Máfíò 24
24
Jízɛ̀ cɛ̃ Gèɖèpɔ́ɔ̀-gbòɔ̀ wáɖá jè
(Máà 13:1-2; Ɖúù 21:5-6)
1Ti ɓɛ́ Jízɛ̀ nì ma ɖé Gèɖèpɔ́ɔ̀ gbǒɔ̀ mú sɔ̀ǔn wɛ̃ɛ, ɔ ɖeín-nà-nyɔ̀ ɓěɔ̀ mu ma ɔ gbo, ɓɛ́ wa ké ma ɔ poo-ɖɛ̀ ɓě ɓɛ́ wa ɓá ma Gèɖèpɔ́ɔ̀ gbǒɔ̀ dyíɛɛ dyí tɛ̀mɛ̀ìn. 2Ké Jízɛ̀ cɛ̃ɛ ma wa gbo, ké ɔ ɖá, “Ɓě dyé ɖɛ séín ɓě nìà kɛ níì? Ḿ cɛ̃ ɓě jǎà gbo, sɔ́ɔ́-kpò ɓě nìà kɛ ɖò se ɔ mǔè ɖò kɔ̃ sèɛ̌ mu. Wa mu wa wáɖáùn séín nyɛ̀nɛ̀ɛ̀.”
Fũ̀à-fṹá-tì kè nyɔ-gǎ-dyéìn-dyéìn ɓě nì ɖé dyúa kɛɛ jè
(Máà 13:3-13; Ɖúù 21:7-19)
3Sɔ̀ìn ɓóɛ gboɛɛ, Jízɛ̀ dèɖě ma dya ɖé Ɔ́ɖè-tòɖòɔ̀ dya, ké ɔ ɖeín-nà-nyɔ̀ ɓěɔ̀ mu ma ɔ gbo nyàà, ké wa ɖá, “Cɛ̃ɛ à gbo, tiɔ̀ nyɛ́ ɖɛ ɓě nìà kɛ mu ná kpáùn wɛ̃́? Ɖɛ́ mɔ̀ dyí-tɛ̀mɛ̀ìn-ɖɛ̀ ɓě, ɓɛ́ wa kéɛ à dyí tɛ̀mɛ̀ìn kà ɔ mɔ̀ǎ nì ɖe-dyi-tì kè ɓóɖó-kpàà mánáín-hwɛ̀-tìǐn nyɛ́?”
4Ké Jízɛ̀ cɛ̃ɛ ma wa gbo, ké ɔ ɖá, “Ɓě mɛ ma mú, ɓɛ́ nyɔ ɖò ní kɔ̃̀ ɖà ɓě cá. 5Sepóɛɖé nyɔ pàɖǎ mu dyiìn, ɓɛ́ wa kéɛ cɛ̃ kà wa mɔ̀ Kɛ́ɖɛ́ìɔ̀ kɛ, ké wa mu nyɔ pàɖǎ cáùn. 6Ɓě mu to ɓě xwɛ̃́ìn dyiɛ kè ɖíɛ́ ɓě tɔ̀mɔ̀ gboɛɛ bɔ̃̌ wɔ̃́ùn, kɛɛ ɓě ní ɖá ɓɛ́ ɓě ké fɛ̃̀ìn. Ɖɛ ɓěɛ̀ ɓéɖé wa ké kpá, kɛɛ ɔ séè ɖɛ séín mánáín-hwɛ̀ìn-naín ke. 7Ɓóɖó-dù ɓě mu gbo vɔ̃ǐn nììn, ké kã́á-ɓòɖò ɓě mu gbo vɔ̃ǐn nììn. Mɔ́ mu kpáùn, ké ɓóɖó-kpàà dà kò-kò ɓě mu dyi túòùn. 8Ɖɛ séín ɓě nìà kɛ mɔ̀ gǎ-dyé-dyé ɓěɔ̀ gbɔ-dè-dè.
9“Ɓó tia ɓaɖaa, wa mu ɓě kpɔ̃ùn, ɓɛ́ wa ké ɓě nyɔǔn ɓě xwaún dyi po, ɓɛ́ wa ké ɓě gǎ dyéìn, ɓɛ́ wa ké ɓě ɖáɓá. Ké ɓóɖó-dù séín mu ɓě mú nyɛ́ìn ɓó ní jè. 10Ɔ ɖǎ ná nìǐn, nyɔ ɓáún-ɓáún mu ní ɖeín-nà-nyɔ̀ jǔɛ ɓɔ́ùn. Wa mu wa mǔè ɓě nyɔǔn ɓě xwaún dyi poùn, ké wa mu mú nyɛ́ìn nyɛ̀ìn. 11Ké nyɔ ɓě ɓɛ́ wa ɖáìn wa mìɔùn kpáá-ɖɛ̀-cɛ̃-nyɔ̀ ɓě, ké wa seà ɔ mɔ̀ kɛɛ mu dyiìn, ké wa mu nyɔ ɓáún-ɓáún cáùn. 12Ké ɖɛ-gbà-nyu-nyu mu dyí vòùn mìɔ jèɛɛ, ɔ muɛ nyuùn ɓɛ́ nyɔǔn ɓáún-ɓáún ké se ɖɛ̀ɓɛ̀ǐn-ɖɛ̀ɓɛ̀ǐn ɖò ɓéɖé. 13Kɛɛ nyɔ mɔ̀ nyɔ mu hwòɖǒ kuùn tee ɓɛ́ ɔ fɛ̀ɛ̀ ké mánáín hwɛ̀ kɛɛ, ɔ mu póùn. 14Ké wa mu bɔ̃̌ nɔ̀mɔ̀ dyíin ɓá Gèɖèpɔ́ɔ̀ kã́á-ɓòɖòɔ̀ jè dyíɛɛ zio mú pòìn ɖé ɓóɖó-kpàà dà séín, ɓɛ́ ɔ ké zàse jǔ ɖé ɓóɖó-dù séín hwìɛ̀, hwɛ̀ ɓɛ́ ɖɛ séín ké mánáín hwɛ̀.
