Ɛ́séɖɔ̀ 40

Jàɖàìn-gbòɔ̀ dyi-nyànàìn-nyànàìn kèɛ̀ Bounɓoɔ̀ xwáɖáún-zàìn-zàìn

1Sɔ̀ìn ɓóɛ gboɛɛ, Bounɓoɔ̀ cɛ̃ɛ ma Mózè gbo, ké ɔ ɖá, 2“Nyànàìn jàɖàìn-gbò kɔ̃̀ mú ɓɛ́ ḿ kè ní nyɔ ɓěɔ̀ kéà dyéìn nyɛɛ dyi ɓó dɛ̀nɛ̀ kĩ́ín-kĩ́ínɔ̀ wé kĩ́ín-kĩ́ínɔ̀ ɓaɖa. 3Ɔ ɖǎ ná nìǐn, m̀ mɛ dè gma-gbɔ̀ɖɔ̀ɔ̀ ɖéɛ xwíníín, ɓɛ́ m̀ ké gma-gbɔ̀ɖɔ̀ɔ̀ faà-ɖɔ̀ɔ̀ dyí zĩ̀ìn. 4Ké m̀ mɛ dyáìn téɓèɖèɔ̀, ɓɛ́ m̀ ké ɖɛ ɓě kɔ̃̀ wa kéà ɓóɛ kɔ̃ nìɛɛ ɓó dè. Ɔ ɖǎ ná nìǐn, nìí, m̀ mɛ dyáìn ɖáùnpò-kɔ̃-dè-ɖɛ̀ɔ̀, ɓɛ́ m̀ ké ɖáùnpò ɓěɔ̀ páún po. 5Ké m̀ mɛ dè góò-gbàà kɔ̃̀ kɔ̃ mɔ̀à nyɔ́ún-nɔ̀mɔ̀-ɖɛ̀ fɔ̃̀ìn-naín nyɛɛ ɓó gma-gbɔ̀ɖɔ̀ɔ̀ dyúa, ɓɛ́ m̀ ké faà-ɖɔ̀ɔ̀ ɓó jàɖàìn-gbòɔ̀ wĩín dyi ɓá. 6Ɔ ɖǎ ná nìǐn, m̀ mɛ dè sáa-kɔ̃-zàìn-gbààɔ̀ ɓó jàɖàìn-gbòɔ̀ dyúa, 7ɓɛ́ m̀ ké mú-dèɖèìn-ɖɛ̀ɔ̀ ɓó jàɖàìn-gbòɔ̀ kè sáa-kɔ̃-zàìn-gbààɔ̀ pṹa dè, ɓɛ́ m̀ kéɛ ní mú po. 8Ɔ ɖǎ ná nìǐn, m̀ mɛ cɛ̃̀ìn jàɖàìn-gbòɔ̀ gba-gba ɖei, ɓɛ́ m̀ ké faà-ɖɔ̀ɔ̀ dyií ɓá ɓó gba-gbaɔ̀ wĩín.

9“Ɔ ɖǎ ná nìǐn, m̀ mɛ ɖú bũ̌-po-cànàɔ̀ dyí, ɓɛ́ m̀ ké ɖò jàɖàìn-gbòɔ̀ kè ɖɛ séín nì ɖéɛ múɛɛ bũ̌ po, ɓɛ́ m̀ ké wa wáká po ɓó ḿ bìì. Ɔ dyi ná nìǐn, nìí, wa mu mú hwɛ̀ìn. 10Ké m̀ mɛ po sáa-kɔ̃-zàìn-gbààɔ̀ ɔ kè kũ̀à-mú-nyùìn-ɖɛ̀ séín ɓáa dyíɛɛ cánáɔ̀ ɖò bũ̌, ɓɛ́ m̀ ké gbààɔ̀ wáká po ɓó ḿ bìì. Nìí, ɔ mu mú hwɛ̀ìn mìɔ. 11Ké m̀ mɛ po mú-dèɖèìn-ɖɛ̀ɔ̀ kèɛ̀ kɔ̃-dè-ɖɛ̀ɔ̀ cánáɔ̀ ɖò bũ̌ ɖekè, ɓɛ́ m̀ ké wa wáká po ɓó ḿ bìì.

