Ɖìvéɖékɔ̀ 23
23
Hwɔ ɓě ɓá ɓiè jè dyíɛ
1Hwɛ̀ ké Bounɓoɔ̀ wùɖù ma Mózè gbo ɖe, ké ɔ ɖá, 2“Cɛ̃ɛ Éézùɖùɛ̀-dyù ɓěɔ̀ gbo kà ḿ ɖá hwɔ ɓě ɓɛ́ ḿ ɖǎ wáká poɛɛ, wa kɛà kɛ̀. Ɔ mɔ̀ ti ɓɛ́ m̀ kè Éézùɖùɛ̀-dyù ɓěɔ̀ ké dyí poìn, ɓɛ́ ɓě ké ḿ ɓièɛ.
Gèɖèpɔ́ɔ̀ fɔ̀-wèɔ̀
3“Wé mɛ̀nɛ̌ìn-ɖò mɔ̀ wé ɓě kɔ̃̀ xwíníín ɓɛ́ ɓě ké ɓěɛ̀ kũ̀à ɓě nyu. Kɛɛ wéɔ̀ mɛ̀nɛ̌ìn-sɔ̃́ nììnɔ̀ mɛ mɔ̀ fɔ̀-wè. Ɔ mɔ̀ ní fɔ̀-wèɔ̀. Ɔ mɛ mɔ̀ wé kɔ̃̀ ɓaɖa ɓě ɓéɖé ɓɛ́ ɓě ké dyí poìn, ɓɛ́ ɓě ké ḿ ɓièɛ. Ɓě mɛ ɓɔ́ kũ̀à ɖò nyuɛ ɓó wéa ɓaɖa fɔɔ cá ɖé dɛ̀ kã̀ìn séín ɓě mu nììn nyɛ, sepóɛɖé ɔ mɔ̀ ní fɔ̀-wèɔ̀.
Hwɔ ɓě ɓá kɔ̃in zĩ̀ìn jè kè bɛɖɛɛ̀ se dyáìn-ɖɛ̀ gbo nìɛɛ jè dyíɛ
(Nɔ̀ɓà 28:16-25)
4“Hwɔ tɔ̀ɔ̀ ɓě ɓɛ́ ḿ ɖǎ wáká poɛɛ, wa kɛà kɛ̀. Wa ɖòɛ̀ ti dyi ɓó nyini ní, ɓě mɛ poìn dyí, ɓɛ́ ɓě ké ḿ ɓiè. 5Ní Zĩ̀ìn-Kɔ̃in-hwɔ̀ɔ̀ mɛ dè gbɔ ɓó dɛ̀nɛ̀ kĩ́ínɔ̀ wé ɓaɖa-bùè sè hĩinyɛ nììnɔ̀ hwìo pɛ̀ɛ. 6Ké ɓó dɛ̀nɛ̀ dyúáɖòɔ̀ wé ɓaɖa-bùè sè hm̀m̌ nììnɔ̀ ɓaɖaa, ɔ mɔ̀ ti ní Bɛɖɛɛ̀-Se-Dyáìn-Ɖɛ̀-Gbo-Nì-hwɔ̀ɔ̀ mɛ dè gbɔ. Ɔ ɖǎ ná nìǐn, ɓě mɛ ɖi bɛɖɛɛ̀ ɓɛ́ ɓě se dyáìn-ɖɛ̀ nyùìn nyɛɛ ɖòùn ɓó wé mɛ̀nɛ̌ìn-sɔ̃́ xwíníín. 7Ɓó wéɔ̀ kĩ́ín-kĩ́ínɔ̀ ɓaɖaa, ɓě mɛ ɓɔ́ gana-kũ̀à ɖò nyuɛ, kɛɛ ɓě ɓéɖé ɓɛ́ ɓě ké dyí poìn, ɓɛ́ ɓě ké ḿ ɓiè. 8Ké ɓě mɛ nyu sáa-zàìn-ɖɛ̀ ɓě ɓó ḿ bìì ɓó wé mɛ̀nɛ̌ìn-sɔ̃́ɔ̀ xwíníín. Ké ɓó wéɔ̀ mɛ̀nɛ̌ìn-sɔ̃́ nììnɔ̀ ɓaɖaa, ɓě mɛ ɓɔ́ gana-kũ̀à ɖò nyuɛ, kɛɛ ɓě ɓéɖé ɓɛ́ ɓě ké ḿ ɓiè.”