Gǎ-dyé-dyé vɛ̀nɛ̀ nì dyiɛń nyɛ
(Máà 13:14-23; Ɖúù 21:20-24)
15“Ɓě mu ɖɛ kɔ̃̀ jè kpáá-ɖɛ̀-cɛ̃-nyɔ̀ Dànyá cɛ̃ zɔ̃̌ɔ̀ kɛɛ dyéìn. Ɔ mɔ̀ Gèɖèpɔ́ɔ̀ gmaɔ̀ ɖuà-ɖɛ̀ ɓɛ́ ɔ dyàà ɖɛ nyàìn nyɔǔn dyiɛ. Ɔ mu ɖé pá hwɛ̀ǐn-hwɛ̀ǐnɔ̀ mú dyi nyànàùn. (Nyɔ mɔ̀ nyɔ zà céè-ɖɛ̀ nìà kɛ wuɖuún wɛ̃ɛ, ɔ mɛ wɔ̃́ɔ múin.) 16Ti ɓě mu ɖɛ nìà kɛ kpáa dyéìn nyɛɛ, nìí, nyɔ ɓě nì ɖé Júɖìà-ɓòɖòɔ̀ kɔ̃ kɛɛ mɛ gbǔ, ɓɛ́ wa ké ɖé toɖo ɓěɔ̀ dya mu. 17Nyɔ mɔ̀ nyɔ nì ɖé ɔ gbǒɔ̀ dúún wɛ̃ɛ ní ɖá ɔ ké ɖɛ ɖò ɖé ɔ gbǒɔ̀ mú zà. 18Ké nyɔ mɔ̀ nyɔ nì ɖé ɔ ɓíɖí-geɖeín nyɛɛ, ɔ ní ɖá ɓɛ́ ɔ ké ɔ ɓíɖí-taún ɖe kɔ́ìn, ɓɛ́ ɔ ké ɔ ɖɔ dyí ɖú. 19Màa ɓě nì zùù kɔ̃ɛ kè nyɔ ɓě nì dyú nyáǐn ɓó tia ɓaɖaa, ééɓàa, wa jè mu wìì-ɖɛ̀ jǔùn. 20Ɓě mɛ ɓaà Gèɖèpɔ́ɔ̀, ɓɛ́ ɓěɛ̀ gbǔ-tìɔ̀ ní kɔ̃̀ ɖà sɔ̃̀ɔ̀-tì mɔɔ ɓó Gèɖèpɔ́ɔ̀ fɔ̀-wèɔ̀ xwíníín jǔ. 21Ɓó tia ɓaɖaa, nyɔǔn-dyù mu gǎ dyéɛń ziìn, ɓɛ́ ɔ ké kà wa nyu ma gǎ dyéɛ sɔ̀ìn ɖé ɓóɖó-kpàà gbɔ-dè-tìǐn, ké kàà-ɖɛ̀ǐn gbo dyiɛɛ dyí zi, ké wa se kǎa gǎ dyéɛ mu ɖe. 22Gèɖèpɔ́ɔ̀ seɔ́ má wé ɓěa ɓoún xwã́ìn ní, nìí, nyɔ ɖò seɔ́ má toɖo-kpàà kɔ̃ sèɛ̌ mu. Kɛɛ Gèɖèpɔ́ɔ̀ mu wé ɓěa ɓoún xwã́ìn ɓó nyɔ ɓě ɓɛ́ ɔ ɖǎà gã kɛɛ jè.
23“Ɓó tia ɓaɖaa, nyɔ ɖò dyiɛ ɓě gbo cɛ̃, ké ɔ dyi níiń, ‘Gmɔ̀ nɔ̄, kà Kɛ́ɖɛ́ìɔ̀ nì kɛ,’ mɔɔ ‘Kà ɔ nì ɖéɛ’ ní, nìí, ɓě ní po nyɔɔ̀ wuɖuɔ̀ jǎà. 24Sepóɛɖé nyɔ ɓě mu dyiìn, ɓɛ́ wa ké wa mìɔùn Kɛ́ɖɛ́ì ɖáìn, ké ɖíɛ́ ɓě mu wa mìɔùn kpáá-ɖɛ̀-cɛ̃-nyɔ̀ ɖáìn. Wa mu ɖàɓàìn-ɖɛ̀ kpa ɖɛ ɓě kè dĩ́ín-dĩ̀ìn-ɖɛ̀ ɓě nyuùn, ɓɛ́ ɔ dyi xwa fɛ̃́ìn ní, ɓɛ́ wa ké nyɔ ɓě ɓɛ́ Gèɖèpɔ́ɔ̀ ɖǎà gã kɛɛ cá. 25Gmɔ̀ nɔ̄, ḿ nì ɓě náún poɛń nɔ̀ɔ̀, hwɛ̀ ɓɛ́ ɖɛ ɓěɛ̀ ké kpá.
26“Ɔ jèɛɛ, nyɔ ɖò dyiɛ ɓě gbo cɛ̃, ké ɔ dyi níiń, ‘Gmɔ̀ nɔ̄, Kɛ́ɖɛ́ìɔ̀ nì ɖé gbǎùn-fúɖúáɔ̀ kɔ̃’ ní, nìí, ɓěǐn mu ɖé. Ké ɔ dyiɛ cɛ̃, ké ɔ dyi níiń, ‘Gmɔ̀ nɔ̄, ɔ nì ɖé gbǒɔ̀ gbɔo’ ní, nìí, ɓěǐn poɛ jǎà. 27Mɔ̄ Nyɔǔn-dyùɛ̀ Dyú-gààɔ̀ dyi dyiɛń nìǐn, ɔ mu nììn kà wɛ́ɖɛ́-wɛ́ɖɛ́ poà, ké ce fã̀ìn dyɔɔ̀ gànáɔ̀ dyíin, sɔ̀ìn ɖé dyóɖó-xwáɖáún-wóɖóìn-naínɔ̀, ɓɛ́ ɔ kéà ɖé dyóɖó-dyi-kpáìn-naínɔ̀ muɛ.