12“Ɔ ɖǎ ná nìǐn, m̀ mɛ dyà Eɖóún kè ɔ dyú-gàà ɓěɔ̀ ɓó jàɖàìn-gbòɔ̀ wĩín, ɓɛ́ wa ké bũ̌in dèɖè. 13Ɔ ɖǎ ná nìǐn, m̀ mɛ po gã́ùn hwɛ̀ǐn-hwɛ̀ǐn ɓěɔ̀ Eɖóún mú, ɓɛ́ m̀ ké ɔ cáná dúún po, ɓɛ́ m̀ ké ɔ wáká po ɓó ḿ bìì, nìí ɓɛ́ ɔ ké ní sáa-zà-nyɔ̀ vɛ̀nɛ̀ jǔ. 14Ɔ ɖǎ ná nìǐn, m̀ mɛ dyà ɔ dyú-gàà ɓěɔ̀, ɓɛ́ m̀ ké gã́ùn ɓěɔ̀ wa mú po. 15Ké m̀ mɛ po wa cáná dúún kà dyúáɖò kà m̀ poà wa ɓǎ mɔ̀ùn cáná dúún wɛ̃, ɓɛ́ wa ké ní sáa-zà-nyɔ̀ ɓě jǔ. Waà cáná-dúún-po-poɔ̀ muɛ nyuùn ɓɛ́ wa kè waà xwíníín-dyù ɓě ké sáa-zà-nyɔ̀ ɓě jǔ kánáá pū.”

16Ké Mózè nyu ma ɖɛ séín ɓěɔ̀ kà Bounɓoɔ̀ nyuɛ ma kà ɔ gbo cɛ̃ɛ kɛ. 17Mózè nyànàìn ma jàɖàìn-gbòɔ̀ dyi ɓó ti waà zɔ̃ɔ̀ sɔ̃́ nììnɔ̀ dɛ̀nɛ̀ kĩ́ín-kĩ́ínɔ̀ wé kĩ́ín-kĩ́ínɔ̀ ɓaɖa. 18Ti ɓɛ́ ɔ ké ma jàɖàìn-gbòɔ̀ dyi nyànàǐn nìɛɛ, ɔ po ma cu-pĩ̀à ɓěɔ̀ kɔ̃-dè-ɖɛ̀ ɓěɔ̀ páún, ké ɔ nyànàìn ma cu-pĩ̀à ɓěɔ̀ dyi, ké ɔ po ma cu-pĩ̀à ɓěɔ̀ kɔ̃-cɛ̃̀ìn-cù ɓěɔ̀ páún, ké ɔ po ma cúè-ɓò ɓěɔ̀ kɔ̃-dè-ɖɛ̀ ɓěɔ̀ páún. 19Hwɛ̀ ké ɔ ɓáìn ma faà-ɖɔ̀ ɓěɔ̀ ɓó cu-pĩ̀à ɓěɔ̀ kɔ̃in, ké ɔ soɖo ma kɔ̃in-ɓáìn-ɖɛ̀ɔ̀ ɓó faà-ɖɔ̀ ɓěɔ̀ kɔ̃in. Ɔ nyu ma ɖɛ séín ɓěɛ̀ kà Bounɓoɔ̀ nyuɛ ma kà ɔ gbo cɛ̃ɛ kɛ.

