Ɖìvéɖékɔ̀ 25
25
Gma ɓě ɓá zɔ̃ɔ̀ mɛ̀nɛ̌ìn-sɔ̃́ nììnɔ̀ jè dyíɛ
(Dìtɔ̀wáɖánámɛ̀ 15:1-11)
1Hwɛ̀ ké Bounɓoɔ̀ wùɖù ma Mózè gbo ɖé Sányà-tòɖòɔ̀ dya, ké ɔ ɖá, 2“Cɛ̃ɛ Éézùɖùɛ̀-dyù ɓěɔ̀ gbo kà ḿ ɖá ti ɓɛ́ ɓě mu ɖé ɓóɖó ɓɛ́ ḿ nìà ɓě nyíɛń nyɛɛ kɔ̃ nyiniìn nyɛɛ, ɓěǐn ɖá ɓɛ́ ɓě ké ɖɛ ɖò ɓóɖóɔ̀ kɔ̃ ɓá ɓó zɔ̃ mɛ̀nɛ̌ìn-sɔ̃́ nììn séín xwíníín, ɓɛ́ ɓě ké ɓóɖóɔ̀ wáká po ɓó ḿ bìì, ɓɛ́ ɓóɖóɔ̀ ké fɔ̀. 3Ɓě ɓɛ́ìn ɓěɛ̀ geɖe ɓěɔ̀ gbo ɖɛ ɓáa, ɓɛ́ ɓě ké geɖe ɓěɔ̀ cɛ̃ ɓó zɔ̃ mɛ̀nɛ̌ìn-ɖò xwíníín. Ké ɓě ɓɛ́ìn ɓěɛ̀ géɖéè-gbǎ ɓěɔ̀ dya dyi nɔ̀mɔ̀ìn, ɓɛ́ ɓě ké wa géɖéè dya kpã́ ɓó tia ɓaɖa ɖekè. 4Kɛɛ zɔ̃ɔ̀ mɛ̀nɛ̌ìn-sɔ̃́ nììnɔ̀ mɛ mɔ̀ fɔ̀-zɔ̃̀ ɓó ɓóɖóɔ̀ bìì, ɓɛ́ ɔ ké wáká kpá ɓó ḿ bìì. Nyɔ ɖò ní ɖá ɓɛ́ ɔ ké ɔ geɖeɔ̀ gbo ɖɛ ɖò ɓá, mɔɔ ɓɛ́ ɔ ké ɔ géɖéè-gbǎɔ̀ dya dyi nɔ̀mɔ̀ìn. 5Ké nyɔ ɖò ní ɖá ɓɛ́ ɔ ké ɓáá-ɖɛ̀ ɖò ɓɛ́ ɔ mìɔùn mɛ kɛɛ ɖò kpã́ ɓó dyi dè jè, mɔɔ ɔ ní ɖá ɓɛ́ ɔ ké géɖéè-gbǎɔ̀ nyɔ sèà ɓó, ɓɛ́ wa seà dya dyi nɔ̀mɔ̀ìn nyɛɛ ɖò kpã́ ɓó dyi dè jè. Sepóɛɖé ɓóɖóɔ̀ ɓéɖé ɓɛ́ ɔ ké fɔ̀ ɓó zɔ̃ɔ̀ mɛ̀nɛ̌ìn-sɔ̃́ nììnɔ̀ xwíníín. 6Ɖii-ɖɛ̀ kã̀ìn séín ɓɛ́ ɔ mìɔùn mɛ ɓóɖóɔ̀ kɔ̃ ɖé zɔ̃ɔ̀ mɛ̀nɛ̌ìn-sɔ̃́ nììnɔ̀ xwíníín nyɛɛ se nyɔ dyúáɖòɛ̀ kɔ̃̀ɔ̀-ɖɛ̀. Kɛɛ ɔ mɔ̀ ɖii-ɖɛ̀ ɓó ɓě kè ɓěɛ̀ gǐì-gàà ɓě kè ɓěɛ̀ gǐì-màà ɓě kè nyɔ ɓě ɓɛ́ wa nyu ɓě bìì kũ̀à ɓó pɛ́ɛ̀ jèɛ kè ɖíà ɓě cĩ́à ɖé ɓě hwìɛ̀ kɛɛ bìì. 7Ké ɔ mɔ̀ ɖii-ɖɛ̀ ɓó ɓěɛ̀ nyúà-ɖɛ̀ ɓě kè xwáɖá-xwíɖíi-nìmìì ɓě bìì. Ɖii-ɖɛ̀ kã̀ìn séín ɓɛ́ ɔ mìɔùn mɛ ɖé ɓóɖóɔ̀ kɔ̃ɛɛ, ɓě ɓɛ́ìn ɖiɛ.
Gma ɓě ɓá ɖɛ-séín-ɖe-tò-zɔ̃̀ɔ̀ jè dyíɛ
8“Ɓě mɛ zɛɖɛ zɔ̃ mɛ̀nɛ̌ìn-sɔ̃́ɔ̀ dú mɛ̀nɛ̌ìn-sɔ̃́, ɓɛ́ ɔ ké zɔ̃ kpáɖá-nyɔ sɔ̃́ sè mɛ̀nɛ̌ìn-hĩinyɛ jǔ. 9Ɓě ɖǎa náa nyuín, nìí, ɓě mɛ ɓaɖa gã̀à ɖé ɓóɖóɔ̀ dà séín ɓó dɛ̀nɛ̀ mɛ̀nɛ̌ìn-sɔ̃́ nììnɔ̀ wé ɓaɖa-bùè nììn mɔ̀à Nàmàǔn-Ɖɛ-Kɔ̃in-Ɓáìn-wèɔ̀ kɛɛ ɓaɖa. 10Kǎà ɓě mɛ nyu zɔ̃ɔ̀ kpáɖá-nyɔ sɔ̃́ ɓaɖa-bùè nììnɔ̀ wáká poɛ ɓó ḿ bìì, ɓɛ́ ɓě ké zio po ɓá buɛ̀ jè dyí, ɖé nyɔ séín ɓɛ́ wa cĩ́ ɖé ɓěɛ̀ ɓóɖóɔ̀ dà séín nyɛɛ gbo. Ɔ mɛ mɔ̀ ɖɛ-séín-ɖe-tò-zɔ̃̀ ɓó ɓě bìì. Ɓó tia ɓaɖaa, ɓěɛ̀ ɖò-ɖò séín mɛ tò ɔ mǔè ɖò nììn pá ɓɛ́ ɔ ɓéɖéɛɛ ɔ mǔèɔ̀ dyí ɖe, ké Éézùɖùɛ̀-dyù ɖò ɓɛ́ wa dɔ̃ ma wíɖí múɛɛ, wa mɛ buɛ̀ ɔ, ɓɛ́ Éézùɖùɛ̀-dyùɔ̀ ké ɔ mìɔùn nììn nyɔ ɓěɔ̀ gbo ɖe mu. 11Zɔ̃ɔ̀ kpáɖá-nyɔ sɔ̃́ ɓaɖa-bùè nììn mɔ̀à ɖɛ-séín-ɖe-tò-zɔ̃̀ɔ̀ ɓó ɓě bììɛɛ xwíníín nyɛɛ, ɓěɛ̀ nyɔ ɖò ní ɖá ɓɛ́ ɔ ké ɖɛ ɖò ɓá, ké nyɔ ɖò ní ɖá ɓɛ́ ɔ ké ɓáá-ɖɛ̀ɔ̀ nyɔ mìɔùn mɛ kɛɛ mɔɔ géɖéè-gbǎɔ̀ nyɔ sèà ɓó, ɓɛ́ wa seà dya dyi nɔ̀mɔ̀ìn nyɛɛ ɖò kpã́ ɓó dyi dè jè, 12sepóɛɖé ɔ mɔ̀ ɖɛ-séín-ɖe-tò-zɔ̃̀, ké ɓě mɛ poɛ wáká ɓó ḿ bìì. Kɛɛ ɓě ɓɛ́ìn ɖii-ɖɛ̀ ɓě ɓɛ́ ɓě mu ɖé geɖe ɓěɔ̀ gbo zàùn nyɛ̀nɛ̀ɛ̀ kɛɛ ɖiɛ.