28“Dɛ̀ kã̀ìn séín ɓɛ́ xwɛ́ nì kɛɛ, ɖéɛ̀ hwĩ́ín-hwã ɓěɔ̀ poìn dyí. Kà dyúáɖòɔ̀ kǎà dyí-tɛ̀mɛ̀ìn-ɖɛ̀ ɓěɛ̀ cɛ̃ ɓóɖó-kpàà mánáín hwɛ̀ jè.
Nyɔǔn-dyùɛ̀ Dyú-gààɔ̀ dyi jè
(Máà 13:24-27; Ɖúù 21:25-28)
29“Nyɔǔn-gǎ-dyéìn-dyéìn ɓě ɓɛ́ wa muà nììn ɓó wé ɓěa ɓaɖaa ɖǎ dyi zi nyɛ̀nɛ̀ɛ̀ ní, nìí, dyóɖóɔ̀ mu tíe-kpò mú zɛ̃̀ìn, ké dɛ̀nɛ̀ɔ̀ se fãá mu, ké dɛ̀nɛ̀ mɛ́nɛ́ɛ́ ɓěɔ̀ mu dyií ɓuɖuùn, ɓɛ́ wa ké dyi kpáuń nì. Ké ɖɛ séín nì ɖé dyɔɔ̀ dyíɛɛ mu dyi túòùn. 30Ké dyí-tɛ̀mɛ̀ìn-ɖɛ̀ ɓá mɔ̄ Nyɔǔn-dyùɛ̀ Dyú-gààɔ̀ jè dyíɛɛ mu xwáɖáún wóɖóùn ɖé dyɔɔ̀ dyí. Nìí, xwéɖé-dù séín ɓě nì ɓóɖó-kpàà kɔ̃ɛɛ mu kpé poùn. Ti wa mu mɔ̄ Nyɔǔn-dyùɛ̀ Dyú-gààɔ̀ dyéìn nyɛɛ, ní mu ɖé dyɔún sɔ̀ùn, ké ní mu ní-kpò ɖò mú dyììn ɖé kpé kè dĩ́ín-dĩ̀ìn vɛ̀nɛ̀ mú. 31Wa mu gã̀à ɖò ɓaɖaùn gana-kà, ké ní mu ní ínjà ɓěɔ̀ ɖé ɓóɖó-kpàà gã hĩinyɛ ɓěɔ̀ kɔ̃in toìn, ké wa mu nyɔ ɓě ɓɛ́ ḿ ɖǎà gã kɛɛ dyí poìn sɔ̀ìn ɖé ɓóɖó-kpàà wáká ɖò kɔ̃, ké ɖéɛ wáká tɔ̀ɔ̀ kɔ̃ muɛ.
Tɛ̀mɛ̀ìn-ɖɛ̀ ɓá féè-cù jè dyíɛ
(Máà 13:28-31; Ɖúù 21:29-33)
32“Féè-cùɔ̀ mɛ tɛ̀mɛ̀ìn ɓě ɖɛ. Ɓě dyiɛ dyé, ké ɔ ɖɔ́ ɓěɔ̀ dyiá dɔ̀ɔ̀-dɔ̀ɔ̀ nì, ké ɔ dyi mí poɛń nìǐn, nìí, ɓě mɛ dyuòɛ̀ kà ní-tì nìǎ dyi xwɛ̃́ǐn nyɛ. 33Kà dyúáɖòɔ̀ kǎà ɓě dyi ɖɛ séín ɓě nìà kɛ dyéɛń nìǐn, ɓě mɛ dyuòɛ̀ dyí kà mánáín-hwɛ̀-tìɔ̀ nìǎ dyi xwɛ̃́ǐn nyɛ, ké kà ɔ nìǎ ɓě ɓo kɔ̃ dyáuń wɛ̃. 34Ḿ cɛ̃ ɓě jǎà gbo, nyɔ ɓě nìà kàǔn wɛ̃ɛ, wa se mɛ́ɛ hwɛ̀ɛ̌ mu, ké ɖɛ séín ɓěɛ̀ kpá hwɛ̀. 35Dyɔɔ̀ kè ɓóɖó-kpàà mu dyi ziìn, kɛɛ ní wuɖu ɓěɔ̀ se dyi ziɛ́ mu.
