Máfíò 15

Tɛ̀mɛ̀ìn-ɖɛ̀ sɔ̀ìn ɖé ɓǎ nììn ɓǎ ɓěɔ̀ gboɛ

(Máà 7:1-13)

1Ké Fáɖòsíì-nyɔ̀ ɓěɔ̀ kè Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ ɖíɛ́ ɓě sɔ̀ ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ké wa mu ma Jízɛ̀ gbo. Ké wa diè ma ɔ dyi, ké wa ɖá, 2“Ɖɛ́ kɔ̃̀ jè nì ɖeín-nà-nyɔ̀ ɓěɔ̀ seà ɖɛ ɓě ɓɛ́ à ɓǎ nììn ɓǎ ɓěɔ̀ tɛ̀mɛ̀ìn ma à kɛɛ dyi kpɔ̃ kɛ́? Wa ní dèɖè xwai, ké wa ɖi ɖɛ.”

3Ké Jízɛ̀ zà ma ɖé wuɖu, ké ɔ ɖá, “Ɖɛ́ kɔ̃̀ jè ɓě mɔ̀ùn kpɔ̃à ɓě mìɔùn nììn tɛ̀mɛ̀ìn-ɖɛ̀ ɓěɔ̀ dyi, ké ɓě seà ɖɛ ɓě ɓɛ́ Gèɖèpɔ́ɔ̀ cɛ̃ ɓɛ́ à ké nyuɛɛ dyi kpɔ̃ kɛ́? 4Sepóɛɖé Gèɖèpɔ́ɔ̀ ɖá, ‘M̀ mɛ dyé m̀ ɖe kè m̀ ɓǎ kpéín,’ ɔ kè ‘Nyɔ mɔ̀ nyɔ ɓɛ́ ɔ cɛ̃ɛ ɔ ɖe mɔɔ ɔ ɓǎ wuɖu gbà kɔ̃ún wɛ̃ɛ, wa mɛ ɖáɓá nyɔɔ̀ cá.’ 5Kɛɛ ɓě mɔ̀ùn ɖá, ‘Ɔ jǔ ké nyɔ ɖò dyi ɖɛ ɔ kéɔ́ ɔ ɖe mɔɔ ɔ ɓǎ gbo kpáìn nyɛɛ ɓéɖé, ké ɔ dyiɛ cɛ̃ kà ɓɛ́ ɔ ɖǎa Gèɖèpɔ́ɔ̀ nyíɛɛ ní, nìí, ɔ se ɓéɖé ɓɛ́ ɔ ké ɔ ɓǎ gbo kpá ɖe.’ 6Ké kǎà ɓě kpɔ̃à ɓě mìɔùn nììn tɛ̀mɛ̀ìn-ɖɛ̀ ɓěɔ̀ dyi, ké ɓě seà ɖɛ ɓɛ́ Gèɖèpɔ́ɔ̀ cɛ̃à ɓě gboɛɛ ɖɛ ɖáà. 7Ɓě mɔ̀ dyéɖéi-nyu-nyɔ̀ ɓě. Ɖɛ Àzédyà cɛ̃ zɔ̃̌ɔ̀ ɓá ɓě jè dyíɛɛ mɔ̀ jǎà. Ɖɛ ɔ cɛ̃ zɔ̃̌ɔ̀ kɛɛ kɛà kɛ̀. Ɔ ɖá,

8‘Nyɔ ɓěɛ̀ dè ḿ dya ɖé waà wĩín-wùɖù mú,

kɛɛ waà hwòɖǒ-dyùà tɔmɔìn ḿ bũ̌in mìɔ.

9Ní ɓiè-ɓiè ɓɛ́ wa nyuɛɛ se xwíníín ɖò kɔ̃̀.