13“Ɖé zɔ̃ nìà kɛ xwíníín nyɛɛ, nyɔ kã̀ìn séín ɓɛ́ ɔ dɔ̃ ma ɔ mǔè ɖòɛ̀ pá kɛɛ, ɔ mɛ tòɛ̀ nyɔ kɔ̃̀ɔ̀ kɛɛ dyí ɖe. 14Ɔ jǔ ké nyɔ ɖò dyi ɔ mǔè ɖò pá ɖò gbo pèɖèìn ní, nìí, nyɔɔ̀ ní ɖá ɓɛ́ ɔ ké ɔ mǔèɔ̀ kpáná kɔ̃ún po. 15Ɖɛ-ɓá-zɔ̃̀ jĩ̀ kà sè ɓó dyúa hwɛ̀ ɓɛ́ ɖɛ-séín-ɖe-tò-zɔ̃̀ɔ̀ ké ɓó nyiniɛɛ, ɔ mɔ̀ ti nyɔɔ̀ mɛ po hwòɖǒ gbo, hwɛ̀ ɓɛ́ ɔ ké páɔ̀ ɔ mǔèɔ̀ gbo pèɖèìn. 16Ɔ jǔ ké zɔ̃ sè ɓó dyúa kɛɛ dyi dyí vò ní, nyɔɔ̀ ɓɛ́ìn píɔ́ɔ̀ dyií kpaa. Kɛɛ ɔ jǔ ké zɔ̃ sè ɓó dyúa kɛɛ se dyí vò ní, nyɔɔ̀ mɛ dyà píɔ́ɔ̀ ɓíɖíi. Sepóɛɖé ɖɛ nyɔɔ̀ nìà ɔ mǔèɔ̀ gbo pèɖèɛ̌n jɛ́ɛ́ kɛɛ mɔ̀ ɖɛ-ɓá-zɔ̃̀ jĩ̀ kà sè ɓóɛ. 17Nyɔ ɖò ní ɖá ɓɛ́ ɔ ké ɔ mǔè ɖò kpáná kɔ̃ún po. Kɛɛ ɓě mɛ fɛ̃̀ìn ḿ dyi, sepóɛɖé mɔ̄ mɔ̀ Bounɓo mɔ̀à ɓěɛ̀ Gèɖèpɔ́ɔ̀ kɛ̀.
Fũ̀à-fṹá ɓá zɔ̃ɔ̀ mɛ̀nɛ̌ìn-sɔ̃́ nììnɔ̀ jè dyíɛ
18“Ɓě mɛ kpɔ̃ ní gma séín ɓěɔ̀ dyi kóɖó-kóɖó, ɓɛ́ ɓě ké wa kíɖíí sí. Ɔ dyi ná nìǐn, nìí, ɓě mu ɖé ɓóɖóɔ̀ kɔ̃ cĩ́ìn ɖé gìɖìǐ mú. 19Ɓěɛ̀ ɓáá-ɖɛ̀ ɓěɔ̀ mu ɖé ɓóɖóɔ̀ kɔ̃ bãùn, ké ɓě mu ɖɛ ɖiìn, ɓɛ́ ɓě ké ɖoɓo, ké ɓě mu ɖé ɓóɖóɔ̀ kɔ̃ cĩ́ìn ɖé gìɖìǐ mú. 20Ti ɖíɛ́ ɓě ní, ɓě ɓɛ́ìn ɖɛi dièɛ̀, ɓɛ́ ɓě ké níiń, ‘Ɔ jǔ ké à se à ɓáá-ɖɛ̀ ɓěɔ̀ ɓá ɓó zɔ̃ɔ̀ mɛ̀nɛ̌ìn-sɔ̃́ nììnɔ̀ xwíníín, ɓɛ́ à ké waà ɓo ɓěɔ̀ kpã́ ní, nìí, ɖɛ́ à mu ɖiìn nyɛ́?’ 21Ní muɛ nyuùn ɓɛ́ ɓěɛ̀ ɓáá-ɖɛ̀ ɓěɔ̀ ké bã mìɔ ɖé zɔ̃ɔ̀ mɛ̀nɛ̌ìn-ɖò nììnɔ̀ xwíníín, ɓɛ́ ɓě ké ɖé ɖii-ɖɛ̀ dyé ɓó zɔ̃ sɔ̃́ bìì. 22Ti ɓɛ́ ɓě mu ɓěɛ̀ ɓáá-ɖɛ̀ ɓěɔ̀ ɓáuń nììn ɖé zɔ̃ɔ̀ mɛ̀nɛ̌ìn-tã nììnɔ̀ xwíníín nyɛɛ, ɓě mu ɖii-ɖɛ̀ sùà ɓɛ́ ɔ sɔ̀ ma kà ɖé ɓěɛ̀ geɖe ɓěɔ̀ gbo ɓó zɔ̃ɔ̀ mɛ̀nɛ̌ìn-ɖò nììnɔ̀ xwíníín nyɛɛ ɖiɛń dyi gã̀ùn tee, ɓɛ́ zɔ̃ɔ̀ mɛ̀nɛ̌ìn-tã nììnɔ̀ geɖe ɓěɔ̀ ké kɔ́ hwɛ̀.
Gma ɓě ɓá pá ɖe tò jè dyíɛ
23“Nyɔ ɖò ní ɖá ɓɛ́ ɔ ké ɔ nììn páɔ̀ peɖe gàná cá. Sepóɛɖé mɔ̄ mɔ̀ nyɔ kɔ̃̀ páɔ̀, ké ɓě mɔ̀ ɖéè ɓɛ́ ɓě ké ní páɔ̀ kũ̀à mú nyùìn pū.
24“Ɔ jǔ ké nyɔ ɖò dyi ɔ pá ɖò peɖe ní, ɔ ɓéɖé kpé ɓɛ́ ɔ ké ɔ páɔ̀ gbǎà ɖe. Ɖɛ nìà kɛ mɛ mɔ̀ gma ɖé ɓóɖóɔ̀ dà séín. 25Ɔ jǔ ké ɓě ɖò dyi gǎ dyé, ké gǎɔ̀ dyiɛ nyu ké nyɔɔ̀ dyi ɔ páɔ̀ ɖò peɖe ní, nìí, gǎ-dyé-nyɔ̀ɔ̀ gbǒ-xwíníín-nyɔ̀ xwɛ̃́ìn ɔ bũ̌in, ɓɛ́ ɔ mɔ̀ nyɔ ɓéɖé ɔ kéɛ gbǎà kɛɛ mɛ gbǎà pá ɓɛ́ nyɔɔ̀ peɖeà kɛɛ ɓó ɔ bìì. 26Kɛɛ ti ɖíɛ́ ɓě ní, nyɔɔ̀ se gbǒ-xwíníín-nyɔ̀ ɖò ɓéɖé, ɓɛ́ ɔ kéɛ gbǎà ɓɛ́ìn ɓó ɔ bìì. Ɔ dyi ná nìǐn, ké nyɔɔ̀ mìɔùn dyi kpé ɓɛ́ìn, ɓɛ́ ɔ kéɛ gbǎà ɖé dyúa ní, 27nìí, ɔ mɛ gmɔ̀ zɔ̃ jĩ̀ kà ɖǎ zi sɔ̀ìn ɓó ti ɔ peɖeɛ ma kà kɛɛ xwíníín, ɓɛ́ ɔ ké zɔ̃ jĩ̀ kà sè ɓó dyúa hwɛ̀ ɓɛ́ ɖɛ-séín-ɖe-tò-zɔ̃̀ɔ̀ ké ɓó nyiniɛɛ wíɖí ɖe tò. Sɔ̀ìn ɓóɛ gboɛɛ, nìí, ɔ ɓɛ́ìn muɛ, ɓɛ́ ɔ ké ɔ páɔ̀ dyí ɖú ɖe. 28Kɛɛ ɔ jǔ ké nyɔɔ̀ se wíɖí dyéɛ ɓɛ́ìn, ɓɛ́ ɔ ké nyɔ ɓɛ́ ɔ dɔ̃ ma kà ɔ páɔ̀ gboɛɛ wíɖíɔ̀ ɖe tò ní, nìí, páɔ̀ mɛ nì nyɔ dɔ̃àà kɛɛ xwa tee ɓɛ́ ɔ ké ɖɛ-séín-ɖe-tò-zɔ̃̀ɔ̀ dyɛ̀ìn hwɛ̀. Ɓó tia ɓaɖaa, nìí, nyɔ kɔ̃̀à páɔ̀ kĩ́ín nyɛɛ ɓɛ́ìn ɔ páɔ̀ dyí ɖúɛ ɖe.