Nyɔ ɖò se ɖɛ séín mánáín-hwɛ̀-tìɔ̀ dyuò
(Máà 13:32-37; Ɖúù 17:26-30, 34-36)
36“Ɓá ti ɓɛ́ ɖɛ ɓě nìà kɛ mu kpáùn wɛ̃ɛ jè dyíɛɛ, nyɔ ɖò seɛ dyuò. Ínjà ɓě nì ɖé dyɔún wɛ̃ kè mɔ̄ mɔ̀à Dyú-gààɔ̀ kɛɛ seɛ dyí dyuò. Ɓǎɔ̀ ɖòùn mɔ̀ nyɔ dyuòɛ̀ dyí. 37Mɔ̄ Nyɔǔn-dyùɛ̀ Dyú-gààɔ̀ dyi-dyiɔ̀ mu nììn kà ɔ nyu ma kà nìɛ̀ ɖé Nóà nììn tiín nyɛ. 38Hwɛ̀ ɓɛ́ ní-tòɔ̀ ké ma dyiɛɛ, nyɔǔn ɓě nì ma ɖɛ ɖiɛń, ké wa nì ma náuń, ké gàa kè màa nì ma dyi kpɔ̃ǐn, ké ɔ dyɛ̀ìn ma wé jɛ́ɛ́ kɔ̃̀ xwíníín ɓɛ́ Nóà dyá ma kà méèɔ̀ múɛɛ hwɛ̀. 39Ké wa se ɖɛ nì ma kà kpáuń wɛ̃ɛ dyuò. Ní-tòɔ̀ dyi ma, ké ɔ zĩ̀ìn ma wa séín, hwɛ̀ ké wa dyuòɛ̀ ma. Mɔ̄ Nyɔǔn-dyùɛ̀ Dyú-gààɔ̀ dyi dyiɛń nìǐn, nìí, kǎà ɔ mu nììn. 40Gàa sɔ̃́ mu ɖé geɖeín nììn. Dyúáɖò mu ɓó sɔ̀ùn, ké dyúáɖò mu ɓó sèìn. 41Màa sɔ̃́ mu ɖɛ ɖuɛń nììn ɓó dòò gbɔ. Dyúáɖò mu ɓó sɔ̀ùn, ké dyúáɖò mu ɓó sèìn.
42“Ɔ jèɛɛ, ɓě mɛ nì ɓɛ́ɖɛ́ kɔ̃, sepóɛɖé ɓě se dyuò wé kɔ̃̀ mú ɓɛ́ mɔ̄ mɔ̀à ɓěɛ̀ Bounɓoɔ̀ kɛɛ mu dyiìn nyɛ. 43Ɖɛ nìà kɛ mɛ nì ɓě hwìɖǐi. Gbǒ-kɔ̃̀-nyɔ̀ɔ̀ dyiɔ́ ti ɓɛ́ dyíɖíí-nyɔ̀ muɔ́ dyiìn nyɛɛ dyuò ní, nìí, ɔ seɔ́ mɔ́ɔ mu, ké ɔ seɔ́ wɔ̃́ɔ mu ɓɛ́ dyíɖíí-nyɔ̀ɔ̀ kéɔ́ ɔ gbǒɔ̀ wa. 44Ɔ jèɛɛ, ɓě mɔ̀ùn mɛ nì ɓɛ́ɖɛ́ kɔ̃, sepóɛɖé mɔ̄ Nyɔǔn-dyùɛ̀ Dyú-gààɔ̀ mu dyiìn ti ɓɛ́ ɓě se ní jè hwìɖǐi dèɛ̌ muɛ.
Gbo-nì-nyɔ̀ ɓɛ́ nyɔ ɓɛ́ìn hwòɖǒ kɔ̃ dèɛ̀ kɛ kè gbo-nì-nyɔ̀ ɓɛ́ nyɔ se hwòɖǒ kɔ̃ dèɛ̀ ɓɛ́ìn nyɛ
(Ɖúù 12:41-48)
45“Nyɛ́ mɔ̀ gbo-nì-nyɔ̀ ɓɛ́ ɔ fɔ̀nɔ̀ hwòɖǒ, ké nyɔ ɓɛ́ìn ɔ hwòɖǒ kɔ̃ dèɛ̀ kɛ́? Ɔ mɔ̀ nyɔ ɓɛ́ ɔ gbo-nì-ɓǎɔ̀ sè gbo-nì-nyɔ̀ ɓě nì ɖé ɔ ɓíɖí-gbǒ-xwíníín nyɛɛ gboɛ, ɓɛ́ ɔ ké wa ɖii-ɖɛ̀ nyí ɓó ti wa ɓéɖé ɓɛ́ wa kéɛ dyéìn nyɛ. 46Gbo-nì-nyɔ̀ nìà kɛɛ, ɔ gbo-nì-ɓǎɔ̀ dyi dyi, ké ɔ dyi ɔ ɖɛ nìà kɛ nyuɛ dyi dyɛ̀ìn ní, mana nì ɔ kɔ̃. 47Ḿ cɛ̃ ɓě jǎà gbo, gbo-nì-ɓǎɔ̀ mu ɔ ɖɛ séín ɓěɔ̀ gbo-nì-nyɔ̀ɔ̀ xwaún dyi poùn. 48Kɛɛ ɔ jǔ ké ɔ dyi gbo-nì-nyɔ̀ kɔ̃̀ kpeɖe nyìnììn dyíin nyɛɛ jǔ ní, nìí, ɔ muɛ ɔ mìɔùn gbo cɛ̃ìn, ɓɛ́ ɔ ké níiń, ‘Ní gbo-nì-ɓǎɔ̀ se dyiɛ́ mu ɓó kàǔn.’ 49Ɔ mu ɔ mǔè gbo-nì-nyɔ̀ ɓěɔ̀ ɓaɖa kpàǐ ɖúùn, ké ɔ kè nɔmɔɔ-ná-nyɔ̀ ɓě mu ɖɛ ɖiìn, ké wa mu náùn. 50Nìí, ɔ gbo-nì-ɓǎɔ̀ mu dyiìn ɓó wé kɔ̃̀ xwíníín ɓɛ́ ɔ seà ɔ gbo-nì-ɓǎɔ̀ jè hwìɖǐi dèɛ̌ muɛ. 51Ké ɔ gbo-nì-ɓǎɔ̀ mu ɔ gǎ kɔ̃ tòùn, ké ɔ mu ɔ nììn pá ɖé dyéɖéi-nyu-nyɔ̀ ɓěɔ̀ hwìɛ̀ nyuùn. Ɖéɛ̀ ɔ mu kpé poùn, ké ɔ mu nyɛ́nɛ́ tàùn.
