Máfíò 22
22
Nɔ́ɔ́ ɓá nyɔ́nɔ́-dyi-kpɔ̃-hwɔ̀ ɖò jè dyíɛ
(Ɖúù 14:15-24)
1Sɔ̀ìn ɓóɛ gboɛɛ, Jízɛ̀ wùɖù ma nyɔ ɓěɔ̀ gbo ɖe ɖé nɔ́ɔ́ mú, ké ɔ ɖá, 2“Gèɖèpɔ́ɔ̀ kã́á-ɓòɖò nìà ɖé dyɔún wɛ̃ɛ nì kà kã́á ɖò ɓɛ́ ɔ nì ma nyɔ́nɔ́-dyi-kpɔ̃-hwɔ̀ ɖò pauń dyiɛń ɓó ɔ dyú-gàà bììɛɛ nìà kɛ. 3Ɔ ɖoɓo ma ɔ gbo-nì-nyɔ̀ ɓěɔ̀, ɓɛ́ wa kéɛ ma nyɔ ɓě ɓɛ́ ɔ ɖǎ ma kà hwɔɔ̀ kɔ̃ ɖáa gbo cɛ̃, ɓɛ́ wa ké ma hwɔɔ̀ kɔ̃ dyi, kɛɛ wa séín nɔ́ɔ̀ ma ní. 4Ɔ jèɛɛ, ɔ dèìn ma ɔ gbo-nì-nyɔ̀ ɖíɛ́ ɓě wuɖu wĩín ɖe, ké ɔ ɖá, ‘Ɓě cɛ̃ɛ nyɔ ɓě ɓɛ́ ḿ ɖǎ ma kà ɖáa gbo, ɓɛ́ ɓě ké níiń, “Gmɔ̀ nɔ̄, ɔ mɔ̀ǎ hwɔɔ̀ pa-tì. Ḿ ɖǎ ní ɓìɖǐ kè ɓìɖǐ-dyù nɔ̀mɔ̀ kɔ̃in ɓěɔ̀ ɖáɓá, ké ḿ ɖǎ ɖɛ séín ti dyéìn. Ɓě dyi nyɔ́nɔ́-dyi-kpɔ̃-hwɔ̀ɔ̀ kɔ̃.” ’ 5Kɛɛ nyɔ ɓě ɓɛ́ ɔ ɖá ma kà hwɔɔ̀ kɔ̃ɛɛ se ma ti ɓéɖé ɓó hwɔɔ̀ jè. Ɖò mɔ̀ùn mu ma ɔ ɓíɖí-geɖeín, ké ɖò mɔ̀ùn mu ma ɖɛ peɖeɛń. 6Ké waà ɖíɛ́ ɓě mɔ̀ùn kpɔ̃ ma kã́áɔ̀ gbo-nì-nyɔ̀ ɓěɔ̀, ké wa nyìnììn ma wa bũ̌in dɛ̃-kà, ké wa ɖáɓá ma gbo-nì-nyɔ̀ ɓěɔ̀. 7Púɛɛ, kã́áɔ̀ kpá ma dyoɖoún mìɔ, ké ɔ ɖoɓo ma ɔ sójà ɓěɔ̀, ké wa ɖáɓá ma nyɔ ɓě ɓɛ́ wa ɖáɓá ma kà ɔ gbo-nì-nyɔ̀ ɓěɔ̀ kɛ, ké wa fɔ̃ ma waà hwɔɖɔɔ̀. 8Hwɛ̀ ké kã́áɔ̀ ɖá ma ɔ gbo-nì-nyɔ̀ ɓěɔ̀ ɖíɛ́ ɓě ɖe, ké ɔ cɛ̃ɛ ma wa gbo, ké ɔ ɖá, ‘Nyɔ́nɔ́-dyi-kpɔ̃-hwɔ̀ɔ̀ pa-tìɔ̀ ɖǎ nyini, kɛɛ nyɔ ɓě ɓɛ́ ḿ ɖá ma kà kɛɛ se ma wɛ̃̀ìn ɓó hwɔɔ̀ kɔ̃ dyi jè. 9Ɔ ná nì jèɛɛ, ɓě mɛ mu hwìè vɛ̀nɛ̀ ɓěɔ̀ kɔ̃, ɓɛ́ ɓě ké nyɔ kã̀ìn séín ɓě mu dyéìn nyɛɛ hwɔɔ̀ kɔ̃ ɖá.’ 10Ɔ jèɛɛ, gbo-nì-nyɔ̀ ɓěɔ̀ mu ma hwìè ɓěɔ̀ kɔ̃, ké wa poìn ma nyɔǔn séín wa ɓɛ́ìn ma dyéɛ kɛɛ dyí. Wa mɔ̀ nyɔ ɓě kɔ̃̀ kpeɖe nɔ̀mɔ̀ dyíin nyɛ kè nyɔ ɓě kɔ̃̀ kpeɖe nyìnììn dyíin nyɛ. Ké nyɔǔn ɓěɔ̀ dyi ma, ké wa dyí ma ɖé hwɔ-pàìn-naínɔ̀.
