Máfíò 19

Jízɛ̀ tɛ̀mɛ̀ìn nyɔǔn ɖɛ ɓá nyɔ́nɔ́ ɓɔ́ jè dyí

(Máà 10:1-12)

1Ti ɓɛ́ Jízɛ̀ hwɔ ma ɖɛ ɓěɛ̀ cɛ̃ɛ kɛɛ, ɔ sɔ̀ ma ɖé Gáɖàɖíì-ɓòɖòɔ̀ kɔ̃, ké ɔ mu ma ɖé Júɖìà-ɓòɖò kɔ̃, ɖé Jɔ́nì-nìɔ̀ ɖeín. 2Ké nyɔ kúɖúú ɓě sí ma ɔ kíɖíí, ké ɔ kánáìn ma waà wɛ́-nyɔ̀ ɓěɔ̀ dyi.

3Ɓó tia ɓaɖaa, Fáɖòsíì-nyɔ̀ ɓěɔ̀ ɖíɛ́ ɓě dyi ma Jízɛ̀ gbo, ɓɛ́ wa ké ma ɔ mú dɔ̃̌. Ké wa diè ma ɔ dyi, ké wa ɖá, “Ɔ nɔ̀mɔ̀ dyíin ɓɛ́ gàa ɖò ké ɔ gmàà ɓɔ́ ɓó ɖɛ séín jèè?”

4Ké Jízɛ̀ jǔ ma wa gɔ̃̌, ké ɔ ɖá, “Ɓě séè Gèɖèpɔ́ɔ̀-cèè-ɖɛ̀ɔ̀ wáká nyɔ nìà kɛɛ wuɖuún zà ɖòò? Ɔ wákáɔ̀ ɖá, ‘Ɖé ɖɛ dè gbɔɔ̀ múɛɛ, Ɖɛ-séín-mɛ-nyɔ̀ɔ̀ mɛ ma gàa kè màa. 5Ké ɔ ɖá, “Ɓó ɖɛa jèɛɛ, gàaɔ̀ mu ɔ ɖe kè ɔ ɓǎ dyi táàùn, ɓɛ́ ɔ kè ɔ gmààɔ̀ ké xwaún kpáìn, ɓɛ́ wa ké nyɔ dyúáɖò jǔ.” ’ 6Ɔ ɖǎ ná nìǐn, wa se nyɔ sɔ̃́ ɖe, kɛɛ wa mɔ̀ǎ nyɔ dyúáɖò. Ɔ jèɛɛ, ɖɛ Gèɖèpɔ́ɔ̀ ɖǎ xwaún poìn nyɛɛ, nyɔ ɖò ní nyuɛ, ké wa ní sɔìn mú.”

7Ké Fáɖòsíì-nyɔ̀ ɓěɔ̀ diè ma ɔ dyi, ké wa ɖá, “Nìí, ɖɛ́ kɔ̃̀ jè Mózè cɛ̃ɛ ma kà ɓɛ́ gàaɔ̀ mɛ céè buɛ̀-cèè-ɖɛ̀, ɓɛ́ ɔ kéɛ ɔ gmààɔ̀ nyí, ɓɛ́ ɔ kéà màaɔ̀ ɔ ɓíɖí ɖe tò kɛ́?”

8Ké Jízɛ̀ cɛ̃ɛ ma wa gbo, ké ɔ ɖá, “Mózè wɔ̃́ ɓɛ́ ɓě ké ma ɓěɛ̀ gmàà ɓěɔ̀ ɓɔ́, sepóɛɖé ɓěɛ̀ hwòɖǒ-dyùà ɓěɔ̀ kùmù jè. Kɛɛ ɔ se ma kǎa nì sɔ̀ìn ɖé ɖɛ dè gbɔɔ̀ mú. 9Ḿ mɛ cɛ̃ɛ ɓě gbo, nyɔ kɔ̃̀ gmàà se gbàɖàùn po, ké ɔ mu ɔ ɓɔ́ùn, ɓɛ́ ɔ ké màa kà kò ɖò dyi kpɔ̃ kɛɛ, nyɔɔ̀ po gmaɖe.”

