Ɛ́séɖɔ̀ 10
10
Kpã̌ùn-tò
1Sɔ̀ìn ɓóɛ gboɛɛ, Bounɓoɔ̀ cɛ̃ɛ ma Mózè gbo ɖe, ké ɔ ɖá, “Mu ɖé Féwòɖò gbo ɖe, sepóɛɖé mɔ̄ mɔ̀ nyɔ ɖǎ ɔ kè ɔ gɔ̌mànà-nyɔ̀ ɓěɔ̀ hwòɖǒ-dyùà kùmùìn. Ɖɛ kɔ̃̀ jè ɔ nìà náa mɔ̀ ɓɛ́ ḿ ké ní zɛ̃̀ìn-ɖɛ̀ ɓěɛ̀ nyu ɖé wa hwìɛ̀, 2ɓɛ́ m̀ kè Éézùɖùɛ̀-dyù ɓěɔ̀ kéɛ ɓěɛ̀ dyú ɓě kè ɓěɛ̀ nyúà-dyú ɓě gbo cɛ̃ kà ɓɛ́ ḿ nyu ma zɛ̃̀ìn-ɖɛ̀ ɓěɛ̀ ɖé Íjè-nyɔ̀ ɓěɔ̀ hwìɛ̀, ké ḿ zàìn ma wa zùǔn wɛ̃, ɓɛ́ ɓě kéɛ dyuò kà mɔ̄ mɔ̀ Bounɓoɔ̀ kɛ.”
3Ɔ jèɛɛ, Mózè kè Eɖóún mu ma ɖé Féwòɖò gbo, ké wa cɛ̃ɛ ma ɔ gbo, ké wa ɖá, “Bounɓo mɔ̀à Híìbúɖúù-nyɔ̀ ɓěɔ̀ Gèɖèpɔ́ɔ̀ kɛɛ ɖá, tiɔ̀ nyɛ́ nì mu wɔ̃́ùn ɓɛ́ m̀ ké m̀ mìɔùn ɓíɖíi dyà ɓó ɔ dyúa kɛ́? Ɔ ɖá m̀ mɛ táà ɔ nyɔ ɓěɔ̀ dyi, ɓɛ́ wa ké mu, nìí ɓɛ́ wa ké ɔ ɓiè. 4Ɔ jǔ ké m̀ se wa dyi táà, ɓɛ́ wa ké mu ní, ɔ mu kpã̌ùn-tò nì ɓóɖóɛ̀ kɔ̃ dyàùn ɓó gàɖàà. 5Ké wa mu ɓóɖó gànáà kɔ̃in ɓáìn, ké nyɔ ɖò se ɓíɖíi dyi dyéɛ mu. Wa mu ɓáá-ɖɛ̀ ɓɛ́ sɔ̃̀ɔ̀-kpòɔ̀ seà mú gbɔɔ̀ kɛɛ ɓɛɛ hwɔùn, ɔ kè cu séín sè ɓíɖíiɛɛ ɖekè. 6Wa mu ɖé nì gbǒ ɓěɔ̀ kè nì gɔ̌mànà-nyɔ̀ ɓěɔ̀ gbǒ ɓěɔ̀ ɔ kè nì nyɔ tɔ̀ɔ̀ ɓěɔ̀ gbǒ ɓěɔ̀ múin dyíìn ɖekè. Ɖɛ nìà kɛ mɔ̀ ɖɛ ɖò ɓɛ́ ɓě ɓǎ ɓě mɔɔ ɓěɛ̀ ɓǎ nììn ɓǎ ɓě séè zɔ̃̌ɔ̀ dyé ɖò kĩ́ín nyɛ.” Ti ɓɛ́ Mózè ɖǎ ma wuɖu jaɖaa, ɔ cɛ́ɛ̀ ma xwa, ké ɔ sɔ̀ ɓó Féwòɖò dyúa.