11“Kɛɛ ti ɓɛ́ kã́áɔ̀ mu ma ɖé, ɓɛ́ ɔ ké ma nyɔ ɓě dyi ma kà hwɔɔ̀ kɔ̃ɛ dyéɛɛ, ɔ dyé ma ɖé gàa ɖò, ké gàaɔ̀ se ma hwɔɔ̀ ɖɔ ɓéɖé. 12Ké ɔ diè ma gàaɔ̀ dyi, ké ɔ ɖá, ‘Ḿ ɓǎto, m̀ se hwɔɔ̀ ɖɔ mú po. Xwɛ̌ nyu m̀ dyi nɔ̄ dyá kɛ́?’ Ké gàaɔ̀ se ma wùɖùɛ̀ ɓɛ́ìn. 13Hwɛ̀ ké kã́áɔ̀ cɛ̃ɛ ma ɔ gbo-nì-nyɔ̀ ɓěɔ̀ gbo, ké ɔ ɖá, ‘Ɓě sã ɔ sɔ̃ ɓěɔ̀ kè ɔ ɓo ɓěɔ̀, ɓɛ́ ɓě ké ɔ ɖé píé po ɖé tíe-kpòɔ̀ mú. Ɖéɛ̀ ɔ mu kpé poùn, ké ɔ mu nyɛ́nɛ́ tàùn.’ ”
14Ɖé nɔ́ɔ̀ dúí-jaɖa-jaɖa múɛɛ, Jízɛ̀ ɖá, “Gèɖèpɔ́ɔ̀ ɖá nyɔ pàɖǎ, kɛɛ ɔ gã nyɔ xwéɖé wè nyɛ̀nɛ̀ɛ̀.”
Dyi-diè-ɖɛ̀ ɓá tácì pɛ́ɛ̀ jè dyíɛ
(Máà 12:13-17; Ɖúù 20:20-26)
15Sɔ̀ìn ɓóɛ gboɛɛ, Fáɖòsíì-nyɔ̀ ɓěɔ̀ poìn ma wuɖuí ɓá kà wa ké ma Jízɛ̀ kpɔ̃ɔ nyu ɖé ɔ wĩín-wùɖù múɛɛ jè dyí. 16Ɔ jèɛɛ, wa ɖoɓo ma waà ɖeín-nà-nyɔ̀ ɓěɔ̀ ɖíɛ́ ɓě kè Hɛ́wɔ̀ɖɔ̀ nììn nyɔ ɓěɔ̀ ɖíɛ́ ɓě ɖé Jízɛ̀ gbo, ké wa diè ma ɔ dyi, ké wa ɖá, “Nyɔ-ɖɛ-tɛ̀mɛ̀ìn-nyɔ̀, à dyuòɛ̀ dyí kà m̀ mɔ̀ dyí-sɛ́ɖɛ́ìn-nyɔ̀ kɛ, ké m̀ tɛ̀mɛ̀ìn nyɔǔn hwìè ɓě ɓɛ́ Gèɖèpɔ́ɔ̀ mɔ́ nyɔǔn ké kpaa ɖé jǎà múɛ. Mɔ̀ǔn mɔ́ nyɔ múin, sepóɛɖé m̀ se nyɔ ɖòɛ̀ dyéɖé peɖe jè. 17Ɔ jèɛɛ, cɛ̃ɛ à gbo, ɔ nɔ̀mɔ̀ dyíin ɓɛ́ à ké Síízɛ̀ mɔ̀à Wóɖóùn-kã̀ǎɔ̀ kɛɛ tácì dyéɖéín pɛ́ɛ̀ìn, mɔɔ ɔ se dyíin nɔ̀mɔ̀ɔ̀?”
18Kɛɛ Jízɛ̀ dyuò ma waà hwìɖǐi-poìn-ɖɛ̀ nyìnììn kɔ̃in ɓěɔ̀ dyí jèɛɛ, ɔ cɛ̃ɛ ma wa gbo, ké ɔ ɖá, “Ɓě mɔ̀ dyéɖéi-nyu-nyɔ̀ ɓě. Ɖɛ́ kɔ̃̀ jè ɓě nìà ḿ mú dɔ̃̌uń wɛ̃́? 19Ɓě tɛ̀mɛ̀ìn ḿ wíɖí-pĩ̀à ɓɛ́ ɓě pɛ́ɛ̀ìn kà tácìɔ̀ kɛɛ dyí.”
Ké wa kpa ma ɔ wíɖí-pĩ̀à ɖò gbo. 20Ké Jízɛ̀ diè ma wa dyi, ké ɔ ɖá, “Nyɛ́ kɔ̃̀ dú-ɓò nìà wíɖí-pĩ̀àɛ̀ kɔ̃ kɛ́? Ké nyɛ́ ɖɛ ɓě céèà ɓó ɔ kɔ̃ɛɛ ɓá dyíɛ́?”
21Ké wa ɖá, “Ɔ mɔ̀ Síízɛ̀e.”
Hwɛ̀ ké Jízɛ̀ cɛ̃ɛ ma wa gbo, ké ɔ ɖá, “Ɓě nyí ɖɛ Síízɛ̀ kɔ̃̀ kɛɛ Síízɛ̀, ké ɓě nyí ɖɛ Gèɖèpɔ́ɔ̀ kɔ̃̀ kɛɛ Gèɖèpɔ́ɔ̀.”
