Máfíò 20
20
Géɖéè-gbǎ mú kũ̀à-nyu-nyɔ̀ ɓě
1Ké Jízɛ̀ kpa ma wuɖu dyúa, ké ɔ ɖá, “Gèɖèpɔ́ɔ̀ kã́á-ɓòɖò nìà ɖé dyɔún wɛ̃ɛ nì kà gàa ɖò ɓɛ́ ɔ mu ma kũ̀à-nyɔ̀ ɓě dyi mɔ́uń gànà-kṹún mɛ̀nɛ̀ɛ̀ ɖòɛ̀ ɓaɖa, ɓɛ́ wa ké ɔ géɖéè-gbǎ mú kũ̀à nyuɛɛ nìà kɛ. 2Ɔ dyé ma kũ̀à-nyɔ̀ ɓěɔ̀, ké ɔ wɔ̃́ ɓɛ́ ɔ ké wíɖí ɓɛ́ wa kɔ̃̀ ɓɛ́ wa ké dyé ɓó wé dyúáɖò xwíníín nyɛɛ wa nyí. Ké ɔ ɖoɓo ma wa, ɓɛ́ wa ké ma ɖé ɔ géɖéè-gbǎɔ̀ mú kũ̀à nyu. 3Ti ɓɛ́ jǎ-dyòɖò-pì nìǎ ma ɖé hwɛ̀ǐn nyɛɛ, ɔ mu ma ɖé ɖɛ-pèɖèìn-naínɔ̀, ké ɔ dyé ma ɖé gàa ɖíɛ́ ɓě, ké wa nyanaìn ma ɖé dyi pū. Wa se ma nyuu-ɖɛ̀ ɖò kɔ̃̀. 4Ké ɔ cɛ̃ɛ ma wa gbo, ké ɔ ɖá, ‘Ɓě mu ɖé ní géɖéè-gbǎɔ̀ mú, ɓɛ́ ɓě ké kũ̀à nyu, ké ní mu pɛ́ɛ̀-ɖɛ̀ ɓě kɔ̃̀ ɓě ké dyéɛɛ ɓě pɛ́ɛ̀ìn.’ Ké wa mu ma kũ̀àɔ̀ gbo. 5Ké gàaɔ̀ nyu ma ɖɛ dyúáɖòɔ̀ ɓó dyóɖó-kò-dú-hwìɛ̀ kè zii-dyòɖò-gbo-dyòɖòàǔn. 6Ké ti ɓɛ́ ɔ mɔ̀ǎ ma hwìo pɛ̀ɛ kɛɛ, gàaɔ̀ mu ma ɖé ɖɛ-pèɖèìn-naínɔ̀ ɖe, ké ɔ dyé ma gàa ɖíɛ́ ɓě, ké wa nyanaìn ma ɖé dyi. Ké ɔ diè ma wa dyi, ké ɔ ɖá, ‘Ɖɛ́ kɔ̃̀ jè ɓě wáɖáà nɔ̄ dyi, ké ɓě seà ɖɛ ɖò nyuɛń nì kɛ́?’ 7Ké wa cɛ̃ɛ ma ɔ gbo, ké wa ɖá, ‘Ɔ mɔ̀, nyɔ ɖò se à ɖá ɓó kũ̀à nyu jèe.’ Ké ɔ ɖá, ‘Ɓě mu ɖé ní géɖéè-gbǎɔ̀ mú, ɓɛ́ ɓě ké kũ̀à nyu.’