7Ké Féwòɖòɛ̀ gɔ̌mànà-nyɔ̀ ɓěɔ̀ cɛ̃ɛ ma ɔ gbo, ké wa ɖá, “Tiɔ̀ nyɛ́ gàa nìà kɛ mu dyí-gbǒ-ɖɛ̀ jǔɛ ɓɔ́ùn ɓó à bììɛ́? Táà Éézùɖùɛ̀-gàà ɓěɛ̀ dyi, ɓɛ́ wa ké Bounɓo mɔ̀à waà Gèɖèpɔ́ɔ̀ kɛɛ ɓièɛ̌ mu. M̀ séèɛ̀ dyé kà Íjè-ɓòɖòɛ̀ ɖǎ dyíin nyìnììn nyɛɛ̀?”
8Ké Féwòɖò ɖá ma Mózè kè Eɖóún, ké wa dyi ma ɓó ɔ dyúa. Ké ɔ cɛ̃ɛ ma wa gbo, ké ɔ ɖá, “Ɓě mu, ɓɛ́ ɓě ké Bounɓo mɔ̀à ɓěɛ̀ Gèɖèpɔ́ɔ̀ kɛɛ ɓiè. Kɛɛ ɓěɛ̀ nyɛ́ kè nyɛ́ nìà muɛń nyɛ́?”
9Ké Mózè ɖá, “À séín mu muùn. À mu nyɔ gmɔ̀ ɓěɔ̀ kè à nyɔ sùà ɓěɔ̀ kè à dyú-gàà ɓě kè à dyú-màà ɓě kè à ɓáɖáá ɓě kè à wiɖi ɓě ɔ kè à ɓìɖǐ ɓěɔ̀ kpaùn, sepóɛɖé à ɓéɖé à ké hwɔ ɖò pa ɓó à Bounɓoɔ̀ bìì.”
10Ké Féwòɖò ɖá, “Ḿ gboò Bounɓoɔ̀ dyí. Ḿ se wɔ̃́ɔ ɓɛ́ìn fɔɔ cá ɓɛ́ ɓě ké ɓěɛ̀ màa ɓěɔ̀ kè ɓěɛ̀ dyú mɛ́nɛ́ɛ́ ɓěɔ̀ kpa, sepóɛɖé ḿ ɖǎa dyé kà ɓě ɖǎ ɖɛ gbà ɖò dyí sɔ́ kɛ. 11Ɓěɛ̀ gàa ɓěɔ̀ ɖòùn mɛ mu, ɓɛ́ ɓě ké Bounɓoɔ̀ ɓiè, sepóɛɖé ɖɛ nìà kɛ mɔ̀ ɖɛ ɓě ɖúó zɔ̀ǔn dyíɛ.” Púɛɛ, wa kúmú ma Mózè kè Eɖóún ɓó Féwòɖò dyúa.
12Ti ɓɛ́ Mózè kè Eɖóún sɔ̀ ma ɓó Féwòɖò dyúa kɛɛ, Bounɓoɔ̀ cɛ̃ɛ ma Mózè gbo, ké ɔ ɖá, “Pɛ́ɛ̀ nì sɔ̃ɔ̀, ɓɛ́ m̀ ké nì kùì-kpàɔ̀ Íjè-ɓòɖòɛ̀ kɔ̃in tò, ɓɛ́ kpã̌ùn-tò ké ɓóɖó gànáà kɔ̃ dyi, ɓɛ́ ɔ ké ɓáá-ɖɛ̀ séín kè cu séín ɓɛ́ sɔ̃̀ɔ̀-kpòɔ̀ se ma mú gbɔɔ̀ kɛɛ ɓɛ.” 13Ɔ jèɛɛ, Mózè pɛ́ɛ̀ ma ɔ sɔ̃ɔ̀, ké ɔ tò ma ɔ kùì-kpàɔ̀ Íjè-ɓòɖòɔ̀ kɔ̃in. Ké Bounɓoɔ̀ nyuɛ ké pìɔ̌ ɖò sɔ̀ìn ma ɖé