20Ɔ ɖǎ ma ná nìɛɛ, Mózè ɖú ma sɔ́ɔ́-pĩ̀à sɔ̃́ ɓɛ́ gma ɓěɔ̀ céè ma kà kɔ̃ɛɛ dyí, ké ɔ poɛ ma ɖéɛ gbɔ̀ɖɔ̀ɔ̀ mú. Ké ɔ sṹ ma gbɔ̀ɖɔ̀ɔ̀ ɓéɖéìn-cù-kpóɖó ɓěɔ̀ ɓóɛ wáún, ké ɔ po ma gbɔ̀ɖɔ̀ɔ̀ kĩ̀ǐn kɔ̃̀ kɔ̃ mɔ̀à Bounɓoɔ̀ nyɔ-wìì-kɔ̃-ɓéɖéìn-naín nyɛɛ ɓóɛ wĩín. 21Hwɛ̀ ké ɔ dyà ma gbɔ̀ɖɔ̀ɔ̀ ɖé jàɖàìn-gbòɔ̀ mú, ké ɔ ɓá ma faà-ɖɔ̀ɔ̀ dyií, ké ɔ zĩ̀ìn ma gma-gbɔ̀ɖɔ̀ɔ̀ dyí. Ɔ nyu ma ɖɛ séín ɓěɛ̀ kà Bounɓoɔ̀ nyuɛ ma kà ɔ gbo cɛ̃ɛ kɛ.

22Ké ɔ dè ma téɓèɖèɔ̀ ɖé jàɖàìn-gbòɔ̀ mú, hwɔ ɖé jàɖàìn-gbòɔ̀ xwía-wàkáɔ̀ kɔ̃ dyí, nɔ̄ faà-ɖɔ̀ɔ̀ dyúa. 23Ké ɔ deìn ma bɛɖɛɛ̀-kpò ɓěɔ̀ ɓó téɓèɖèɔ̀ kɔ̃ dyi. Ɔ nyu ma ɖɛ séín ɓěɛ̀ kà Bounɓoɔ̀ nyuɛ ma kà ɔ gbo cɛ̃ɛ kɛ.

24Ké ɔ dè ma ɖáùnpò-kɔ̃-dè-ɖɛ̀ɔ̀ ɖé jàɖàìn-gbòɔ̀ mú ɖé wáká ɓɛ́ ɔ kè téɓèɖèɔ̀ gmɔìn dyéɖéín nyɛɛ kɔ̃. Ɔ mɔ̀ ɖé jàɖàìn-gbòɔ̀ zɔ̃̌in-wàkáɔ̀ kɔ̃. 25Ké ɔ kpɔ̃̀ìn ma ɖáùnpò ɓěɔ̀ dyí ɓó Bounɓoɔ̀ dyúa. Ɔ nyu ma ɖɛ séín ɓěɛ̀ kà Bounɓoɔ̀ nyuɛ ma kà ɔ gbo cɛ̃ɛ kɛ.

26Ké ɔ dè ma góò-gbààɔ̀ ɖé jàɖàìn-gbòɔ̀ mú, hwɔ ɓó faà-ɖɔ̀ɔ̀ dyúa dyí, 27ké ɔ fɔ̃̀ìn ma nyɔ́ún-nɔ̀mɔ̀-ɖɛ̀ ɓóɛ kɔ̃. Ɔ nyu ma ɖɛ séín ɓěɛ̀ kà Bounɓoɔ̀ nyuɛ ma kà ɔ gbo cɛ̃ɛ kɛ.

28Ké ɔ ɓá ma faà-ɖɔ̀ɔ̀ dyií ɓó jàɖàìn-gbòɔ̀ wĩín. 29Ké ɔ dè ma sáa-kɔ̃-zàìn-gbààɔ̀ ɓó jàɖàìn-gbòɔ̀ dyúa, ké ɔ nyu ma fɔ̃ɔ-sàǎ-zàìn-ɖɛ̀ɔ̀ kè ɖii-ɖɛ̀-sàǎ-zàìn-ɖɛ̀ɔ̀ ɓóɛ kɔ̃. Ɔ nyu ma ɖɛ séín ɓěɛ̀ kà Bounɓoɔ̀ nyuɛ ma kà ɔ gbo cɛ̃ɛ kɛ.