22Ti ɓɛ́ wa wɔ̃́ ma ɖɛ ɓě nìà kɛɛ, wa giniìn ma dyi mìɔ, ké wa sɔ̀ ma ɓó ɔ gbo dyí, ké wa mu ma.
Dyi-diè-ɖɛ̀ ɓá gĩɔ wóɖó jè dyíɛ
(Máà 12:18-27; Ɖúù 20:27-40)
23Ɓó wé dyúáɖòɔ̀ xwíníín nyɛɛ, Sádyùsíì-nyɔ̀ ɖíɛ́ ɓě mu ma Jízɛ̀ gbo. Wa mɔ̀ nyɔ ɓě cɛ̃à kà ɓɛ́ nyɔ ɓě ɖǎà mɛ́ kɛɛ se gĩɔ wóɖóɛ ɓɛ́ìn ɖeɛ̀. Wa diè ma ɔ dyi, ké wa ɖá, 24“Nyɔ-ɖɛ-tɛ̀mɛ̀ìn-nyɔ̀, Mózèɛ̀ gmaɔ̀ ɖá gàa ɖò dyi mɛ́, ké ɔ se dyú ɖò ɓíɖíi sè ní, nìí, ɔ ɖíí-gàà mɛ kpɔ̃ ɔ gmààɔ̀ dyi, ɓɛ́ ɔ kèɔ̀ kè ké dyú wóɖóìn ɖé ɔ ɖíí-gàà mɛ́à kɛɛ nyɛ́nɛ́ mú. 25Ɖíí-gàà mɛ̀nɛ̌ìn-sɔ̃́ cĩ́ zɔ̃̌ɔ̀ nɔ̄ à hwìɛ̀. Waà ɖíí-gàà vɛ̀nɛ̀ kpɔ̃ ma nyɔ́nɔ́ dyi. Ké ɔ kè màaɔ̀ se ma dyú ɖò wóɖóìn, ké ɔ mɛ́ ma. Ké màaɔ̀ sè ma ɔ ɖíí-gàà kɔ ɓó ɔ ɖeín dyíɛɛ gbo. 26Ɖɛ dyúáɖòɔ̀ kpá ma ɖíí-gàà sɔ̃́ nììnɔ̀ gbo, ké ɔ kpá ma nyɔ kɔ ma ɓó ɔ mɔ̀ùn ɖeín dyíɛɛ gbo ɖekè. Ké kǎà ɔ kpá ma ɖíí-gàà mɛ̀nɛ̌ìn-sɔ̃́ ɓěɔ̀ gbo. 27Ti ɓɛ́ wa séín ɖǎ ma mɛ́ɛ, màaɔ̀ mɔ̀ùn mɛ́ ma ɖekè. 28Kà ɔ nìà náa, nìí, ti ɓɛ́ Gèɖèpɔ́ɔ̀ muà nyɔ ɓě ɖǎà mɛ́ɛ gĩɔ zàùn wɛ̃ɛ, nyɛ́ kɔ̃̀ gmàà màaɔ̀ mu jǔùn wɛ̃́? Sepóɛɖé màaɔ̀ ɖǎ ma wa ɖò-ɖòɛ̀ gmàà jǔ nyɛ̀nɛ̀ɛ̀.”
29Ké Jízɛ̀ jǔ ma wa gɔ̃̌, ké ɔ ɖá, “Ɓě bĩ ɖɛ xwa, sepóɛɖé ɓě se ɖɛ Gèɖèpɔ́ɔ̀-cèè-ɖɛ̀ɔ̀ cɛ̃ɛ dyuò, ké ɓě se Gèɖèpɔ́ɔ̀ kpéɔ̀ jè dyuò. 30Sepóɛɖé ti ɓɛ́ nyɔ ɓě ɖǎà mɛ́ɛ muà gĩɔ wóɖóùn wɛ̃ɛ, màa kè gàa se dyi kpɔ̃ǐn mu ɖe. Wa muá nììn kà ínjà ɓě nìà ɖé dyɔún wɛ̃ɛ nìà kɛ. 31Ɓá nyɔ ɓě ɖǎà mɛ́ɛ gĩɔ wóɖó jè dyíɛɛ, ḿ dyuòɛ̀ jɛ́ɛ́ kà ɓě ɖǎ ɖɛ Gèɖèpɔ́ɔ̀ cɛ̃à ɖé ɔ céè-ɖɛ̀ɔ̀ múɛɛ wuɖuún zà kɛ. 32Ɔ ɖá, ‘Mɔ̄ mɔ̀ Ééɓòɖòhɛ̃́ɛ̀ kè Áázè ɔ kè Jékɔ̀ɛ̀ Gèɖèpɔ́ɔ̀.’ Ɔ se gĩɔ-nyɔ̀ ɓěɛ̀ Gèɖèpɔ́ɔ̀. Ɔ mɔ̀ Gèɖèpɔ́ɔ̀ ɓó nyɔ ɓě nì cĩ́ɛń nyɛɛ bìì.”
33Ti ɓɛ́ nyɔ kúɖúú ɓěɔ̀ wɔ̃́ ma ɖɛ nìà kɛɛ, wa giniìn ma dyi ɓó kà ɔ nyu ma wa ɖɛ tɛ̀mɛ̀ìn nyɛɛ jè.
Gmaɔ̀ nyɔ kpa ɖɛ mìɔ kɛ
(Máà 12:28-34; Ɖúù 10:25-28)
34Ti ɓɛ́ Fáɖòsíì-nyɔ̀ ɓěɔ̀ wɔ̃́ɔ ma kà ɓɛ́ Jízɛ̀ɛ̀ gɔ̃̌-jǔ-wùɖùɔ̀ ɖǎ ma Sádyùsíì-nyɔ̀ ɓěɔ̀ ɓɔ́í poɛɛ, wa poìn ma dyí, ké wa mu ma ɖé Jízɛ̀ gbo. 35Ké waà dyúáɖò ɓɛ́ ɔ mɔ̀ ma nyɔ-gma-tɛ̀mɛ̀ìn-nyɔ̀ ɖò kɛɛ mɔ́ ɓɛ́ ɔ ké ma Jízɛ̀ mú dɔ̃̌ jèɛɛ, ɔ diè ma ɔ dyi, ké ɔ ɖá, 36“Nyɔ-ɖɛ-tɛ̀mɛ̀ìn-nyɔ̀, gma ɓě nìà ɖé gma-cèè-ɖɛ̀ɔ̀ múɛɛ, nyɛ́ kpa ɖɛ ké ɔ zi wa séín dyíɛ́?”
37Ké Jízɛ̀ jǔ ma ɔ gɔ̃̌, ké ɔ ɖá, “Ɓě mɛ ɖɛ̀ɓɛ̀ Bounɓo mɔ̀à ɓěɛ̀ Gèɖèpɔ́ɔ̀ kɛɛ mú hwòɖǒɛ̀-ɖé-hwɛ̀-kà ɖé ɓěɛ̀ kpé séín mú. 38Gma nìà kɛ mɔ̀ gmaɔ̀ vɛ̀nɛ̀, ké ɔ mɔ̀ gma kpa ɖɛɔ̀. 39Ké nyɔ kpa ɖɛ kɔ ɓó nyɔ nìà kɛ gbo dyíɛɛ mɔ̀, m̀ mɛ ɖɛ̀ɓɛ̀ m̀ mǔè ɖò mú kà m̀ ɖɛ̀ɓɛ̀à m̀ mìɔùn múɛ. 40Mózèɛ̀ gma séín ɓěɔ̀ kè kpáá-ɖɛ̀-cɛ̃-nyɔ̀ ɓěɔ̀ tɛ̀mɛ̀ìn-ɖɛ̀ séín ɓěɔ̀ sṹ gma sɔ̃́ ɓě nìà kɛ mú.”
Dyi-diè-ɖɛ̀ ɓá Kɛ́ɖɛ́ìɔ̀ jè dyíɛ
(Máà 12:35-37; Ɖúù 20:41-44)
41Ti ɓɛ́ Fáɖòsíì-nyɔ̀ ɓěɔ̀ poìn ma ɓó Jízɛ̀ gbo dyí keɛɛ, ɔ diè ma wa dyi, ké ɔ ɖa, 42“Ɖɛ́ ɓě poìn hwìɖǐi ɓá Kɛ́ɖɛ́ìɔ̀ jè dyíɛ́? Nyɛ́ kɔ̃̀ dyú ɔ jǔ kɛ́?”
Ke wa cɛ̃ɛ ma ɔ gbo, ké wa ɖá, “Ɔ mɔ̀ Dèɓéɛ̀ dyúe.”
43Ké Jízɛ̀ diè ma wa dyi ɖe, ké ɔ ɖá, “Nìí, xwɛ̌ nyu Dèɓé dyi ma ɔ ɔ wuɖuí-kɔ̃̀-nyɔ̀ ɖáìn ti Zùùɔ̀ wùɖùìn zɔ̃̌ɔ̀ kà ɔ múɛɛ kɛ́? Sepóɛɖé Dèɓé cɛ̃ɛ ma, ké ɔ ɖá,
44‘Bounɓoɔ̀ cɛ̃ɛ ma ní wuɖuí-kɔ̃̀-nyɔ̀ɔ̀ gbo, ké ɔ ɖá,
“Dèɖě dà ḿ ɖiaún dya,
ɓɛ́ ḿ ké nì mú-nyɛ́-nyɔ̀ ɓěɔ̀ m̀ ɓo xwíɖíi po hwɛ̀.” ’
45Ɔ jǔ ké Dèɓé mìɔùn dyi ɔ ɔ wuɖuí-kɔ̃̀-nyɔ̀ ɖáìn ní, nìí, xwɛ̌ Kɛ́ɖɛ́ìɔ̀ ɓɛ́ìn ɔ dyú jǔɛ kɛ́?”
46Nyɔ ɖò se ma ɔ gɔ̃̌ jǔɛ ɓɛ́ìn fɔɔ. Ké sɔ̀ìn ɓó ké dyúa muɛɛ, nyɔ ɖò se ma ɔ dyi diè ɖe fɔɔ.