dyóɖó-xwáɖáún-wóɖóìn-naínɔ̀. Pìɔ̌ɔ̀ dyi ma ɓó wé gànáɔ̀ kè máaún-hwùɖù gànáɔ̀ mú. Zɔ̃ kéá ma zɔ̃ɛɛ, púɛɛ, pìɔ̌ɔ̀ ɖǎ ma kpã̌ùn kúɖúú dyà. 14Ké wa ɖú ma Íjè-ɓòɖò gànáɔ̀ dyí, ké wa nì ma ɓóɖóɔ̀ gã séín gbo. Wa zi ma dyí vòɛ̌n mìɔ cá. Kpã̌ùn jĩ̀ náa ɖò séè ma Íjè-ɓòɖòɔ̀ kɔ̃ dyi ɖò, mɔɔ ké ɖò se ɓóɖóɔ̀ kɔ̃ dyiɛ́ mu ɖe. 15Kpã̌ùn ɓěɔ̀ ɓáìn ma ɓóɖóɔ̀ kɔ̃in cá, ké ɓíɖíi dyi nì ma kpɛ̃̀. Ɓáá-ɖɛ̀ séín kè cu séín ɓɛ́ sɔ̃̀ɔ̀-kpòɔ̀ se ma kà mú gbɔɔ̀ɛɛ, kpã̌ùn ɓěɔ̀ ɓɛ wa kè waà ɓo ɓěɔ̀ nyɛ̀nɛ̀ɛ̀. Nyɔ ɖò se ma mí-dyɔ̀ɔ̀ ɖò ɓáá-ɖɛ̀ mɔɔ cu ɖò dya dyéɛ ɓɛ́ìn ɖé Íjè-ɓòɖòɔ̀ kɔ̃.
16Púɛɛ, Féwòɖò ɖá ma Mózè kè Eɖóún wàɖà, ké ɔ cɛ̃ɛ ma wa gbo, ké ɔ ɖá, “Ḿ ɖǎ Bounɓo mɔ̀à ɓěɛ̀ Gèɖèpɔ́ɔ̀ kɛ ɔ kè ɓě nàmàǔn bũ̌ nyu. 17Ɔ jèɛɛ, ɓě zĩ̀ìn ní nàmàǔnɔ̀ kɔ̃in ɖe, ɓɛ́ ɓě ké ḿ bìì Bounɓo mɔ̀à ɓěɛ̀ Gèɖèpɔ́ɔ̀ kɛɛ ɓaà, ɓɛ́ ɔ ké nyɔ-gǎ-dyéìn-ɖɛ̀ mɔ̀ nyɔ-ɖáɓá-ɖɛ̀ nìà kɛɛ ḿ bũ̌ zà.” 18Ɔ jèɛɛ, ti ɓɛ́ Mózè sɔ̀ ma ɓó Féwòɖò dyúa kɛɛ, ɔ ɓaà ma Bounɓoɔ̀. 19Ké Bounɓoɔ̀ zĩàìn ma pìɔ̌ɔ̀ gbo, ké ɔ nyuɛ ma dìì vɛ̀nɛ̀ ɖò mú. Dììɔ̀ sɔ̀ìn ma ɖé dyóɖó-dyi-kpáìn-naínɔ̀, ké ɔ ɖú ma kpã̌ùn séín ɓěɔ̀ dyí, ké ɔ kpa wa ɖé Dyóó Zĩ-zãɔ̀#10:19 Dyóó Zĩ-zãɔ̀ nyɛ́nɛ́ ɖò mɔ̀ Dòùn-dáá-dyòǒ. kɔ̃. Ké kpã̌ùn dyúáɖò kpeé-kpeé se ma Íjè-ɓòɖòɔ̀ dà ɖò sè. 20Kɛɛ Bounɓoɔ̀ nyuɛ ké Féwòɖòɛ̀ hwòɖǒ-dyùàɔ̀ kùmù ma ɖe mìɔ, ké ɔ se ma Éézùɖùɛ̀-nyɔ̀ ɓěɔ̀ dyi táà, ɓɛ́ wa ké ma mu.