9Hwɛ̀ ké Bounɓoɔ̀ wùɖù ma Mózè gbo ɖe, ké ɔ ɖá, 10“Cɛ̃ɛ Éézùɖùɛ̀-dyù ɓěɔ̀ gbo kà ḿ ɖá, ti ɓɛ́ ɓě mu ɓóɖó ɓɛ́ ḿ nìà ɓě nyíɛń nyɛɛ kɔ̃ nyiniìn, ké ɓě mu ɓěɛ̀ geɖe ɓěɔ̀ cɛ̃iń nììn nyɛɛ, nìí, ɓě mɛ dyà mɔɔ́-jũ̌ kĩ́ín-kĩ́ín ɓɛ́ ɓě mu cɛ̃ìn nyɛɛ sáa-zà-nyɔ̀ ɓěɔ̀ gbo ɓó Bɛɖɛɛ̀-Se-Dyáìn-Ɖɛ̀-Gbo-Nì-hwɔ̀ɔ̀ jè. 11Ké wa mɛ vũàà dyi, ɓɛ́ ɔ ké nyíí-ɖɛ̀ kpa ɖɛ jǔ ɓó ḿ bìì. Nìí, ní muɛ dyi kpɔ̃ùn. Ti ɓɛ́ sáa-zà-nyɔ̀ ɓěɔ̀ kéɛ dyi vũà kɛɛ mɛ mɔ̀ wé kɔà ɓó ní fɔ̀-wèɔ̀ ɖeín dyíɛɛ ɓaɖa. 12Ké ɓó wé dyúáɖòɔ̀ xwíníín nyɛɛ, sáa-zà-nyɔ̀ ɓěɔ̀ mɛ zàìn ɓáɖáá ɓɛ́ ɔ nyuá zɔ̃ dyúáɖò, ɓɛ́ ɔ se kɛɛ ɖò ɓéɖéɛɛ sáa, ɓɛ́ ɔ ké fɔ̃ɔ-sàǎ-zàìn-ɖɛ̀ jǔ ɓó ḿ bìì. 13Wa mɛ zàìn ɓáɖááɔ̀ kè ɖii-ɖɛ̀-sàǎ-zàìn-ɖɛ̀ mɔ̀à fáɖáɓà nìɛ̀-nìɛ̀ kópò-wè ɓaɖa-bùè sè mɛ̀nɛ̌ìn-ɖò caìn cáná kɛɛ sáa. Ɖɛ nìà kɛ mu nyíí-ɖɛ̀ ɓɛ́ ɔ mu ɖii-ɖɛ̀ kɔ̃̀ nyɔ́ dè ḿ hwìɖǐiɛɛ jǔùn. Wa mɛ zàìn ɖɛ ɓěɛ̀ kè wã́ìn-kòpò-wè hĩinyɛ#23:13 Ɖɛ nìà kɛ mɔ̀ híìn mɔ̀ wa nììn ɖɛ-mú-ɖàɓàìn-ɖɛ̀ kɛɛ wé dyúáɖòɛ̀ wáká hĩinyɛ nììn. sáa. Wã́ìnɔ̀ mɔ̀ náá-ɖɛ̀-sàǎ-zàìn-ɖɛ̀. 14Ké ɓěǐn ɖá ɓɛ́ ɓě ké mɔɔ́ ɖìèɔ̀ ɖò ɖi fɔɔ cá, ɓɛ́ ɔ ké wé kɔ̃̀ ɓaɖa ɓɛ́ ɓě dyàà nyíí-ɖɛ̀ mɔ̀à ɓěɛ̀ mɔɔ́-jũ̌ kĩ́ín-kĩ́ínɔ̀ kɛɛ ḿ gboɛɛ dyɛ̀ìn hwɛ̀. Ɓěǐn ɖá ɓɛ́ ɓě ké ɖò ɖi, kɛbì ɔ mɛ mɔ̀ɔ̀ dyɔɔ mɔɔ ɔ ɖa-ɖa mɔɔ ɔ nyɔ ɓɛ́ ɓě nyu bɛɖɛɛ̀ múɛ. Ɖɛ nìà kɛ mɛ mɔ̀ gma ɓó ɓě kè ɓěɛ̀ xwíníín-dyù ɓě bìì kánáá pū ɖé dɛ̀ kã̀ìn séín ɓě mu nììn nyɛ.
