Ɛ́séɖɔ̀ 38

Sáa-kɔ̃-zàìn-gbààɔ̀ nyu-nyu

(Ɛ́séɖɔ̀ 27:1-8)

1Sɔ̀ìn ɓóɛ gboɛɛ, wa po ma sáa-kɔ̃-zàìn-gbàà ɖò. Wa pòɛ̀n ma àkésìà-cù. Gbààɔ̀ wáká hĩinyɛɔ̀ ɓɛ́ìn ma wɔ̃. Wáká ɖò-ɖòɛ̀ tɔ̀mɔ̀-tɔ̀mɔ̀ mɔ̀ ma ɓáɖáa dyúáɖò kè jìì-ɓàɖàǎ sɔ̃́, ké ɔ dya-tɔ̀mɔ̀-tɔ̀mɔ̀ mɔ̀ ma jìì-ɓàɖàǎ mɛ̀nɛ̌ìn-ɖò. 2Wa nyuɛ ké ɖɛ hwɔìn nimii-gmɛ̌ ɓě nìɛ̀ ma gã hĩinyɛɔ̀ kɔ̃. Gmɛ̌ ɓěɔ̀ kè gbààɔ̀ mɔ̀ ma ɖɛ dyúáɖò. Ké wa po ma gbàà gànáɔ̀ bàɖàsǐ bũ̌in. 3Ké wa nyu ma kũ̀à-mú-nyùìn-ɖɛ̀ séín ɓá gbààɔ̀ dyíɛ. Wa mɔ̀ ma páni ɓě kè síɔ́ɓò ɓě kè gbòɖòò ɓě kè tó-tàɓàìn-ɖɛ̀ ɓě ɔ kè nyɛ-kɛ̀nɛ̀-mú-ɓéɖéìn-jìà ɓě. Ɖɛ séín ɓěɛ̀ mɔ̀ ma bàɖàsǐ. 4Ké wa nyu ma tɔ̀ɔ̌ ɖò ɓó gbààɔ̀ jè. Wa nyùɛ̀n ma bàɖàsǐ, ké wa poɛ ma ɖé gbààɔ̀ xwíníín, ké ɔ sèìn ma gbààɔ̀ hwìɛ̀ dyi. 5Ké wa nyu ma bàɖàsǐ-gbɛ̌ɛ̀ ɓě ɖé tɔ̀ɔ̌ɔ̀ gã hĩinyɛɔ̀ kɔ̃, ɓɛ́ wa ké wa cu-kpóɖó ɓě wa kéà gbààɔ̀ ɓéɖéìn nyɛɛ mú sṹ. 6Cu-kpóɖó ɓěɔ̀ mɔ̀ ma àkésìà-cù, ké wa poɛ ma bàɖàsǐ bũ̌in. 7Ké wa sṹ ma cu-kpóɖó ɓěɔ̀ ɖé gbɛ̌ɛ̀ ɓě ɓɛ́ wa nìà gbààɔ̀ wáká sɔ̃́ɔ̀ kɔ̃ɛɛ mú, ɓɛ́ wa kéɛ ɓéɖéìn. Wa kɔ̀ìn ma gbààɔ̀ cu-pĩ̀à ɓě, ké gbààɔ̀ nì ma ɓí hwòɖǒǔn.

Mú-dèɖèìn-ɖɛ̀ ɓɛ́ ɔ mɔ̀ bàɖàsǐ kɛɛ nyu-nyu

(Ɛ́séɖɔ̀ 30:18)

8Ké wa ɖú ma bàɖàsǐ dyí, ké wa nyuɛ ma mú-dèɖèìn-ɖɛ̀ ɖò kèɛ̀ kɔ̃-dè-ɖɛ̀ mú. Ɖɛ wa nyùìn ma mú-dèɖèìn-ɖɛ̀ɔ̀ kɛɛ mɔ̀ bàɖàsǐ-sɛ̀ɓɛ̀ɛ̀#38:8 Ɖɛ mɔ̀ nyɔ ɓě nìǒ zɔ̃̌ɔ̀ kɛɛ nììn sɛ́ɓɛ́ɛ̀ kɛɛ mɔ̀ bàɖàsǐ fã-fã. ɓɛ́ màa ɓě nì ma ɓó Bounɓoɔ̀ jàɖàìn-gbòɔ̀ wĩín kũ̀à nyuɛń nyɛɛ tò ma kɛ.