Currently Selected:
Máfíò 22: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
Máfíò 22
22
Nɔ́ɔ́ ɓá nyɔ́nɔ́-dyi-kpɔ̃-hwɔ̀ ɖò jè dyíɛ
(Ɖúù 14:15-24)
1Sɔ̀ìn ɓóɛ gboɛɛ, Jízɛ̀ wùɖù ma nyɔ ɓěɔ̀ gbo ɖe ɖé nɔ́ɔ́ mú, ké ɔ ɖá, 2“Gèɖèpɔ́ɔ̀ kã́á-ɓòɖò nìà ɖé dyɔún wɛ̃ɛ nì kà kã́á ɖò ɓɛ́ ɔ nì ma nyɔ́nɔ́-dyi-kpɔ̃-hwɔ̀ ɖò pauń dyiɛń ɓó ɔ dyú-gàà bììɛɛ nìà kɛ. 3Ɔ ɖoɓo ma ɔ gbo-nì-nyɔ̀ ɓěɔ̀, ɓɛ́ wa kéɛ ma nyɔ ɓě ɓɛ́ ɔ ɖǎ ma kà hwɔɔ̀ kɔ̃ ɖáa gbo cɛ̃, ɓɛ́ wa ké ma hwɔɔ̀ kɔ̃ dyi, kɛɛ wa séín nɔ́ɔ̀ ma ní. 4Ɔ jèɛɛ, ɔ dèìn ma ɔ gbo-nì-nyɔ̀ ɖíɛ́ ɓě wuɖu wĩín ɖe, ké ɔ ɖá, ‘Ɓě cɛ̃ɛ nyɔ ɓě ɓɛ́ ḿ ɖǎ ma kà ɖáa gbo, ɓɛ́ ɓě ké níiń, “Gmɔ̀ nɔ̄, ɔ mɔ̀ǎ hwɔɔ̀ pa-tì. Ḿ ɖǎ ní ɓìɖǐ kè ɓìɖǐ-dyù nɔ̀mɔ̀ kɔ̃in ɓěɔ̀ ɖáɓá, ké ḿ ɖǎ ɖɛ séín ti dyéìn. Ɓě dyi nyɔ́nɔ́-dyi-kpɔ̃-hwɔ̀ɔ̀ kɔ̃.” ’ 5Kɛɛ nyɔ ɓě ɓɛ́ ɔ ɖá ma kà hwɔɔ̀ kɔ̃ɛɛ se ma ti ɓéɖé ɓó hwɔɔ̀ jè. Ɖò mɔ̀ùn mu ma ɔ ɓíɖí-geɖeín, ké ɖò mɔ̀ùn mu ma ɖɛ peɖeɛń. 6Ké waà ɖíɛ́ ɓě mɔ̀ùn kpɔ̃ ma kã́áɔ̀ gbo-nì-nyɔ̀ ɓěɔ̀, ké wa nyìnììn ma wa bũ̌in dɛ̃-kà, ké wa ɖáɓá ma gbo-nì-nyɔ̀ ɓěɔ̀. 7Púɛɛ, kã́áɔ̀ kpá ma dyoɖoún mìɔ, ké ɔ ɖoɓo ma ɔ sójà ɓěɔ̀, ké wa ɖáɓá ma nyɔ ɓě ɓɛ́ wa ɖáɓá ma kà ɔ gbo-nì-nyɔ̀ ɓěɔ̀ kɛ, ké wa fɔ̃ ma waà hwɔɖɔɔ̀. 8Hwɛ̀ ké kã́áɔ̀ ɖá ma ɔ gbo-nì-nyɔ̀ ɓěɔ̀ ɖíɛ́ ɓě ɖe, ké ɔ cɛ̃ɛ ma wa gbo, ké ɔ ɖá, ‘Nyɔ́nɔ́-dyi-kpɔ̃-hwɔ̀ɔ̀ pa-tìɔ̀ ɖǎ nyini, kɛɛ nyɔ ɓě ɓɛ́ ḿ ɖá ma kà kɛɛ se ma wɛ̃̀ìn ɓó hwɔɔ̀ kɔ̃ dyi jè. 9Ɔ ná nì jèɛɛ, ɓě mɛ mu hwìè vɛ̀nɛ̀ ɓěɔ̀ kɔ̃, ɓɛ́ ɓě ké nyɔ kã̀ìn séín ɓě mu dyéìn nyɛɛ hwɔɔ̀ kɔ̃ ɖá.’ 10Ɔ jèɛɛ, gbo-nì-nyɔ̀ ɓěɔ̀ mu ma hwìè ɓěɔ̀ kɔ̃, ké wa poìn ma nyɔǔn séín wa ɓɛ́ìn ma dyéɛ kɛɛ dyí. Wa mɔ̀ nyɔ ɓě kɔ̃̀ kpeɖe nɔ̀mɔ̀ dyíin nyɛ kè nyɔ ɓě kɔ̃̀ kpeɖe nyìnììn dyíin nyɛ. Ké nyɔǔn ɓěɔ̀ dyi ma, ké wa dyí ma ɖé hwɔ-pàìn-naínɔ̀.