29“Ɔ jǔ ké nyɔ ɖò dyi ɔ gbǒ ɓɛ́ ɔ nì ɖé hwɔɖɔ, ɓɛ́ ɔ nì gmɔ ɖeiɛ múɛɛ ɔ mǔè ɖò gbo pèɖèìn ní, nyɔ peɖeà gbǒɔ̀ kɛɛ ɓéɖé kpé ɓɛ́ ɔ ké ɔ gbǒɔ̀ gbǎà ɖe, hwɛ̀ ɓɛ́ zɔ̃ ɖò ké jɛ̀ɖɛ̀. 30Kɛɛ ɔ jǔ ké nyɔɔ̀ seɛ gbǎà, ké zɔ̃ ɖò dyi jɛ̀ɖɛ̀ ní, nìí, gbǒɔ̀ mɔ̀ nyɔ dɔ̃àà kɛ kè ɔ xwíníín-dyù ɓěɛ̀ kɔ̃̀ɔ̀-ɖɛ̀. Ké ɔ se ɓéɖé ɓɛ́ ɔ kéɛ ɖe tò ɖé ɖɛ-séín-ɖe-tò-zɔ̃̀ɔ̀ xwíníín. 31Kɛɛ gbǒ ɓɛ́ ɔ nì hwɔɖɔ-dyù ɖò, ɓɛ́ ɔ se gmɔ ɖei nìɛ múɛɛ, gma ɓě ɓá pá ɖò gbǎà jè dyíɛɛ mɛ nì ɓóɛ jè ɖekè. Gbǒ nì ná kɛɛ, nyɔǔn ɓéɖé kpé ɓɛ́ wa kéɛ gbǎà ti séín pū, ké nyɔ ɓɛ́ ɔ dɔ̃à gbǒɔ̀ kɛɛ mɛ tòɛ̀ nyɔ kɔ̃̀ɔ̀ kɛɛ dyí ɖe ɖé ɖɛ-séín-ɖe-tò-zɔ̃̀ɔ̀ xwíníín. 32Ɓá Ɖíìváà-nyɔ̀ ɓěɔ̀ mɔ̀ùn jè dyíɛɛ, wa ɓéɖé kpé ɓɛ́ wa ké gbǒ ɓě ɓɛ́ wa nì ɖé hwɔɖɔ ɓě, ɓɛ́ ḿ nyí wa kɛ múɛɛ gbǎà ɓó ti séín pū. 33Ɔ jǔ ké Ɖíìváà-nyɔ̀ ɖò dyi ɔ gbǒ ɖò nì ɖé Ɖíìváà-nyɔ̀ ɓěɔ̀ nììn hwɔɖɔ ɓěɔ̀ ɖò múɛɛ peɖe, ké ɔ seɛ gbǎà ní, nìí, nyɔ ɓɛ́ ɔ dɔ̃à gbǒɔ̀ kɛɛ mɛ tòɛ̀ ɖe ɖé ɖɛ-séín-ɖe-tò-zɔ̃̀ɔ̀ xwíníín. Sepóɛɖé gbǒ ɓě ɓɛ́ Ɖíìváà-nyɔ̀ ɓěɔ̀ kɔ̃̀ ɖé wa nììn hwɔɖɔ ɓěɔ̀ múɛɛ mɔ̀ waà kɔ̃̀ɔ̀-ɖɛ̀ ɖé ɓě mɔ̀ Éézùɖùɛ̀-dyù ɓěɔ̀ hwìɛ̀. 34Kɛɛ nyúà-ɖɛ̀ dyi-ɖi-naín ɓě nìà Ɖíìváà-nyɔ̀ ɓěɔ̀ hwɔɖɔ ɓěɔ̀ ɖeiɛɛ, wa mɛ ɓɔ́ɔ peɖeɛ fɔɔ cá, sepóɛɖé pá ɓěɔ̀ mɔ̀ wa nììn kánáá pū.
Gma ɓě ɓá gǎ-dyé-nyɔ̀ ɓě kpaún po jè dyíɛ
35“Ɔ jǔ ké ɓě ɖò dyi gǎ dyé mìɔ, ké ɔ se ɔ mìɔùn gbo gmɔ̀ɔ̀ ɓɛ́ìn ní, nìí, nyɔ ɖò mɛ kpá ɔ gbo kà ɔ kéɔ́ kà ɖéè ɖò gbo kpáa nyuɛ, ɓɛ́ gǎ-dyé-nyɔ̀ɔ̀ ké ɓó ɓě hwìɛ̀ cĩ́ɛ ɓɛ́ìn kánáá pū. 36Ké nyɔ ɖò ní ɖá ɓɛ́ ɔ ké ɔ mǔè ɖò kpáná ɖò xwai mɔ́. Kɛɛ ɓě séín mɛ fɛ̃̀ìn ḿ dyi, ɓɛ́ ɓě kéɛ nyu ɓɛ́ ɓě mǔèɔ̀ ké ɖé ɓě hwìɛ̀ cĩ́ kánáá pū. 37Nyɔ ɖò ní ɖá ɓɛ́ ɔ ké ɔ mǔè ɖò wíɖí kpaún po ɓó kpáná ɖò dyé jè, mɔɔ ɓɛ́ ɔ ké ɔ mǔèɔ̀ ɖii-ɖɛ̀ ɖò gbo pèɖèìn ɓó kpáná ɖò dyé jè. 38Ɓě mɛ ɓɔ́ ɖɛ ɓěɛ̀ ɖò nyuɛ, sepóɛɖé mɔ̄ mɔ̀à Bounɓo mɔ̀à ɓěɛ̀ Gèɖèpɔ́ɔ̀ kɛɛ mɔ̀ nyɔ zà ma kà ɓě ɖé Íjè-ɓòɖòɔ̀ kɔ̃, ɓɛ́ ḿ kéà ɓě Kénà-ɓòɖòɔ̀ nyí, ɔ kè ɓɛ́ ḿ kéà ɓěɛ̀ Gèɖèpɔ́ɔ̀ jǔɛ̀.
