Máfíò 16

Fáɖòsíì-nyɔ̀ ɓěɔ̀ kè Sádyùsíì-nyɔ̀ ɓěɔ̀ mɔ́ ɖàɓàìn-ɖɛ̀ ɖò dyéɛ dyi

(Máà 8:11-13; Ɖúù 12:54-56)

1Wé ɖòɛ̀ ɓaɖaa, Fáɖòsíì-nyɔ̀ ɓěɔ̀ kè Sádyùsíì-nyɔ̀ ɓěɔ̀ ɖíɛ́ ɓě dyi ma Jízɛ̀ gbo. Wa mɔ́ ɓɛ́ wa ké ma ɔ mú dɔ̃̌. Ɔ jèɛɛ, wa diè ma ɔ dyi, ɓɛ́ ɔ ké ma wa bìì ɖàɓàìn-ɖɛ̀ ɖò nyu sɔ̀ìn ɖé dyɔún. 2Kɛɛ Jízɛ̀ cɛ̃ɛ ma wa gbo, ké ɔ ɖá, “Dyóɖó dyi ziɛń nìǐn, ɓě ɖá, ‘Ní se ɖaɓaá mu gàɖàà, sepóɛɖé dyɔɔ̀ dyí nì zĩ-zã.’ 3Ké zɔ̃ dyi zɔ̃ nyɛ̀nɛ̀ɛ̀ ní, ɓě ɖá, ‘Ní mu zɛ̃̌ɛ̀ ɖaɓaùn, sepóɛɖé dyɔɔ̀ dyí nì zĩ-zã, ké ní kpɔ̃ dyi.’ Ɓě dyi dyɔɔ̀ dyí gmɔ̀ ní, nìí, ɓě ɓɛ́ìn ɖɛ mɔ̀ ɔ xwíníín nyɛɛ cɛ̃ɛ. Kɛɛ ɓě se ɖàɓàìn-ɖɛ̀ ɓá tiɔ̀ dyíɛɛ xwíníín dyuò. 4Ɓě mɔ̀à kpeɖeín-nyìnììn-nyɔ̀ kè Gèɖèpɔ́ɔ̀ jè dyi-táà-nyɔ̀ ɓěɛɛ, ɓě mɔ̀ ɖàɓàìn-ɖɛ̀ dyi-mɔ́-nyɔ̀. Ɖàɓàìn-ɖɛ̀ nyɛ̀nɛ̀ɛ̀ ɓɛ́ Gèɖèpɔ́ɔ̀ mu ɓě dyí tɛ̀mɛ̀ìn nyɛɛ hwɔìn ɖɛ ɓɛ́ ɔ nyu zɔ̃̌ɔ̀ kà kpáá-ɖɛ̀-cɛ̃-nyɔ̀ Jónà bũ̌ kɛ.” Ké Jízɛ̀ sɔ̀ ma ɓó wa gbo dyí, ké ɔ mu ma.

Fáɖòsíì-nyɔ̀ ɓěɔ̀ kè Sádyùsíì-nyɔ̀ ɓěɔ̀ nììn bɛɖɛɛ̀-dyáìn-ɖɛ̀ɔ̀ jè

(Máà 8:14-21)

5Ti ɓɛ́ ɖeín-nà-nyɔ̀ ɓěɔ̀ péɖé ma dòùnɓìǎɔ̀ kɛɛ, bɛɖɛɛ̀ kpa jè dyi ma wa hwìɖǐi. 6Ké Jízɛ̀ cɛ̃ɛ ma wa gbo, ké ɔ ɖá, “Ɓě mɛ ma mú ɓó Fáɖòsíì-nyɔ̀ ɓěɔ̀ kè Sádyùsíì-nyɔ̀ ɓěɔ̀ bɛɖɛɛ̀-dyáìn-ɖɛ̀ɔ̀ jè.”

7Ké wa cɛ̃ìn cɛ̃̀ìn ma gbo, ké wa ɖá, “Ɔ mɔ̀ à se dyɛ bɛɖɛɛ̀ dyà jèo.”