11“Kɛɛ ti ɓɛ́ kã́áɔ̀ mu ma ɖé, ɓɛ́ ɔ ké ma nyɔ ɓě dyi ma kà hwɔɔ̀ kɔ̃ɛ dyéɛɛ, ɔ dyé ma ɖé gàa ɖò, ké gàaɔ̀ se ma hwɔɔ̀ ɖɔ ɓéɖé. 12Ké ɔ diè ma gàaɔ̀ dyi, ké ɔ ɖá, ‘Ḿ ɓǎto, m̀ se hwɔɔ̀ ɖɔ mú po. Xwɛ̌ nyu m̀ dyi nɔ̄ dyá kɛ́?’ Ké gàaɔ̀ se ma wùɖùɛ̀ ɓɛ́ìn. 13Hwɛ̀ ké kã́áɔ̀ cɛ̃ɛ ma ɔ gbo-nì-nyɔ̀ ɓěɔ̀ gbo, ké ɔ ɖá, ‘Ɓě sã ɔ sɔ̃ ɓěɔ̀ kè ɔ ɓo ɓěɔ̀, ɓɛ́ ɓě ké ɔ ɖé píé po ɖé tíe-kpòɔ̀ mú. Ɖéɛ̀ ɔ mu kpé poùn, ké ɔ mu nyɛ́nɛ́ tàùn.’ ”
14Ɖé nɔ́ɔ̀ dúí-jaɖa-jaɖa múɛɛ, Jízɛ̀ ɖá, “Gèɖèpɔ́ɔ̀ ɖá nyɔ pàɖǎ, kɛɛ ɔ gã nyɔ xwéɖé wè nyɛ̀nɛ̀ɛ̀.”
Dyi-diè-ɖɛ̀ ɓá tácì pɛ́ɛ̀ jè dyíɛ
(Máà 12:13-17; Ɖúù 20:20-26)
15Sɔ̀ìn ɓóɛ gboɛɛ, Fáɖòsíì-nyɔ̀ ɓěɔ̀ poìn ma wuɖuí ɓá kà wa ké ma Jízɛ̀ kpɔ̃ɔ nyu ɖé ɔ wĩín-wùɖù múɛɛ jè dyí. 16Ɔ jèɛɛ, wa ɖoɓo ma waà ɖeín-nà-nyɔ̀ ɓěɔ̀ ɖíɛ́ ɓě kè Hɛ́wɔ̀ɖɔ̀ nììn nyɔ ɓěɔ̀ ɖíɛ́ ɓě ɖé Jízɛ̀ gbo, ké wa diè ma ɔ dyi, ké wa ɖá, “Nyɔ-ɖɛ-tɛ̀mɛ̀ìn-nyɔ̀, à dyuòɛ̀ dyí kà m̀ mɔ̀ dyí-sɛ́ɖɛ́ìn-nyɔ̀ kɛ, ké m̀ tɛ̀mɛ̀ìn nyɔǔn hwìè ɓě ɓɛ́ Gèɖèpɔ́ɔ̀ mɔ́ nyɔǔn ké kpaa ɖé jǎà múɛ. Mɔ̀ǔn mɔ́ nyɔ múin, sepóɛɖé m̀ se nyɔ ɖòɛ̀ dyéɖé peɖe jè. 17Ɔ jèɛɛ, cɛ̃ɛ à gbo, ɔ nɔ̀mɔ̀ dyíin ɓɛ́ à ké Síízɛ̀ mɔ̀à Wóɖóùn-kã̀ǎɔ̀ kɛɛ tácì dyéɖéín pɛ́ɛ̀ìn, mɔɔ ɔ se dyíin nɔ̀mɔ̀ɔ̀?”
18Kɛɛ Jízɛ̀ dyuò ma waà hwìɖǐi-poìn-ɖɛ̀ nyìnììn kɔ̃in ɓěɔ̀ dyí jèɛɛ, ɔ cɛ̃ɛ ma wa gbo, ké ɔ ɖá, “Ɓě mɔ̀ dyéɖéi-nyu-nyɔ̀ ɓě. Ɖɛ́ kɔ̃̀ jè ɓě nìà ḿ mú dɔ̃̌uń wɛ̃́? 19Ɓě tɛ̀mɛ̀ìn ḿ wíɖí-pĩ̀à ɓɛ́ ɓě pɛ́ɛ̀ìn kà tácìɔ̀ kɛɛ dyí.”
Ké wa kpa ma ɔ wíɖí-pĩ̀à ɖò gbo. 20Ké Jízɛ̀ diè ma wa dyi, ké ɔ ɖá, “Nyɛ́ kɔ̃̀ dú-ɓò nìà wíɖí-pĩ̀àɛ̀ kɔ̃ kɛ́? Ké nyɛ́ ɖɛ ɓě céèà ɓó ɔ kɔ̃ɛɛ ɓá dyíɛ́?”
21Ké wa ɖá, “Ɔ mɔ̀ Síízɛ̀e.”
Hwɛ̀ ké Jízɛ̀ cɛ̃ɛ ma wa gbo, ké ɔ ɖá, “Ɓě nyí ɖɛ Síízɛ̀ kɔ̃̀ kɛɛ Síízɛ̀, ké ɓě nyí ɖɛ Gèɖèpɔ́ɔ̀ kɔ̃̀ kɛɛ Gèɖèpɔ́ɔ̀.”