8“Ti ɓɛ́ hwìo ɖǎ ma jǔɛɛ, géɖéè-gbǎɔ̀ kɔ̃̀-nyɔ̀ɔ̀ cɛ̃ɛ ma nyɔ nì ma kũ̀à-nyu-nyɔ̀ ɓěɔ̀ kɔ̃in nyɛɛ gbo, ké ɔ ɖá, ‘Ɖá kũ̀à-nyu-nyɔ̀ ɓěɔ̀, ɓɛ́ m̀ ké wa pɛ́ɛ̀. M̀ mɛ pɛ́ɛ̀ nyɔ sè ɖe ɓě ɓɛ́ ḿ kpɔ̃à dyiɛɛ kĩ́ín, ké nyɔ ɓě ɓɛ́ ḿ kpɔ̃à dyi kĩ́ín nyɛɛ mɛ sè ɖe.’ 9Nyɔ ɓě ɓɛ́ gàaɔ̀ kpɔ̃ ma kà dyi ɓó hwìo pɛ̀ɛ kɛɛ, ɔ nyí ma wa ɖò-ɖò wé gànáà pɛ́ɛ̀-ɖɛ̀. 10Ti ɓɛ́ nyɔ ɓě ɓɛ́ ɔ kpɔ̃ ma dyi kĩ́ín nyɛɛ kɔ ma ɓó dyíɛɛ, waà hwòɖǒ ɖá ɔ mu ma wa wíɖí pàɖǎ pɛ́ɛ̀ìn, kɛɛ ɔ nyí ma wa ɖò-ɖò wé gànáà pɛ́ɛ̀-ɖɛ̀ ɖekè. 11Wa kpɔ̃ ma wíɖíɔ̀, ké wa ɖú ma géɖéè-gbǎɔ̀ kɔ̃̀-nyɔ̀ɔ̀ dúi jɛ̀ìn kpàǐ, 12ké wa ɖá, ‘Gàa sè ɖe ɓě ɓɛ́ m̀ kpɔ̃à dyiɛɛ, wa nyu kũ̀à ɓó áɓà dyúáɖò nyɛ̀nɛ̀ɛ̀ xwíníín, kɛɛ à mɔ̀ùn nyu kũ̀à ɓó wé gànáà xwíníín, ké dyóɖóɔ̀ ɖǎ à fɔ̃ fɔ̃̀ɔ̌. Ké m̀ nyuɛ ké à kè wa nììn pɛ́ɛ̀-ɖɛ̀ɔ̀ ɓɛ́ìn wɔ̃.’
13“Ké gàaɔ̀ cɛ̃ɛ ma wa nyɔ dyúáɖò gbo, ké ɔ ɖá, ‘Gmɔ̀ nɔ̄, ḿ ɓǎto, ḿ se m̀ ɖɛ gbà ɖò bũ̌ nyu. Má, m̀ wɔ̃́ ɓɛ́ m̀ kéɔ́ má wé dyúáɖòɛ̀ kũ̀à nyu, ɓɛ́ ḿ ké m̀ wé dyúáɖòɛ̀ pɛ́ɛ̀-ɖɛ̀ nyíe? 14Ɖú nì pɛ́ɛ̀-ɖɛ̀ɔ̀ dyí, ɓɛ́ m̀ ké m̀ ɓíɖí-taún mu. Ní hwòɖǒ poɛ gbɔ, ɓɛ́ ḿ ké pɛ́ɛ̀-ɖɛ̀ dyúáɖò ɓɛ́ ḿ nyíà m̀ kɛɛ gàa sè ɖe ɓě ɓɛ́ ḿ kpɔ̃à dyiɛɛ nyí. 15Má, ɖɛ ní mɔ́ ɓɛ́ ḿ ké ḿ mìɔùn nììn wíɖíɔ̀ mú nyùìn nyɛɛ, ḿ ɓɛ́ìn mú nyùɛ̀ne? M̀ kpá hwɛ̀nɛ̌ǐn, sepóɛɖé ḿ nyu ɖɛ nɔ̀mɔ̀ dyíin nyɛɛ jèè?’
16“Ɔ jèɛɛ, nyɔ ɓě sèà ɖe ɓó kàǔn wɛ̃ɛ mu dyúa ziìn, ké nyɔ ɓě ɓɛ́ wa nìà dyúa ɓó kàǔn wɛ̃ɛ mu ɖe ziìn.”