Gma ɓě ɓá Éézùɖùɛ̀-nyɔ̀ ɓɛ́ nyɔ ɖò dɔ̃ wíɖí múɛɛ buɛ̀ jè dyíɛ
39“Ɔ jǔ ké ɓě mǔè Éézùɖùɛ̀-dyù ɓěɔ̀ ɖò dyi gǎ dyé mìɔ jè, ké ɔ dyi ɔ mìɔùn ɓě ɖò gbo pèɖèìn ní, nìí, nyɔ dɔ̃à ɔ kɛɛ mɛ ɓɔ́ ɔ kũ̀à nyùɛ̀n kà gǐì nìà kɛ. 40Kɛɛ nyɔ dɔ̃à ɔ kɛɛ mɛ kpɔ̃ ɔ kà nyɔ kpɔ̃à pɛ́ɛ̀-nyɔ̀ ɖò kɛ, mɔɔ kà nyɔ kpɔ̃à ɖéè ɖò kɛ. Nyɔɔ̀ mɛ nyu nyɔ dɔ̃à ɔ kɛɛ kũ̀à tee, ɓɛ́ ɔ ké ɖɛ-séín-ɖe-tò-zɔ̃̀ɔ̀ dyɛ̀ìn. 41Sɔ̀ìn ɓóɛ gboɛɛ, nìí, nyɔɔ̀ kè ɔ dyú ɓě mɛ buɛ̀, ɓɛ́ ɔ ké ɔ mìɔùn ɓíɖí ɖe mu, ɓɛ́ ɔ ké ɔ ɓǎ ɓěɛ̀ kɔ̃̀ɔ̀-ɖɛ̀ ɓěɔ̀ dyí ɖú ɖe. 42Ɓě mɔ̀ Éézùɖùɛ̀-dyù ɓěɛɛ, ɓě mɔ̀ ní gǐì ɓě ɓɛ́ ḿ zà ma kà ɖé Íjè-ɓòɖòɔ̀ kɔ̃ɛ jèɛɛ, nyɔ ɖò ní ɖá ɓɛ́ ɔ ké ɓě ɖò gǐì mú dɔ̃ fɔɔ cá, 43ké ɔ ní ɖá ɓɛ́ ɔ ké ɔ wuɖuí kɔ̃̀ nyɔ-dyi-nɛ́ìn-kà. Kɛɛ ɓě séín mɛ fɛ̃̀ìn ḿ dyi. 44Ɓěɛ̀ gǐì-gàà kè gǐì-màà ɓěɔ̀ mɛ mɔ̀ nyɔ ɓě ɓɛ́ wa sɔ̀ ɓóɖó-dù ɓě nì ɓó ɓě ɖeiɛɛ kɔ̃ɛ. Ɖé ɓóɖó-dù ɓěa hwìɛ̀, ɖéɛ̀ ɓě ɓɛ́ìn gǐì dɔ̃ɔ. 45Ké ɓě ɓɛ́ìn ɖíà ɓě cĩ́ ɖé ɓě hwìɛ̀ kɛ kè waà gbǒ-xwíníín-nyɔ̀ ɓě ɓɛ́ wa wóɖóìn ɖé ɓěɛ̀ ɓóɖóɔ̀ kɔ̃ɛɛ gǐì mú dɔ̃ɔ, ɓɛ́ wa ké ɓěɛ̀ kɔ̃̀ɔ̀-ɖɛ̀ jǔ. 46Ké ɓě ɓɛ́ìn wa ɓěɛ̀ dyú ɓě gbo sèɛ̀, ɓɛ́ wa ké ɓěɛ̀ dyú ɓěɔ̀ kɔ̃̀ɔ̀-ɖɛ̀ jǔ ɖekè. Ɓě ɓɛ́ìn wa gǐì mú nyuɛ ɖé waà fɛ̀ɛ̀-wè séín mú. Kɛɛ ɓěɛ̀ nyɔ ɖò ní ɖá ɓɛ́ ɔ ké ɔ mǔè Éézùɖùɛ̀-dyù ɖò wuɖuí kɔ̃̀ nyɔ-dyi-nɛ́ìn-kà.
47“Ɔ jǔ ké ɖíà ɓě cĩ́à ɖé ɓě hwìɛ̀ kɛɛ ɖò dyi bã, ké ɓě mɔ̀ Éézùɖùɛ̀-dyù ɓěɛɛ ɖò mɔ̀ùn dyi gǎ dyé mìɔ jè, ké ɔ dyi ɔ mìɔùn ɖíà-nyɔ̀ɔ̀ mɔɔ ɖíà-nyɔ̀ɔ̀ gbǒ-xwíníín-nyɔ̀ ɖò gbo pèɖèìn ní, 48nìí, ɔ ɓéɖé kpé ɓɛ́ ɔ ké ɔ mìɔùn gbǎà sɔ̀ìn ɓó ti ɔ ɖǎ ɔ mìɔùn ɖíà-nyɔ̀ɔ̀ gbo pèɖèìn nyɛ. Ɔ ɖíí-gàà ɖò 49mɔɔ ɔ ɓǎ ɖíí-gàà ɖò mɔɔ ɔ ɓǎ ɖíí-gàà dyú ɖò mɔɔ ɔ gbǒ-xwíníín-nyɔ̀ tɔ̀ɔ̀ ɖò mɛ gbǎà ɔ. Mɔɔ ké ɔ jǔ ké nyɔɔ̀ dyi kpé ɓɛ́ìn ní, nìí, ɔ mɛ gbǎà ɔ mìɔùn. 50Ɔ dyi ná nìǐn, nìí, ɔ kè nyɔ dɔ̃à ɔ kɛɛ mɛ gmɔ̀ zɔ̃ jĩ̀ kà ɖǎ zi sɔ̀ìn ɓó ti ɔ pèɖèìn ma kà ɔ mìɔùn nyɔɔ̀ gboɛɛ xwíníín, ɓɛ́ ɔ ké zɔ̃ jĩ̀ kà sè ɓó dyúa hwɛ̀ ɓɛ́ ɖɛ-séín-ɖe-tò-zɔ̃̀ɔ̀ ké ɓó nyiniɛɛ wíɖí ɖe tò. Ɔ mɛ pɛ́ɛ̀ ɔ dyììn ɖé wíɖí jĩ̀ kà ɓɛ́ wa pɛ́ɛ̀ kũ̀à-nyu-nyɔ̀ ɓó zɔ̃ dyúáɖò xwíníín nyɛɛ mú. 51Ɔ jǔ ké zɔ̃ sè ɓó dyúa kɛɛ dyi dyí vò ní, nìí, ɔ mɛ pɛ́ɛ̀ nyɔ dɔ̃à ɔ kɛɛ wíɖí ɓáún-ɓáún. 52Kɛɛ ɔ jǔ ké zɔ̃ sè ɓó dyúa kɛɛ se dyí vò ní, ɔ mɛ pɛ́ɛ̀ nyɔɔ̀ wíɖí tííwè. Ɔ mɛ pɛ́ɛ̀ wíɖíɔ̀ dyììn ɖé zɔ̃ jĩ̀ kà sè ɓó dyúa hwɛ̀ ɓɛ́ ɖɛ-séín-ɖe-tò-zɔ̃̀ɔ̀ ké ɓó nyiniɛɛ mú. 53Nyɔ dɔ̃à ɔ kɛɛ mɛ kpɔ̃ ɔ kà nyɔ kpɔ̃à kũ̀à-nyu-nyɔ̀, ɓɛ́ wa ké pɛ́ɛ̀ ɓó zɔ̃ kè zɔ̃ xwíníín nyɛ. Ɔ ní ɖá ɓɛ́ ɔ ké ɔ wuɖuí kɔ̃̀ nyɔ-dyi-nɛ́ìn-kà. 54Ɔ jǔ ké nyɔɔ̀ mìɔùn mɔɔ ɔ nyɔ ɖò se ɔ gbǎà ɓɛ́ìn ní, nìí, ɔ kè ɔ dyú ɓě mɛ buɛ̀ ɖé ɖɛ-séín-ɖe-tò-zɔ̃̀ɔ̀ xwíníín. 55Ɓě mɔ̀ Éézùɖùɛ̀-dyù ɓěɛɛ, ɓě mɛ ɓɔ́ gǐì jǔɛ, sepóɛɖé ɓě mɔ̀ ní gǐì ɓě. Mɔ̄ kɔ̃̀ ɓě. Ɓě mɔ̀ ní gǐì ɓě ɓɛ́ ḿ zà ma kà ɖé Íjè-ɓòɖòɔ̀ kɔ̃ɛ. Ɓě mɛ nyu ɖɛ ɓěɛ̀, sepóɛɖé mɔ̄ mɔ̀ Bounɓo mɔ̀à ɓěɛ̀ Gèɖèpɔ́ɔ̀ kɛ̀.”
