Ɛ́séɖɔ̀ 11

Mózè po wuɖui ɓá nyíɔ́-dyù mɛ́ jè dyí

1Hwɛ̀ ɓɛ́ Mózè ké ma Féwòɖò gbo wùɖùɛɛ, Bounɓoɔ̀ cɛ̃ɛ ma Mózè gbo, ké ɔ ɖá, “Ní mu nyɔ-gǎ-dyéìn-ɖɛ̀ dyúáɖò nyɛ̀nɛ̀ɛ̀ kã́áɔ̀ kè Íjè-ɓòɖòɔ̀ kɔ̃ dyàùn ɖe. Sɔ̀ìn ɓóɛ gboɛɛ, ɔ mu ɓě dyi táàùn, ɓɛ́ ɓě ké ɓóɖóɛ̀ kɔ̃ sɔ̀, ké ɔ mu ɓě kúmúùn gàná cá. 2Ɔ jèɛɛ, cɛ̃ɛ ní nyɔ ɓěɔ̀ gbo, ɓɛ́ wa ɖò-ɖò séín ké waà ɓǎto Íjè-nyɔ̀ ɓě séɓàɖà-ɓàɖàà-ɖɛ̀ kè góò-ɓàɖàà-ɖɛ̀ ɓě zɔ̀ìn.” 3Ké Bounɓoɔ̀ nyuɛ ké Íjè-nyɔ̀ ɓěɔ̀ hwòɖǒ pɛ́ɛ̀ ma dyí ɓó Éézùɖùɛ̀-nyɔ̀ ɓěɔ̀ ɖɛ nyí jè, ké Mózè mɔ̀ ma nyɔ kpa ɖɛ ɖò ɖé Féwòɖòɛ̀ gɔ̌mànà-nyɔ̀ ɓěɔ̀ kè Íjè-nyɔ̀ tɔ̀ɔ̀ ɓěɔ̀ dyéɖéín.

4Ti ɓɛ́ Mózè nì ma ɓó Féwòɖò gbo keɛɛ, ɔ cɛ̃ɛ ma kã́áɔ̀ gbo, ké ɔ ɖá, “Bounɓoɔ̀ ɖá máaǔn hwuɖu hwìɛ̀ǐn ní, ɔ mu Íjè-ɓòɖòɔ̀ mú namaùn. 5Íjè-nyɔ̀ ɓěɔ̀ nyíɔ́-dyù-gàà séín mu mɛ́ìn. Mɔ̀ mɔ̀à kã́áɔ̀ kɛɛ mìɔùn nììn nyíɔ́-dyù mu mɛ́ìn, hwɛ̀ ḿ po níiń, gǐì-màà ɓɛ́ ɔ mɔ̀ ɖɛ-ɖu-nyɔ̀ kɛɛ nììn nyíɔ́-dyù. Ké nyúà-ɖɛ̀ ɓěɔ̀ nyíɔ́-dyù mu mɛ́ìn ɖekè. 6Ké vĩ̌-wùɖù zoo mu Íjè-ɓòɖòɛ̀ dà séín sɔ̀ìn. Vĩ̌-vĩ̌ nì náa ɖò séè Íjè-ɓòɖò gànáà kɔ̃ kpá ɖò mɔɔ ké ɖò se ná Íjè-ɓòɖòɛ̀ kɔ̃ kpáa mu ɖe. 7Kɛɛ ɖé Éézùɖùɛ̀-nyɔ̀ ɓěɔ̀ hwìɛ̀ kɛɛ, gìɖìǐ mu ɖé nyɔ séín kè nyúà-ɖɛ̀ séín kɔ̃ nììn. Ɔ mu ná nììn ɓɛ́ m̀ kéɛ dyuò kà Bounɓoɔ̀ po gbo-zaìn-zaìn ɖò ɓó Íjè-nyɔ̀ ɓěɔ̀ kè Éézùɖùɛ̀-nyɔ̀ ɓěɔ̀ pṹa kɛ. 8Ɔ ɖǎ ná nìǐn, nì gɔ̌mànà-nyɔ̀ séín ɓěɛ̀ mu dyiìn, ɓɛ́ wa ké ḿ dyúa dú hwuɖu taɓa, ɓɛ́ wa ké ḿ ɓaà, ɓɛ́ wa ké níiń ‘À ɓaà m̀ ní, m̀ kè nì nyɔ séín ɓɛ́ wa síà m̀ kíɖííɛɛ mɛ mu.’ Sɔ̀ìn ɓóɛ gboɛɛ ní, à mu muùn.” Púɛɛ, Mózè kpá ma dyoɖoún, ké ɔ sɔ̀ ma ɓó Féwòɖò dyúa.

9Bounɓoɔ̀ ɖǎa ma Mózè gbo cɛ̃ kĩ́ín kà Féwòɖò se ma ɔ wuɖuɔ̀ ɖùǔ gbo tòɛ̌ muɛ. Ɔ ɖá, “Ɖɛ kɔ̃̀ jè Féwòɖò seà m̀ ɖùǔ gbo tòɛ̌ muɛɛ mɔ̀ ɓɛ́ ní zɛ̃̀ìn-ɖɛ̀ ɓěɔ̀ ké kɔ̃ kpá ɖé Íjè-ɓòɖòɔ̀ kɔ̃.” 10Mózè kè Eɖóún nyu ma zɛ̃̀ìn-ɖɛ̀ séín ɓěa ɓó Féwòɖò dyúa. Kɛɛ Bounɓoɔ̀ nyuɛ ké Féwòɖòɛ̀ hwòɖǒ-dyùàɔ̀ kùmù ma, ké ɔ se ma Éézùɖùɛ̀-nyɔ̀ ɓěɔ̀ dyi táà mɔ́, ɓɛ́ wa ké ma ɔ ɓóɖóɔ̀ mú sɔ̀.

Currently Selected:

Ɛ́séɖɔ̀ 11: ƁB02

Highlight

Copy