Currently Selected:
Máfíò 24: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
Máfíò 24
24
Jízɛ̀ cɛ̃ Gèɖèpɔ́ɔ̀-gbòɔ̀ wáɖá jè
(Máà 13:1-2; Ɖúù 21:5-6)
1Ti ɓɛ́ Jízɛ̀ nì ma ɖé Gèɖèpɔ́ɔ̀ gbǒɔ̀ mú sɔ̀ǔn wɛ̃ɛ, ɔ ɖeín-nà-nyɔ̀ ɓěɔ̀ mu ma ɔ gbo, ɓɛ́ wa ké ma ɔ poo-ɖɛ̀ ɓě ɓɛ́ wa ɓá ma Gèɖèpɔ́ɔ̀ gbǒɔ̀ dyíɛɛ dyí tɛ̀mɛ̀ìn. 2Ké Jízɛ̀ cɛ̃ɛ ma wa gbo, ké ɔ ɖá, “Ɓě dyé ɖɛ séín ɓě nìà kɛ níì? Ḿ cɛ̃ ɓě jǎà gbo, sɔ́ɔ́-kpò ɓě nìà kɛ ɖò se ɔ mǔè ɖò kɔ̃ sèɛ̌ mu. Wa mu wa wáɖáùn séín nyɛ̀nɛ̀ɛ̀.”
Fũ̀à-fṹá-tì kè nyɔ-gǎ-dyéìn-dyéìn ɓě nì ɖé dyúa kɛɛ jè
(Máà 13:3-13; Ɖúù 21:7-19)
3Sɔ̀ìn ɓóɛ gboɛɛ, Jízɛ̀ dèɖě ma dya ɖé Ɔ́ɖè-tòɖòɔ̀ dya, ké ɔ ɖeín-nà-nyɔ̀ ɓěɔ̀ mu ma ɔ gbo nyàà, ké wa ɖá, “Cɛ̃ɛ à gbo, tiɔ̀ nyɛ́ ɖɛ ɓě nìà kɛ mu ná kpáùn wɛ̃́? Ɖɛ́ mɔ̀ dyí-tɛ̀mɛ̀ìn-ɖɛ̀ ɓě, ɓɛ́ wa kéɛ à dyí tɛ̀mɛ̀ìn kà ɔ mɔ̀ǎ nì ɖe-dyi-tì kè ɓóɖó-kpàà mánáín-hwɛ̀-tìǐn nyɛ́?”
4Ké Jízɛ̀ cɛ̃ɛ ma wa gbo, ké ɔ ɖá, “Ɓě mɛ ma mú, ɓɛ́ nyɔ ɖò ní kɔ̃̀ ɖà ɓě cá. 5Sepóɛɖé nyɔ pàɖǎ mu dyiìn, ɓɛ́ wa kéɛ cɛ̃ kà wa mɔ̀ Kɛ́ɖɛ́ìɔ̀ kɛ, ké wa mu nyɔ pàɖǎ cáùn. 6Ɓě mu to ɓě xwɛ̃́ìn dyiɛ kè ɖíɛ́ ɓě tɔ̀mɔ̀ gboɛɛ bɔ̃̌ wɔ̃́ùn, kɛɛ ɓě ní ɖá ɓɛ́ ɓě ké fɛ̃̀ìn. Ɖɛ ɓěɛ̀ ɓéɖé wa ké kpá, kɛɛ ɔ séè ɖɛ séín mánáín-hwɛ̀ìn-naín ke. 7Ɓóɖó-dù ɓě mu gbo vɔ̃ǐn nììn, ké kã́á-ɓòɖò ɓě mu gbo vɔ̃ǐn nììn. Mɔ́ mu kpáùn, ké ɓóɖó-kpàà dà kò-kò ɓě mu dyi túòùn. 8Ɖɛ séín ɓě nìà kɛ mɔ̀ gǎ-dyé-dyé ɓěɔ̀ gbɔ-dè-dè.
9“Ɓó tia ɓaɖaa, wa mu ɓě kpɔ̃ùn, ɓɛ́ wa ké ɓě nyɔǔn ɓě xwaún dyi po, ɓɛ́ wa ké ɓě gǎ dyéìn, ɓɛ́ wa ké ɓě ɖáɓá. Ké ɓóɖó-dù séín mu ɓě mú nyɛ́ìn ɓó ní jè. 10Ɔ ɖǎ ná nìǐn, nyɔ ɓáún-ɓáún mu ní ɖeín-nà-nyɔ̀ jǔɛ ɓɔ́ùn. Wa mu wa mǔè ɓě nyɔǔn ɓě xwaún dyi poùn, ké wa mu mú nyɛ́ìn nyɛ̀ìn. 11Ké nyɔ ɓě ɓɛ́ wa ɖáìn wa mìɔùn kpáá-ɖɛ̀-cɛ̃-nyɔ̀ ɓě, ké wa seà ɔ mɔ̀ kɛɛ mu dyiìn, ké wa mu nyɔ ɓáún-ɓáún cáùn. 12Ké ɖɛ-gbà-nyu-nyu mu dyí vòùn mìɔ jèɛɛ, ɔ muɛ nyuùn ɓɛ́ nyɔǔn ɓáún-ɓáún ké se ɖɛ̀ɓɛ̀ǐn-ɖɛ̀ɓɛ̀ǐn ɖò ɓéɖé. 13Kɛɛ nyɔ mɔ̀ nyɔ mu hwòɖǒ kuùn tee ɓɛ́ ɔ fɛ̀ɛ̀ ké mánáín hwɛ̀ kɛɛ, ɔ mu póùn. 14Ké wa mu bɔ̃̌ nɔ̀mɔ̀ dyíin ɓá Gèɖèpɔ́ɔ̀ kã́á-ɓòɖòɔ̀ jè dyíɛɛ zio mú pòìn ɖé ɓóɖó-kpàà dà séín, ɓɛ́ ɔ ké zàse jǔ ɖé ɓóɖó-dù séín hwìɛ̀, hwɛ̀ ɓɛ́ ɖɛ séín ké mánáín hwɛ̀.