30Ké ɔ dè ma mú-dèɖèìn-ɖɛ̀ɔ̀ ɓó jàɖàìn-gbòɔ̀ kè sáa-kɔ̃-zàìn-gbààɔ̀ pṹa, ké ɔ po ma ɖé ní, ɓɛ́ sáa-zà-nyɔ̀ ɓěɔ̀ kéɛ ma sɔ̃ kè ɓo dyi dèɖèìn. 31Ɖéɛ̀ Mózè kè Eɖóún ɔ kè Eɖóún dyú-gàà ɓěɔ̀ dèɖèìn ma waà sɔ̃ kè ɓo dyi. 32Ɔ jǔ ké wa ɖò dyi jàɖàìn-gbòɔ̀ mú dyáa mɔ́, mɔɔ ké ɔ dyi sáa-kɔ̃-zàìn-gbààɔ̀ bũ̌in xwɛ̃́ìn mɔ́ ní, nìí, ɔ ɓéɖé ɓɛ́ ɔ ké sɔ̃ kè ɓo dyi dèɖè. Mózè nyu ma ɖɛ séín ɓěɛ̀ kà Bounɓoɔ̀ nyuɛ ma kà ɔ gbo cɛ̃ɛ kɛ.

33Hwɛ̀ ké Mózè cɛ̃̀ìn ma jàɖàìn-gbòɔ̀ kè sáa-kɔ̃-zàìn-gbààɔ̀ gba-gba ɖei, ké ɔ ɓá ma faà-ɖɔ̀ɔ̀ ɓó gba-gbaɔ̀ wĩín. Kǎà Mózè nyu ma kũ̀à séínɔ̀ hwɔɔ.

Bounɓoɔ̀ dĩ́ín-dĩ̀ìnɔ̀ dyíìn jàɖàìn-gbòɔ̀ múin

(Nɔ̀ɓà 9:15-23)

34Sɔ̀ìn ɓóɛ gboɛɛ, ní-kpòɔ̀ ɓáìn ma jàɖàìn-gbòɔ̀ kɔ̃in, ké Bounɓoɔ̀ dĩ́ín-dĩ̀ìnɔ̀ dyíìn ma ɖé jàɖàìn-gbòɔ̀ múin. 35Púɛɛ, Mózè se ma ɖé jàɖàìn-gbòɔ̀ mú dyáa ɓɛ́ìn, sepóɛɖé ní-kpòɔ̀ ɖǎa kɔ̃ dè, ké Bounɓoɔ̀ dĩ́ín-dĩ̀ìnɔ̀ ɖǎ ɖé jàɖàìn-gbòɔ̀ múin dyíìn. 36Sɔ̀ìn ɓóɛ gboɛɛ, ti séín ɓɛ́ ní-kpòɔ̀ mu dyií muùn sɔ̀ìn ɓó jàɖàìn-gbòɔ̀ kɔ̃ɛɛ, nìí, ɔ mɔ̀ ti ké Éézùɖùɛ̀-nyɔ̀ ɓěɔ̀ kpá ma hwìè xwíníín ɖe. 37Kɛɛ ɔ jǔ ké ní-kpòɔ̀ se ma daí sɔ̀ìn ní, nìí, wa mɔ̀ùn se ma daí sɔ̀ìn. Wa gã̀ ma ɓó páɔ̀ dyɛ mɔ̀ɔ̀ mú dyi tee, ké ní-kpòɔ̀ sɔ̀ìn ma daí hwɛ̀. 38Bounɓoɔ̀ ní-kpòɔ̀ nì ma ɓó jàɖàìn-gbòɔ̀ kɔ̃in ɓó dyóɖóaún, ké nyɛ-mìɔ̀ nì ma ɓóɛ kɔ̃in ɓó máaún. Kǎà ɔ nyu ma nìɛ̀ ɖé Éézùɖùɛ̀-nyɔ̀ ɓěɔ̀ dyéɖéín ti séín wa nì ma hwìè-kpàɔ̀ kɔ̃ɛ.

Currently Selected:

Ɛ́séɖɔ̀ 40: ƁB02

Highlight

Copy