Currently Selected:
Ɖìvéɖékɔ̀ 25: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
Ɖìvéɖékɔ̀ 25
25
Gma ɓě ɓá zɔ̃ɔ̀ mɛ̀nɛ̌ìn-sɔ̃́ nììnɔ̀ jè dyíɛ
(Dìtɔ̀wáɖánámɛ̀ 15:1-11)
1Hwɛ̀ ké Bounɓoɔ̀ wùɖù ma Mózè gbo ɖé Sányà-tòɖòɔ̀ dya, ké ɔ ɖá, 2“Cɛ̃ɛ Éézùɖùɛ̀-dyù ɓěɔ̀ gbo kà ḿ ɖá ti ɓɛ́ ɓě mu ɖé ɓóɖó ɓɛ́ ḿ nìà ɓě nyíɛń nyɛɛ kɔ̃ nyiniìn nyɛɛ, ɓěǐn ɖá ɓɛ́ ɓě ké ɖɛ ɖò ɓóɖóɔ̀ kɔ̃ ɓá ɓó zɔ̃ mɛ̀nɛ̌ìn-sɔ̃́ nììn séín xwíníín, ɓɛ́ ɓě ké ɓóɖóɔ̀ wáká po ɓó ḿ bìì, ɓɛ́ ɓóɖóɔ̀ ké fɔ̀. 3Ɓě ɓɛ́ìn ɓěɛ̀ geɖe ɓěɔ̀ gbo ɖɛ ɓáa, ɓɛ́ ɓě ké geɖe ɓěɔ̀ cɛ̃ ɓó zɔ̃ mɛ̀nɛ̌ìn-ɖò xwíníín. Ké ɓě ɓɛ́ìn ɓěɛ̀ géɖéè-gbǎ ɓěɔ̀ dya dyi nɔ̀mɔ̀ìn, ɓɛ́ ɓě ké wa géɖéè dya kpã́ ɓó tia ɓaɖa ɖekè. 4Kɛɛ zɔ̃ɔ̀ mɛ̀nɛ̌ìn-sɔ̃́ nììnɔ̀ mɛ mɔ̀ fɔ̀-zɔ̃̀ ɓó ɓóɖóɔ̀ bìì, ɓɛ́ ɔ ké wáká kpá ɓó ḿ bìì. Nyɔ ɖò ní ɖá ɓɛ́ ɔ ké ɔ geɖeɔ̀ gbo ɖɛ ɖò ɓá, mɔɔ ɓɛ́ ɔ ké ɔ géɖéè-gbǎɔ̀ dya dyi nɔ̀mɔ̀ìn. 5Ké nyɔ ɖò ní ɖá ɓɛ́ ɔ ké ɓáá-ɖɛ̀ ɖò ɓɛ́ ɔ mìɔùn mɛ kɛɛ ɖò kpã́ ɓó dyi dè jè, mɔɔ ɔ ní ɖá ɓɛ́ ɔ ké géɖéè-gbǎɔ̀ nyɔ sèà ɓó, ɓɛ́ wa seà dya dyi nɔ̀mɔ̀ìn nyɛɛ ɖò kpã́ ɓó dyi dè jè. Sepóɛɖé ɓóɖóɔ̀ ɓéɖé ɓɛ́ ɔ ké fɔ̀ ɓó zɔ̃ɔ̀ mɛ̀nɛ̌ìn-sɔ̃́ nììnɔ̀ xwíníín. 6Ɖii-ɖɛ̀ kã̀ìn séín ɓɛ́ ɔ mìɔùn mɛ ɓóɖóɔ̀ kɔ̃ ɖé zɔ̃ɔ̀ mɛ̀nɛ̌ìn-sɔ̃́ nììnɔ̀ xwíníín nyɛɛ se nyɔ dyúáɖòɛ̀ kɔ̃̀ɔ̀-ɖɛ̀. Kɛɛ ɔ mɔ̀ ɖii-ɖɛ̀ ɓó ɓě kè ɓěɛ̀ gǐì-gàà ɓě kè ɓěɛ̀ gǐì-màà ɓě kè nyɔ ɓě ɓɛ́ wa nyu ɓě bìì kũ̀à ɓó pɛ́ɛ̀ jèɛ kè ɖíà ɓě cĩ́à ɖé ɓě hwìɛ̀ kɛɛ bìì. 7Ké ɔ mɔ̀ ɖii-ɖɛ̀ ɓó ɓěɛ̀ nyúà-ɖɛ̀ ɓě kè xwáɖá-xwíɖíi-nìmìì ɓě bìì. Ɖii-ɖɛ̀ kã̀ìn séín ɓɛ́ ɔ mìɔùn mɛ ɖé ɓóɖóɔ̀ kɔ̃ɛɛ, ɓě ɓɛ́ìn ɖiɛ.
Gma ɓě ɓá ɖɛ-séín-ɖe-tò-zɔ̃̀ɔ̀ jè dyíɛ
8“Ɓě mɛ zɛɖɛ zɔ̃ mɛ̀nɛ̌ìn-sɔ̃́ɔ̀ dú mɛ̀nɛ̌ìn-sɔ̃́, ɓɛ́ ɔ ké zɔ̃ kpáɖá-nyɔ sɔ̃́ sè mɛ̀nɛ̌ìn-hĩinyɛ jǔ. 9Ɓě ɖǎa náa nyuín, nìí, ɓě mɛ ɓaɖa gã̀à ɖé ɓóɖóɔ̀ dà séín ɓó dɛ̀nɛ̀ mɛ̀nɛ̌ìn-sɔ̃́ nììnɔ̀ wé ɓaɖa-bùè nììn mɔ̀à Nàmàǔn-Ɖɛ-Kɔ̃in-Ɓáìn-wèɔ̀ kɛɛ ɓaɖa. 10Kǎà ɓě mɛ nyu zɔ̃ɔ̀ kpáɖá-nyɔ sɔ̃́ ɓaɖa-bùè nììnɔ̀ wáká poɛ ɓó ḿ bìì, ɓɛ́ ɓě ké zio po ɓá buɛ̀ jè dyí, ɖé nyɔ séín ɓɛ́ wa cĩ́ ɖé ɓěɛ̀ ɓóɖóɔ̀ dà séín nyɛɛ gbo. Ɔ mɛ mɔ̀ ɖɛ-séín-ɖe-tò-zɔ̃̀ ɓó ɓě bìì. Ɓó tia ɓaɖaa, ɓěɛ̀ ɖò-ɖò séín mɛ tò ɔ mǔè ɖò nììn pá ɓɛ́ ɔ ɓéɖéɛɛ ɔ mǔèɔ̀ dyí ɖe, ké Éézùɖùɛ̀-dyù ɖò ɓɛ́ wa dɔ̃ ma wíɖí múɛɛ, wa mɛ buɛ̀ ɔ, ɓɛ́ Éézùɖùɛ̀-dyùɔ̀ ké ɔ mìɔùn nììn nyɔ ɓěɔ̀ gbo ɖe mu. 11Zɔ̃ɔ̀ kpáɖá-nyɔ sɔ̃́ ɓaɖa-bùè nììn mɔ̀à ɖɛ-séín-ɖe-tò-zɔ̃̀ɔ̀ ɓó ɓě bììɛɛ xwíníín nyɛɛ, ɓěɛ̀ nyɔ ɖò ní ɖá ɓɛ́ ɔ ké ɖɛ ɖò ɓá, ké nyɔ ɖò ní ɖá ɓɛ́ ɔ ké ɓáá-ɖɛ̀ɔ̀ nyɔ mìɔùn mɛ kɛɛ mɔɔ géɖéè-gbǎɔ̀ nyɔ sèà ɓó, ɓɛ́ wa seà dya dyi nɔ̀mɔ̀ìn nyɛɛ ɖò kpã́ ɓó dyi dè jè, 12sepóɛɖé ɔ mɔ̀ ɖɛ-séín-ɖe-tò-zɔ̃̀, ké ɓě mɛ poɛ wáká ɓó ḿ bìì. Kɛɛ ɓě ɓɛ́ìn ɖii-ɖɛ̀ ɓě ɓɛ́ ɓě mu ɖé geɖe ɓěɔ̀ gbo zàùn nyɛ̀nɛ̀ɛ̀ kɛɛ ɖiɛ.
