɛɛ, gboò-wùɖù nì ɓě mɔ̀à dyéɖéi-nyu-nyɔ̀ ɓěɛɛ kɔ̃. Ɓě nɔ̀mɔ̀ìn kpáá-ɖɛ̀-cɛ̃-nyɔ̀ ɓěɔ̀ xwɛ́-gmàà ɓěɔ̀ xwa, ké ɓě bɛ̃̀ìn dyí-sɛ́ɖɛ́ìn-nyɔ̀ ɓěɔ̀ xwɛ́-gmàà ɓěɔ̀. 30Ké ɓě ɖá, ‘À dyi zɔ̃̌ɔ̀ cĩ́ɛń nì ɖé à ɓǎ nììn ɓǎ ɓěɔ̀ tiín ní, nìí, à seɔ́ má wa hwìɛ̀ kpáa mu, ɓɛ́ à kéɔ́ kpáá-ɖɛ̀-cɛ̃-nyɔ̀ ɓěɔ̀ ɖáɓá.’ 31Ɖɛ ɓě ɓɛ́ ɓě cɛ̃à kɛɛ tɛ̀mɛ̀ìn nyɔǔn dyí kà ɓɛ́ ɓě mɔ̀ nyɔ ɓě ɖáɓá ma kà kpáá-ɖɛ̀-cɛ̃-nyɔ̀ ɓěɔ̀ kɛɛ dyú ɓě kɛ. 32Ɓě mu dyúa, ɓɛ́ ɓě ké ɖɛ ɓě ɓǎ nììn ɓǎ ɓěɔ̀ dè ma kà gbɔɛɛ mánáín hwɔ. 33Ɓě mɔ̀ sɛ kè sɛɛ̀ dyú ɓěɛɛ, xwɛ̌ ɓě ɓɛ́ìn zaa ɓɛ́ ɔ kpɔ̃à ɓě ɓɛ́ ɓě kéà hɛ́ɛ̀ muɛɛ xwaún póɛ kɛ́? 34Ɔ jèɛɛ, ḿ cɛ̃ɛ ɓě gbo, ní mu kpáá-ɖɛ̀-cɛ̃-nyɔ̀ ɓě kè hwòɖǒ-fɔ̀nɔ̀-nyɔ̀ ɓě ɔ kè Gèɖèpɔ́ɔ̀-cèè-ɖɛ̀ dyuò-nyɔ̀ ɓě ɓě gbo ɖoɓoùn. Ɓě mu wa ɖíɛ́ ɓě ɖáɓáùn, ké ɓě mu ɖíɛ́ ɓě kɔ́ɖɔ́sì ɓě kɔ̃in kɔ̀ìn. Ké ɓě mu ɖíɛ́ ɓě gbàtò ɓàɖàìn ɖé ɓěɛ̀ cɔ́cì-gbò ɓěɔ̀ mú, ké ɓě mu wa kúmúɛ kpaùn ɖé hwɔɖɔ ɓěɔ̀ mú. 35Ké ɔ muɛ nyuùn ké ɓě mu nyɔ séín ɓě ɓɛ́ wa se ma ɖɛ gbà ɖò nyu, ké nyɔǔn ɖáɓá ma kà wa kɛɛ nyɔmɔɔ wáɖáìn ma kà dyi kɛɛ kpa dyí ɖúùn. Ɔ mɔ̀ sɔ̀ìn ɖé Éɓò ɓɛ́ ɔ mɔ̀ zɔ̃̌ɔ̀ kà dyí-sɛ́ɖɛ́ìn-nyɔ̀ kɛɛ nììn nyɔmɔɔ wáɖáìn zɔ̃̌ɔ̀ kà dyiɛɛ gbo, ɓɛ́ ɔ ké Zɛ́kɔ̀wáɖádyà mɔ̀à Bɛ̀wéɖékìàà dyú-gààɔ̀ kɛɛ nììnɔ̀ gbo dyiɛ. Ɔ mɔ̀ nyɔ ɓɛ́ ɓě ɖáɓáìn zɔ̃̌ɔ̀ kà ɖé Gèɖèpɔ́ɔ̀ gbǒɔ̀ kè sáa-kɔ̃-zàìn-gbààɔ̀ pṹa kɛ. 36Ḿ cɛ̃ ɓě jǎà gbo, ɖɛ séín ɓě kpá zɔ̃̌ɔ̀ kà kɛɛ, ɓě mɔ̀ nyɔ ɓě nìà kàǔn wɛ̃ɛ mu wa kpa dyí ɖúùn.
Jízɛ̀ ɖɛ̀ɓɛ̀ Jùɖúsɛ̀ɖɛ̀ìn-hwɔ̀ɖɔ̀ɔ̀ mú
(Ɖúù 13:34-35)
37“Éé Jùɖúsɛ̀ɖɛ̀ìn-nyɔ̀ ɓě, Jùɖúsɛ̀ɖɛ̀ìn-nyɔ̀ ɓě! Ɓě mɔ̀ nyɔ ɖáɓáà kpáá-ɖɛ̀-cɛ̃-nyɔ̀ ɓěɔ̀, ké ɓě taɓaìn kíá ɓě ɓɛ́ Gèɖèpɔ́ɔ̀ ɖoɓo ma ɓě gboɛɛ sɔ́ɔ́-kpò dyi. Ti pàɖǎ múɛɛ, ní mɔ́ ɓɛ́ ḿ ké ma ɓě dyí poìn kà dyú-ɖɛ̌-sòò nyuà ɔ dyú ɓěɔ̀ dyí poɛ̀n ɖé ɔ pìɔ̌-kpàɔ̀ xwíɖíiɛ, kɛɛ ɓě se wɔ̃́ ɓɛ́ ḿ ké ma ɓě dyí poìn. 38Gmɔ̀ nɔ̄, Gèɖèpɔ́ɔ̀ mu ɔ gbǒ mɔ̀à ɓěɛ̀ ɓièìn-naínɔ̀ kɛɛ dyi táàùn, ké ɔ mu wáɖáùn. 39Ḿ cɛ̃ɛ ɓě gbo, sɔ̀ìn dà ɓó ké dyúa muɛɛ, ɓě se ḿ dyéɛ mu ɖe, ɔ sèìn ké ɓě cɛ̃ɛ, ké ɓě ɖǎ, ‘Mana mɛ nì nyɔ ɓɛ́ ɔ dyi kà ɖé Bounɓoɔ̀ nyɛ́nɛ́ɔ̀ múɛɛ kɔ̃o’ hwɛ̀.”
Currently Selected:
:
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.