Ɖìvéɖékɔ̀ 22
22
Sáa-zàìn-ɖɛ̀ ɓě ɓɛ́ Bounɓoɔ̀ ɓɛ́ìn dyi kpɔ̃ɔ kɛ
1Hwɛ̀ ké Bounɓoɔ̀ wùɖù ma Mózè gbo ɖe, ké ɔ ɖá, 2“Cɛ̃ɛ Eɖóún kè ɔ dyú-gàà ɓěɔ̀ gbo kà ḿ ɖá wa mɛ dyé sáa-zàìn-ɖɛ̀ hwɛ̀ǐn-hwɛ̀ǐn ɓě ɓɛ́ Éézùɖùɛ̀-dyù ɓěɔ̀ po wáká ɓó ḿ bììɛɛ kpéín, wa ní kɔ̃̀ ɖà ní nyɛ́nɛ́ hwɛ̀ǐn-hwɛ̀ǐnɔ̀ dyíin nyìnììn, sepóɛɖé mɔ̄ mɔ̀ Bounɓoɔ̀. 3Ɔ jǔ ké waà xwíníín-zà-dyù-gàà ɓěɔ̀ ɖò se mú hwɛ̀, ké ɔ dyi sáa-zàìn-ɖɛ̀ hwɛ̀ǐn-hwɛ̀ǐn ɓě ɓɛ́ Éézùɖùɛ̀-dyù ɓěɔ̀ po wáká ɓó ḿ bììɛɛ ɖò bũ̌in xwɛ̃́ìn ní, nìí, wa mɛ zà nyɔɔ̀ ɓó ḿ dyúa, ɓɛ́ ɔ ké se sáa-zà-nyɔ̀ jǔ ɖe. Sáa-zà-nyɔ̀ ɓěɔ̀ mɛ kpɔ̃ gma nìà kɛ dyi, sepóɛɖé mɔ̄ mɔ̀ Bounɓoɔ̀.
4“Ɔ jǔ ké sáa-zà-nyɔ̀ ɓěɔ̀ ɖò dyi caà-wɛ̀ ɓɛ́ìn nyɔ ɖò kpɔ̃ɔ kɛɛ ɖò mɔɔ wɛ́ ɖò kpɔ̃ ɔ, ké wɛ́ɔ̀ nyuɛ ké ní ɖò sɔ̀ ɔ nɛ́ɛ-pòìn-naínɔ̀ kɛɛ ɓéɖé ní, nìí, ɔ ní ɖá ɓɛ́ ɔ ké sáa-zàìn-ɖɛ̀ hwɛ̀ǐn-hwɛ̀ǐn ɓěɔ̀ ɖò ɖi, ɓɛ́ ɔ ké mú hwɛ̀ hwɛ̀. Ɔ jǔ ké sáa-zà-nyɔ̀ ɖò dyi xwɛ́ ɖò dyi tìnììn ní, nìí, ɔ mɔ̀ se-mú-hwɛ̀-nyɔ̀. Mɔɔ ké ɔ dya nyíɔún-pòǐn ní, nìí, ɔ mɔ̀ se-mú-hwɛ̀-nyɔ̀. 5Mɔɔ ké ɔ dyi nimii-xwɛ̀ ɖò mɔɔ nyɔ ɖò se mú hwɛ̀ɛ dyi tìnììn ní, nìí, ɔ mɔ̀ se-mú-hwɛ̀-nyɔ̀. 6Sáa-zà-nyɔ̀ ɓɛ́ ɔ tìnìàìn ɖɛ nì kà ɓěɛɛ ɖò dyiɛɛ mɔ̀ se-mú-hwɛ̀-nyɔ̀, ké kǎà ɔ mu ná gã̀ùn tee ɓɛ́ hwìo ké jǔ. Ɔ dyi ná nìǐn, ɔ mɛ ɓɔ́ sáa-zàìn-ɖɛ̀ hwɛ̀ǐn-hwɛ̀ǐn ɓěɔ̀ ɖò ɖiɛ, ɔ sèìn ké ɔ dèɖè hwɛ̀. 