22Ti ɓɛ́ wa wɔ̃́ ma ɖɛ ɓě nìà kɛɛ, wa giniìn ma dyi mìɔ, ké wa sɔ̀ ma ɓó ɔ gbo dyí, ké wa mu ma.
Dyi-diè-ɖɛ̀ ɓá gĩɔ wóɖó jè dyíɛ
(Máà 12:18-27; Ɖúù 20:27-40)
23Ɓó wé dyúáɖòɔ̀ xwíníín nyɛɛ, Sádyùsíì-nyɔ̀ ɖíɛ́ ɓě mu ma Jízɛ̀ gbo. Wa mɔ̀ nyɔ ɓě cɛ̃à kà ɓɛ́ nyɔ ɓě ɖǎà mɛ́ kɛɛ se gĩɔ wóɖóɛ ɓɛ́ìn ɖeɛ̀. Wa diè ma ɔ dyi, ké wa ɖá, 24“Nyɔ-ɖɛ-tɛ̀mɛ̀ìn-nyɔ̀, Mózèɛ̀ gmaɔ̀ ɖá gàa ɖò dyi mɛ́, ké ɔ se dyú ɖò ɓíɖíi sè ní, nìí, ɔ ɖíí-gàà mɛ kpɔ̃ ɔ gmààɔ̀ dyi, ɓɛ́ ɔ kèɔ̀ kè ké dyú wóɖóìn ɖé ɔ ɖíí-gàà mɛ́à kɛɛ nyɛ́nɛ́ mú. 25Ɖíí-gàà mɛ̀nɛ̌ìn-sɔ̃́ cĩ́ zɔ̃̌ɔ̀ nɔ̄ à hwìɛ̀. Waà ɖíí-gàà vɛ̀nɛ̀ kpɔ̃ ma nyɔ́nɔ́ dyi. Ké ɔ kè màaɔ̀ se ma dyú ɖò wóɖóìn, ké ɔ mɛ́ ma. Ké màaɔ̀ sè ma ɔ ɖíí-gàà kɔ ɓó ɔ ɖeín dyíɛɛ gbo. 26Ɖɛ dyúáɖòɔ̀ kpá ma ɖíí-gàà sɔ̃́ nììnɔ̀ gbo, ké ɔ kpá ma nyɔ kɔ ma ɓó ɔ mɔ̀ùn ɖeín dyíɛɛ gbo ɖekè. Ké kǎà ɔ kpá ma ɖíí-gàà mɛ̀nɛ̌ìn-sɔ̃́ ɓěɔ̀ gbo. 27Ti ɓɛ́ wa séín ɖǎ ma mɛ́ɛ, màaɔ̀ mɔ̀ùn mɛ́ ma ɖekè. 28Kà ɔ nìà náa, nìí, ti ɓɛ́ Gèɖèpɔ́ɔ̀ muà nyɔ ɓě ɖǎà mɛ́ɛ gĩɔ zàùn wɛ̃ɛ, nyɛ́ kɔ̃̀ gmàà màaɔ̀ mu jǔùn wɛ̃́? Sepóɛɖé màaɔ̀ ɖǎ ma wa ɖò-ɖòɛ̀ gmàà jǔ nyɛ̀nɛ̀ɛ̀.”
29Ké Jízɛ̀ jǔ ma wa gɔ̃̌, ké ɔ ɖá, “Ɓě bĩ ɖɛ xwa, sepóɛɖé ɓě se ɖɛ Gèɖèpɔ́ɔ̀-cèè-ɖɛ̀ɔ̀ cɛ̃ɛ dyuò, ké ɓě se Gèɖèpɔ́ɔ̀ kpéɔ̀ jè dyuò. 30Sepóɛɖé ti ɓɛ́ nyɔ ɓě ɖǎà mɛ́ɛ muà gĩɔ wóɖóùn wɛ̃ɛ, màa kè gàa se dyi kpɔ̃ǐn mu ɖe. Wa muá nììn kà ínjà ɓě nìà ɖé dyɔún wɛ̃ɛ nìà kɛ. 31Ɓá nyɔ ɓě ɖǎà mɛ́ɛ gĩɔ wóɖó jè dyíɛɛ, ḿ dyuòɛ̀ jɛ́ɛ́ kà ɓě ɖǎ ɖɛ Gèɖèpɔ́ɔ̀ cɛ̃à ɖé ɔ céè-ɖɛ̀ɔ̀ múɛɛ wuɖuún zà kɛ. 32Ɔ ɖá, ‘Mɔ̄ mɔ̀ Ééɓòɖòhɛ̃́ɛ̀ kè Áázè ɔ kè Jékɔ̀ɛ̀ Gèɖèpɔ́ɔ̀.’ Ɔ se gĩɔ-nyɔ̀ ɓěɛ̀ Gèɖèpɔ́ɔ̀. Ɔ mɔ̀ Gèɖèpɔ́ɔ̀ ɓó nyɔ ɓě nì cĩ́ɛń nyɛɛ bìì.”