Tíe kpɔ̃ Íjè-ɓòɖòɔ̀ kɔ̃in
21Sɔ̀ìn ɓóɛ gboɛɛ, Bounɓoɔ̀ cɛ̃ɛ ma Mózè gbo, ké ɔ ɖá, “Pɛ́ɛ̀ nì sɔ̃ɔ̀, ɓɛ́ m̀ kéɛ dyií tò, ɓɛ́ tíe-kpò ké Íjè-ɓòɖò gànáɔ̀ kɔ̃in kpɔ̃. Ɔ mɔ̀ tíe-kpò ɓɛ́ nyɔ ɓɛ́ìn dyi kpɔ̃ɔ cá kɛ.” 22Ké Mózè tò ma ɔ sɔ̃ɔ̀ ɖé dyɔɔ̀ dyí, ké tíe-kpò vɛ̀nɛ̀ ɖò kpɔ̃ ma Íjè-ɓòɖò gànáɔ̀ kɔ̃in ɓó wé tã xwíníín. 23Nyɔ ɖò se ma ɔ mǔè ɖò dyéɛ ɓɛ́ìn, mɔɔ ké nyɔ ɖò se ma ɔ ɓíɖí-taún sɔ̀ɔ̀ ɓɛ́ìn, ɓɛ́ ɔ ké dà ɖò mu ɓó wé tã xwíníín. Kɛɛ ce fɔ̀nɔ̀ ma ɖé Éézùɖùɛ̀-nyɔ̀ ɓěɔ̀ nììn pá kɔ̃̀ mú wa cĩ́ ma kà ɖé Íjè-ɓòɖòɔ̀ kɔ̃ɛ.
24Ké Féwòɖò ɖá ma Mózè ɖe, ké ɔ ɖá, “Ɓě mu, ɓɛ́ ɓě ké Bounɓoɔ̀ ɓiè. Ɓě mɛ kpa ɓěɛ̀ màa ɓěɔ̀ kè ɓěɛ̀ dyú mɛ́nɛ́ɛ́ ɓěɔ̀ ɖekè. Kɛɛ ɓě mɛ sè ɓěɛ̀ nyúà-ɖɛ̀ ɓěɔ̀ ɓíɖíi.”
25-26Kɛɛ Mózè ɖá, “M̀ ɓéɖé ɓɛ́ m̀ ké wɔ̃́ ɓɛ́ à ké nyúà-ɖɛ̀ ɓěɔ̀ kpa, ɓɛ́ à ké fɔ̃ɔ-sàǎ-zàìn-ɖɛ̀ ɓě ɔ kè sáa-zàìn-ɖɛ̀ tɔ̀ɔ̀ ɓě nyu ɓó Bounɓo mɔ̀à à Gèɖèpɔ́ɔ̀ kɛɛ bìì. Nyúà-ɖɛ̀ ɓěɔ̀ ɖòɛ̀ bǎ fóɖóún dyɛ se ɓíɖíi sèɛ̌ mu. À ɓéɖé à ké nyúà-ɖɛ̀ ɓěɔ̀ ɖíɛ́ ɓě kũ̀à mú nyùìn ɓó Bounɓo mɔ̀à à Gèɖèpɔ́ɔ̀ kɛɛ ɓiè jè. À se nyúà-ɖɛ̀ɔ̀ nyɔ à ké kũ̀à mú nyùìn ɓó Bounɓoɔ̀ ɓiè jèɛɛ dyí dyuòɛ̀ ɓɛ́ìn, ɔ sèìn ké à nyini ɖé páɔ̀ mú hwɛ̀.”
27Kɛɛ Bounɓoɔ̀ kùmùìn ma Féwòɖòɛ̀ hwòɖǒ-dyùàɔ̀, ké ɔ se mɔ́ ɓɛ́ ɔ ké Éézùɖùɛ̀-nyɔ̀ ɓěɔ̀ dyi táà, ɓɛ́ wa ké mu. 28Púɛɛ, Féwòɖò cɛ̃ɛ ma Mózè gbo, ké ɔ ɖá, “Sɔ̀ dà ḿ dyúa! Mɔ̀ǔn ɖá m̀ ké dà ḿ dyúa dyi ɖeo! Ti nì mu dà ḿ dyúa dyiìn ɖeɛɛ, nì mu mɛ́ìno.”
29Ké Mózè ɖá, “Kà m̀ nyuà cɛ̃ɛ kɛɛ, kǎà ɔ mu nììn. Ḿ se ɓó m̀ dyúa dyiɛ́ mu ɖe fɔɔ cá.”
Currently Selected:
Ɛ́séɖɔ̀ 10: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