Wa tɛ̀mɛ̀ìn nyɔǔn ɓɛ́ wa ké nyɔǔn-dyùɛ̀ tɛ̀mɛ̀ìn-ɖɛ̀ kíɖíí sí kà ɔ mɔ̀ɔ̌ kà Gèɖèpɔ́ɔ̀ gma ɓěɔ̀ kɛ.’ ”

Jízɛ̀ cɛ̃ ɖɛ nyuɛ ké nyɔ se mú hwɛ̀ kɛɛ jè

(Máà 7:14-23)

10Sɔ̀ìn ɓóɛ gboɛɛ, Jízɛ̀ ɖá ma nyɔ kúɖúú ɓěɔ̀ ɖé ɔ mìɔùn gbo, ké ɔ cɛ̃ɛ ma wa gbo, ké ɔ ɖá, “Ɓě tò ɖùǔ, ɓɛ́ ɓě ké ɖɛ múin wɔ̃́. 11Ɖɛ nyuɛ ké nyɔ se mú hwɛ̀ kɛɛ se ɖɛ ɓɛ́ nyɔɔ̀ ɖiɛ. Kɛɛ ɖɛ ɔ cɛ̃ɛ, ɔ nyuɛ ké ɔ se mú hwɛ̀.”

12Hwɛ̀ ké ɔ ɖeín-nà-nyɔ̀ ɓěɔ̀ dyi ma ɔ gbo, ké wa diè ma ɔ dyi, ké wa ɖá, “M̀ dyuò kà Fáɖòsíì-nyɔ̀ ɓěɔ̀ hwòɖǒ kpá ɖé ɖei ti ɓɛ́ wa wɔ̃́ ma ɖɛ m̀ cɛ̃ ma kà kɛɛ̀?”

13Ké Jízɛ̀ zà ma ɖé wuɖu, ké ɔ ɖá, “Wa mu ɓáá-ɖɛ̀ séín ɓɛ́ ḿ Ɓǎ nìà ɖé dyɔún wɛ̃ɛ se ma ɓáa hwuɖu zàùn. 14Ɓě táà wa dyi. Wa kpè dyéɖéín dyi, ké wa zàìn nyɔǔn hwìè da. Dyéɖéín-dyi-kpè-nyɔ̀ ɖò dyi ɔ mǔè dyéɖéín-dyi-kpè-nyɔ̀ ɖò hwìè da zàìn ní, nìí, wa sɔ̃́ɔ̀ kpá ɓí.”

15Ké Píɖɛ̀ cɛ̃ɛ ma ɔ gbo, ké ɔ ɖá, “Zà nɔ́ɔ̀ xwíníín mú ɖé à gbo.”

16Ké Jízɛ̀ ɖá, “Ɓě mɔ̀ùn se ɖɛ múin wɔ̃́ɔ ɓɛ́ìn ɖekèè? 17Ɓě seɛ múin wɔ̃́ kà ɓɛ́ ɖɛ nyɔǔn ɖi kɛɛ mu ɖé wa xwíníín, ké wa mu hwìè gbo kɛɛ̀? 18Kɛɛ ɖɛ ɓɛ́ nyɔ ɖò cɛ̃ kɛɛ, ɔ sɔ̀ ɖé ɔ hwòɖǒ bũ̌, ké ɔ nyuɛ ké nyɔɔ̀ se mú hwɛ̀. 19Sepóɛɖé ɖɛ gbà ɓě nì ɖé nyɔǔn-dyùɛ̀ hwòɖǒ bũ̌ɛɛ, ɖéɛ̀ ɔ nyu. Ɔ hwɔìn kà kú-ɖáɓá-ɖáɓá kè gmaɖe-po-po kè gbàɖàùn-po-po kè dyíɖí-dyíɖí kè seɛ̀-zàse nyu-nyu ɔ kè nyɔ mǔè ɖò ɖɛ gbà kɔ̃ún-cɛ̃-cɛ̃. 20Ɖɛ ɓěɛ̀ nyuɛ ké nyɔ se mú hwɛ̀. Kɛɛ ɔ jǔ ké m̀ se xwai dèɖè, ké m̀ dyi ɖɛ ɖi ní, ɔ seɛ nyuɛ ɓɛ́ìn ɓɛ́ m̀ ké se-mú-hwɛ̀-nyɔ̀ jǔ.”

Màa ɖòɛ̀ hwìɖǐǐ-taɓa-taɓa

(Máà 7:24-30)

21Ti ɓɛ́ Jízɛ̀ ɖǎ ma wuɖu jaɖaa, ɔ mu ma ɖé gbɛ̌ɛ̀ kɔ̃̀ mú Táà-hwɔ̀ɖɔ̀ɔ̀ kè Zíɖɔ̀ùn-hwɔ̀ɖɔ̀ɔ̀ nìà kɛ. 22Ké Kénà-màà ɖò sɔ̀ ma ɖé gbɛ̌ɛ̀ɔ̀ mú, ké ɔ dyi ma Jízɛ̀ gbo, ké ɔ páná ma mú, ké ɔ ɖá, “Ɓɔ̌ɔ̀, mɔ̀ mɔ̀à Dèɓéɛ̀ Dyú-gààɔ̀ kɛɛ, dyé ḿ wìǐn. Zùù gbà ɖò nì ní dyú-màà mú, ké ɔ nì ɔ gǎ dyéɛń mìɔ.”

