Ɛ́séɖɔ̀ 12
12
Zĩ̀ìn-Kɔ̃in-hwɔ̀
1Hwɛ̀ ɓɛ́ Bounɓoɔ̀ ké ma Íjè-nyɔ̀ ɓěɔ̀ nyíɔ́-dyù-gàà ɓěɔ̀ ɖáɓáa, ɔ cɛ̃ɛ ma Mózè kè Eɖóún gbo ɖé Íjè-ɓòɖòɔ̀ kɔ̃, ké ɔ ɖá, 2“Dɛ̀nɛ̀ nìà kɛ mɛ mɔ̀ ɓěɛ̀ zɔ̃ɔ̀ dɛ̀nɛ̀ kĩ́ín-kĩ́ín nììn. 3Cɛ̃ɛ Éézùɖùɛ̀-dyù séín ɓěɔ̀ gbo kà ɓó dɛ̀nɛ̀ nìà kɛ wé ɓaɖa-bùè nììnɔ̀ ɓaɖaa, gàa ɖò-ɖò séín mɛ ɖú ɓáɖáá ɖò mɔɔ wiɖi ɖò dyí ɓó ɔ taàɔ̀ bììɛ. Nyúà-ɖɛ̀ dyúáɖò mɛ nì ɓó taà ɖò-ɖò séín bìì. 4Ɔ jǔ ké taà ɖò dyi dyí ɓíè ɓó nyúà-ɖɛ̀ gàná bìì ní, nìí, taà sɔ̃́ ɓɛ́ wa deìn bũ̌ɛɛ mɛ poìn nyúà-ɖɛ̀ dyúáɖò dyí. Nyɔ jĩ̀ kà nì taà ɖò-ɖò múɛ kè suaɖɛ̀ jĩ̀ kà ɓɛ́ nyɔ ɖò-ɖò ɓɛ́ìn tàà kɛɛ, ɓě mɛ gmɔ̀ɔ̀, ɓɛ́ ɓě kéɛ náa nyu. 5Nyúà-ɖɛ̀ ɓɛ́ ɓě muà gãùn wɛ̃ɛ mɛ mɔ̀ nyúà-ɖɛ̀ ɓɛ́ ɔ ɖǎ zɔ̃ dyúáɖò nyuɛ. Ɔ mɛ mɔ̀ ɔ ɓíɔ́ ɓɛ́ ɔ se kɛɛ ɖò ɓéɖéɛ, ké ɔ ɓɛ́ìn ɓáɖáá mɔɔ wiɖi jǔɛ. 6Ɓě mɔ̀ Éézùɖùɛ̀-dyù séín ɓěɛɛ, ɓě mɛ dè ɓěɛ̀ nyúà-ɖɛ̀ ɓěɔ̀ dyi tee, ɓɛ́ ɔ ké dɛ̀nɛ̀ɔ̀ wé ɓaɖa-bùè sè hĩinyɛ dyɛ̀ìn. Ɔ ɖǎ ná nìǐn, ɓě séín mɛ ɖáɓá wa ɓó hwìo pɛ̀ɛ. 7Ɓě ɖǎ nyúà-ɖɛ̀ ɓěɔ̀ ɖáɓá ní, ɓě mɛ ɖú waà nyɔmɔɔ̀ ɖò dyí, ɓɛ́ ɓě kéɛ ɓóɛ gbǒ ɓě kɔ̃̀ mú ɓě muà suaɖɛ̀ɔ̀ tàìn nyɛɛ xwìɖì-tɛ̃́ín ɓěɔ̀ wáká sɔ̃́ɔ̀ kè wa dú-hwìɛ̀ tã́. 