Ɖìvéɖékɔ̀ 24
24
Gma ɓě ɓá jàɖàìn-gbòɔ̀ ɖáùnpò ɓěɔ̀ gbo gmɔ̀ jè dyíɛ
(Ɛ́séɖɔ̀ 27:20-21)
1Hwɛ̀ ké Bounɓoɔ̀ wùɖù ma Mózè gbo ɖe, ké ɔ ɖá, 2-3“Cɛ̃ gma ɓě nìà kɛ Éézùɖùɛ̀-dyù ɓěɔ̀ gbo. Gma ɓěɔ̀ mɔ̀, Éézùɖùɛ̀-dyù ɓěɔ̀ mɛ dyà cáná nɔ̀mɔ̀ dyíin ɓɛ́ wa zà ɔ́ɖè-ɓò mú ɖieɛɛ ɓó ɖáùnpò ɓě ɓɛ́ wa nìà jàɖàìn-gbòɔ̀ múɛɛ bìì, ɓɛ́ wa ké wãuń nì kánáá pū ɓó máaún. Ɖáùnpò ɓěɔ̀ nì ɓó Pá Hwɛ̀ǐn-hwɛ̀ǐnɔ̀ mú, ké faà-ɖɔ̀ɔ̀ ɓá ɓó wa kè gma-gbɔ̀ɖɔ̀ɔ̀ pṹa dyií. Eɖóún mɛ gmɔ̀ ɖáùnpò ɓěɔ̀ jè gbo, ɓɛ́ wa ké wãuń nì kánáá pū ɓó ḿ dyúa, sɔ̀ìn hwìo gbo dyɛ̀ìn gànà-kṹún wɛ̃. Ɖɛ nìà kɛ mɛ mɔ̀ gma kánáá pū ɓó ɓě kè ɓěɛ̀ xwíníín-dyù ɓě bìì. 4Eɖóún kè ɔ dyú-gàà ɓěɔ̀ ɓéɖé ɓɛ́ wa ké ɖáùnpò ɓě nìà kɛ jè gbo gmɔ̀, ɓɛ́ wa ké wãuń nì máaún kánáá pū ɓó ḿ dyúa. Wa mɔ̀ ɖáùnpò ɓě kɔ̃̀ kɔ̃-dè-ɖɛ̀ mɔ̀à góò kɛ.
Gma ɓě ɓá bɛɖɛɛ̀ wa ké Gèɖèpɔ́ɔ̀ dyúa dyi dè kánáá pūɛɛ jè dyíɛ
5“Sáa-zà-nyɔ̀ ɓěɔ̀ mɛ ɖú fáɖáɓà nìɛ̀-nìɛ̀ kópò-wè hɔ̃dɛ̀ɖɛ̀ ɖò kè kpáɖá-nyɔ hĩinyɛ ɓaɖa-bùè sè sɔ̃́ dyí, ɓɛ́ wa kéɛ bɛɖɛɛ̀-kpò ɓaɖa-bùè sè sɔ̃́ mú nyu. Bɛɖɛɛ̀-kpò ɖò-ɖò mɛ ɖú fáɖáɓà-kòpò-wè ɓaɖa-bùè sè mɛ̀nɛ̌ìn-ɖò dyí. 6Wa ɖǎa náa nyuín, wa mɛ gbǒɛ̀n kòò sɔ̃́ dyí ɓó góò-tèɓèɖè ɓɛ́ ɔ nìà ɖé jàɖàìn-gbòɔ̀ Pá Hwɛ̀ǐn-hwɛ̀ǐnɔ̀ múɛɛ kɔ̃ ɓó ḿ dyúa. Bɛɖɛɛ̀-kpò mɛ̀nɛ̌ìn-ɖò mɛ nì kòò dyúáɖò mú. 7Sɔ̀ìn ɓóɛ gboɛɛ, wa mɛ po nyɔ́ún-nɔ̀mɔ̀-ɖɛ̀ kpa ɖɛ ɖò