8Jízɛ̀ dyuò ma ɖɛ wa nì ma cɛ̃iń nyɛɛ dyí jèɛɛ, ɔ diè ma wa dyi, ké ɔ ɖá, “Ɖɛ́ kɔ̃̀ jè ɓě nìà gbo cɛ̃ìn cɛ̃̀ǐn kà ɓɛ́ ɓě se bɛɖɛɛ̀ ɖò ɓéɖé kɛɛ́? Ɓěɛ̀ hwìɖǐǐ-taɓa-taɓaɔ̀ ɓíè dyí cá wà! 9Ɓě séè ɖɛ múin wɔ̃́ keè? Ti ɓɛ́ ḿ jaɖaìn ma kà bɛɖɛɛ̀-kpò hm̀m̌ɔ̀ dyi ɓó gàa táázĩ̀ìn hm̀m̌ ɓěɔ̀ bììɛɛ, ɔ jè se ɓě hwìɖǐi nì ɖeè? Tìě-wè jĩ̀ xwɛ̌ ɓě poìn ma dyíɛ́? 10Ké ti ɓɛ́ ḿ nyíà bɛɖɛɛ̀-kpò mɛ̀nɛ̌ìn-sɔ̃́ gàa táázĩ̀ìn hĩinyɛɔ̀ kɛɛ, tìě-wè jĩ̀ xwɛ̌ ɓě poìn ma dyíɛ́? Ɔ jè se ɓě hwìɖǐi nì ɖeè? 11Ɖɛ́ kɔ̃̀ jè ɓě seɛ múin wɔ̃́ kà ɖɛ kɔ̃̀ jè ḿ nìà ɓě gbo cɛ̃iń nyɛɛ se ma bɛɖɛɛ̀ jè kɛ́? Ɓě mɛ ma mú ɓó Fáɖòsíì-nyɔ̀ ɓěɔ̀ kè Sádyùsíì-nyɔ̀ ɓěɔ̀ bɛɖɛɛ̀-dyáìn-ɖɛ̀ɔ̀ jè.”

12Púɛɛ, ɖeín-nà-nyɔ̀ ɓěɔ̀ wɔ̃́ɔ ma múin kà ɔ nì ma Fáɖòsíì-nyɔ̀ ɓěɔ̀ kè Sádyùsíì-nyɔ̀ ɓěɔ̀ tɛ̀mɛ̀ìn-ɖɛ̀ ɓěɔ̀ jè cɛ̃iń, ké ɔ se ma wa bɛɖɛɛ̀-dyáìn-ɖɛ̀ jè gbo cɛ̃iń nì kɛ.

Píɖɛ̀ cɛ̃ɛ kà Jízɛ̀ mɔ̀ Kɛ́ɖɛ́ìɔ̀ kɛ

(Máà 8:27-30; Ɖúù 9:18-21)

13Ké Jízɛ̀ mu ma ɖé gbɛ̌ɛ̀ ɓɛ́ ɔ nì ma ɖé Sɛ̀sɛ̀wíɖíà-Féɖópà-hwɔ̀ɖɔ̀ɔ̀ wĩín nyɛɛ mú. Ti ɓɛ́ ɔ kè ɔ ɖeín-nà-nyɔ̀ ɓěɔ̀ nì ma ɖéɛɛ, ɔ diè ma wa dyi, ké ɔ ɖá, “Nyɔǔn ɓě dyi ní jè cɛ̃ín, nìí, nyɛ́ wa ɖá mɔ̄ mɔ̀à Nyɔǔn-dyùɛ̀ Dyú-gààɔ̀ kɛɛ jǔɛ́?”

14Ké wa ɖá, “Nyɔ ɖíɛ́ ɓě ɖá m̀ mɔ̀ Jɔ̃́ɔ́ nyɔ-níɔ-po-nyɔ̀ɔ̀. Ɖíɛ́ ɓě mɔ̀ùn ɖá m̀ mɔ̀ Ìɖáájɔ̀, ké ɖíɛ́ ɓě ɖá m̀ mɔ̀ Jɛ̀ɖèmádyà mɔɔ kpáá-ɖɛ̀-cɛ̃-nyɔ̀ tɔ̀ɔ̀ ɓěɔ̀ ɖò.”