Kà Bounɓoɔ̀ jàɖàìn-gbòɔ̀ ɖei nyu nìɛ̀ kɛ

(Ɛ́séɖɔ̀ 27:9-19)

9Ɖɛ kɔ ɓó dyíɛɛ mɔ̀ wa cɛ̃ ma gba-gba ɖò ɓó Bounɓoɔ̀ jàɖàìn-gbòɔ̀ ɖei. Gba-gbaɔ̀ mɔ̀ ma faà-ɖɔ̀ ɓɛ́ ɔ mɔ̀ ɖénì-ɖɔ̀ nɔ̀mɔ̀ dyíin nyɛ. Gba-gbaɔ̀ zɔ̃̌in-wàkáɔ̀ tɔ̀mɔ̀-tɔ̀mɔ̀ mɔ̀ ma ɓáɖáa kpáɖá-nyɔ sè hm̀m̌. 10Ké wa nyu ma cúè-ɓò kpáɖá-nyɔ ɖò ɓó faà-ɖɔ̀ ɓě hwɔà ɖé zɔ̃̌in-wàkáɔ̀ kɔ̃ dyíɛɛ jè. Cúè-ɓò ɓěɔ̀ ɓéɖé ma kɔ̃-dè-ɖɛ̀ kpáɖá-nyɔ ɖò ɓɛ́ wa mɔ̀ bàɖàsǐ kɛ kè waà kɔ̃-cɛ̃̀ìn-ɖɛ̀ ɓě ɓɛ́ wa mɔ̀ séɓàɖà kɛ ɔ kè waà séɓàɖà-gbǎ ɓě. 11Gba-gbaɔ̀ xwía-wàkáɔ̀ tɔ̀mɔ̀-tɔ̀mɔ̀ mɔ̀ ma ɓáɖáa kpáɖá-nyɔ sè hm̀m̌ ɖekè. Ké ɔ ɓéɖé ma cúè-ɓò kpáɖá-nyɔ ɖò kè wa kɔ̃-dè-ɖɛ̀ kpáɖá-nyɔ ɖò ɓɛ́ wa mɔ̀ bàɖàsǐ kɛ kè waà kɔ̃-cɛ̃̀ìn-ɖɛ̀ ɓě ɓɛ́ wa mɔ̀ séɓàɖà kɛ ɔ kè waà séɓàɖà-gbǎ ɓě. 12Gba-gbaɔ̀ wáká hwɔà ɖé dyóɖó-dyi-kpáìn-naínɔ̀ dyíɛɛ tɔ̀mɔ̀-tɔ̀mɔ̀ mɔ̀ ma ɓáɖáa ɓaɖa-bùè sè sɔ̃́ kè fá-kɛ́ín. Ké ɔ ɓéɖé ma cúè-ɓò ɓaɖa-bùè kè wa kɔ̃-dè-ɖɛ̀ ɓaɖa-bùè kè waà kɔ̃-cɛ̃̀ìn-ɖɛ̀ ɓě ɓɛ́ wa mɔ̀ séɓàɖà kɛ ɔ kè waà séɓàɖà-gbǎ ɓě. 13Gba-gbaɔ̀ wáká hwɔà ɖé dyóɖó-xwáɖáún-wóɖóìn-naínɔ̀ dyíɛɛ tɔ̀mɔ̀-tɔ̀mɔ̀ mɔ̀ ma ɓáɖáa ɓaɖa-bùè sè sɔ̃́ kè fá-kɛ́ín, ké ɔ ɓéɖé ma mú-dyáìn-naín. 14Gba-gbaɔ̀ wáká ɓɛ́ ɔ nìà ɖé ɔ mú-dyáìn-naínɔ̀ wáká ɖò kɔ̃ɛɛ tɔ̀mɔ̀-tɔ̀mɔ̀ mɔ̀ ma ɓáɖáa tã kè jìì-ɓàɖàǎ mɛ̀nɛ̌ìn-ɖò. Ké ɔ ɓéɖé ma cúè-ɓò tã kè wa kɔ̃-dè-ɖɛ̀ tã. 15Gba-gbaɔ̀ wáká ɓɛ́ ɔ nìà ɖé ɔ mú-dyáìn-naínɔ̀ wáká tɔ̀ɔ̀ kɔ̃ɛɛ nììn tɔ̀mɔ̀-tɔ̀mɔ̀ mɔ̀ ma ɓáɖáa tã kè jìì-ɓàɖàǎ mɛ̀nɛ̌ìn-ɖò ɖekè. Ké ɔ ɓéɖé ma cúè-ɓò tã kè wa kɔ̃-dè-ɖɛ̀ tã ɖekè. 16Faà-ɖɔ̀ séín ɓɛ́ wa cɛ̃̀ìn ma kà gba-gbaɔ̀ kɛɛ mɔ̀ ma ɖénì-ɖɔ̀ nɔ̀mɔ̀ dyíin. 17Cúè-ɓò ɓěɔ̀ kɔ̃-dè-ɖɛ̀ ɓěɔ̀ mɔ̀ ma bàɖàsǐ, ké waà kɔ̃-cɛ̃̀ìn-ɖɛ̀ ɓěɔ̀ kè waà gbǎ ɓěɔ̀ ɔ kè waà dú-hwìɛ̀ ɓěɔ̀ mɔ̀ ma séɓàɖà. Cúè-ɓò séín ɓá gba-gbaɔ̀ dyíɛɛ ɓéɖé ma kɔ̃-cɛ̃̀ìn-ɖɛ̀ ɓě ɓɛ́ wa mɔ̀ séɓàɖà kɛ. 18Faà-ɖɔ̀ ɓá ma kà ɓó gba-gba-wɔ̃̀ɔ̀ gbo dyiɛɛ mɔ̀ ma ɖénì-ɖɔ̀ nɔ̀mɔ̀ dyíin kɔ̃̀ kɔ̃ ɓɛ́ wa ɖaɓa ɖɛ nɔ̀mɔ̀ kɔ̃in ɓěɛ. Wa ɖàɓàìn ma ɖɛ nɔ̀mɔ̀ kɔ̃in ɓěɔ̀ dyèě-ɖúú ɖàɓàìn kpèɛ̀ kɛɛ dú kò-kò ɓě kèɛ̀ dyéɖé zĩ-zã. Faà-ɖɔ̀ɔ̀ tɔ̀mɔ̀-tɔ̀mɔ̀ mɔ̀ ma ɓáɖáa hm̀m̌, ké ɔ dya-tɔ̀mɔ̀-tɔ̀mɔ̀ mɔ̀ ma ɓáɖáa dyúáɖò kè jìì-ɓàɖàǎ sɔ̃́ kà faà-ɖɔ̀ ɓě nì gba-gbaɔ̀ múɛɛ nìà kɛ. 19Ɔ ɓéɖé ma cúè-ɓò hĩinyɛ kè wa kɔ̃-dè-ɖɛ̀ hĩinyɛ ɓɛ́ wa mɔ̀ bàɖàsǐ kɛ. Cúè-ɓò ɓěɔ̀ kɔ̃-cɛ̃̀ìn-ɖɛ̀ ɓěɔ̀ kè waà gbǎ ɓěɔ̀ ɔ kè waà dú-hwìɛ̀ ɓěɔ̀ mɔ̀ ma séɓàɖà. 20Ɓóɖóún-kɔ-cù séín kéà jàɖàìn-gbòɔ̀ kè gba-gbaɔ̀ ɓóɖóún dyi kpɔ̃ɛɛ mɔ̀ ma bàɖàsǐ.