ɓó bɛɖɛɛ̀ɔ̀ kòò ɖò-ɖò kɔ̃. Wa ɖǎa náa nyuín, wa mɛ fɔ̃ nyɔ́ún-nɔ̀mɔ̀-ɖɛ̀ɔ̀, ɓɛ́ ɔ ké ɖii-ɖɛ̀-sàǎ-zàìn-ɖɛ̀ jǔ ɓó bɛɖɛɛ̀ɔ̀ bɛ̃̌ǐn. Ɖɛ nìà kɛ muɛ nyɔǔn dyí tɛ̀mɛ̀ìn kà wa ɖǎa séín ḿ nyíɛ. 8Wa ɓéɖé ɓɛ́ wa ké bɛɖɛɛ̀ nìà kɛ gbo zĩàìn, ɓɛ́ wa ké bɛɖɛɛ̀ ɖìè ɓóɛ bɛ̃̌ǐn po ɓó ní fɔ̀-wè séínɔ̀ ɓaɖa. Wa mɛ nyuɛ náa ɓó ḿ dyúa, ɓó Éézùɖùɛ̀-dyù ɓěɔ̀ bìì, ɓɛ́ ɔ ké sè-ná-sèɛ̀ dèè-wùɖù nìà ɓó ḿ kè Éézùɖùɛ̀-dyù ɓěɔ̀ pṹa kɛɛ dyí-tɛ̀mɛ̀ìn-ɖɛ̀ jǔ. 9Wa ɖǎa náa nyuín, nìí, Eɖóún kè ɔ dyú-gàà ɓě mɔ̀à sáa-zà-nyɔ̀ ɓěɔ̀ kɛɛ mɔ̀ nyɔ kɔ̃̀ bɛɖɛɛ̀ɔ̀ nyɔ wa muà ɓó téɓèɖèɔ̀ kɔ̃ zàùn wɛ̃. Ké wa mɛ ɖìɛ̀n pá hwɛ̀ǐn-hwɛ̀ǐn ɖò mú, sepóɛɖé ɔ hwɛ̀ mú mìɔ. Bɛɖɛɛ̀ nìà kɛ mɛ mɔ̀ sáa-zà-nyɔ̀ ɓěɔ̀ nììn kánáá pū ɖé ɖii-ɖɛ̀-nyìǐ-ɖɛ̀ ɓě ɓɛ́ Éézùɖùɛ̀-dyù ɓěɔ̀ mu ḿ dyàùn wɛ̃ɛ hwìɛ̀.”
Gǎ dyi nyɔ ɖò ɓɛ́ ɔ vàɖǎ ma Gèɖèpɔ́ɔ̀ kɛɛ kɔ̃ɛ
10Wé ɖòɛ̀ ɓaɖaa, Éézùɖùɛ̀-màà ɖòɛ̀ dyú-gàà kɔ̃̀ ɓǎ mɔ̀ ma Íjè-nyɔ̀ɛ kè Éézùɖùɛ̀-nyɔ̀ ɖò nì ma gbàà vɔ̃uń ɖé Éézùɖùɛ̀-nyɔ̀ ɓěɔ̀ jàɖàìn-hwɔ̀ɖɔ̀ɔ̀ mú. 11Éézùɖùɛ̀-màà kɔ̃̀à dyúɔ̀ kɛɛ nyɛ́nɛ́ mɔ̀ ma Sɛ̀ɖómìtì. Ɔ mɔ̀ ma gàa ɖò sɔ̀ ɖé Dɛ̃́ìn nììn xwéɖé-dùɔ̀ mú, kɔ̃̀ nyɛ́nɛ́ mɔ̀ Díɓìɖì kɛɛ dyú-màà. Ti wa nì ma vɔ̃uń wɛ̃ɛ, púɛɛ, Éézùɖùɛ̀-mààɔ̀ dyú-gààɔ̀ vàɖǎ ma Bounɓoɔ̀ ní. Ɔ jèɛɛ, wa kpa ma ɔ Mózè gbo. 12Ké wa po ma ɔ kpɔɖɔ ɖeín, ɓɛ́ wa ké ɖɛ Gèɖèpɔ́ɔ̀ mɔ́ wa ké ɔ bũ̌ nyuɛɛ dyí dyuò hwɛ̀.