Geɖe-Kɔ́-Ɓàɖà-hwɔ̀ɔ̀
(Nɔ̀ɓà 28:26-31)
15“Sɔ̀ìn ɓó wé kɔà ɓó ní fɔ̀-wèɔ̀ ɖeín dyí, mɔ̀à wé kɔ̃̀ ɓaɖa ɓɛ́ ɓě dyà ɓěɛ̀ mɔɔ́-jũ̌ɔ̀ ɓó dyi vũà jèɛ gboɛɛ, ɓě mɛ zɛɖɛ wíkì mɛ̀nɛ̌ìn-sɔ̃́. 16Ɔ ɖǎ ná nìǐn, ɓó wéɔ̀ kpáɖá-nyɔ sɔ̃́ ɓaɖa-bùè nììn, mɔ̀à wé kɔà ɓó fɔ̀-wè-dù mɛ̀nɛ̌ìn-sɔ̃́ nììnɔ̀ ɖeín dyíɛ ɓaɖaa, ɓě mɛ dyà ḿ ɖii-ɖɛ̀-sàǎ-zàìn-ɖɛ̀ ɓɛ́ ɔ mɔ̀ ɓěɛ̀ mɔɔ́ ɖìèɔ̀ ɖòɛ. 17Ɓě gbǒ-xwíníín ɖò-ɖò séín mɛ dyà bɛɖɛɛ̀-kpò sɔ̃́ ɓɛ́ ɓě nyùìn fáɖáɓà nìɛ̀-nìɛ̀ kópò-wè ɓaɖa-bùè sè mɛ̀nɛ̌ìn-ɖò, ɔ kè ɓɛ́ ɓě po bɛɖɛɛ̀-dyáìn-ɖɛ̀ gboɛ, ɓɛ́ ɔ ké ɖii-ɖɛ̀ kĩ́ín-kĩ́ín sɔ̀ ɖé ɓěɛ̀ geɖe ɓěɔ̀ gboɛɛ jǔ. Ɓě mɛ dyà ɖɛ ɓě nìà kɛ, ɓɛ́ wa ké nyíí-ɖɛ̀ kpa ɖɛ jǔ ɓó ḿ bìì. 18Ɓě mɛ dyà bɛɖɛɛ̀ɔ̀ kè ɓáɖáá ɓíɔ́ mɛ̀nɛ̌ìn-sɔ̃́ ɓɛ́ wa nyuá zɔ̃ dyúáɖòɛ. Ké ɓě mɛ dyà ɓìɖǐ ɓíɔ́ ɖò kè vã́á sɔ̃́. Nyúà-ɖɛ̀ ɓěɔ̀ ɖò ní ɖá ɓɛ́ ɔ ké kɛɛ ɖò ɓéɖé, ké wa mɛ mɔ̀ fɔ̃ɔ-sàǎ-zàìn-ɖɛ̀ ɓó ḿ bìì. Ɓě mɛ dyà nyúà-ɖɛ̀ ɓěɔ̀ kè ɖii-ɖɛ̀-sàǎ-zàìn-ɖɛ̀ kè náá-ɖɛ̀-sàǎ-zàìn-ɖɛ̀. Ɖɛ ɓě nìà kɛ mu nyíí-ɖɛ̀ ɓɛ́ wa mu ɖii-ɖɛ̀ kɔ̃̀ nyɔ́ dè ḿ hwìɖǐiɛɛ jǔùn. 19Ɓě ɖǎa náa nyuín, ɓě mɛ zàìn wiɖi ɓíɔ́ ɖò sáa ɓó nàmàǔn-sàǎ-zàìn-ɖɛ̀ jè. Ké ɓě mɛ zàìn ɓáɖáá sɔ̃́ ɓɛ́ wa nyuá zɔ̃ dyúáɖòɛɛ sáa ɓó gbo-kpɔ̃ìn-sàǎ-zàìn-ɖɛ̀ jè. 20Ɔ ɖǎ ná nìǐn, nìí, sáa-zà-nyɔ̀ ɓěɔ̀ mɛ vũà ɓáɖáá sɔ̃́ɔ̀ kè bɛɖɛɛ̀ sɔ̀à ɖii-ɖɛ̀ kĩ́ín-kĩ́ín sɔ̀à ɖé ɓěɛ̀ geɖe ɓěɔ̀ gboɛ múɛɛ dyi, ɓɛ́ wa ké nyíí-ɖɛ̀ kpa ɖɛ jǔ ɓó ḿ bìì. Wa kpá wáká ɓó ḿ bìì, ké ḿ nyíɛ sáa-zà-nyɔ̀ ɓěɔ̀. 21Ké ɓó wéa ɓaɖaa, ɓě mɛ ɓɔ́ gana-kũ̀à ɖò nyuɛ, kɛɛ ɓě ɓéɖé ɓɛ́ ɓě ké dyí poìn, ɓɛ́ ɓě ké ḿ ɓiè. Ɖɛ nìà kɛ mɛ mɔ̀ gma ɓó ɓě kè ɓěɛ̀ xwíníín-dyù ɓě bìì kánáá pū ɖé dɛ̀ kã̀ìn séín ɓě mu nììn nyɛ.