7Ɔ jǔ ké dyóɖóɔ̀ ɖǎ zi ní, nìí, ɔ mu mú-hwɛ̀-nyɔ̀ jǔùn. Ɔ ɖǎ ná nìǐn, nìí, ɔ ɓɛ́ìn sáa-zàìn-ɖɛ̀ hwɛ̀ǐn-hwɛ̀ǐn ɓěɔ̀ ɖò ɖiɛ, sepóɛɖé ɖɛ nìà kɛ mɔ̀ ɔ ɖii-ɖɛ̀. 8Sáa-zà-nyɔ̀ ɖò ní ɖá ɓɛ́ ɔ ké nimii ɖò mɛ́ìn ɓíɖíiɛ, mɔɔ ɓɛ́ kpɔ̃ɔ-nìmìì ɖò kpɔ̃ɛɛ ɖi, ɔ ní kɔ̃̀ ɖà se-mú-hwɛ̀-nyɔ̀ jǔ ɓóɛ jè. Sáa-zà-nyɔ̀ ɓěɔ̀ mɛ ɓɔ́ ɖɛ ɓěɛ̀ ɖò nyuɛ, sepóɛɖé mɔ̄ mɔ̀ Bounɓoɔ̀.
9“Sáa-zà-nyɔ̀ ɓěɔ̀ mɛ ɓɔ́ ní gma ɓěɛ̀ zùǔn zàìn, kɛɛ wa mɛ kpɔ̃ wa dyi, ɓɛ́ zaa ní kɔ̃̀ ɖà wa dúún wáɖá, wa ní kɔ̃̀ ɖà mɛ́, sepóɛɖé mɔ̄ mɔ̀à Bounɓo mɔ̀ nyɔ poà wa wáká kɛ̀.
10“Nyɔ ɓɛ́ ɔ se sáa-zà-nyɔ̀ ɓěɔ̀ gbǒ-xwíníín-nyɔ̀ ɓěɔ̀ ɖòɛɛ mɛ ɓɔ́ sáa-zàìn-ɖɛ̀ hwɛ̀ǐn-hwɛ̀ǐn ɓě mɔ̀à sáa-zà-nyɔ̀ ɓěɔ̀ ɖii-ɖɛ̀ kɛɛ ɖò ɖiɛ fɔɔ cá, kɛbì ɔ mɛ mɔ̀ ɖéè ɓɛ́ ɔ dyi sáa-zà-nyɔ̀ ɓěɔ̀ ɖò gboɛ mɔɔ nyɔ ɓɛ́ ɔ kpɔ̃ dyi, ɓɛ́ ɔ ké ɔ kũ̀à nyuɛ. 11Kɛɛ ɔ jǔ ké sáa-zà-nyɔ̀ ɖò dyi gǐì ɖò wíɖí mú dɔ̃, mɔɔ ké gǐìɔ̀ dyi ɖé ɔ gbǒɔ̀ xwíníín wóɖóìn ní, nìí, gǐìɔ̀ ɓɛ́ìn ɔ ɖii-ɖɛ̀ɔ̀ ɖò ɖiɛ. 12Ɔ jǔ ké sáa-zà-nyɔ̀ ɖòɛ̀ dyú-màà ɖò dyi nyɔ ɓɛ́ ɔ se sáa-zà-nyɔ̀ ɖòɛɛ dyi kpɔ̃ ní, nìí, ɔ mɛ ɓɔ́ sáa-zàìn-ɖɛ̀ hwɛ̀ǐn-hwɛ̀ǐn ɓěɔ̀ ɖò ɖiɛ. 13Kɛɛ ɔ jǔ ké sáa-zà-nyɔ̀ ɖòɛ̀ dyú-màà ɖò dyi jɔ̌ɔ̀-màà mɔɔ màa ɓɛ́ ɔ kè ɔ dyú-ɓǎ ɖǎ ɓɔ́ìn nyɛɛ jǔ, ké ɔ se dyú ɖò ɓéɖé, ké ɔ dyi ɖé ɔ ɓǎ ɓíɖí-taún cĩ́ɛń dyi ɖe kà ɔ nyuɛ ma kà ɔ dyú-gbɔ́ɔ́-tìǐn nyɛɛ ní, nìí, ɔ ɓɛ́ìn ɔ ɓǎà ɖii-ɖɛ̀ɔ̀ ɖò ɖiɛ. Nyɔ ɓɛ́ ɔ se sáa-zà-nyɔ̀ ɓěɔ̀ gbǒ-xwíníín-nyɔ̀ ɓěɔ̀ ɖòɛɛ mɛ ɓɔ́ɔ ɖiɛ fɔɔ cá.