Gǎ-dyé-dyé vɛ̀nɛ̀ nì dyiɛń nyɛ
(Máà 13:14-23; Ɖúù 21:20-24)
15“Ɓě mu ɖɛ kɔ̃̀ jè kpáá-ɖɛ̀-cɛ̃-nyɔ̀ Dànyá cɛ̃ zɔ̃̌ɔ̀ kɛɛ dyéìn. Ɔ mɔ̀ Gèɖèpɔ́ɔ̀ gmaɔ̀ ɖuà-ɖɛ̀ ɓɛ́ ɔ dyàà ɖɛ nyàìn nyɔǔn dyiɛ. Ɔ mu ɖé pá hwɛ̀ǐn-hwɛ̀ǐnɔ̀ mú dyi nyànàùn. (Nyɔ mɔ̀ nyɔ zà céè-ɖɛ̀ nìà kɛ wuɖuún wɛ̃ɛ, ɔ mɛ wɔ̃́ɔ múin.) 16Ti ɓě mu ɖɛ nìà kɛ kpáa dyéìn nyɛɛ, nìí, nyɔ ɓě nì ɖé Júɖìà-ɓòɖòɔ̀ kɔ̃ kɛɛ mɛ gbǔ, ɓɛ́ wa ké ɖé toɖo ɓěɔ̀ dya mu. 17Nyɔ mɔ̀ nyɔ nì ɖé ɔ gbǒɔ̀ dúún wɛ̃ɛ ní ɖá ɔ ké ɖɛ ɖò ɖé ɔ gbǒɔ̀ mú zà. 18Ké nyɔ mɔ̀ nyɔ nì ɖé ɔ ɓíɖí-geɖeín nyɛɛ, ɔ ní ɖá ɓɛ́ ɔ ké ɔ ɓíɖí-taún ɖe kɔ́ìn, ɓɛ́ ɔ ké ɔ ɖɔ dyí ɖú. 19Màa ɓě nì zùù kɔ̃ɛ kè nyɔ ɓě nì dyú nyáǐn ɓó tia ɓaɖaa, ééɓàa, wa jè mu wìì-ɖɛ̀ jǔùn. 20Ɓě mɛ ɓaà Gèɖèpɔ́ɔ̀, ɓɛ́ ɓěɛ̀ gbǔ-tìɔ̀ ní kɔ̃̀ ɖà sɔ̃̀ɔ̀-tì mɔɔ ɓó Gèɖèpɔ́ɔ̀ fɔ̀-wèɔ̀ xwíníín jǔ. 21Ɓó tia ɓaɖaa, nyɔǔn-dyù mu gǎ dyéɛń ziìn, ɓɛ́ ɔ ké kà wa nyu ma gǎ dyéɛ sɔ̀ìn ɖé ɓóɖó-kpàà gbɔ-dè-tìǐn, ké kàà-ɖɛ̀ǐn gbo dyiɛɛ dyí zi, ké wa se kǎa gǎ dyéɛ mu ɖe. 22Gèɖèpɔ́ɔ̀ seɔ́ má wé ɓěa ɓoún xwã́ìn ní, nìí, nyɔ ɖò seɔ́ má toɖo-kpàà kɔ̃ sèɛ̌ mu. Kɛɛ Gèɖèpɔ́ɔ̀ mu wé ɓěa ɓoún xwã́ìn ɓó nyɔ ɓě ɓɛ́ ɔ ɖǎà gã kɛɛ jè.
23“Ɓó tia ɓaɖaa, nyɔ ɖò dyiɛ ɓě gbo cɛ̃, ké ɔ dyi níiń, ‘Gmɔ̀ nɔ̄, kà Kɛ́ɖɛ́ìɔ̀ nì kɛ,’ mɔɔ ‘Kà ɔ nì ɖéɛ’ ní, nìí, ɓě ní po nyɔɔ̀ wuɖuɔ̀ jǎà. 24Sepóɛɖé nyɔ ɓě mu dyiìn, ɓɛ́ wa ké wa mìɔùn Kɛ́ɖɛ́ì ɖáìn, ké ɖíɛ́ ɓě mu wa mìɔùn kpáá-ɖɛ̀-cɛ̃-nyɔ̀ ɖáìn. Wa mu ɖàɓàìn-ɖɛ̀ kpa ɖɛ ɓě kè dĩ́ín-dĩ̀ìn-ɖɛ̀ ɓě nyuùn, ɓɛ́ ɔ dyi xwa fɛ̃́ìn ní, ɓɛ́ wa ké nyɔ ɓě ɓɛ́ Gèɖèpɔ́ɔ̀ ɖǎà gã kɛɛ cá. 25Gmɔ̀ nɔ̄, ḿ nì ɓě náún poɛń nɔ̀ɔ̀, hwɛ̀ ɓɛ́ ɖɛ ɓěɛ̀ ké kpá.
26“Ɔ jèɛɛ, nyɔ ɖò dyiɛ ɓě gbo cɛ̃, ké ɔ dyi níiń, ‘Gmɔ̀ nɔ̄, Kɛ́ɖɛ́ìɔ̀ nì ɖé gbǎùn-fúɖúáɔ̀ kɔ̃’ ní, nìí, ɓěǐn mu ɖé. Ké ɔ dyiɛ cɛ̃, ké ɔ dyi níiń, ‘Gmɔ̀ nɔ̄, ɔ nì ɖé gbǒɔ̀ gbɔo’ ní, nìí, ɓěǐn poɛ jǎà. 27Mɔ̄ Nyɔǔn-dyùɛ̀ Dyú-gààɔ̀ dyi dyiɛń nìǐn, ɔ mu nììn kà wɛ́ɖɛ́-wɛ́ɖɛ́ poà, ké ce fã̀ìn dyɔɔ̀ gànáɔ̀ dyíin, sɔ̀ìn ɖé dyóɖó-xwáɖáún-wóɖóìn-naínɔ̀, ɓɛ́ ɔ kéà ɖé dyóɖó-dyi-kpáìn-naínɔ̀ muɛ.