Ɖɛ kpa ɖɛ ɓě ɓɛ́ wa pòìn jàɖàìn-gbòɔ̀ kɛ

21Mózè cɛ̃ɛ ma Ɖíìváà-nyɔ̀ ɓěɔ̀ gbo, ɓɛ́ wa ké ma ɖɛ ɓě ɓɛ́ wa pòìn ma kà Bounɓoɔ̀ jàɖàìn-gbò kɔ̃̀ mú ɓɛ́ gma-gbɔ̀ɖɔ̀ɔ̀ kéà nìɛɛ jè ɓíɖíi céè. Ìfámà mɔ̀à Eɖóún mɔ̀à sáa-zà-nyɔ̀ vɛ̀nɛ̀ɔ̀ kɛɛ dyú-gààɔ̀ kɛɛ mɔ̀ ma wa nàìn-nyɔ̀. 22Bɛ̀záɖèò ɓɛ́ ɔ mɔ̀à Húɔ̀ɛ̀ nyúà-dyú, kɔ̃̀ ɓǎ mɔ̀à Dyúwìɖì, ké ɔ sɔ̀à Júɖàà xwéɖé-dùɔ̀ múɛɛ nyu ma ɖɛ séín ɓɛ́ Bounɓoɔ̀ cɛ̃ ma kà Mózè gboɛ. 23Ké Àhòɖíà mɔ̀à Àhìsámàà dyú-gàà, ɓɛ́ ɔ sɔ̀à ɖé Dɛ̃́ìn xwéɖé-dùɔ̀ múɛɛ dè ma Bɛ̀záɖèò sɔ̃ xwíɖíi. Ɔ mɔ̀ ma sɛ́ɖɛ́-dyuò-nyɔ̀ kè ɖɛ-sɔ̃-bɛ̃̀-kɔ̃-pòìn-ɖɛ̀ nyu-nyɔ̀. Ɔ dyuò dyèě-ɖúú ɖàɓàìn kpèɛ̀ kɛɛ dú kò-kò ɓě kèɛ̀ dyéɖé zĩ-zã ɓě ɖénì-ɖɔ̀ nɔ̀mɔ̀ dyíin ɓě kɔ̃ ɖàɓàìn.