8Ɔ ɖǎ ná nìǐn, ɓě mɛ po suaɖɛ̀ɔ̀ dyéɖé, ɓɛ́ ɓě kéɛ vàǎ nɛɛ̀-nɛɛ̀ dyí tàìn ɓó máaún-hwùɖù dyúáɖòɔ̀ mú. Ɓě mɛ ɖìɛ̀n bɛɖɛɛ̀ se dyáìn-ɖɛ̀ gbo nìɛɛ dyí. 9Ɓě mɛ ɓɔ́ suaɖɛ̀ɔ̀ dyɔɔ tàà, mɔɔ ké ɓě mɛ ɓɔ́ɔ pĩɛ, kɛɛ ɓě mɛ poɛ séín dyéɖé. Ɓě mɛ poɛ dúɔ̀ kèɛ̀ ɖáá ɓěɔ̀ kèɛ̀ xwíníín-ɖɛ̀ ɓěɔ̀ séín dyéɖé. 10Ɓě ní ɖá ɓɛ́ ɓě ké ɖò goò. Ɔ jǔ ké ɖò dyi goò ní, ɓě mɛ fɔ̃ɔ. 11Kà ɓě kéɛ ɖiɛ nyuɛɛ kɛà kɛ̀. Ɓě mɛ po ɖɔún, ké ɓě mɛ po ɓěɛ̀ bǎ ɓěɔ̀ ɓoún séín, ɓɛ́ ɓěɛ̀ kùì-kpà ɓěɔ̀ ké ɓě xwa nì, ké ɓě mɛ ɖiɛ wàɖà-wàɖà. Ɖɛ nìà kɛ mɔ̀ mɔ̄ mɔ̀à Bounɓoɔ̀ kɛɛ Zĩ̀ìn-Kɔ̃in-hwɔ̀ɔ̀.
12“Ɓó máaún-hwùɖù dyúáɖòɔ̀ múɛɛ, ní mu Íjè-ɓòɖò gànáà mú namaùn, ɓɛ́ ḿ ké nyíɔ́-dyù-gàà séín kè nyúà-ɖɛ̀ nyíɔ́-dyù séín ɖáɓá. Kǎà ní mu Íjè-nyɔ̀ ɓěɔ̀ nììn gèɖèpɔ́ɔ̀ séín ɓěɔ̀ toún ɖuɛ nyuùn. Mɔ̄ mɔ̀ Bounɓoɔ̀. 13Nyɔmɔɔ muà ɓó xwìɖì-tɛ̃́ín ɓěɔ̀ bũ̌ nììn nyɛɛ mu Éézùɖùɛ̀-dyù ɓěɔ̀ dyí-dyuòìn-ɖɛ̀ jǔùn ɓó waà gbǒ ɓě kɔ̃̀ mú wa muà nììn nyɛɛ bũ̌. Ké ḿ dyi nyɔmɔɔ̀ dyéín, ní mu wa kɔ̃in zĩ̀ìn. Ḿ se wa mú gbɔɔ̌ mu, ti ní mu Íjè-ɓòɖòɛ̀ sɔ̃ kɔ̃ poùn wɛ̃. 14Wé nìà kɛ mɔ̀ wé Éézùɖùɛ̀-dyù ɓěɔ̀ ɓéɖé ɓɛ́ wa ké dyi kpɔ̃ɛ. Wa kè waà xwíníín-dyù ɓě mɛ kpɔ̃ wé nìà kɛ dyi kánáá pū. Ɔ mɛ mɔ̀ hwɔ-pa-wè ɓó mɔ̄ mɔ̀à Bounɓoɔ̀ kɛɛ bìì, ɓɛ́ ɔ ké wa ɖɛ ɓɛ́ ḿ ɖǎ wa bìì nyuɛɛ hwìɖǐi dyà.