23Kɛɛ Jízɛ̀ se ma màaɔ̀ gɔ̃̌ jǔ. Ɔ jèɛɛ, ɔ ɖeín-nà-nyɔ̀ ɓěɔ̀ dyi ma, ké wa ɓaà ma ɔ, ké wa ɖá, “Cɛ̃ɛ màaɔ̀ gbo, ɓɛ́ ɔ ké à ɖeín sɔ̀, sepóɛɖé ɔ sí à kíɖíí, ké ɔ nì kuɖu-kuɖu nyuɛń.”

24Ké Jízɛ̀ cɛ̃ɛ ma wa gbo, ké ɔ ɖá, “Gèɖèpɔ́ɔ̀ ɖoɓo ḿ ɖé Éézùɖùɛ̀-dyù mɔ̀ ɓáɖáá sè xwáɖáún ɓěɔ̀ ɖòùn gbo.”

25Hwɛ̀ ké màaɔ̀ dyi ma, ké ɔ taɓa ma kɔ́-dù hwuɖu ɓó ɔ dyúa, ké ɔ ɖá, “Ɓɔ̌ɔ̀, kpá wɛ́ɛ ḿ gboe.”

26Ké Jízɛ̀ jǔ ma ɔ gɔ̃̌, ké ɔ ɖá, “Ɔ se dyíin nɔ̀mɔ̀ ɓɛ́ nyɔ ké dyú ɓěɔ̀ ɖii-ɖɛ̀ɔ̀ dyí ɖú, ɓɛ́ nyɔ kéɛ gbe nyí.”

27Kɛɛ màaɔ̀ ɖá, “Ɓɔ̌ɔ̀, ɔ mɔ̀ jǎà jɛ́ɛ́, kɛɛ gbe ɓěɔ̀ ɖi ɖii-ɖɛ̀-bùǒ ɓě ɓɛ́ wa sɔ̀ waà kɔ̃̀-nyɔ̀ɛ̀ téɓèɖèɔ̀ kɔ̃, ké wa wáɖá ɓíɖíiɛɛ ní.”

28Hwɛ̀ ké Jízɛ̀ cɛ̃ɛ ma ɔ gbo, ké ɔ ɖá, “Màa wè, nì hwìɖǐǐ-taɓa-taɓaɔ̀ ɓúá kpéín. Ɖɛ m̀ mɔ́à kɛɛ mu ná m̀ bìì kpáùn.” Ké màaɔ̀ dyú-mààɔ̀ káná ma dyi ɓó ti déínɔ̀ xwíníín.

Jízɛ̀ kánáìn wɛ́-nyɔ̀ pàɖǎ dyi

29Sɔ̀ìn ɓóɛ gboɛɛ, Jízɛ̀ nà ma Gáɖàɖíì Dòùnɓìǎɔ̀ wĩin, ké ɔ mu ma toɖo ɖò dya, ké ɔ dèɖě ma ɖé dya. 30Ké nyɔ kúɖúú ɓě dyi ma ɖé ɔ gbo, ké wa dyà ma nyɔ ɓě ɓɛ́ wa kɔ́ɖɔ́ kɛ kè nyɔ ɓě ɓɛ́ wa kpè dyéɖéín dyiɛ kè ɓoo-ɓoo ɓě ɔ kè nyɔ ɓě ɓɛ́ wa ɓéɖé wɛ́ tɔ̀ɔ̀ ɓěɛɛ Jízɛ̀ gbo. Ké wa pɛ̃́ìn ma wa ɓó Jízɛ̀ dyúa dyi, ké ɔ kánáìn ma wa dyi. 31Ti ɓɛ́ nyɔ ɓěɔ̀ wɔ̃́ ma ɓoo-ɓoo ɓěɔ̀ wùɖùɛ̀, ké wa dyé ma kɔ́ɖɔ́-nyɔ̀ ɓěɔ̀ kè nyɔ ɓě kɔ̃̀ ɓo mɛ́ɛ dyi nàà, ké wa dyé ma dyéɖéín-dyi-kpè-nyɔ̀ ɓěɔ̀ dyi dyéɛ kɛɛ, wa giniìn ma dyi mìɔ, ké wa ɓàìn ma Éézùɖùɛ̀ Gèɖèpɔ́ɔ̀.