15Hwɛ̀ ké Jízɛ̀ diè ma wa mɔ̀ùn dyi, ké ɔ ɖá, “Ɓě mɔ̀ùn ɖá nyɛ́ ḿ jǔ kɛ́?”

16Ké Sã́ɓò Píɖɛ̀ zà ma ɖé wuɖu, ké ɔ ɖá, “M̀ mɔ̀ Kɛ́ɖɛ́ìɔ̀. M̀ mɔ̀ nì-nì Gèɖèpɔ́ɔ̀ dyú-gààɔ̀.”

17Hwɛ̀ ké Jízɛ̀ cɛ̃ɛ ma, ké ɔ ɖá, “Sã́ɓò, mɔ̀ mɔ̀à Jónàà dyú-gààɔ̀ kɛɛ, mana nì m̀ kɔ̃, sepóɛɖé nyɔ ɖò se m̀ ɖɛ nìà kɛ gbo cɛ̃, kɛɛ ḿ Ɓǎ nìà ɖé dyɔún wɛ̃ɛ mɔ̀ nyɔ cɛ̃ɛ m̀ gbo. 18Ɔ jèɛɛ, ḿ cɛ̃ɛ m̀ gbo, mɔ̀ Píɖɛ̀ nìà kɛɛ, nì nyɛ́nɛ́ɔ̀ xwíníín mɔ̀ sɔ́ɔ́-kpò. Ké sɔ́ɔ́-kpòɔ̀ kɔ̃, ɓóɛ̀ ní mu ní cɔ́cìɔ̀ poùn, ké gĩɔ se ɔ toún ɖuɛ ɓɛ́ǐn mu. 19Ní mu m̀ Gèɖèpɔ́ɔ̀ kã́á-ɓòɖò nìà ɖé dyɔún wɛ̃ɛ kaàìn-ɖɛ̀ ɓěɔ̀ nyíìn. Gèɖèpɔ́ɔ̀ nìà ɖé dyɔún wɛ̃ɛ mu ɖɛ séín m̀ wɔ̃́ìn gbo nɔ̄ ɓóɖó-kpàà kɔ̃ɛɛ gbo wɔ̃́ìn, ké ɔ mu ɖɛ séín m̀ po ɓɔ́í kɛɛ ɓɔ́í poùn ɖekè.” 20Ké Jízɛ̀ cɛ̃ɛ ma ɔ ɖeín-nà-nyɔ̀ ɓěɔ̀ gbo kóɖó-kóɖó, ɓɛ́ wa ní kɔ̃̀ɔ̀ ɖà nyɔ ɖò gbo cɛ̃ kà ɓɛ́ ɔ mɔ̀ Kɛ́ɖɛ́ìɔ̀ kɛ.

Jízɛ̀ cɛ̃ɛ ɔ ɖeín-nà-nyɔ̀ ɓěɔ̀ gbo kà ɔ mu gǎ dyéìn ɓɛ́ ɔ ké mɛ́ kɛ

(Máà 8:31–9:1; Ɖúù 9:22-27)

21Sɔ̀ìn ɓó tia gboɛɛ, Jízɛ̀ ɖúɛ ma ɔ ɖeín-nà-nyɔ̀ ɓěɔ̀ gbo cɛ̃ kpàǐ, ké ɔ ɖá, “Ḿ ɓéɖé ɓɛ́ ḿ ké ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú mu, ké Júù-nyɔ̀ vɛ̀nɛ̀ ɓěɔ̀ kè sáa-zà-nyɔ̀ kpa ɖɛ ɓěɔ̀ ɔ kè Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ mu ḿ gǎ dyéìn mìɔ. Wa mu ḿ ɖáɓáùn, kɛɛ ní mu gĩɔ wóɖóùn ɓó wéɔ̀ tã nììnɔ̀ xwíníín.”