Bɛɖɛɛ̀-Se-Dyáìn-Ɖɛ̀-Gbo-Nì-hwɔ̀
15“Zĩ̀ìn-Kɔ̃in-hwɔ̀ɔ̀ ɖǎ dyi zi ní, Éézùɖùɛ̀-dyù ɓěɔ̀ mɛ ɖi bɛɖɛɛ̀ ɓɛ́ ɔ se dyáìn-ɖɛ̀ ɖò gbo nì kɛɛ ɓó wé mɛ̀nɛ̌ìn-sɔ̃́ xwíníín. Ɓó wé kĩ́ín-kĩ́ínɔ̀ ɓaɖaa, wa mɛ zà bɛɖɛɛ̀-dyáìn-ɖɛ̀ séín waà gbǒ ɓěɔ̀ múin. Sɔ̀ìn ɓó wé kĩ́ín-kĩ́ínɔ̀ gbo, ɓɛ́ ɔ ké wéɔ̀ mɛ̀nɛ̌ìn-sɔ̃́ nììnɔ̀ dyɛ̀ìn nyɛɛ, nyɔ mu bɛɖɛɛ̀ dyá-dyá ɖò ɖiìn nyɛɛ, wa ɓéɖé ɓɛ́ wa ké ɔ woɖo gbo cɛ̃ sɔ̀ìn ɓó wa hwìɛ̀. 16Ké Éézùɖùɛ̀-dyù séín ɓěɔ̀ mɛ poìn dyí ɓó wé kĩ́ín-kĩ́ínɔ̀ ɓaɖa, ɓɛ́ wa ké ḿ ɓiè. Kà dyúáɖòɔ̀ kǎà wa mɛ nyuɛ ɓó wéɔ̀ mɛ̀nɛ̌ìn-sɔ̃́ nììnɔ̀ ɓaɖa. Nyɔ ɖò ní ɖá ɔ ké kũ̀à ɖò nyu ɓó wé kĩ́ín-kĩ́ínɔ̀ kè wé mɛ̀nɛ̌ìn-sɔ̃́ nììnɔ̀ ɓaɖa, ɔ sèìn ɓɛ́ nyɔǔn ké waà ɖii-ɖɛ̀ pĩ. Ɖɛa ɖòùn mɔ̀ kũ̀à wa mɛ nyu. 17Wa mɛ dè Bɛɖɛɛ̀-Se-Dyáìn-Ɖɛ̀-Gbo-Nì-hwɔ̀ɔ̀ paa gbɔ ɓó Zĩ̀ìn-Kɔ̃in-hwɔ̀ɔ̀ wéɔ̀ ɓaɖa, sepóɛɖé wé nìà kɛ mɔ̀ wé kɔ̃̀ ɓaɖa ḿ zà waà xwéɖé-dù ɖò-ɖò séín nɔ̄ Íjè-ɓòɖòɛ̀ kɔ̃. Wa kè waà xwíníín-dyù ɓě mɛ kpɔ̃ wé nìà kɛ jè dyi kánáá pū. 18Ɖé dɛ̀nɛ̀ kĩ́ín-kĩ́ínɔ̀ múɛɛ, wa mɛ ɖi bɛɖɛɛ̀ ɓɛ́ wa se dyáìn-ɖɛ̀ nyùìn nyɛ. Wa mɛ dèɛ̀ nyuɛ gbɔ ɓó dɛ̀nɛ̀ kĩ́ín-kĩ́ínɔ̀ wé ɓaɖa-bùè sè hĩinyɛ nììnɔ̀ hwìo, ɓɛ́ ɔ ké dɛ̀nɛ̀ɔ̀ wé kpáɖá-nyɔ sè dyúáɖò nììnɔ̀ hwìo dyɛ̀ìn. 19Bɛɖɛɛ̀-dyáìn-ɖɛ̀ ɖò mɛ ɓɔ́ ɖé waà gbǒ ɓěɔ̀ ɖò mú nìɛ̀ ɓó wé mɛ̀nɛ̌ìn-sɔ̃́ɔ̀ xwíníín. Nyɔ kã̀ìn séín ɓɛ́ ɔ mu ɖɛ nì bɛɖɛɛ̀-dyáìn-ɖɛ̀ gboɛɛ ɖò ɖiìn nyɛɛ, wa ɓéɖé ɓɛ́ wa ké ɔ woɖo gbo cɛ̃ sɔ̀ìn ɓó wa hwìɛ̀, kɛbì ɔ mɛ mɔ̀ ɖíà ɖò mɔɔ kɛbì ɔ mɛ mɔ̀ Éézùɖùɛ̀-dyù ɖòɛ. 20Wa nyɔ ɖò ní ɖá ɔ ké ɖɛ ɓɛ́ bɛɖɛɛ̀-dyáìn-ɖɛ̀ nì gboɛɛ ɖò ɖi. Dɛ̀ kã̀ìn séín wa mu cĩ́ìn nyɛɛ, wa mɛ ɖi bɛɖɛɛ̀ se dyáìn-ɖɛ̀ gbo nì kɛ.”
