Ɖìvéɖékɔ̀ Ɖìvéɖékɔ̀-cèè-ɖɛ̀ɔ̀ jè kɔ̃in-zaìn-zaìn
Ɖìvéɖékɔ̀-cèè-ɖɛ̀ɔ̀ jè kɔ̃in-zaìn-zaìn
Ɖìvéɖékɔ̀-nyɛ̀nɛ̀ɔ̀ xwíníín mɔ̀ ɖɛ ɓá Ɖíìváà-nyɔ̀ ɓěɔ̀ jè dyíɛ. Gèɖèpɔ́ɔ̀ gã ma Ɖíìváà xwéɖé-dùɔ̀, ɓɛ́ wa ké ma sáa-zà-nyɔ̀ ɓěɔ̀ jǔ.
Ti ɓɛ́ Gèɖèpɔ́ɔ̀ ɖǎ ma Ɖíìváà-nyɔ̀ ɓě mɔ̀à sáa-zà-nyɔ̀ ɓěɔ̀ gã kɛɛ, ɔ nyí ma wa gma ɓě ɓá kà wa ké waà kũ̀à ɓěɔ̀ nyuɛ nyu ɓó ɔ dyúa kɛɛ jè dyíɛ. Gma ɓě nìà kɛ ɖíɛ́ ɓě nì ɓó, ké wa ɓá ti Éézùɖùɛ̀-nyɔ̀ ɓěɔ̀ mu ma waà sáa-zàìn-ɖɛ̀ ɓěɔ̀ dyàùn wɛ̃ɛ jè dyí.
Gèɖèpɔ́ɔ̀ tò ma gma ɓěa, ɓɛ́ ɔ nyɔ ɓěɔ̀ ké mú hwɛ̀ kà ɔ mìɔùn hwɛ̀à múɛ. Ɔ mɔ́ ɓɛ́ ɔ nyɔ ɓěɔ̀ kè ɓóɖó-dù ɓě nì ɓó wa ɖeiɛɛ ké se hwɔìn.
Céè-ɖɛ̀ɔ̀ wáká kĩ́ín-kĩ́ínɔ̀ mɔ̀ gma ɓě ɓá sáa zà jè dyíɛ. Ɔ cɛ̃ ti nyɔ ɖò ké sáa zàìn nyɛ kè ɖɛ nyɔɔ̀ ké sáa zàìn nyɛ ɔ kè kà ɔ ké sáa zàà nyuɛ jè (1:1–7:38).
Céè-ɖɛ̀ɔ̀ wáká kɔ ɓó dyíɛɛ cɛ̃ Eɖóún kè ɔ dyú-gàà ɓěɔ̀ kũ̀à kɔ̃ún po jè. Wa mɔ̀ ma sáa-zà-nyɔ̀ kĩ́ín-kĩ́ín ɓěɔ̀. Wa mɔ̀ nyɔ ké ma hwìèɔ̀ da zà ɓó waà xwíníín-dyù ɓě bìì. Wa ɓéɖé wa ké ma ɖɔ ɓɛ́ Gèɖèpɔ́ɔ̀ gã ma kɛɛ mú po. Céè-ɖɛ̀ɔ̀ wáká nìà kɛ cɛ̃ Eɖóúnɛ̀ dyú-gàà ɓěɔ̀ sɔ̃́ mɛ́ jè. Ɖɛ nìà kɛ mɔ̀ gǎ ɓɛ́ ɔ dyi ma wa kɔ̃ ɓó Gèɖèpɔ́ɔ̀ wuɖu ɓɛ́ wa jaɖa ma kà múɛɛ jèɛ (8:1–10:20).
Céè-ɖɛ̀ɔ̀ wáká kɔ ɓó dyíɛɛ zaìn gma ɓě ɓá mú hwɛ̀ jè kè se mú hwɛ̀ jè dyíɛɛ kɔ̃in nɔ̀mɔ̀ dyíin. Ké céè-ɖɛ̀ɔ̀ zaìn ti ɓɛ́ wa ké nyɔ ɖò se-mú-hwɛ̀-nyɔ̀ ɖáìn nyɛɛ jè kɔ̃in nɔ̀mɔ̀ dyíin (11:1–15:33).
Céè-ɖɛ̀ɔ̀ wáká hwɛ̀ìn-gbɔɔ̀ cɛ̃ fɛ̀ɛ̀ hwɛ̀ǐn-hwɛ̀ǐn cĩ́ jè kè Gèɖèpɔ́ɔ̀ fɔ̀-wèɔ̀ jè ɔ kè hwɔ-wè tɔ̀ɔ̀ ɓěɔ̀ jè (16:1–27:34).
Céè-ɖɛ̀ɔ̀ dà ɓě m̀ ɓɛ́ìn ɖɛ kò-kò ɓěɛ̀ dyéɛ kɛɛ kɛà kɛ̀
1. Gma ɓě ɓá sáa-zà-zà-dù kò-kò ɓě jè dyíɛ. 1:1–7:38
2. Eɖóún kè ɔ dyú-gàà ɓěɔ̀ kũ̀à-kɔ̃ún-po-po. 8:1–10:20
3. Gma ɓě ɓá mú hwɛ̀ jè kè se mú hwɛ̀ jè dyíɛ. 11:1–15:33
4. Nàmàǔn-Ɖɛ-Kɔ̃in-Ɓáìn-wèɔ̀. 16:1-34
5. Gma ɓě ɓá mú-hwɛ̀-fɛ̀ɛ̀ kè ɓiè-ɓiè nììn mú-hwɛ̀-hwɛ̀ jè dyíɛ. 17:1–27:34
Currently Selected:
Ɖìvéɖékɔ̀ Ɖìvéɖékɔ̀-cèè-ɖɛ̀ɔ̀ jè kɔ̃in-zaìn-zaìn: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.