14“Ɔ jǔ ké nyɔ ɓɛ́ ɔ se sáa-zà-nyɔ̀ ɓěɔ̀ gbǒ-xwíníín-nyɔ̀ ɓěɔ̀ ɖòɛɛ seó ɖei dyé, ké ɔ dyi sáa-zàìn-ɖɛ̀ hwɛ̀ǐn-hwɛ̀ǐn ɓěɔ̀ ɖò ɖi ní, ɔ mɛ pɛ́ɛ̀ jè ɖé sáa-zà-nyɔ̀ ɓěɔ̀ gbo, ké ɔ mɛ po jĩ̀ kà ɓɛ́ ɖɛɔ̀ kpa kɛɛ wáká hm̀m̌ nììn ɓó kɔ̃in ɖe. 15-16Sáa-zà-nyɔ̀ ɖò ní ɖá ɓɛ́ ɔ ké nyɔ ɓɛ́ ɔ se sáa-zà-nyɔ̀ ɓěɔ̀ dyí ɓáa sáa-zàìn-ɖɛ̀ hwɛ̀ǐn-hwɛ̀ǐn ɓě ɓɛ́ Éézùɖùɛ̀-dyù ɓěɔ̀ dyà ḿ gboɛɛ ɖò nyí, ɓɛ́ ɔ kéɛ ɖi. Ɔ dyiɛ náa nyuín, nìí, ɔ mu sáa-zàìn-ɖɛ̀ hwɛ̀ǐn-hwɛ̀ǐnɔ̀ zùǔn zàìn, ké nyɔ nyuɛ náa kɛɛ, zaa mu ɔ kpɔ̃ùn, ké ɔ mɛ pɛ́ɛ̀ jè. Sáa-zà-nyɔ̀ ɓěɔ̀ mɛ kpɔ̃ gma nìà kɛ dyi, sepóɛɖé mɔ̄ mɔ̀à Bounɓo mɔ̀ nyɔ poà wa wáká kɛ̀.”
17Hwɛ̀ ké Bounɓoɔ̀ wùɖù ma Mózè gbo ɖe, ké ɔ ɖá, 18“Cɛ̃ɛ Eɖóún kè ɔ dyú-gàà ɓěɔ̀ kè Éézùɖùɛ̀-dyù séín ɓěɔ̀ gbo kà ḿ ɖá ɔ jǔ ké wa ɖò mɔɔ ɖíà ɓě cĩ́à ɖé wa hwìɛ̀ kɛɛ ɖò dyi ḿ nyúà-ɖɛ̀ ɖò gbo dyà, ɓɛ́ ɔ ké fɔ̃ɔ-sàǎ-zàìn-ɖɛ̀ jǔ ɓá wuɖu-ɖi-ɖi ɖò ɓɛ́ nyɔɔ̀ ɖǎ nyuɛɛ jè dyí, mɔɔ ké ɔ dyi fɔ̃ɔ-sàǎ-zàìn-ɖɛ̀ɔ̀ dyà, ɓɛ́ ɔ ké hwòɖǒ-wáɖáá-nyìǐ-ɖɛ̀ jǔ ní, 19nìí, nyúà-ɖɛ̀ɔ̀ mɛ mɔ̀ ɓìɖǐ ɓíɔ́ mɔɔ ɓáɖáá ɓíɔ́ mɔɔ vã́á ɓɛ́ wa se kɛɛ ɖò ɓéɖéɛ, hwɛ̀ ké ḿ kpɔ̃ɔ dyi. 20Nyɔ ɖò mɛ ɓɔ́ ḿ nyúà-ɖɛ̀ ɓɛ́ ɔ ɓéɖé kɛɛ ɖòɛɛ gbo dyàà, sepóɛɖé ḿ seɛ dyi kpɔ̃ɔ́ mu. 21Ɔ jǔ ké nyɔ ɖò dyi ḿ ɓìɖǐ mɔɔ ɓáɖáá mɔɔ wiɖi ɖò gbo dyà, ɓɛ́ ɔ ké gbo-kpɔ̃ìn-sàǎ-zàìn-ɖɛ̀ jǔ ɓá wuɖu-ɖi-ɖi ɖò ɓɛ́ nyɔɔ̀ ɖǎ nyuɛɛ jè dyí, mɔɔ ké ɔ dyi gbo-kpɔ̃ìn-sàǎ-zàìn-ɖɛ̀ɔ̀ dyà, ɓɛ́ ɔ ké hwòɖǒ-wáɖáá-nyìǐ-ɖɛ̀ jǔ ní, nìí, nyúà-ɖɛ̀ɔ̀ mɛ ɓɔ́ kɛɛ ɖò ɓéɖéɛ, hwɛ̀ ké ḿ kpɔ̃ɔ dyi. 22Nyɔ ɖò ní ɖá ɓɛ́ ɔ ké nyúà-ɖɛ̀ ɓɛ́ ɔ ɓéɖé kɛɛ ɖòɛɛ sáa-zà-nyɔ̀ ɓěɔ̀ gbo dyà, ɓɛ́ wa kéɛ ɓóɛ sáa-kɔ̃-zàìn-gbààɔ̀ kɔ̃ fɔ̃̀ìn, ɓɛ́ ɔ ké ɖii-ɖɛ̀-nyìǐ-ɖɛ̀ jǔ ɓó ḿ bìì. Nyúà-ɖɛ̀ ɓěɔ̀ hwɔìn kà nyúà-ɖɛ̀ ɓɛ́ ɔ kpè dyéɖéín dyi, mɔɔ ɓɛ́ ɔ kɔ́ɖɔ́, mɔɔ ɓɛ́ ɔ kɔ́ dyí, mɔɔ ɓɛ́ ɔ ɓéɖé ku-kɔ̃in-wɛ̀-dù kò-kò ɓěɔ̀ ɖòɛ. 23Nyɔ ɖò ɓɛ́ìn ɓìɖǐ ɖò mɔɔ ɓáɖáá ɖò ɓɛ́ ɔ nyìnììn dyíin nyɛ, mɔɔ ɓɛ́ ɔ se mú wóɖóɛɛ ḿ gbo dyàà ɓó hwòɖǒ-wáɖáá-nyìǐ-ɖɛ̀ jè. Kɛɛ ɔ jǔ ké nyúà-ɖɛ̀ɔ̀ dyi wuɖu-ɖi-ɖi ɖò ɓɛ́ nyɔɔ̀ ɖǎ nyuɛɛ dyí ɓá ní, nìí, ḿ seɛ dyi kpɔ̃ɔ́ mu. 24Nyɔ ɖò ní ɖá ɓɛ́ ɔ ké nyúà-ɖɛ̀ ɖò ɓɛ́ ɔ kɔ̃̀ dě ɓě ɖǎ mú bunuìn, mɔɔ ɓɛ́ ɔ dě ɓěɔ̀ ɖǎ dyi wɛ̀ìn, mɔɔ ɓɛ́ ɔ dě ɓěɔ̀ ɖǎ mú fá, mɔɔ ɓɛ́ ɔ dě ɓěɔ̀ ɖǎ ɓó cɛ̃̀ kɛɛ ḿ gbo dyà. Ɓě mɛ ɓɔ́ nyúà-ɖɛ̀ kɔ̃̀ dě ɓě kɔ́ dyíɛɛ sáa zàìn ɖé ɓěɛ̀ ɓóɖó ɖìèɔ̀ kɔ̃ ɖekè. 25Ké ɓěɛ̀ nyɔ ɖò ní ɖá ɓɛ́ ɔ ké nyúà-ɖɛ̀ nì náa ɖò ɖíà ɖò xwaún kpɔ̃, ɓɛ́ ɔ kéɛ sáa zàìn, ɓɛ́ ɔ ké ɖii-ɖɛ̀-nyìǐ-ɖɛ̀ jǔ ɓó ḿ bìì. Waà dě ɓěɔ̀ kɔ́ dyí jèɛɛ, ḿ se wa dyi kpɔ̃ɔ́ mu.”