Zĩ̀ìn-Kɔ̃in-hwɔ̀ kĩ́ín-kĩ́ínɔ̀
21Ti ɓɛ́ Bounɓoɔ̀ ɖǎ ma Mózè gbo wùɖùɛ̀ hwɔɛɛ, Mózè poìn ma Éézùɖùɛ̀-nyɔ̀ ɓěɔ̀ nyɔ vɛ̀nɛ̀ séín ɓěɔ̀ dyí, ké ɔ cɛ̃ɛ ma wa gbo, ké ɔ ɖá, “Ɓě mu, ɓɛ́ ɓě ké ɓáɖáá mɔɔ wiɖi ɓě gã ɓó ɓěɛ̀ taà ɖò-ɖò ɓěɔ̀ bìì, ɓɛ́ ɓě ké wa ɖáɓá, ɓɛ́ ɓě kéɛ Zĩ̀ìn-Kɔ̃in-hwɔ̀ɔ̀ pàìn. 22Ɓě ɖǎ nyúà-ɖɛ̀ ɓěɔ̀ ɖáɓá ní, ɓě mɛ ɖú ɓáá-ɖɛ̀ mɔ̀à hésɔ̀ kɛɛ dyí, ɓɛ́ ɓě kéɛ pṹ sã, ɓɛ́ ɓě kéɛ ɖé gbòɖòò kɔ̃̀ mú nyúà-ɖɛ̀-nyɔ̀mɔ̀ɔ̀ nìà kɛ sṹ, ɓɛ́ ɓě ké nyɔmɔɔ̀ ɖò ɓó ɓěɛ̀ gbǒ ɓěɔ̀ xwìɖì-tɛ̃́ín ɓěɔ̀ wáká sɔ̃́ɔ̀ kè wa dú-hwìɛ̀ tã́. Ɔ ɖǎ ná nìǐn, ɓěɛ̀ nyɔ ɖò ní ɖá ɓɛ́ ɔ ké píé sí fɔɔ cá, ɓɛ́ zɔ̃ ké zɔ̃ hwɛ̀. 23Ti ɓɛ́ Bounɓoɔ̀ muà ɓóɖóɛ̀ mú namaùn, ɓɛ́ ɔ kéà Íjè-nyɔ̀ ɓěɔ̀ ɖáɓáa, nìí, ɔ mu nyɔmɔɔ̀ ɓó xwìɖì-tɛ̃́ín ɓěɔ̀ wáká kèɛ̀ dú-hwìɛ̀ dyéìn, ké ɔ mu ɓě kɔ̃in zĩ̀ìn. Ɔ se ɔ gĩɔ-ìnjàɔ̀ dyi táǎ mu, ɓɛ́ ɔ ké ɓěɛ̀ gbǒ ɓěɔ̀ ɖò mú dyá, nìí ɓɛ́ ɔ ké ɖé nyɔ ɖò ɖáɓá. 24Sɔ̀ìn ɓó zɛ̃̌ɛ̀ gboɛɛ, ɓě kè ɓěɛ̀ xwíníín-dyù ɓě mɛ nyu ɖɛ nìà kɛ kánáá pū. 25Ɓě mɛ kpɔ̃ wé nìà kɛ jè dyi tee ti ɓě mu ɓóɖó ɓɛ́ Bounɓoɔ̀ ɖáìn ɓě nyɛ́nɛ́ín nyɛɛ kɔ̃ nyiniìn nyɛ. 26Ɔ jǔ ké ɓěɛ̀ dyú ɓěɔ̀ dyi ɓě dyi diè, ké wa dyi níiń, ‘Ɖɛ́ kɔ̃̀ jè ɓě ɖáɓáà nyúà-ɖɛ̀ ɓěɛ̀ kɛ́?’ ní, 27nìí, ɓě mɛ cɛ̃ɛ wa gbo, ɓɛ́ ɓě ké níiń, ‘Ɔ mɔ̀ sáa-zàìn-ɖɛ̀ ɓá Kɔ̃in-Zĩ̀ìn-hwɔ̀ɔ̀ jè dyíɛ. À nyuɛ ɓɛ́ à ké Bounɓoɔ̀ dya dè, sepóɛɖé ɔ zĩ̀ìn ma à mɔ̀ Éézùɖùɛ̀-nyɔ̀ ɓěɛɛ kɔ̃in ɖé Íjè-ɓòɖòɔ̀ kɔ̃, ké à nyɔ ɖò se ma mɛ́, ti ɓɛ́ ɔ ɖáɓá ma Íjè-nyɔ̀ ɓěɔ̀ kɛ.’ ”
Ti ɓɛ́ Mózè ɖǎ ma wuɖu jaɖaa, púɛɛ, Éézùɖùɛ̀-nyɔ̀ ɓěɔ̀ taɓa ma dú hwuɖu, ké wa ɓiè ma Gèɖèpɔ́ɔ̀. 28Ké wa nyu ma ɖɛ Bounɓoɔ̀ cɛ̃ ma kà Mózè kè Eɖóún gboɛ.