33Ti ɓɛ́ nyɔ kúɖúú ɓěɔ̀ wɔ̃́ ma ɖɛ nìà kɛɛ, wa giniìn ma dyi ɓó kà ɔ nyu ma wa ɖɛ tɛ̀mɛ̀ìn nyɛɛ jè.
Gmaɔ̀ nyɔ kpa ɖɛ mìɔ kɛ
(Máà 12:28-34; Ɖúù 10:25-28)
34Ti ɓɛ́ Fáɖòsíì-nyɔ̀ ɓěɔ̀ wɔ̃́ɔ ma kà ɓɛ́ Jízɛ̀ɛ̀ gɔ̃̌-jǔ-wùɖùɔ̀ ɖǎ ma Sádyùsíì-nyɔ̀ ɓěɔ̀ ɓɔ́í poɛɛ, wa poìn ma dyí, ké wa mu ma ɖé Jízɛ̀ gbo. 35Ké waà dyúáɖò ɓɛ́ ɔ mɔ̀ ma nyɔ-gma-tɛ̀mɛ̀ìn-nyɔ̀ ɖò kɛɛ mɔ́ ɓɛ́ ɔ ké ma Jízɛ̀ mú dɔ̃̌ jèɛɛ, ɔ diè ma ɔ dyi, ké ɔ ɖá, 36“Nyɔ-ɖɛ-tɛ̀mɛ̀ìn-nyɔ̀, gma ɓě nìà ɖé gma-cèè-ɖɛ̀ɔ̀ múɛɛ, nyɛ́ kpa ɖɛ ké ɔ zi wa séín dyíɛ́?”
37Ké Jízɛ̀ jǔ ma ɔ gɔ̃̌, ké ɔ ɖá, “Ɓě mɛ ɖɛ̀ɓɛ̀ Bounɓo mɔ̀à ɓěɛ̀ Gèɖèpɔ́ɔ̀ kɛɛ mú hwòɖǒɛ̀-ɖé-hwɛ̀-kà ɖé ɓěɛ̀ kpé séín mú. 38Gma nìà kɛ mɔ̀ gmaɔ̀ vɛ̀nɛ̀, ké ɔ mɔ̀ gma kpa ɖɛɔ̀. 39Ké nyɔ kpa ɖɛ kɔ ɓó nyɔ nìà kɛ gbo dyíɛɛ mɔ̀, m̀ mɛ ɖɛ̀ɓɛ̀ m̀ mǔè ɖò mú kà m̀ ɖɛ̀ɓɛ̀à m̀ mìɔùn múɛ. 40Mózèɛ̀ gma séín ɓěɔ̀ kè kpáá-ɖɛ̀-cɛ̃-nyɔ̀ ɓěɔ̀ tɛ̀mɛ̀ìn-ɖɛ̀ séín ɓěɔ̀ sṹ gma sɔ̃́ ɓě nìà kɛ mú.”
Dyi-diè-ɖɛ̀ ɓá Kɛ́ɖɛ́ìɔ̀ jè dyíɛ
(Máà 12:35-37; Ɖúù 20:41-44)
41Ti ɓɛ́ Fáɖòsíì-nyɔ̀ ɓěɔ̀ poìn ma ɓó Jízɛ̀ gbo dyí keɛɛ, ɔ diè ma wa dyi, ké ɔ ɖa, 42“Ɖɛ́ ɓě poìn hwìɖǐi ɓá Kɛ́ɖɛ́ìɔ̀ jè dyíɛ́? Nyɛ́ kɔ̃̀ dyú ɔ jǔ kɛ́?”
Ke wa cɛ̃ɛ ma ɔ gbo, ké wa ɖá, “Ɔ mɔ̀ Dèɓéɛ̀ dyúe.”
43Ké Jízɛ̀ diè ma wa dyi ɖe, ké ɔ ɖá, “Nìí, xwɛ̌ nyu Dèɓé dyi ma ɔ ɔ wuɖuí-kɔ̃̀-nyɔ̀ ɖáìn ti Zùùɔ̀ wùɖùìn zɔ̃̌ɔ̀ kà ɔ múɛɛ kɛ́? Sepóɛɖé Dèɓé cɛ̃ɛ ma, ké ɔ ɖá,
44‘Bounɓoɔ̀ cɛ̃ɛ ma ní wuɖuí-kɔ̃̀-nyɔ̀ɔ̀ gbo, ké ɔ ɖá,
“Dèɖě dà ḿ ɖiaún dya,
ɓɛ́ ḿ ké nì mú-nyɛ́-nyɔ̀ ɓěɔ̀ m̀ ɓo xwíɖíi po hwɛ̀.” ’
45Ɔ jǔ ké Dèɓé mìɔùn dyi ɔ ɔ wuɖuí-kɔ̃̀-nyɔ̀ ɖáìn ní, nìí, xwɛ̌ Kɛ́ɖɛ́ìɔ̀ ɓɛ́ìn ɔ dyú jǔɛ kɛ́?”
46Nyɔ ɖò se ma ɔ gɔ̃̌ jǔɛ ɓɛ́ìn fɔɔ. Ké sɔ̀ìn ɓó ké dyúa muɛɛ, nyɔ ɖò se ma ɔ dyi diè ɖe fɔɔ.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.