26Hwɛ̀ ké Bounɓoɔ̀ wùɖù ma Mózè gbo ɖe, ké ɔ ɖá, 27“Ɔ jǔ ké ɓìɖǐ-dyù ɖò mɔɔ ɓáɖáá-dyù ɖò mɔɔ wiɖi-dyù ɖò dyi wóɖó ní, nìí, ɔ mɛ nì ɔ ɖe woɖoún tee, ɓɛ́ wé mɛ̀nɛ̌ìn-sɔ̃́ ké zi hwɛ̀. Ɔ ɖǎ ná nìǐn, nìí, sɔ̀ìn ɓó wéɔ̀ mɛ̀nɛ̌ìn-tã nììnɔ̀ gbo, muà dyúa kɛɛ, nyɔ ɖò ɓɛ́ìn sáa-zàìn-ɖɛ̀ mú nyuɛ, ké ní muɛ dyi kpɔ̃ùn. 28Nyɔ ɖò ní ɖá ɓɛ́ ɔ ké ɓìɖǐ ɖò mɔɔ ɓáɖáá ɖò mɔɔ wiɖi ɖò kè ɔ dyú ɖáɓá ɓó wé dyúáɖòɔ̀ xwíníín.
29“Ɔ jǔ ké nyɔ ɖò dyi zùo-po-nyìǐ-ɖɛ̀ ɖò ḿ gbo sáa zàǐn mu ní, nìí, nyɔɔ̀ mɛ nyuɛ dyììn ɖé gma ɓɛ́ ḿ tòà ɓáa jè dyíɛɛ mú, hwɛ̀ ké ḿ kpɔ̃ɔ dyi. 30Gmaɔ̀ mɔ̀, nyɔɔ̀ mɛ tà suaɖɛ̀ɔ̀ séín ɓó wé dyúáɖò kɔ̃̀ xwíníín ɔ ɖáɓáà kɛ. Suaɖɛ̀ɔ̀ ɖò mɛ ɓɔ́ goòɛ̀. Ɓě mɛ nyuɛ náa, sepóɛɖé mɔ̄ mɔ̀ Bounɓoɔ̀.
31“Mɔ̄ mɔ̀ Bounɓoɔ̀ jèɛɛ, ɓě mɛ kpɔ̃ ní gma ɓěɔ̀ dyi kóɖó-kóɖó, ɓɛ́ ɓě ké wa kíɖíí sí. 32-33Ɓěǐn ɖá ɓɛ́ ɓě ké ní nyɛ́nɛ́ hwɛ̀ǐn-hwɛ̀ǐnɔ̀ dyíin nyìnììn. Kɛɛ ɓě mɛ nyuɛ, ɓɛ́ nyɔ tɔ̀ɔ̀ ɓě kéɛ dyuò kà ḿ hwɛ̀ múɛ, sepóɛɖé mɔ̄ mɔ̀à Bounɓo mɔ̀ nyɔ zà ma kà ɓě ɖé Íjè-ɓòɖòɔ̀ kɔ̃, ké ḿ poà ɓě wáká, ɓɛ́ ḿ kéà ɓěɛ̀ Gèɖèpɔ́ɔ̀ jǔɛ̀.”
Currently Selected:
Ɖìvéɖékɔ̀ 22: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