22“Ti ɓɛ́ ɓě mu ɓěɛ̀ geɖe ɓěɔ̀ cɛ̃ìn nyɛɛ, ɓěǐn ɖá ɓɛ́ ɓě kéɛ xwáɖá gbìǐ dyi kpɔ̃̀ìn, mɔɔ ké ɓěǐn ɖá ɓɛ́ ɓě kéɛ bɛ̃̌ po. Kɛɛ ɓě mɛ sè ɓó wa ɓó gǎ-dyé-nyɔ̀ ɓě kè ɖíà ɓě bìì. Ɓě mɛ nyuɛ náa, sepóɛɖé mɔ̄ mɔ̀ Bounɓo mɔ̀à ɓěɛ̀ Gèɖèpɔ́ɔ̀ kɛ̀.”
Gã̀à-Ɓaɖa-hwɔ̀ɔ̀
(Nɔ̀ɓà 29:1-6)
23Hwɛ̀ ké Bounɓoɔ̀ wùɖù ma Mózè gbo ɖe, ké ɔ ɖá, 24“Cɛ̃ɛ Éézùɖùɛ̀-dyù ɓěɔ̀ gbo kà ḿ ɖá dɛ̀nɛ̀ mɛ̀nɛ̌ìn-sɔ̃́ nììnɔ̀ wé kĩ́ín-kĩ́ínɔ̀ ɓaɖaa, ɓě mɛ fɔ̀. Ké sáa-zà-nyɔ̀ ɓěɔ̀ mɛ ɓaɖa gã̀à, ɓɛ́ ɓě ké dyí poìn, ɓɛ́ ɓě ké ḿ ɓiè. 25Ɓě mɛ ɓɔ́ gana-kũ̀à ɖò nyuɛ, kɛɛ ɓě mɛ nyu sáa-zàìn-ɖɛ̀ ɓě ɓó ḿ bìì.”
Nàmàǔn-Ɖɛ-Kɔ̃in-Ɓáìn-wèɔ̀
(Nɔ̀ɓà 29:7-11)
26Hwɛ̀ ké Bounɓoɔ̀ wùɖù ma Mózè gbo ɖe, ké ɔ ɖá, 27“Dɛ̀nɛ̀ mɛ̀nɛ̌ìn-sɔ̃́ nììnɔ̀ wé ɓaɖa-bùè nììnɔ̀ ɓaɖa mɛ mɔ̀ Nàmàǔn-Ɖɛ-Kɔ̃in-Ɓáìn-wè. Ɓó wéa ɓaɖaa, ɓě ɓéɖé ɓɛ́ ɓě ké dyí poìn, ɓɛ́ ɓě ké ḿ ɓiè, ɓɛ́ ɓě ké wɔ̃ kɔ̃ hwèɖè, ɓɛ́ ɓě ké sáa-zàìn-ɖɛ̀ ɓě nyu ɓó ḿ bìì. 28Ké ɓě mɛ ɓɔ́ kũ̀à ɖò nyuɛ fɔɔ cá, sepóɛɖé ɔ mɔ̀ Nàmàǔn-Ɖɛ-Kɔ̃in-Ɓáìn-wè. Ɔ mɔ̀ wé kɔ̃̀ ɓaɖa sáa-zà-nyɔ̀ vɛ̀nɛ̀ɔ̀ mu ɓěɛ̀ nàmàǔn ɓěɔ̀ kɔ̃in-ɓáìn-ɖɛ̀ nyuùn ɓó ḿ dyúa kɛ. 29Nyɔ mɔ̀ nyɔ ɓɛ́ ɔ se wɔ̃ kɔ̃ hwèɖèɛ̌ mu ɓó wéa ɓaɖaa, ɓě mɛ cɛ̃ ɔ woɖo gbo sɔ̀ìn ɓó ɓě hwìɛ̀. 