22Ké Píɖɛ̀ zà ma Jízɛ̀ ɓó ɖeín-nà-nyɔ̀ tɔ̀ɔ̀ ɓěɔ̀ hwìɛ̀, ké ɔ ɖú ma ɔ gbo wùɖù kpàǐ, ké ɔ ɖá, “Bounɓo, ɓɔ́ kà ɓó wùɖùɛ̀. Gèɖèpɔ́ɔ̀ mɛ ɓɔ́ wɔ̃́ɔ ɓɛ́ ɖɛ nì náa ké m̀ gbo kpá fɔɔ.”

23Ké Jízɛ̀ gmɔ̀ìn ma ɖé Píɖɛ̀ gbo, ké ɔ ɖá, “Sɔ̀ ḿ bũ̌, Sétɔ̃̀. M̀ mɔ̀ dyí-gbǒ-ɖɛ̀ ɓó ḿ bìì. Ɖɛ ɓě nì poìn hwìɖǐiɛɛ mɔ̀ nyɔǔn-dyùɛ̀ hwìɖǐi-poìn-ɖɛ̀. Wa se Gèɖèpɔ́ɔ̀ nììn hwìɖǐi-poìn-ɖɛ̀.”

24Hwɛ̀ ké Jízɛ̀ cɛ̃ɛ ma ɔ ɖeín-nà-nyɔ̀ ɓěɔ̀ gbo, ké ɔ ɖá, “Nyɔ ɖò dyi mɔ́ ɓɛ́ ḿ kè ɔ ké mú naìn ní, nìí, ɔ mɛ táà ɔ hwòɖǒɛ̀-mɔ́ɔ́-ɖɛ̀ dyi, ké ɔ mɛ ɖú ɔ kɔ́ɖɔ́sìɔ̀ dyí, ɓɛ́ ɔ ké ḿ kíɖíí sí. 25Nyɔ mɔ̀ nyɔ ɓɛ́ ɔ kàmà ɔ fɛ̀ɛ̀ɔ̀ jè kɛɛ, ɔ fɛ̀ɛ̀ɔ̀ mu ɔ xwa sɔ̀ùn. Ké nyɔ mɔ̀ nyɔ ɓɛ́ ɔ fɛ̀ɛ̀ɔ̀ mu ɔ xwa sɔ̀ùn ɓó ní jèɛɛ, ɔ muɛ póìn. 26Nyɔ ɖò dyi ɖɛ séín nì ɓóɖó-kpà gànáà kɔ̃ɛɛ kɔ̃̀, ké ɔ fɛ̀ɛ̀ jɛ́ɛ́ɔ̀ dyi ɔ xwa sɔ̀ ní, nìí, ɖɛ́ mɔ̀ kpáná ɖò ɔ muɛ kɔ̃ún dyéìn nyɛ́? Ɔ jǔ ké ɔ fɛ̀ɛ̀ jɛ́ɛ́ɔ̀ dyi ɔ xwa sɔ̀ ní, nìí, ɖɛ́ ɔ ɓɛ́ìn tòɛ̀ ɓɛ́ ɔ ké ɔ fɛ̀ɛ̀ jɛ́ɛ́ɔ̀ ɖe dyéɛ́? 27Sepóɛɖé mɔ̄ mɔ̀à Nyɔǔn-dyùɛ̀ Dyú-gààɔ̀ kɛɛ, ḿ kè ní ínjà ɓěɔ̀ mu ḿ Ɓǎà dĩ́ín-dĩ̀ìnɔ̀ mú dyììn, ké nìí, ní mu nyɔǔn séín pɛ́ɛ̀ìn dyììn ɖé kà waà kũ̀à-sɔ̃̀ nyu nìɛ̀ kɛɛ mú. 28Ḿ cɛ̃ ɓě jǎà gbo, nyɔ ɖíɛ́ ɓě nì dà ɓě hwìɛ̀, ké wa se gĩɔ muɛ́ mu, kɛɛ wa mu mɔ̄ mɔ̀à Nyɔǔn-dyùɛ̀ Dyú-gààɔ̀ kɛɛ dyéìn, ɓɛ́ ḿ ké kã́á jǔ, ɓɛ́ ḿ ké dyi hwɛ̀.”

Currently Selected:

Máfíò 16: ƁB02

Highlight

Copy