Jízɛ̀ nyí gàa táázĩ̀ìn hĩinyɛ ɖii-ɖɛ̀

(Máà 8:1-10)

32Sɔ̀ìn ɓó ɖeɛɛ, nyɔ kúɖúú ɓě poìn ma Jízɛ̀ ɖei dyí ɖe. Ké Jízɛ̀ ɖá ma ɔ ɖeín-nà-nyɔ̀ ɓěɔ̀ ɓó ɔ gbo, ké ɔ ɖá, “Nyɔ ɓěɛ̀ jè nyùìn ḿ wìì, sepóɛɖé wa nyuá ḿ gbo wé tã, ké ɖii-ɖɛ̀ ɖò se nì ɖe ɓɛ́ wa kéɛ ɖi. Ké ḿ se mɔ́ ɓɛ́ wa ké mɔ́ún sè, ɓɛ́ ḿ ké wa ɖe ɖoɓo, wa ní kɔ̃̀ ɖà hwìèɔ̀ gba kṹún kpáìn.”

33Ké ɖeín-nà-nyɔ̀ ɓěɔ̀ diè ma ɔ dyi, ké wa ɖá, “Dɛ̌ à ɓɛ́ìn ɖii-ɖɛ̀ dyéɛ nɔ̄ gbǎùn-fúɖúá nìà kɛ kɔ̃, ɓɛ́ ɔ ké nyɔ ɓěɛ̀ mɔ́ xwíníín zà kɛ́?”

34Ké Jízɛ̀ diè ma wa dyi, ké ɔ ɖá, “Bɛɖɛɛ̀-kpò jĩ̀ xwɛ̌ ɓě ɓéɖéɛ́?”

Ké wa ɖá, “À ɓéɖé bɛɖɛɛ̀-kpò mɛ̀nɛ̌ìn-sɔ̃́ kè zimii-dyù mɛ́nɛ́ɛ́ wè.”

35Ké Jízɛ̀ cɛ̃ɛ ma nyɔ kúɖúú ɓěɔ̀ gbo, ɓɛ́ wa ké ma ɓó ɓíɖíi dyi kò. 36Ké ɔ ɖú ma bɛɖɛɛ̀-kpò mɛ̀nɛ̌ìn-sɔ̃́ɔ̀ kè zimii ɓěɔ̀ dyí, ké ɔ po Gèɖèpɔ́ɔ̀ zùo. Ké ɔ jaɖaìn ma wa kpói, ké ɔ nyí ma wa ɖeín-nà-nyɔ̀ ɓěɔ̀, ké ɖeín-nà-nyɔ̀ ɓěɔ̀ mɔ̀ùn geìn ma wa nyɔ kúɖúú ɓěɔ̀ múin. 37Ké nyɔ séín ɓěɔ̀ ɖi ma ɖɛ, ké wa ɖoɓo ma. Ké wa poìn ma bɛɖɛɛ̀ɔ̀ kè zimiiɔ̀ nyɔ sè dyiɛɛ dyí, ké ɔ nyu ma tìě-wè mɛ̀nɛ̌ìn-sɔ̃́. 38Nyɔ ɓě ɓɛ́ wa ɖi ma kà bɛɖɛɛ̀ɔ̀ kè zimiiɔ̀ kɛɛ mɔ̀ ma gàa táázĩ̀ìn hĩinyɛ. Wa se ma màa ɓěɔ̀ kè dyú ɓěɔ̀ zɛɖɛ.

39Sɔ̀ìn ɓóɛ gboɛɛ, Jízɛ̀ ɖoɓo ma nyɔ ɓěɔ̀ wa ɓíɖí ɖe. Ké ɔ dyá ma ɓáɖáà ɖò mú, ké ɔ mu ma ɖé Mágàɖɛ̀ìn-hwɔ̀ɖɔ̀ɔ̀ mú.

Currently Selected:

Máfíò 15: ƁB02

Highlight

Copy