28“Dɛ̀ kã̀ìn séín ɓɛ́ xwɛ́ nì kɛɛ, ɖéɛ̀ hwĩ́ín-hwã ɓěɔ̀ poìn dyí. Kà dyúáɖòɔ̀ kǎà dyí-tɛ̀mɛ̀ìn-ɖɛ̀ ɓěɛ̀ cɛ̃ ɓóɖó-kpàà mánáín hwɛ̀ jè.
Nyɔǔn-dyùɛ̀ Dyú-gààɔ̀ dyi jè
(Máà 13:24-27; Ɖúù 21:25-28)
29“Nyɔǔn-gǎ-dyéìn-dyéìn ɓě ɓɛ́ wa muà nììn ɓó wé ɓěa ɓaɖaa ɖǎ dyi zi nyɛ̀nɛ̀ɛ̀ ní, nìí, dyóɖóɔ̀ mu tíe-kpò mú zɛ̃̀ìn, ké dɛ̀nɛ̀ɔ̀ se fãá mu, ké dɛ̀nɛ̀ mɛ́nɛ́ɛ́ ɓěɔ̀ mu dyií ɓuɖuùn, ɓɛ́ wa ké dyi kpáuń nì. Ké ɖɛ séín nì ɖé dyɔɔ̀ dyíɛɛ mu dyi túòùn. 30Ké dyí-tɛ̀mɛ̀ìn-ɖɛ̀ ɓá mɔ̄ Nyɔǔn-dyùɛ̀ Dyú-gààɔ̀ jè dyíɛɛ mu xwáɖáún wóɖóùn ɖé dyɔɔ̀ dyí. Nìí, xwéɖé-dù séín ɓě nì ɓóɖó-kpàà kɔ̃ɛɛ mu kpé poùn. Ti wa mu mɔ̄ Nyɔǔn-dyùɛ̀ Dyú-gààɔ̀ dyéìn nyɛɛ, ní mu ɖé dyɔún sɔ̀ùn, ké ní mu ní-kpò ɖò mú dyììn ɖé kpé kè dĩ́ín-dĩ̀ìn vɛ̀nɛ̀ mú. 31Wa mu gã̀à ɖò ɓaɖaùn gana-kà, ké ní mu ní ínjà ɓěɔ̀ ɖé ɓóɖó-kpàà gã hĩinyɛ ɓěɔ̀ kɔ̃in toìn, ké wa mu nyɔ ɓě ɓɛ́ ḿ ɖǎà gã kɛɛ dyí poìn sɔ̀ìn ɖé ɓóɖó-kpàà wáká ɖò kɔ̃, ké ɖéɛ wáká tɔ̀ɔ̀ kɔ̃ muɛ.
Tɛ̀mɛ̀ìn-ɖɛ̀ ɓá féè-cù jè dyíɛ
(Máà 13:28-31; Ɖúù 21:29-33)
32“Féè-cùɔ̀ mɛ tɛ̀mɛ̀ìn ɓě ɖɛ. Ɓě dyiɛ dyé, ké ɔ ɖɔ́ ɓěɔ̀ dyiá dɔ̀ɔ̀-dɔ̀ɔ̀ nì, ké ɔ dyi mí poɛń nìǐn, nìí, ɓě mɛ dyuòɛ̀ kà ní-tì nìǎ dyi xwɛ̃́ǐn nyɛ. 33Kà dyúáɖòɔ̀ kǎà ɓě dyi ɖɛ séín ɓě nìà kɛ dyéɛń nìǐn, ɓě mɛ dyuòɛ̀ dyí kà mánáín-hwɛ̀-tìɔ̀ nìǎ dyi xwɛ̃́ǐn nyɛ, ké kà ɔ nìǎ ɓě ɓo kɔ̃ dyáuń wɛ̃. 34Ḿ cɛ̃ ɓě jǎà gbo, nyɔ ɓě nìà kàǔn wɛ̃ɛ, wa se mɛ́ɛ hwɛ̀ɛ̌ mu, ké ɖɛ séín ɓěɛ̀ kpá hwɛ̀. 35Dyɔɔ̀ kè ɓóɖó-kpàà mu dyi ziìn, kɛɛ ní wuɖu ɓěɔ̀ se dyi ziɛ́ mu.