13Hwɛ̀ ké Bounɓoɔ̀ cɛ̃ɛ ma Mózè gbo, ké ɔ ɖá, 14“M̀ mɛ kpa vàɖǎ-nyɔ̀ɔ̀ ɖé jàɖàìn-hwɔ̀ɖɔ̀ɔ̀ ɖeín. Ɔ ɖǎ ná nìǐn, nìí, nyɔ kã̀ìn séín ɓɛ́ wa wɔ̃́ ɔ vàɖǎ-wùɖùɔ̀ kɛɛ mɛ dè ɔ sɔ̃ dúún, ɓɛ́ ɔ mìɔùn nììn zaaɔ̀ ké ɔ ɖɔ nì. Sɔ̀ìn ɓóɛ gboɛɛ, nìí, Éézùɖùɛ̀-dyù séín ɓěɔ̀ mɛ taɓaìn ɔ sɔ́ɔ́-kpò dyi, ɓɛ́ ɔ ké mɛ́. 15Ɔ ɖǎ ná nìǐn, nìí, m̀ mɛ cɛ̃ɛ Éézùɖùɛ̀-dyù ɓěɔ̀ gbo kà ḿ ɖá ɔ jǔ ké nyɔ ɖò dyi ḿ vàɖǎ ní, nìí, nyɔɔ̀ ɓéɖé ɓɛ́ ɔ ké ɔ ɖɛ gbàɔ̀ kpa dyí ɖúɛ. 16Nyɔ ɖò dyi ḿ vàɖǎ ní, Éézùɖùɛ̀-dyù séín ɓěɔ̀ ɓéɖé ɓɛ́ wa ké ɔ ɖáɓá. Wa ɓéɖé ɓɛ́ wa ké ɔ sɔ́ɔ́-kpò dyi taɓaìn, ɓɛ́ ɔ ké mɛ́, kɛbì ɔ mɛ mɔ̀ Éézùɖùɛ̀-dyù ɓěɔ̀ ɖò mɔɔ ɖíà ɓě cĩ́à ɖé wa hwìɛ̀ kɛɛ ɖòɛ.
17“Ɔ jǔ ké nyɔ ɖò dyi ɔ mǔè ɖò ɖáɓá ní, wa mɛ ɖáɓá ɔ mɔ̀ùn ɖekè. 18Ɔ jǔ ké nyɔ ɖò dyi ɔ mǔè ɖòɛ̀ nyúà-ɖɛ̀ ɖò ɖáɓá ní, ɔ mɛ tò nyúà-ɖɛ̀ɔ̀ ɖò ɖe. Gmaɔ̀ xwíníín mɔ̀, fɛ̀ɛ̀ pɛ́ɛ̀ fɛ̀ɛ̀ jè. 19Ɔ jǔ ké nyɔ ɖò dyi ɔ mǔè ɖò puà ní, ɖɛ ɔ nyuà ɔ mǔèɔ̀ bũ̌ɛɛ ɖò, ɖéɛ̀ wa mɛ nyu ɔ mɔ̀ùn bũ̌ ɖekè. 20Ɔ dyi ɔ mǔèɔ̀ kpá jaɖa ní, nìí, wa ɓéɖé ɓɛ́ wa ké ɔ nììn kpá jaɖa ɖekè. Mɔɔ ɔ dyi ɔ mǔèɔ̀ dyéɖé-ɓò ɖò wa ní, nìí, wa ɓéɖé ɓɛ́ wa ké ɔ nììn dyéɖé-ɓò ɖò wa ɖekè. Mɔɔ ké ɔ dyi ɔ mǔèɔ̀ nììn nyɛ́nɛ́-ɓò ɖò wĩín jaɖa ní, nìí, wa ɓéɖé ɓɛ́ wa ké ɔ mɔ̀ùn nyɛ́nɛ́-ɓò ɖò wĩín jaɖa ɖekè. Kà dyúáɖò kà ɔ nyuà ɔ mǔèɔ̀ puà kɛɛ, kǎà wa mɛ nyuɛ ɔ mɔ̀ùn bũ̌ ɖekè. 21Ɔ jǔ ké nyɔ ɖò dyi ɔ mǔè ɖòɛ̀ nyúà-ɖɛ̀ ɖò ɖáɓá ní, nìí, ɔ ɓéɖé ɓɛ́ ɔ ké ɖò ɖe tò. Kɛɛ ɔ jǔ ké nyɔ ɖò dyi ɔ mǔè ɖò ɖáɓá ní, nìí, wa ɓéɖé ɓɛ́ wa ké ɔ mɔ̀ùn ɖáɓá ɖekè. 22Gma ɓě ɓɛ́ ḿ nìà ɓě nyíɛń nyɛɛ mɛ nì ɓó nyɔ séín bìì, kɛbì ɔ mɛ mɔ̀ ɓě ɖò mɔɔ ɖíà ɓě cĩ́à ɖé ɓě hwìɛ̀ kɛɛ ɖòɛ, sepóɛɖé mɔ̄ mɔ̀ Bounɓo mɔ̀à ɓěɛ̀ Gèɖèpɔ́ɔ̀ kɛ̀.”