30Ké nyɔ mu kũ̀à ɖò nyuùn ɓó wéa ɓaɖaa, ní mu nyɔɔ̀ mú gbɔɔ̀ùn sɔ̀ìn ɓó ɓě hwìɛ̀. 31Ɓě mɛ ɓɔ́ kũ̀à ɖò nyuɛ ɓó wéa ɓaɖa fɔɔ cá. Ɖɛ nìà kɛ mɛ mɔ̀ gma ɓó ɓě kè ɓěɛ̀ xwíníín-dyù ɓě bìì kánáá pū ɖé dɛ̀ kã̀ìn séín ɓě mu nììn nyɛ. 32Nàmàǔn-Ɖɛ-Kɔ̃in-Ɓáìn-wèɔ̀ mɛ mɔ̀ fɔ̀-wè ɓó ɓě bìì kà ní fɔ̀-wèɔ̀ nìà kɛ, ké ɓě mɛ hwèɖè wɔ̃ kɔ̃ ɓó wéa ɓaɖa. Ɓě mɛ dè wéɔ̀ jè dyi kpɔ̃ɔ gbɔ sɔ̀ìn ɓó dɛ̀nɛ̀ mɛ̀nɛ̌ìn-sɔ̃́ nììnɔ̀ wé mɛ̀nɛ̌ìn-hĩinyɛ nììnɔ̀ hwìo gbo, ɓɛ́ ɔ ké wéɔ̀ nyɔ kɔ ɓó dyíɛɛ hwìo dyɛ̀ìn.”
Hwɔ ɓá ɓeè-dyù ɓě jè dyíɛ
(Nɔ̀ɓà 29:12-40)
33Hwɛ̀ ké Bounɓoɔ̀ wùɖù ma Mózè gbo ɖe, ké ɔ ɖá, 34“Cɛ̃ɛ Éézùɖùɛ̀-dyù ɓěɔ̀ gbo kà ḿ ɖá ní hwɔ ɓá ɓeè-dyù ɓě jè dyíɛɛ mɛ dè gbɔ ɓó dɛ̀nɛ̀ mɛ̀nɛ̌ìn-sɔ̃́ nììnɔ̀ wé ɓaɖa-bùè sè hm̀m̌ nììnɔ̀ ɓaɖa, ɓɛ́ ɔ ké nì ɓó wé mɛ̀nɛ̌ìn-sɔ̃́ xwíníín. 35Ɓó wéɔ̀ kĩ́ín-kĩ́ínɔ̀ ɓaɖaa, ɓě mɛ ɓɔ́ gana-kũ̀à ɖò nyuɛ, kɛɛ ɓě ɓéɖé ɓɛ́ ɓě ké dyí poìn, ɓɛ́ ɓě ké ḿ ɓiè. 36Ké ɓě mɛ nyu sáa-zàìn-ɖɛ̀ ɓě ɓó ḿ bìì, ɓó wé mɛ̀nɛ̌ìn-sɔ̃́ɔ̀ xwíníín. Ké ɓó wéɔ̀ mɛ̀nɛ̌ìn-tã nììnɔ̀ ɓaɖaa, ɓě ɓéɖé ɓɛ́ ɓě ké dyí poìn, ɓɛ́ ɓě ké ḿ ɓiè ɖe, ɓɛ́ ɓě ké sáa-zàìn-ɖɛ̀ ɓě nyu ɖe ɓó ḿ bìì. Wé nìà kɛ mɔ̀ hwɔɔ̀ gbǎ-wè jèɛɛ, ɓě mɛ ɓɔ́ gana-kũ̀à ɖò nyuɛ.