13“Ɖé zɔ̃ nìà kɛ xwíníín nyɛɛ, nyɔ kã̀ìn séín ɓɛ́ ɔ dɔ̃ ma ɔ mǔè ɖòɛ̀ pá kɛɛ, ɔ mɛ tòɛ̀ nyɔ kɔ̃̀ɔ̀ kɛɛ dyí ɖe. 14Ɔ jǔ ké nyɔ ɖò dyi ɔ mǔè ɖò pá ɖò gbo pèɖèìn ní, nìí, nyɔɔ̀ ní ɖá ɓɛ́ ɔ ké ɔ mǔèɔ̀ kpáná kɔ̃ún po. 15Ɖɛ-ɓá-zɔ̃̀ jĩ̀ kà sè ɓó dyúa hwɛ̀ ɓɛ́ ɖɛ-séín-ɖe-tò-zɔ̃̀ɔ̀ ké ɓó nyiniɛɛ, ɔ mɔ̀ ti nyɔɔ̀ mɛ po hwòɖǒ gbo, hwɛ̀ ɓɛ́ ɔ ké páɔ̀ ɔ mǔèɔ̀ gbo pèɖèìn. 16Ɔ jǔ ké zɔ̃ sè ɓó dyúa kɛɛ dyi dyí vò ní, nyɔɔ̀ ɓɛ́ìn píɔ́ɔ̀ dyií kpaa. Kɛɛ ɔ jǔ ké zɔ̃ sè ɓó dyúa kɛɛ se dyí vò ní, nyɔɔ̀ mɛ dyà píɔ́ɔ̀ ɓíɖíi. Sepóɛɖé ɖɛ nyɔɔ̀ nìà ɔ mǔèɔ̀ gbo pèɖèɛ̌n jɛ́ɛ́ kɛɛ mɔ̀ ɖɛ-ɓá-zɔ̃̀ jĩ̀ kà sè ɓóɛ. 17Nyɔ ɖò ní ɖá ɓɛ́ ɔ ké ɔ mǔè ɖò kpáná kɔ̃ún po. Kɛɛ ɓě mɛ fɛ̃̀ìn ḿ dyi, sepóɛɖé mɔ̄ mɔ̀ Bounɓo mɔ̀à ɓěɛ̀ Gèɖèpɔ́ɔ̀ kɛ̀.
Fũ̀à-fṹá ɓá zɔ̃ɔ̀ mɛ̀nɛ̌ìn-sɔ̃́ nììnɔ̀ jè dyíɛ
18“Ɓě mɛ kpɔ̃ ní gma séín ɓěɔ̀ dyi kóɖó-kóɖó, ɓɛ́ ɓě ké wa kíɖíí sí. Ɔ dyi ná nìǐn, nìí, ɓě mu ɖé ɓóɖóɔ̀ kɔ̃ cĩ́ìn ɖé gìɖìǐ mú. 19Ɓěɛ̀ ɓáá-ɖɛ̀ ɓěɔ̀ mu ɖé ɓóɖóɔ̀ kɔ̃ bãùn, ké ɓě mu ɖɛ ɖiìn, ɓɛ́ ɓě ké ɖoɓo, ké ɓě mu ɖé ɓóɖóɔ̀ kɔ̃ cĩ́ìn ɖé gìɖìǐ mú. 20Ti ɖíɛ́ ɓě ní, ɓě ɓɛ́ìn ɖɛi dièɛ̀, ɓɛ́ ɓě ké níiń, ‘Ɔ jǔ ké à se à ɓáá-ɖɛ̀ ɓěɔ̀ ɓá ɓó zɔ̃ɔ̀ mɛ̀nɛ̌ìn-sɔ̃́ nììnɔ̀ xwíníín, ɓɛ́ à ké waà ɓo ɓěɔ̀ kpã́ ní, nìí, ɖɛ́ à mu ɖiìn nyɛ́?’ 21Ní muɛ nyuùn ɓɛ́ ɓěɛ̀ ɓáá-ɖɛ̀ ɓěɔ̀ ké bã mìɔ ɖé zɔ̃ɔ̀ mɛ̀nɛ̌ìn-ɖò nììnɔ̀ xwíníín, ɓɛ́ ɓě ké ɖé ɖii-ɖɛ̀ dyé ɓó zɔ̃ sɔ̃́ bìì. 22Ti ɓɛ́ ɓě mu ɓěɛ̀ ɓáá-ɖɛ̀ ɓěɔ̀ ɓáuń nììn ɖé zɔ̃ɔ̀ mɛ̀nɛ̌ìn-tã nììnɔ̀ xwíníín nyɛɛ, ɓě mu ɖii-ɖɛ̀ sùà ɓɛ́ ɔ sɔ̀ ma kà ɖé ɓěɛ̀ geɖe ɓěɔ̀ gbo ɓó zɔ̃ɔ̀ mɛ̀nɛ̌ìn-ɖò nììnɔ̀ xwíníín nyɛɛ ɖiɛń dyi gã̀ùn tee, ɓɛ́ zɔ̃ɔ̀ mɛ̀nɛ̌ìn-tã nììnɔ̀ geɖe ɓěɔ̀ ké kɔ́ hwɛ̀.
Gma ɓě ɓá pá ɖe tò jè dyíɛ
23“Nyɔ ɖò ní ɖá ɓɛ́ ɔ ké ɔ nììn páɔ̀ peɖe gàná cá. Sepóɛɖé mɔ̄ mɔ̀ nyɔ kɔ̃̀ páɔ̀, ké ɓě mɔ̀ ɖéè ɓɛ́ ɓě ké ní páɔ̀ kũ̀à mú nyùìn pū.
24“Ɔ jǔ ké nyɔ ɖò dyi ɔ pá ɖò peɖe ní, ɔ ɓéɖé kpé ɓɛ́ ɔ ké ɔ páɔ̀ gbǎà ɖe. Ɖɛ nìà kɛ mɛ mɔ̀ gma ɖé ɓóɖóɔ̀ dà séín. 25Ɔ jǔ ké ɓě ɖò dyi gǎ dyé, ké gǎɔ̀ dyiɛ nyu ké nyɔɔ̀ dyi ɔ páɔ̀ ɖò peɖe ní, nìí, gǎ-dyé-nyɔ̀ɔ̀ gbǒ-xwíníín-nyɔ̀ xwɛ̃́ìn ɔ bũ̌in, ɓɛ́ ɔ mɔ̀ nyɔ ɓéɖé ɔ kéɛ gbǎà kɛɛ mɛ gbǎà pá ɓɛ́ nyɔɔ̀ peɖeà kɛɛ ɓó ɔ bìì. 26Kɛɛ ti ɖíɛ́ ɓě ní, nyɔɔ̀ se gbǒ-xwíníín-nyɔ̀ ɖò ɓéɖé, ɓɛ́ ɔ kéɛ gbǎà ɓɛ́ìn ɓó ɔ bìì. Ɔ dyi ná nìǐn, ké nyɔɔ̀ mìɔùn dyi kpé ɓɛ́ìn, ɓɛ́ ɔ kéɛ gbǎà ɖé dyúa ní, 27nìí, ɔ mɛ gmɔ̀ zɔ̃ jĩ̀ kà ɖǎ zi sɔ̀ìn ɓó ti ɔ peɖeɛ ma kà kɛɛ xwíníín, ɓɛ́ ɔ ké zɔ̃ jĩ̀ kà sè ɓó dyúa hwɛ̀ ɓɛ́ ɖɛ-séín-ɖe-tò-zɔ̃̀ɔ̀ ké ɓó nyiniɛɛ wíɖí ɖe tò. Sɔ̀ìn ɓóɛ gboɛɛ, nìí, ɔ ɓɛ́ìn muɛ, ɓɛ́ ɔ ké ɔ páɔ̀ dyí ɖú ɖe. 28Kɛɛ ɔ jǔ ké nyɔɔ̀ se wíɖí dyéɛ ɓɛ́ìn, ɓɛ́ ɔ ké nyɔ ɓɛ́ ɔ dɔ̃ ma kà ɔ páɔ̀ gboɛɛ wíɖíɔ̀ ɖe tò ní, nìí, páɔ̀ mɛ nì nyɔ dɔ̃àà kɛɛ xwa tee ɓɛ́ ɔ ké ɖɛ-séín-ɖe-tò-zɔ̃̀ɔ̀ dyɛ̀ìn hwɛ̀. Ɓó tia ɓaɖaa, nìí, nyɔ kɔ̃̀à páɔ̀ kĩ́ín nyɛɛ ɓɛ́ìn ɔ páɔ̀ dyí ɖúɛ ɖe.