23Hwɛ̀ ké Mózè zà ma Éézùɖùɛ̀-nyɔ̀ ɓěɔ̀ wuɖu kɔ̃, ké wa ɖú ma nyɔ ɓɛ́ ɔ vàɖǎ ma kà Bounɓoɔ̀ kɛɛ dyí, ké wa kpa ma ɔ ɖé jàɖàìn-hwɔ̀ɖɔ̀ɔ̀ ɖeín, ké wa taɓaìn ma ɔ sɔ́ɔ́-kpò dyi, ké ɔ mɛ́ ma. Kǎà Éézùɖùɛ̀-nyɔ̀ ɓěɔ̀ nyu ma ɖɛ Bounɓoɔ̀ cɛ̃ ma kà Mózè gboɛɛ nyuɛ.
Currently Selected:
Ɖìvéɖékɔ̀ 24: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
Ɖìvéɖékɔ̀ 24
24
Gma ɓě ɓá jàɖàìn-gbòɔ̀ ɖáùnpò ɓěɔ̀ gbo gmɔ̀ jè dyíɛ
(Ɛ́séɖɔ̀ 27:20-21)
1Hwɛ̀ ké Bounɓoɔ̀ wùɖù ma Mózè gbo ɖe, ké ɔ ɖá, 2-3“Cɛ̃ gma ɓě nìà kɛ Éézùɖùɛ̀-dyù ɓěɔ̀ gbo. Gma ɓěɔ̀ mɔ̀, Éézùɖùɛ̀-dyù ɓěɔ̀ mɛ dyà cáná nɔ̀mɔ̀ dyíin ɓɛ́ wa zà ɔ́ɖè-ɓò mú ɖieɛɛ ɓó ɖáùnpò ɓě ɓɛ́ wa nìà jàɖàìn-gbòɔ̀ múɛɛ bìì, ɓɛ́ wa ké wãuń nì kánáá pū ɓó máaún. Ɖáùnpò ɓěɔ̀ nì ɓó Pá Hwɛ̀ǐn-hwɛ̀ǐnɔ̀ mú, ké faà-ɖɔ̀ɔ̀ ɓá ɓó wa kè gma-gbɔ̀ɖɔ̀ɔ̀ pṹa dyií. Eɖóún mɛ gmɔ̀ ɖáùnpò ɓěɔ̀ jè gbo, ɓɛ́ wa ké wãuń nì kánáá pū ɓó ḿ dyúa, sɔ̀ìn hwìo gbo dyɛ̀ìn gànà-kṹún wɛ̃. Ɖɛ nìà kɛ mɛ mɔ̀ gma kánáá pū ɓó ɓě kè ɓěɛ̀ xwíníín-dyù ɓě bìì. 4Eɖóún kè ɔ dyú-gàà ɓěɔ̀ ɓéɖé ɓɛ́ wa ké ɖáùnpò ɓě nìà kɛ jè gbo gmɔ̀, ɓɛ́ wa ké wãuń nì máaún kánáá pū ɓó ḿ dyúa. Wa mɔ̀ ɖáùnpò ɓě kɔ̃̀ kɔ̃-dè-ɖɛ̀ mɔ̀à góò kɛ.