37“Kǎà ní hwɔ ɓě ɓɛ́ ḿ ɖǎ wáká poɛɛ jè nyu nìɛ̀. Ɓě ɓéɖé ɓɛ́ ɓě ké dyí poìn ɓó ti ɓěa ɓaɖa, ɓɛ́ ɓě ké ḿ ɓiè, ɓɛ́ ɓě ké sáa-zàìn-ɖɛ̀ ɓě nyu ɓó ḿ bìì. Sáa-zàìn-ɖɛ̀ ɓěɔ̀ hwɔìn kà fɔ̃ɔ-sàǎ-zàìn-ɖɛ̀ ɓě kè ɖii-ɖɛ̀-sàǎ-zàìn-ɖɛ̀ ɓě kè náá-ɖɛ̀-sàǎ-zàìn-ɖɛ̀ ɓě. Ɓě mɛ dyà sáa-zàìn-ɖɛ̀ ɓě ɓɛ́ ḿ ɖá ɓě mɛ dyà ɓó wé ɖò-ɖò xwíníín nyɛ. 38Sáa-zàìn-ɖɛ̀ ɓěɛ̀ mɛ kò ɓó ní fɔ̀-wèɔ̀ nììn sáa-zàìn-ɖɛ̀ ɓěɔ̀ kè nyíí-ɖɛ̀ ɓě ɓɛ́ ɓě nyí ḿ ti séín nyɛ kè ɓěɛ̀ sáa-zàìn-ɖɛ̀ ɓě ɓá wuɖu-ɖi-ɖi ɖò jè dyíɛ kè ɓěɛ̀ hwòɖǒ-wáɖáá-nyìǐ-ɖɛ̀ ɓěɔ̀ wáún.”
39Hwɛ̀ ké Bounɓoɔ̀ wùɖù ma Mózè gbo ɖe ɓá Ɓeè-Dyù-hwɔ̀ɔ̀ jè dyí, ké ɔ ɖá, “Ti ɓɛ́ ɓě mu ɓěɛ̀ geɖe ɓěɔ̀ cɛ̃ɛ hwɔùn wɛ̃ɛ, sɔ̀ìn ɓó dɛ̀nɛ̀ mɛ̀nɛ̌ìn-sɔ̃́ nììnɔ̀ wé ɓaɖa-bùè sè hm̀m̌ nììnɔ̀ gboɛɛ, ɓě mɛ pa ní Ɓeè-Dyù-hwɔ̀ɔ̀ ɓó wé mɛ̀nɛ̌ìn-sɔ̃́ xwíníín. Wé kĩ́ín-kĩ́ínɔ̀ mɛ mɔ̀ ɓěɛ̀ fɔ̀-wè, ké wé hwɛ̀ìn-gbɔɔ̀ mɛ mɔ̀ ɓěɛ̀ fɔ̀-wè ɖekè. 40Ɓó wéɔ̀ kĩ́ín-kĩ́ínɔ̀ ɓaɖaa, ɓě mɛ kpã́ cu-ɓò nɔ̀mɔ̀ kɔ̃in, ké ɓě mɛ ɖú cã́ kè wéɖò-cù ɖɔ́ ɓě ɔ kè cu vò mí dú ɓěɛ̀ ɖɔ́ ɓě dyí, ɓɛ́ ɓě ké múà nyu ɓó ḿ dyúa, ɓó wé mɛ̀nɛ̌ìn-sɔ̃́ɔ̀ xwíníín. 41Ɓě mɛ pa hwɔ nìà kɛ ɓó ḿ bìì, ɓó wé mɛ̀nɛ̌ìn-sɔ̃́ xwíníín ɖé zɔ̃ séínɛ̀ dɛ̀nɛ̀ mɛ̀nɛ̌ìn-sɔ̃́ nììnɔ̀ xwíníín. Ɖɛ nìà kɛ mɛ mɔ̀ gma kánáá pū ɓó ɓě kè ɓěɛ̀ xwíníín-dyù ɓě bìì. 42Ké ɓě mɔ̀ Éézùɖùɛ̀-dyù séín ɓěɔ̀ mɛ cĩ́ ɖé ɓeè-dyù ɓě xwíɖíi ɓó wé mɛ̀nɛ̌ìn-sɔ̃́ɔ̀ xwíníín, 43ɓɛ́ ɓěɛ̀ xwíníín-dyù ɓěɔ̀ kéɛ dyuò kà ti ɓɛ́ ḿ zà ma kà ɓě ɖé Íjè-ɓòɖòɔ̀ kɔ̃ɛɛ, ɓě cĩ́ ma ɓeè-dyù ɓě xwíɖíi kɛ. Ɓě mɛ nyu ɖɛ ɓěɛ̀, sepóɛɖé mɔ̄ mɔ̀ Bounɓo mɔ̀à ɓěɛ̀ Gèɖèpɔ́ɔ̀ kɛ̀.”
44Ɔ jèɛɛ, Mózè po ma wuɖui ɖé Éézùɖùɛ̀-nyɔ̀ ɓěɔ̀ gbo ɓá hwɔ ɓě ɓɛ́ Bounɓoɔ̀ ɖǎà wáká poɛɛ jè dyí.
Currently Selected:
Ɖìvéɖékɔ̀ 23: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