29“Ɔ jǔ ké nyɔ ɖò dyi ɔ gbǒ ɓɛ́ ɔ nì ɖé hwɔɖɔ, ɓɛ́ ɔ nì gmɔ ɖeiɛ múɛɛ ɔ mǔè ɖò gbo pèɖèìn ní, nyɔ peɖeà gbǒɔ̀ kɛɛ ɓéɖé kpé ɓɛ́ ɔ ké ɔ gbǒɔ̀ gbǎà ɖe, hwɛ̀ ɓɛ́ zɔ̃ ɖò ké jɛ̀ɖɛ̀. 30Kɛɛ ɔ jǔ ké nyɔɔ̀ seɛ gbǎà, ké zɔ̃ ɖò dyi jɛ̀ɖɛ̀ ní, nìí, gbǒɔ̀ mɔ̀ nyɔ dɔ̃àà kɛ kè ɔ xwíníín-dyù ɓěɛ̀ kɔ̃̀ɔ̀-ɖɛ̀. Ké ɔ se ɓéɖé ɓɛ́ ɔ kéɛ ɖe tò ɖé ɖɛ-séín-ɖe-tò-zɔ̃̀ɔ̀ xwíníín. 31Kɛɛ gbǒ ɓɛ́ ɔ nì hwɔɖɔ-dyù ɖò, ɓɛ́ ɔ se gmɔ ɖei nìɛ múɛɛ, gma ɓě ɓá pá ɖò gbǎà jè dyíɛɛ mɛ nì ɓóɛ jè ɖekè. Gbǒ nì ná kɛɛ, nyɔǔn ɓéɖé kpé ɓɛ́ wa kéɛ gbǎà ti séín pū, ké nyɔ ɓɛ́ ɔ dɔ̃à gbǒɔ̀ kɛɛ mɛ tòɛ̀ nyɔ kɔ̃̀ɔ̀ kɛɛ dyí ɖe ɖé ɖɛ-séín-ɖe-tò-zɔ̃̀ɔ̀ xwíníín. 32Ɓá Ɖíìváà-nyɔ̀ ɓěɔ̀ mɔ̀ùn jè dyíɛɛ, wa ɓéɖé kpé ɓɛ́ wa ké gbǒ ɓě ɓɛ́ wa nì ɖé hwɔɖɔ ɓě, ɓɛ́ ḿ nyí wa kɛ múɛɛ gbǎà ɓó ti séín pū. 33Ɔ jǔ ké Ɖíìváà-nyɔ̀ ɖò dyi ɔ gbǒ ɖò nì ɖé Ɖíìváà-nyɔ̀ ɓěɔ̀ nììn hwɔɖɔ ɓěɔ̀ ɖò múɛɛ peɖe, ké ɔ seɛ gbǎà ní, nìí, nyɔ ɓɛ́ ɔ dɔ̃à gbǒɔ̀ kɛɛ mɛ tòɛ̀ ɖe ɖé ɖɛ-séín-ɖe-tò-zɔ̃̀ɔ̀ xwíníín. Sepóɛɖé gbǒ ɓě ɓɛ́ Ɖíìváà-nyɔ̀ ɓěɔ̀ kɔ̃̀ ɖé wa nììn hwɔɖɔ ɓěɔ̀ múɛɛ mɔ̀ waà kɔ̃̀ɔ̀-ɖɛ̀ ɖé ɓě mɔ̀ Éézùɖùɛ̀-dyù ɓěɔ̀ hwìɛ̀. 34Kɛɛ nyúà-ɖɛ̀ dyi-ɖi-naín ɓě nìà Ɖíìváà-nyɔ̀ ɓěɔ̀ hwɔɖɔ ɓěɔ̀ ɖeiɛɛ, wa mɛ ɓɔ́ɔ peɖeɛ fɔɔ cá, sepóɛɖé pá ɓěɔ̀ mɔ̀ wa nììn kánáá pū.
Gma ɓě ɓá gǎ-dyé-nyɔ̀ ɓě kpaún po jè dyíɛ
35“Ɔ jǔ ké ɓě ɖò dyi gǎ dyé mìɔ, ké ɔ se ɔ mìɔùn gbo gmɔ̀ɔ̀ ɓɛ́ìn ní, nìí, nyɔ ɖò mɛ kpá ɔ gbo kà ɔ kéɔ́ kà ɖéè ɖò gbo kpáa nyuɛ, ɓɛ́ gǎ-dyé-nyɔ̀ɔ̀ ké ɓó ɓě hwìɛ̀ cĩ́ɛ ɓɛ́ìn kánáá pū. 36Ké nyɔ ɖò ní ɖá ɓɛ́ ɔ ké ɔ mǔè ɖò kpáná ɖò xwai mɔ́. Kɛɛ ɓě séín mɛ fɛ̃̀ìn ḿ dyi, ɓɛ́ ɓě kéɛ nyu ɓɛ́ ɓě mǔèɔ̀ ké ɖé ɓě hwìɛ̀ cĩ́ kánáá pū. 37Nyɔ ɖò ní ɖá ɓɛ́ ɔ ké ɔ mǔè ɖò wíɖí kpaún po ɓó kpáná ɖò dyé jè, mɔɔ ɓɛ́ ɔ ké ɔ mǔèɔ̀ ɖii-ɖɛ̀ ɖò gbo pèɖèìn ɓó kpáná ɖò dyé jè. 38Ɓě mɛ ɓɔ́ ɖɛ ɓěɛ̀ ɖò nyuɛ, sepóɛɖé mɔ̄ mɔ̀à Bounɓo mɔ̀à ɓěɛ̀ Gèɖèpɔ́ɔ̀ kɛɛ mɔ̀ nyɔ zà ma kà ɓě ɖé Íjè-ɓòɖòɔ̀ kɔ̃, ɓɛ́ ḿ kéà ɓě Kénà-ɓòɖòɔ̀ nyí, ɔ kè ɓɛ́ ḿ kéà ɓěɛ̀ Gèɖèpɔ́ɔ̀ jǔɛ̀.