Gma ɓě ɓá bɛɖɛɛ̀ wa ké Gèɖèpɔ́ɔ̀ dyúa dyi dè kánáá pūɛɛ jè dyíɛ
5“Sáa-zà-nyɔ̀ ɓěɔ̀ mɛ ɖú fáɖáɓà nìɛ̀-nìɛ̀ kópò-wè hɔ̃dɛ̀ɖɛ̀ ɖò kè kpáɖá-nyɔ hĩinyɛ ɓaɖa-bùè sè sɔ̃́ dyí, ɓɛ́ wa kéɛ bɛɖɛɛ̀-kpò ɓaɖa-bùè sè sɔ̃́ mú nyu. Bɛɖɛɛ̀-kpò ɖò-ɖò mɛ ɖú fáɖáɓà-kòpò-wè ɓaɖa-bùè sè mɛ̀nɛ̌ìn-ɖò dyí. 6Wa ɖǎa náa nyuín, wa mɛ gbǒɛ̀n kòò sɔ̃́ dyí ɓó góò-tèɓèɖè ɓɛ́ ɔ nìà ɖé jàɖàìn-gbòɔ̀ Pá Hwɛ̀ǐn-hwɛ̀ǐnɔ̀ múɛɛ kɔ̃ ɓó ḿ dyúa. Bɛɖɛɛ̀-kpò mɛ̀nɛ̌ìn-ɖò mɛ nì kòò dyúáɖò mú. 7Sɔ̀ìn ɓóɛ gboɛɛ, wa mɛ po nyɔ́ún-nɔ̀mɔ̀-ɖɛ̀ kpa ɖɛ ɖò ɓó bɛɖɛɛ̀ɔ̀ kòò ɖò-ɖò kɔ̃. Wa ɖǎa náa nyuín, wa mɛ fɔ̃ nyɔ́ún-nɔ̀mɔ̀-ɖɛ̀ɔ̀, ɓɛ́ ɔ ké ɖii-ɖɛ̀-sàǎ-zàìn-ɖɛ̀ jǔ ɓó bɛɖɛɛ̀ɔ̀ bɛ̃̌ǐn. Ɖɛ nìà kɛ muɛ nyɔǔn dyí tɛ̀mɛ̀ìn kà wa ɖǎa séín ḿ nyíɛ. 8Wa ɓéɖé ɓɛ́ wa ké bɛɖɛɛ̀ nìà kɛ gbo zĩàìn, ɓɛ́ wa ké bɛɖɛɛ̀ ɖìè ɓóɛ bɛ̃̌ǐn po ɓó ní fɔ̀-wè séínɔ̀ ɓaɖa. Wa mɛ nyuɛ náa ɓó ḿ dyúa, ɓó Éézùɖùɛ̀-dyù ɓěɔ̀ bìì, ɓɛ́ ɔ ké sè-ná-sèɛ̀ dèè-wùɖù nìà ɓó ḿ kè Éézùɖùɛ̀-dyù ɓěɔ̀ pṹa kɛɛ dyí-tɛ̀mɛ̀ìn-ɖɛ̀ jǔ. 9Wa ɖǎa náa nyuín, nìí, Eɖóún kè ɔ dyú-gàà ɓě mɔ̀à sáa-zà-nyɔ̀ ɓěɔ̀ kɛɛ mɔ̀ nyɔ kɔ̃̀ bɛɖɛɛ̀ɔ̀ nyɔ wa muà ɓó téɓèɖèɔ̀ kɔ̃ zàùn wɛ̃. Ké wa mɛ ɖìɛ̀n pá hwɛ̀ǐn-hwɛ̀ǐn ɖò mú, sepóɛɖé ɔ hwɛ̀ mú mìɔ. Bɛɖɛɛ̀ nìà kɛ mɛ mɔ̀ sáa-zà-nyɔ̀ ɓěɔ̀ nììn kánáá pū ɖé ɖii-ɖɛ̀-nyìǐ-ɖɛ̀ ɓě ɓɛ́ Éézùɖùɛ̀-dyù ɓěɔ̀ mu ḿ dyàùn wɛ̃ɛ hwìɛ̀.”