Jízɛ̀ cɛ̃ɛ kpa tã nììn kà ɔ mu mɛ́ìn nyɛ
(Máà 10:32-34; Ɖúù 18:31-34)
17Ti ɓɛ́ Jízɛ̀ kè ɔ ɖeín-nà-nyɔ̀ ɓaɖa-bùè sè sɔ̃́ ɓěɔ̀ nì ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú muɛń nyɛɛ, ɔ cɛ̃ɛ ma wa gbo, ké ɔ ɖá, 18“Ɓě gmɔ̀ nɔ̄, ɓěà nì ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú muɛń, ké wa mu mɔ̄ mɔ̀à Nyɔǔn-dyùɛ̀ Dyú-gààɔ̀ kɛɛ sáa-zà-nyɔ̀ kpa ɖɛ ɓěɔ̀ kè Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ xwaún dyi poùn, ké wa mu ḿ zaa kpɔ̃̀ìn kà ɓɛ́ ḿ ɓéɖé ḿ ké mɛ́ɛ. 19Ké wa mu ḿ ɓóɖó-dù kà kò ɖò ɓěɛ̀ nyɔ ɓěɔ̀ xwaún dyi poùn, ké wa mɔ̀ùn mu ḿ dyɔ́ ɓaɖaùn, ké wa mu ḿ gbàtò ɓàɖàìn, ké wa mu ḿ kɔ́ɖɔ́sì kɔ̃in kɔ̀ìn. Kɛɛ ní mu gĩɔ wóɖóùn ɓó wéɔ̀ tã nììnɔ̀ xwíníín.”
Ɖeín-nà-nyɔ̀ ɓěɔ̀ sɔ̃́ ɖe zɔ̀ìn Jízɛ̀ ɖɛ ɖò
(Máà 10:35-45)
20Wé ɖòɛ̀ ɓaɖaa, Zɛ́ɓìɖíìɛ̀ dyú-gàà ɓěɔ̀ kè wa ɖe mu ma Jízɛ̀ gbo, ké wa ɖeɔ̀ taɓa ma kɔ́-dù hwuɖu ɓó Jízɛ̀ dyúa, ké ɔ ɓaà ma ɔ ɓó ɖɛ ɖò jè.
21Ké Jízɛ̀ diè ma ɔ dyi, ké ɔ ɖá, “Ɖɛ́ nì mɔ́ kɛ́?”
Ké ɔ jǔ ma Jízɛ̀ gɔ̃̌, ké ɔ ɖá, “Ní mɔ́ ɓɛ́ m̀ kéɛ ḿ nyɛ́nɛ́ín ɖáìn kà ti nì muà kã́á jǔùn wɛ̃ɛ, ní dyú-gàà sɔ̃́ ɓěɛ̀ ɖò ké ɖé m̀ ɖiaún dya dèɖě, ɓɛ́ ɖò ké ɖé m̀ kunuaún dya dèɖě kɛ.”
22Kɛɛ Jízɛ̀ cɛ̃ɛ ma ɔ dyú-gàà ɓěɔ̀ gbo, ké ɔ ɖá, “Ɖɛ ɓě nìà zɔ̀ǔn wɛ̃ɛ, ɓě seɛ dyí dyuò. Ɓě ɓɛ́ìn gǎ-kòpò ní muà mú náìn nyɛɛ mú náìne?”
Ké wa ɖá, “À ɓɛ́ìn nyuɛ.”
23Ké Jízɛ̀ cɛ̃ɛ ma wa gbo, ké ɔ ɖá, “Ɓě mu ní gǎ-kòpòɔ̀ mú náìn jǎà, kɛɛ ḿ se kpé ɓéɖé ɓɛ́ ḿ ké nyɔ ké ḿ ɖiaún dyi kòɛ kè nyɔ ké ḿ kunuaún dyi kòɛɛ gã. Nyɔ ɓě ɓɛ́ wa mu pá ɓě nìà kɛ kɔ̃̀ùn wɛ̃ɛ mɔ̀ nyɔ ɓě kɔ̃̀ bìì ḿ Ɓǎ ɖǎ wa ti dyéìn nyɛ.”