Nyɔ ɖò se ɖɛ séín mánáín-hwɛ̀-tìɔ̀ dyuò
(Máà 13:32-37; Ɖúù 17:26-30, 34-36)
36“Ɓá ti ɓɛ́ ɖɛ ɓě nìà kɛ mu kpáùn wɛ̃ɛ jè dyíɛɛ, nyɔ ɖò seɛ dyuò. Ínjà ɓě nì ɖé dyɔún wɛ̃ kè mɔ̄ mɔ̀à Dyú-gààɔ̀ kɛɛ seɛ dyí dyuò. Ɓǎɔ̀ ɖòùn mɔ̀ nyɔ dyuòɛ̀ dyí. 37Mɔ̄ Nyɔǔn-dyùɛ̀ Dyú-gààɔ̀ dyi-dyiɔ̀ mu nììn kà ɔ nyu ma kà nìɛ̀ ɖé Nóà nììn tiín nyɛ. 38Hwɛ̀ ɓɛ́ ní-tòɔ̀ ké ma dyiɛɛ, nyɔǔn ɓě nì ma ɖɛ ɖiɛń, ké wa nì ma náuń, ké gàa kè màa nì ma dyi kpɔ̃ǐn, ké ɔ dyɛ̀ìn ma wé jɛ́ɛ́ kɔ̃̀ xwíníín ɓɛ́ Nóà dyá ma kà méèɔ̀ múɛɛ hwɛ̀. 39Ké wa se ɖɛ nì ma kà kpáuń wɛ̃ɛ dyuò. Ní-tòɔ̀ dyi ma, ké ɔ zĩ̀ìn ma wa séín, hwɛ̀ ké wa dyuòɛ̀ ma. Mɔ̄ Nyɔǔn-dyùɛ̀ Dyú-gààɔ̀ dyi dyiɛń nìǐn, nìí, kǎà ɔ mu nììn. 40Gàa sɔ̃́ mu ɖé geɖeín nììn. Dyúáɖò mu ɓó sɔ̀ùn, ké dyúáɖò mu ɓó sèìn. 41Màa sɔ̃́ mu ɖɛ ɖuɛń nììn ɓó dòò gbɔ. Dyúáɖò mu ɓó sɔ̀ùn, ké dyúáɖò mu ɓó sèìn.
42“Ɔ jèɛɛ, ɓě mɛ nì ɓɛ́ɖɛ́ kɔ̃, sepóɛɖé ɓě se dyuò wé kɔ̃̀ mú ɓɛ́ mɔ̄ mɔ̀à ɓěɛ̀ Bounɓoɔ̀ kɛɛ mu dyiìn nyɛ. 43Ɖɛ nìà kɛ mɛ nì ɓě hwìɖǐi. Gbǒ-kɔ̃̀-nyɔ̀ɔ̀ dyiɔ́ ti ɓɛ́ dyíɖíí-nyɔ̀ muɔ́ dyiìn nyɛɛ dyuò ní, nìí, ɔ seɔ́ mɔ́ɔ mu, ké ɔ seɔ́ wɔ̃́ɔ mu ɓɛ́ dyíɖíí-nyɔ̀ɔ̀ kéɔ́ ɔ gbǒɔ̀ wa. 44Ɔ jèɛɛ, ɓě mɔ̀ùn mɛ nì ɓɛ́ɖɛ́ kɔ̃, sepóɛɖé mɔ̄ Nyɔǔn-dyùɛ̀ Dyú-gààɔ̀ mu dyiìn ti ɓɛ́ ɓě se ní jè hwìɖǐi dèɛ̌ muɛ.
Gbo-nì-nyɔ̀ ɓɛ́ nyɔ ɓɛ́ìn hwòɖǒ kɔ̃ dèɛ̀ kɛ kè gbo-nì-nyɔ̀ ɓɛ́ nyɔ se hwòɖǒ kɔ̃ dèɛ̀ ɓɛ́ìn nyɛ
(Ɖúù 12:41-48)
45“Nyɛ́ mɔ̀ gbo-nì-nyɔ̀ ɓɛ́ ɔ fɔ̀nɔ̀ hwòɖǒ, ké nyɔ ɓɛ́ìn ɔ hwòɖǒ kɔ̃ dèɛ̀ kɛ́? Ɔ mɔ̀ nyɔ ɓɛ́ ɔ gbo-nì-ɓǎɔ̀ sè gbo-nì-nyɔ̀ ɓě nì ɖé ɔ ɓíɖí-gbǒ-xwíníín nyɛɛ gboɛ, ɓɛ́ ɔ ké wa ɖii-ɖɛ̀ nyí ɓó ti wa ɓéɖé ɓɛ́ wa kéɛ dyéìn nyɛ. 46Gbo-nì-nyɔ̀ nìà kɛɛ, ɔ gbo-nì-ɓǎɔ̀ dyi dyi, ké ɔ dyi ɔ ɖɛ nìà kɛ nyuɛ dyi dyɛ̀ìn ní, mana nì ɔ kɔ̃. 47Ḿ cɛ̃ ɓě jǎà gbo, gbo-nì-ɓǎɔ̀ mu ɔ ɖɛ séín ɓěɔ̀ gbo-nì-nyɔ̀ɔ̀ xwaún dyi poùn. 48Kɛɛ ɔ jǔ ké ɔ dyi gbo-nì-nyɔ̀ kɔ̃̀ kpeɖe nyìnììn dyíin nyɛɛ jǔ ní, nìí, ɔ muɛ ɔ mìɔùn gbo cɛ̃ìn, ɓɛ́ ɔ ké níiń, ‘Ní gbo-nì-ɓǎɔ̀ se dyiɛ́ mu ɓó kàǔn.’ 49Ɔ mu ɔ mǔè gbo-nì-nyɔ̀ ɓěɔ̀ ɓaɖa kpàǐ ɖúùn, ké ɔ kè nɔmɔɔ-ná-nyɔ̀ ɓě mu ɖɛ ɖiìn, ké wa mu náùn. 50Nìí, ɔ gbo-nì-ɓǎɔ̀ mu dyiìn ɓó wé kɔ̃̀ xwíníín ɓɛ́ ɔ seà ɔ gbo-nì-ɓǎɔ̀ jè hwìɖǐi dèɛ̌ muɛ. 51Ké ɔ gbo-nì-ɓǎɔ̀ mu ɔ gǎ kɔ̃ tòùn, ké ɔ mu ɔ nììn pá ɖé dyéɖéi-nyu-nyɔ̀ ɓěɔ̀ hwìɛ̀ nyuùn. Ɖéɛ̀ ɔ mu kpé poùn, ké ɔ mu nyɛ́nɛ́ tàùn.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.