Gǎ dyi nyɔ ɖò ɓɛ́ ɔ vàɖǎ ma Gèɖèpɔ́ɔ̀ kɛɛ kɔ̃ɛ
10Wé ɖòɛ̀ ɓaɖaa, Éézùɖùɛ̀-màà ɖòɛ̀ dyú-gàà kɔ̃̀ ɓǎ mɔ̀ ma Íjè-nyɔ̀ɛ kè Éézùɖùɛ̀-nyɔ̀ ɖò nì ma gbàà vɔ̃uń ɖé Éézùɖùɛ̀-nyɔ̀ ɓěɔ̀ jàɖàìn-hwɔ̀ɖɔ̀ɔ̀ mú. 11Éézùɖùɛ̀-màà kɔ̃̀à dyúɔ̀ kɛɛ nyɛ́nɛ́ mɔ̀ ma Sɛ̀ɖómìtì. Ɔ mɔ̀ ma gàa ɖò sɔ̀ ɖé Dɛ̃́ìn nììn xwéɖé-dùɔ̀ mú, kɔ̃̀ nyɛ́nɛ́ mɔ̀ Díɓìɖì kɛɛ dyú-màà. Ti wa nì ma vɔ̃uń wɛ̃ɛ, púɛɛ, Éézùɖùɛ̀-mààɔ̀ dyú-gààɔ̀ vàɖǎ ma Bounɓoɔ̀ ní. Ɔ jèɛɛ, wa kpa ma ɔ Mózè gbo. 12Ké wa po ma ɔ kpɔɖɔ ɖeín, ɓɛ́ wa ké ɖɛ Gèɖèpɔ́ɔ̀ mɔ́ wa ké ɔ bũ̌ nyuɛɛ dyí dyuò hwɛ̀.
13Hwɛ̀ ké Bounɓoɔ̀ cɛ̃ɛ ma Mózè gbo, ké ɔ ɖá, 14“M̀ mɛ kpa vàɖǎ-nyɔ̀ɔ̀ ɖé jàɖàìn-hwɔ̀ɖɔ̀ɔ̀ ɖeín. Ɔ ɖǎ ná nìǐn, nìí, nyɔ kã̀ìn séín ɓɛ́ wa wɔ̃́ ɔ vàɖǎ-wùɖùɔ̀ kɛɛ mɛ dè ɔ sɔ̃ dúún, ɓɛ́ ɔ mìɔùn nììn zaaɔ̀ ké ɔ ɖɔ nì. Sɔ̀ìn ɓóɛ gboɛɛ, nìí, Éézùɖùɛ̀-dyù séín ɓěɔ̀ mɛ taɓaìn ɔ sɔ́ɔ́-kpò dyi, ɓɛ́ ɔ ké mɛ́. 15Ɔ ɖǎ ná nìǐn, nìí, m̀ mɛ cɛ̃ɛ Éézùɖùɛ̀-dyù ɓěɔ̀ gbo kà ḿ ɖá ɔ jǔ ké nyɔ ɖò dyi ḿ vàɖǎ ní, nìí, nyɔɔ̀ ɓéɖé ɓɛ́ ɔ ké ɔ ɖɛ gbàɔ̀ kpa dyí ɖúɛ. 16Nyɔ ɖò dyi ḿ vàɖǎ ní, Éézùɖùɛ̀-dyù séín ɓěɔ̀ ɓéɖé ɓɛ́ wa ké ɔ ɖáɓá. Wa ɓéɖé ɓɛ́ wa ké ɔ sɔ́ɔ́-kpò dyi taɓaìn, ɓɛ́ ɔ ké mɛ́, kɛbì ɔ mɛ mɔ̀ Éézùɖùɛ̀-dyù ɓěɔ̀ ɖò mɔɔ ɖíà ɓě cĩ́à ɖé wa hwìɛ̀ kɛɛ ɖòɛ.