24Ti ɓɛ́ ɖeín-nà-nyɔ̀ ɓaɖa-bùè tɔ̀ɔ̀ ɓěɔ̀ wɔ̃́ ma ɖɛ nìà kɛɛ, wa kpáìn ma ɖíí-gàà sɔ̃́ ɓěɔ̀ dyoɖoún. 25Ké Jízɛ̀ ɖá ma wa séín, ké ɔ cɛ̃ɛ ma wa gbo, ké ɔ ɖá, “Ɓě dyuò kà ɓóɖó-dù kà kò ɖò ɓěɛ̀ kã́á ɓěɔ̀ kɔ̃̀ wa wuɖuí ɖé ɖɛ séín mú, ké waà gɔ̌mànà-nyɔ̀ ɓěɔ̀ kpɔ̃ wa kànàǎ-kà kɛ. 26Ɔ se ɓéɖé ɓɛ́ ɔ ké ná nì ɖé ɓě hwìɛ̀. Kɛɛ ɔ jǔ ké ɓě ɖò dyi nyɔ vɛ̀nɛ̀ jǔɛ mɔ́ ní, ɔ mɛ mɔ̀ ɓěɛ̀ gbo-nì-nyɔ̀. 27Ɓě ɖò dyi mɔ́ ɓɛ́ ɔ ké nyɔ vɛ̀nɛ̀ jǔ ɖé ɓě séín hwìɛ̀ ní, nìí, ɔ mɛ mɔ̀ ɓěɛ̀ gǐì, 28kà ɓɛ́ mɔ̄ Nyɔǔn-dyùɛ̀ Dyú-gààɔ̀ seà dyi, ɓɛ́ nyɔ ɓě kéà ḿ bìì kũ̀à nyu, kɛɛ ɓɛ́ ḿ kéà wa bìì kũ̀à nyu, ɓɛ́ ḿ kéà ní fɛ̀ɛ̀ɔ̀ tò, ɓɛ́ ɔ kéà nyɔ pàɖǎ mú-gbǎàìn-ɖɛ̀ jǔɛ.”
Jízɛ̀ kánáìn dyéɖéín-dyi-kpè-gàà sɔ̃́ dyi
(Máà 10:46-52; Ɖúù 18:35-43)
29Ti ɓɛ́ Jízɛ̀ kè ɔ ɖeín-nà-nyɔ̀ ɓěɔ̀ nì ma ɖé Jɛ́ɖèkóò-hwɔ̀ɖɔ̀ɔ̀ mú sɔ̀ǔn wɛ̃ɛ, nyɔ kúɖúú ɓě sí ma wa kíɖíí. 30Ké dyéɖéín-dyi-kpè-gàà sɔ̃́ ɓɛ́ wa nì ma ɓó hwìèɔ̀ gbaa wɔ̃́ɔ ma kà Jízɛ̀ nì ma ziɛń nyɛ, ké wa páná ma mú, ké wa ɖá, “Dèɓéɛ̀ Dyú-gàà, dyé à wìǐn.”
31Ké nyɔ kúɖúú ɓěɔ̀ po ma wa ɓɔ́í. Wa cɛ̃ɛ ma wa gbo, ɓɛ́ wa ké gìɖìǐ nì. Kɛɛ dyɛ̌ɛ̀ wa pánáá ma mú ɖe mìɔ, ké wa ɖá, “Ɓɔ̌ɔ̀, mɔ̀ mɔ̀à Dèɓéɛ̀ Dyú-gààɔ̀ kɛɛ, dyé à wìǐn.”
32Ké Jízɛ̀ nyànà ma dyi, ké ɔ ɖá ma wa. Ɔ diè ma wa dyi, ké ɔ ɖá, “Ɖɛ́ ɓě mɔ́ ɓɛ́ ḿ ké ɓě bìì nyuɛ́?”
33Ké wa cɛ̃ɛ ma ɔ gbo, ké wa ɖá, “Ɓɔ̌ɔ̀, à mɔ́ ɓɛ́ m̀ ké à dyéɖé ɓěɔ̀ kaà.”
34Púɛɛ, wìì nyu ma Jízɛ̀ ɓó wa jè. Ɔ jèɛɛ, ɔ tìnììn ma waà dyéɖé ɓěɔ̀ dyi, ké wa dyé ma dyi wàɖà, ké wa sí ma ɔ kíɖíí.
Currently Selected:
Máfíò 20: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