24Ɖɛ ɓě ɓɛ́ wa pòìn ma kà jàɖàìn-gbòɔ̀ kɛɛ, wa kɛà kɛ̀. Góò séín ɓɛ́ wa nyùìn ma kà kũ̀à mú ɓó jàɖàìn-gbòɔ̀ po jèɛɛ xwa-ku-ku ɖu ma pṹá-dyèɖè táázĩ̀ìn sɔ̃́ hɔ̃dɛ̀ɖɛ̀ dyúáɖò kè kpáɖá-nyɔ hĩinyɛ ɓaɖa-bùè sè hm̀m̌ dyììn ɖé kà sáa-zà-nyɔ̀ ɓěɔ̀ nììn pṹá-dyèɖè nyu nìɛ̀ kɛɛ mú. Góòɔ̀ mɔ̀ ma nyíí-ɖɛ̀ kpa ɖɛ. 25Séɓàɖà jĩ̀ kà ɓɛ́ gàa ɓě ɓɛ́ wa zɛɖɛ ma kà kɛɛ tò ma ɓó kũ̀àɔ̀ jèɛɛ xwa-ku-ku ɖu ma pṹá-dyèɖè táázĩ̀ìn mɛ̀nɛ̌ìn-sɔ̃́ hɔ̃dɛ̀ɖɛ̀ hm̀m̌ kè kpáɖá-nyɔ sɔ̃́ ɓaɖa-bùè dyììn ɖé kà sáa-zà-nyɔ̀ ɓěɔ̀ nììn pṹá-dyèɖè nyu nìɛ̀ kɛɛ mú. 26Gàa ɖò-ɖò séín pɛ́ɛ̀ ma séɓàɖà-cɛ̀kò fáún-fáún dyììn ɖé kà sáa-zà-nyɔ̀ ɓěɔ̀ nììn cɛ́kò nyu nìɛ̀ kɛɛ mú. Gàa táázĩ̀ìn hɔ̃dɛ̀ɖɛ̀ mɛ̀nɛ̌ìn-ɖò kè táázĩ̀ìn tã hɔ̃dɛ̀ɖɛ̀ hm̀m̌ kè kpáɖá-nyɔ sɔ̃́ ɓaɖa-bùè pɛ́ɛ̀ ma wíɖí nìà kɛ. Wa mɔ̀ gàa ɓě ɓɛ́ wa nyuá zɔ̃ kpáɖá-nyɔ mɔɔ zi kɔ̃, ɓɛ́ wa zɛɖɛ ma kà kɛ. 27Wa nyu ma séɓàɖà kɔ̃̀ xwa-ku-ku ɖu ma pṹá-dyèɖè táázĩ̀ìn mɛ̀nɛ̌ìn-sɔ̃́ kè hɔ̃dɛ̀ɖɛ̀ hm̀m̌ wɛ̃ɛ jàɖàìn-gbòɔ̀ cu-pĩ̀à ɓěɔ̀ kɔ̃-dè-ɖɛ̀ ɓě kè faà-ɖɔ̀ ɓɛ́ ɔ cɛ̃ ma kà jàɖàìn-gbòɔ̀ xwíníín nyɛɛ cúè-ɓò ɓěɔ̀ kɔ̃-dè-ɖɛ̀ ɓě mú. Wa nyu ma ɖɛ-kɔ̃-dè-ɖɛ̀ hɔ̃dɛ̀ɖɛ̀ ɖò. Ɔ xwíníín mɔ̀ séɓàɖà kɔ̃̀ xwa-ku-ku ɖu ma pṹá-dyèɖè kpáɖá-nyɔ tã ɓaɖa-bùè sè hm̀m̌ wɛ̃ɛ nyu ma ɖɛ-kɔ̃-dè-ɖɛ̀ dyúáɖò. 28Ké wa nyu ma séɓàɖà tɔ̀ɔ̀ kɔ̃̀ xwa-ku-ku ɖu ma pṹá-dyèɖè kpáɖá-nyɔ sɔ̃́ ɓaɖa-bùè kɛɛ ɖò gbǎ ɓě mú ɓó gba-gbaɔ̀ cúè-ɓò ɓěɔ̀ jè, ké wa po ma séɓàɖà tɔ̀ɔ̀ ɖò cúè-ɓò ɓěɔ̀ dú-hwìɛ̀ dyi, ké wa nyu séɓàɖàɔ̀ nyɔ sè ɓóɛɛ cúè-ɓò ɓěɔ̀ kɔ̃-cɛ̃̀ìn-ɖɛ̀ ɓě mú. 29Bàɖàsǐ ɓɛ́ wa nyùìn ma kà kũ̀à mú ɓó jàɖàìn-gbòɔ̀ po jèɛɛ xwa-ku-ku ɖu ma pṹá-dyèɖè táázĩ̀ìn hm̀m̌ hɔ̃dɛ̀ɖɛ̀ tã kè ɓaɖa-bùè. Bàɖàsǐɔ̀ mɔ̀ ma nyíí-ɖɛ̀ kpa ɖɛ. 30Wa nyu ma bàɖàsǐɔ̀ ɖò jàɖàìn-gbò-wɔ̃̀ɔ̀ cúè-ɓò ɓěɔ̀ kɔ̃-dè-ɖɛ̀ ɓě kè sáa-kɔ̃-zàìn-gbààɔ̀ kè ɔ nììn tɔ̀ɔ̌ɔ̀ kè kũ̀à-mú-nyùìn-ɖɛ̀ séín ɓá gbààɔ̀ dyíɛɛ mú. 31Ké wa nyu ma bàɖàsǐɔ̀ nyɔ sè ɓóɛɛ gba-gbaɔ̀ cúè-ɓò ɓěɔ̀ kɔ̃-dè-ɖɛ̀ ɓě kè gba-gba-wɔ̃̀ɔ̀ cúè-ɓò ɓěɔ̀ kɔ̃-dè-ɖɛ̀ ɓě ɔ kè jàɖàìn-gbòɔ̀ kè gba-gbaɔ̀ ɓóɖóún-kɔ-cù séín ɓěɔ̀ mú.

Currently Selected:

Ɛ́séɖɔ̀ 38: ƁB02

Highlight

Copy