10Ké ɔ ɖeín-nà-nyɔ̀ ɓěɔ̀ cɛ̃ɛ ma ɔ gbo, ké wa ɖá, “Gàa kè ɔ gmàà jè dyi kà ɓó nìɛ̌ mu ní, nìí, ɔ nɔ̀mɔ̀ dyíin ɓɛ́ nyɔ ɖò ké se dyɛɛ nyɔ́nɔ́ dyi kpɔ̃ wà!”

11Ké Jízɛ̀ ɖá, “Nyɔǔn séín se ɖɛ nìà kɛ dyi kpɔ̃ɔ ɓɛ́ìn, ɔ sèìn nyɔ ɓě ɓɛ́ Gèɖèpɔ́ɔ̀ nyí kpé, ɓɛ́ wa kéɛ dyi kpɔ̃ɛɛ ɖòùn. 12Ɖɛ kɔ̃̀ jè gàa ɖíɛ́ ɓě ní kpɔ̃à nyɔ́nɔ́ dyiɛɛ ɓéɖé xwíníín kò-kò. Gàa ɖíɛ́ ɓě se gàa. Kǎà wa mɔ̀ùn nyu wóɖóɛ. Ɖíɛ́ ɓě mɔ̀ùn nì ná, sepóɛɖé nyɔ ɖò nyu ná wa. Ké ɖíɛ́ ɓě ní kpɔ̃ nyɔ́nɔ́ dyi ɓó Gèɖèpɔ́ɔ̀ kã́á-ɓòɖò nìà ɖé dyɔún wɛ̃ɛ jè. Nyɔ ɓɛ́ ɔ ɓɛ́ìn ɖɛ nìà kɛ dyi kpɔ̃ɔ kɛɛ mɛ kpɔ̃ɔ dyi.”

Jízɛ̀ po dyú mɛ́nɛ́ɛ́ ɓě mana kɔ̃

(Máà 10:13-16; Ɖúù 18:15-17)

13Wé ɖòɛ̀ ɓaɖaa, nyɔ ɖíɛ́ ɓě dyà ma waà dyú ɓě Jízɛ̀ gbo, ɓɛ́ ɔ ké wa sɔ̃ dúún dè, ɓɛ́ ɔ ké ma ɓaà, ɓɛ́ Gèɖèpɔ́ɔ̀ ké wa mana kɔ̃ po. Kɛɛ Jízɛ̀ɛ̀ ɖeín-nà-nyɔ̀ ɓěɔ̀ po ma nyɔ ɓěɔ̀ ɓɔ́í. 14Ké Jízɛ̀ cɛ̃ɛ ma ɔ ɖeín-nà-nyɔ̀ ɓěɔ̀ gbo, ké ɔ ɖá, “Ɓě táà dyú mɛ́nɛ́ɛ́ ɓěɔ̀ dyi. Wa mɛ dyi ḿ gbo. Ɓěǐn ɖá ɓɛ́ ɓě ké wa dyí ɓàɖàìn, sepóɛɖé wa mɔ̀ nyɔ mu Gèɖèpɔ́ɔ̀ kã́á-ɓòɖò nìà ɖé dyɔún wɛ̃ɛ kɔ̃̀ùn.” 15Ké Jízɛ̀ po ma wa mana kɔ̃ dyììn ɖé wa sɔ̃ dúún dè-dè mú. Sɔ̀ìn ɓóɛ gboɛɛ, ɔ sɔ̀ ɓó páɔ̀ mú.