Gma ɓě ɓá Éézùɖùɛ̀-nyɔ̀ ɓɛ́ nyɔ ɖò dɔ̃ wíɖí múɛɛ buɛ̀ jè dyíɛ
39“Ɔ jǔ ké ɓě mǔè Éézùɖùɛ̀-dyù ɓěɔ̀ ɖò dyi gǎ dyé mìɔ jè, ké ɔ dyi ɔ mìɔùn ɓě ɖò gbo pèɖèìn ní, nìí, nyɔ dɔ̃à ɔ kɛɛ mɛ ɓɔ́ ɔ kũ̀à nyùɛ̀n kà gǐì nìà kɛ. 40Kɛɛ nyɔ dɔ̃à ɔ kɛɛ mɛ kpɔ̃ ɔ kà nyɔ kpɔ̃à pɛ́ɛ̀-nyɔ̀ ɖò kɛ, mɔɔ kà nyɔ kpɔ̃à ɖéè ɖò kɛ. Nyɔɔ̀ mɛ nyu nyɔ dɔ̃à ɔ kɛɛ kũ̀à tee, ɓɛ́ ɔ ké ɖɛ-séín-ɖe-tò-zɔ̃̀ɔ̀ dyɛ̀ìn. 41Sɔ̀ìn ɓóɛ gboɛɛ, nìí, nyɔɔ̀ kè ɔ dyú ɓě mɛ buɛ̀, ɓɛ́ ɔ ké ɔ mìɔùn ɓíɖí ɖe mu, ɓɛ́ ɔ ké ɔ ɓǎ ɓěɛ̀ kɔ̃̀ɔ̀-ɖɛ̀ ɓěɔ̀ dyí ɖú ɖe. 42Ɓě mɔ̀ Éézùɖùɛ̀-dyù ɓěɛɛ, ɓě mɔ̀ ní gǐì ɓě ɓɛ́ ḿ zà ma kà ɖé Íjè-ɓòɖòɔ̀ kɔ̃ɛ jèɛɛ, nyɔ ɖò ní ɖá ɓɛ́ ɔ ké ɓě ɖò gǐì mú dɔ̃ fɔɔ cá, 43ké ɔ ní ɖá ɓɛ́ ɔ ké ɔ wuɖuí kɔ̃̀ nyɔ-dyi-nɛ́ìn-kà. Kɛɛ ɓě séín mɛ fɛ̃̀ìn ḿ dyi. 44Ɓěɛ̀ gǐì-gàà kè gǐì-màà ɓěɔ̀ mɛ mɔ̀ nyɔ ɓě ɓɛ́ wa sɔ̀ ɓóɖó-dù ɓě nì ɓó ɓě ɖeiɛɛ kɔ̃ɛ. Ɖé ɓóɖó-dù ɓěa hwìɛ̀, ɖéɛ̀ ɓě ɓɛ́ìn gǐì dɔ̃ɔ. 45Ké ɓě ɓɛ́ìn ɖíà ɓě cĩ́ ɖé ɓě hwìɛ̀ kɛ kè waà gbǒ-xwíníín-nyɔ̀ ɓě ɓɛ́ wa wóɖóìn ɖé ɓěɛ̀ ɓóɖóɔ̀ kɔ̃ɛɛ gǐì mú dɔ̃ɔ, ɓɛ́ wa ké ɓěɛ̀ kɔ̃̀ɔ̀-ɖɛ̀ jǔ. 46Ké ɓě ɓɛ́ìn wa ɓěɛ̀ dyú ɓě gbo sèɛ̀, ɓɛ́ wa ké ɓěɛ̀ dyú ɓěɔ̀ kɔ̃̀ɔ̀-ɖɛ̀ jǔ ɖekè. Ɓě ɓɛ́ìn wa gǐì mú nyuɛ ɖé waà fɛ̀ɛ̀-wè séín mú. Kɛɛ ɓěɛ̀ nyɔ ɖò ní ɖá ɓɛ́ ɔ ké ɔ mǔè Éézùɖùɛ̀-dyù ɖò wuɖuí kɔ̃̀ nyɔ-dyi-nɛ́ìn-kà.
47“Ɔ jǔ ké ɖíà ɓě cĩ́à ɖé ɓě hwìɛ̀ kɛɛ ɖò dyi bã, ké ɓě mɔ̀ Éézùɖùɛ̀-dyù ɓěɛɛ ɖò mɔ̀ùn dyi gǎ dyé mìɔ jè, ké ɔ dyi ɔ mìɔùn ɖíà-nyɔ̀ɔ̀ mɔɔ ɖíà-nyɔ̀ɔ̀ gbǒ-xwíníín-nyɔ̀ ɖò gbo pèɖèìn ní, 48nìí, ɔ ɓéɖé kpé ɓɛ́ ɔ ké ɔ mìɔùn gbǎà sɔ̀ìn ɓó ti ɔ ɖǎ ɔ mìɔùn ɖíà-nyɔ̀ɔ̀ gbo pèɖèìn nyɛ. Ɔ ɖíí-gàà ɖò 49mɔɔ ɔ ɓǎ ɖíí-gàà ɖò mɔɔ ɔ ɓǎ ɖíí-gàà dyú ɖò mɔɔ ɔ gbǒ-xwíníín-nyɔ̀ tɔ̀ɔ̀ ɖò mɛ gbǎà ɔ. Mɔɔ ké ɔ jǔ ké nyɔɔ̀ dyi kpé ɓɛ́ìn ní, nìí, ɔ mɛ gbǎà ɔ mìɔùn. 50Ɔ dyi ná nìǐn, nìí, ɔ kè nyɔ dɔ̃à ɔ kɛɛ mɛ gmɔ̀ zɔ̃ jĩ̀ kà ɖǎ zi sɔ̀ìn ɓó ti ɔ pèɖèìn ma kà ɔ mìɔùn nyɔɔ̀ gboɛɛ xwíníín, ɓɛ́ ɔ ké zɔ̃ jĩ̀ kà sè ɓó dyúa hwɛ̀ ɓɛ́ ɖɛ-séín-ɖe-tò-zɔ̃̀ɔ̀ ké ɓó nyiniɛɛ wíɖí ɖe tò. Ɔ mɛ pɛ́ɛ̀ ɔ dyììn ɖé wíɖí jĩ̀ kà ɓɛ́ wa pɛ́ɛ̀ kũ̀à-nyu-nyɔ̀ ɓó zɔ̃ dyúáɖò xwíníín nyɛɛ mú. 51Ɔ jǔ ké zɔ̃ sè ɓó dyúa kɛɛ dyi dyí vò ní, nìí, ɔ mɛ pɛ́ɛ̀ nyɔ dɔ̃à ɔ kɛɛ wíɖí ɓáún-ɓáún. 52Kɛɛ ɔ jǔ ké zɔ̃ sè ɓó dyúa kɛɛ se dyí vò ní, ɔ mɛ pɛ́ɛ̀ nyɔɔ̀ wíɖí tííwè. Ɔ mɛ pɛ́ɛ̀ wíɖíɔ̀ dyììn ɖé zɔ̃ jĩ̀ kà sè ɓó dyúa hwɛ̀ ɓɛ́ ɖɛ-séín-ɖe-tò-zɔ̃̀ɔ̀ ké ɓó nyiniɛɛ mú. 53Nyɔ dɔ̃à ɔ kɛɛ mɛ kpɔ̃ ɔ kà nyɔ kpɔ̃à kũ̀à-nyu-nyɔ̀, ɓɛ́ wa ké pɛ́ɛ̀ ɓó zɔ̃ kè zɔ̃ xwíníín nyɛ. Ɔ ní ɖá ɓɛ́ ɔ ké ɔ wuɖuí kɔ̃̀ nyɔ-dyi-nɛ́ìn-kà. 54Ɔ jǔ ké nyɔɔ̀ mìɔùn mɔɔ ɔ nyɔ ɖò se ɔ gbǎà ɓɛ́ìn ní, nìí, ɔ kè ɔ dyú ɓě mɛ buɛ̀ ɖé ɖɛ-séín-ɖe-tò-zɔ̃̀ɔ̀ xwíníín. 55Ɓě mɔ̀ Éézùɖùɛ̀-dyù ɓěɛɛ, ɓě mɛ ɓɔ́ gǐì jǔɛ, sepóɛɖé ɓě mɔ̀ ní gǐì ɓě. Mɔ̄ kɔ̃̀ ɓě. Ɓě mɔ̀ ní gǐì ɓě ɓɛ́ ḿ zà ma kà ɖé Íjè-ɓòɖòɔ̀ kɔ̃ɛ. Ɓě mɛ nyu ɖɛ ɓěɛ̀, sepóɛɖé mɔ̄ mɔ̀ Bounɓo mɔ̀à ɓěɛ̀ Gèɖèpɔ́ɔ̀ kɛ̀.”
Currently Selected:
:
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.