17“Ɔ jǔ ké nyɔ ɖò dyi ɔ mǔè ɖò ɖáɓá ní, wa mɛ ɖáɓá ɔ mɔ̀ùn ɖekè. 18Ɔ jǔ ké nyɔ ɖò dyi ɔ mǔè ɖòɛ̀ nyúà-ɖɛ̀ ɖò ɖáɓá ní, ɔ mɛ tò nyúà-ɖɛ̀ɔ̀ ɖò ɖe. Gmaɔ̀ xwíníín mɔ̀, fɛ̀ɛ̀ pɛ́ɛ̀ fɛ̀ɛ̀ jè. 19Ɔ jǔ ké nyɔ ɖò dyi ɔ mǔè ɖò puà ní, ɖɛ ɔ nyuà ɔ mǔèɔ̀ bũ̌ɛɛ ɖò, ɖéɛ̀ wa mɛ nyu ɔ mɔ̀ùn bũ̌ ɖekè. 20Ɔ dyi ɔ mǔèɔ̀ kpá jaɖa ní, nìí, wa ɓéɖé ɓɛ́ wa ké ɔ nììn kpá jaɖa ɖekè. Mɔɔ ɔ dyi ɔ mǔèɔ̀ dyéɖé-ɓò ɖò wa ní, nìí, wa ɓéɖé ɓɛ́ wa ké ɔ nììn dyéɖé-ɓò ɖò wa ɖekè. Mɔɔ ké ɔ dyi ɔ mǔèɔ̀ nììn nyɛ́nɛ́-ɓò ɖò wĩín jaɖa ní, nìí, wa ɓéɖé ɓɛ́ wa ké ɔ mɔ̀ùn nyɛ́nɛ́-ɓò ɖò wĩín jaɖa ɖekè. Kà dyúáɖò kà ɔ nyuà ɔ mǔèɔ̀ puà kɛɛ, kǎà wa mɛ nyuɛ ɔ mɔ̀ùn bũ̌ ɖekè. 21Ɔ jǔ ké nyɔ ɖò dyi ɔ mǔè ɖòɛ̀ nyúà-ɖɛ̀ ɖò ɖáɓá ní, nìí, ɔ ɓéɖé ɓɛ́ ɔ ké ɖò ɖe tò. Kɛɛ ɔ jǔ ké nyɔ ɖò dyi ɔ mǔè ɖò ɖáɓá ní, nìí, wa ɓéɖé ɓɛ́ wa ké ɔ mɔ̀ùn ɖáɓá ɖekè. 22Gma ɓě ɓɛ́ ḿ nìà ɓě nyíɛń nyɛɛ mɛ nì ɓó nyɔ séín bìì, kɛbì ɔ mɛ mɔ̀ ɓě ɖò mɔɔ ɖíà ɓě cĩ́à ɖé ɓě hwìɛ̀ kɛɛ ɖòɛ, sepóɛɖé mɔ̄ mɔ̀ Bounɓo mɔ̀à ɓěɛ̀ Gèɖèpɔ́ɔ̀ kɛ̀.”
23Hwɛ̀ ké Mózè zà ma Éézùɖùɛ̀-nyɔ̀ ɓěɔ̀ wuɖu kɔ̃, ké wa ɖú ma nyɔ ɓɛ́ ɔ vàɖǎ ma kà Bounɓoɔ̀ kɛɛ dyí, ké wa kpa ma ɔ ɖé jàɖàìn-hwɔ̀ɖɔ̀ɔ̀ ɖeín, ké wa taɓaìn ma ɔ sɔ́ɔ́-kpò dyi, ké ɔ mɛ́ ma. Kǎà Éézùɖùɛ̀-nyɔ̀ ɓěɔ̀ nyu ma ɖɛ Bounɓoɔ̀ cɛ̃ ma kà Mózè gboɛɛ nyuɛ.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.