Gàa-dyù gmɔ̀ bã-bã ɖò jè

(Máà 10:17-31; Ɖúù 18:18-30)

16Wé ɖòɛ̀ ɓaɖa ɖeɛɛ, gàa-dyù gmɔ̀ ɖò dyi ma Jízɛ̀ gbo, ké ɔ diè ma Jízɛ̀ dyi, ké ɔ ɖá, “Nyɔ-ɖɛ-tɛ̀mɛ̀ìn-nyɔ̀, ɖɛ́ nɔ̀mɔ̀ dyíin ḿ mɛ nyu, ɓɛ́ ḿ ké sè-ná-sèɛ̀ fɛ̀ɛ̀ ɓéɖéɛ́?”

17Ké Jízɛ̀ jǔ ma ɔ gɔ̃̌, ké ɔ ɖá, “Ɖɛ́ kɔ̃̀ jè m̀ dièà ḿ dyi ɓó ɖɛ mɔ̀ ɖɛ nɔ̀mɔ̀ dyíin nyɛɛ jè kɛ́? Nyɔ dyúáɖò nyɛ̀nɛ̀ɛ̀ kɔ̃̀ kpeɖe nɔ̀mɔ̀ dyíin. M̀ dyi mɔ́ ɓɛ́ m̀ ké fɛ̀ɛ̀ ɓéɖé ní, nìí, kpɔ̃ gma ɓěɔ̀ dyi.”

18Ké gàaɔ̀ diè ma ɔ dyi, ké ɔ ɖá, “Gmaɔ̀ nyɛ́ kè nyɛ́ɛ̀?”

Ké Jízɛ̀ ɖá, “Ɓě ɖò ní ɖá ɓɛ́ ɓě ké kú ɖáɓá. Ɓě ɖò ní ɖá ɓɛ́ ɓě ké gmaɖe po. Ɓě ɖò ní ɖá ɓɛ́ ɓě ké dyíɖí. Ɓě ɖò ní ɖá ɓɛ́ ɓě ké seɛ̀-zàse nyu. 19Dyé m̀ ɖe kè m̀ ɓǎ kpéín, ké m̀ mɛ ɖɛ̀ɓɛ̀ m̀ mǔè ɖò mú kà m̀ ɖɛ̀ɓɛ̀à m̀ mìɔùn múɛ.”

20Hwɛ̀ ké gàaɔ̀ cɛ̃ɛ ma Jízɛ̀ gbo, ké ɔ ɖá, “Ḿ ɖǎ gma séín ɓěɛ̀ dyi kpɔ̃. Ɖɛ ḿ ɓéɖé ɓɛ́ ḿ ké nyu ɖeɛ́?”

21Ké Jízɛ̀ cɛ̃ɛ ma ɔ gbo, ké ɔ ɖá, “M̀ dyi mɔ́ ɓɛ́ m̀ ké se kɛɛ ɖò ɓéɖé fɔɔ ní, nìí, m̀ mɛ mu, ɓɛ́ m̀ ké ɖɛ séín ɓě ɓɛ́ m̀ ɓéɖéɛɛ peɖe, ɓɛ́ m̀ ké wíɖíɔ̀ gǎ-dyé-nyɔ̀ ɓě nyí. Nìí, nì mu dyi-dè-ɖɛ̀ ɓéɖéìn ɖé dyɔún. Ké m̀ mɛ dyi, ɓɛ́ ḿ kè mɔ̀ ké mú naìn.”

22Ti ɓɛ́ gàaɔ̀ wɔ̃́ ma ɖɛa kɛɛ, ɔ hwòɖǒ zi ma ɖé ɖei kpáuń mìɔ, ké ɔ mu ma ɔ ɖɛ, sepóɛɖé ɔ bã ma ní mìɔ.

23Ké Jízɛ̀ cɛ̃ɛ ma ɔ ɖeín-nà-nyɔ̀ ɓěɔ̀ gbo, ké ɔ ɖá, “Ḿ cɛ̃ ɓě jǎà gbo, ɔ mu mú kàmàǔn ziìn ɓɛ́ bã-nyɔ̀ ɖò ké ɖé Gèɖèpɔ́ɔ̀ kã́á-ɓòɖò nìà ɖé dyɔún wɛ̃ɛ kɔ̃ mu. 24Ḿ cɛ̃ɛ ɓě gbo ɖe, ɔ kàmà mú ɓɛ́ bã-nyɔ̀ ké ɖé Gèɖèpɔ́ɔ̀ kã́á-ɓòɖò nìà ɖé dyɔún wɛ̃ɛ kɔ̃ mu, ké ɔ zi ɓɛ́ sǒ-nì-gbu-kɔ̃ún ké taɓa-ɖɔ-ɓì mú cɛ̃̀ìn nyɛɛ dyí.”

25Ti ɓɛ́ ɖeín-nà-nyɔ̀ ɓěɔ̀ wɔ̃́ ma ɖɛa kɛɛ, wa zi ma dyi giniɛ̌n mìɔ, ké wa ɖá, “Ɔ dyi ná nìǐn, nìí, nyɛ́ ɓɛ́ìn póɛ kɛ́?”

26Ké Jízɛ̀ gmɔ̀ ma wa dya, ké ɔ ɖá, “Nyɔǔn-dyù se ɖɛ nìà kɛ nyuɛ ɓɛ́ìn, kɛɛ Gèɖèpɔ́ɔ̀ ɓɛ́ìn ɖɛ séín nyuɛ.”

27Hwɛ̀ ké Píɖɛ̀ cɛ̃ɛ ma ɔ gbo, ké ɔ ɖá, “Gmɔ̀ nɔ̄, à mɔ̀ùn ɖǎ ɖɛ séín dyi táà, ké à ɖǎ m̀ kíɖíí sí. Ɖɛ́ à mu dyéìn nyɛ́?”

28Ké Jízɛ̀ cɛ̃ɛ ma wa gbo, ké ɔ ɖá, “Ḿ cɛ̃ ɓě jǎà gbo, ti mɔ̄ mɔ̀à Nyɔǔn-dyùɛ̀ Dyú-gààɔ̀ kɛɛ mu ní zèè dĩ́ín-dĩ̀ìnɔ̀ kɔ̃ dya dèɖěìn ɖé ɓóɖó-kpà ɖìèɔ̀ kɔ̃ɛɛ, ɓě mɔ̀ nyɔ ɓě ɖǎà ḿ kíɖíí síɛɛ mu zèè ɓaɖa-bùè sè sɔ̃́ kɔ̃ dya dèɖěìn, ɓɛ́ ɓě ké Éézùɖùɛ̀-dyù ɓěɔ̀ xwéɖé-dù ɓaɖa-bùè sè sɔ̃́ ɓěɔ̀ zaa wɔ̃ po. 29Ké nyɔ ɓɛ́ ɔ táà ɔ gbǒ ɓě mɔɔ ɔ ɖíí-gàà ɓě mɔɔ ɔ ɖíí-màà ɓě mɔɔ ɔ ɖe mɔɔ ɔ ɓǎ mɔɔ ɔ dyú ɓě mɔɔ ɔ pá ɓě dyi ɓó ní jè kɛɛ mu ɖɛ ɓě nì ná kɛɛ dú hɔ̃dɛ̀ɖɛ̀ ɖò dyéìn, ké ɔ mu sè-ná-sèɛ̀ fɛ̀ɛ̀ ɓéɖéìn. 30Nyɔ pàɖǎ nìà dyúa ɓó kàǔn wɛ̃ɛ mu ɖe ziìn ɖé ɓóɖó ɖìè nìà dyiɛń nyɛɛ kɔ̃, ké nyɔ pàɖǎ sèà ɖe ɓó kàǔn wɛ̃ɛ mu dyúa ziìn ɖé ɓóɖó ɖìè nìà dyiɛń nyɛɛ kɔ̃.”

Currently Selected:

Máfíò 19: ƁB02

Highlight

Copy