Nyíɔ́-dyù ɓěɔ̀ mɛ́ jè
29Ɓó máaún hwuɖu hwìɛ̀ǐn nyɛɛ, Bounɓoɔ̀ ɖáɓá ma nyíɔ́-dyù-gàà séín nì ma ɖé Íjè-ɓòɖòɔ̀ kɔ̃ɛ. Féwòɖò nìà ɖé zèèɔ̀ kɔ̃ɛɛ mìɔùn nììn nyíɔ́-dyù mɛ́ ma, hwɛ̀ ḿ po níiń, kpɔɖɔ-ɖeín-nì-nyɔ̀ ɓɛ́ ɔ nì ɖé kpɔɖɔ ɖeín nyɛɛ nyíɔ́-dyù. Nyúà-ɖɛ̀ ɓěɔ̀ nyíɔ́-dyù mɛ́ ma ɖekè. 30Púɛɛ, Féwòɖò kè ɔ gɔ̌mànà-nyɔ̀ ɓěɔ̀ ɔ kè ɔ nyɔ tɔ̀ɔ̀ ɓěɔ̀ sɔ̀ ma dyí ɓó máaúnɔ̀, ké vĩ̌-wùɖù zoo nì ma ɖé Íjè-ɓòɖòɔ̀ kɔ̃, sepóɛɖé taà ɖò se ma nì ɓɛ́ nyɔ ɖò ké se ɖé mɛ́. 31Ké Féwòɖò ɖá ma Mózè kè Eɖóún, ké ɔ cɛ̃ɛ ma wa gbo, ké ɔ ɖá, “Ɓě kè Éézùɖùɛ̀-nyɔ̀ ɓěɔ̀ sɔ̀ ɓóɖóɛ̌n! Ɓě mu, ɓɛ́ ɓě ké Bounɓoɔ̀ ɓiè kà ɓěɛ̀ hwòɖǒ mɔ́à nyuɛ dyiɛ. 32Ɓě ɖú ɓěɛ̀ ɓáɖáá kè wiɖi kè ɓìɖǐ ɓěɔ̀ dyí kà ɓěɛ̀ hwòɖǒ mɔ́à nyuɛ dyiɛ, ɓɛ́ ɓě ké mu, ké ɓě mɛ ɓaà ɓó mɔ́ún bìì, ɓɛ́ Gèɖèpɔ́ɔ̀ ké mɔ́ún mana kɔ̃ po.”
33Púɛɛ, Íjè-nyɔ̀ ɓěɔ̀ nɛ́ ma Éézùɖùɛ̀-nyɔ̀ ɓěɔ̀ kɔ̃, ké wa ɖá, “Ɓě fṹà ɓɛ́ ɓě ké à ɓóɖóɛ̀ kɔ̃ sɔ̀, à ní kɔ̃̀ ɖà mɛ́ɛ hwɛ̀.” 34Ɔ jèɛɛ, Éézùɖùɛ̀-nyɔ̀ ɓěɔ̀ ɖú ma waà bɛɖɛɛ̀ ɓɛ́ wa nì ma nyuɛń, ɓɛ́ wa séè ma ɖé bɛɖɛɛ̀-dyáìn-ɖɛ̀ po keɛɛ dyí. Ɔ gã̀ ma ɖé waà bɛɖɛɛ̀-mú-nyùìn-ɖɛ̀ ɓěɔ̀ mú dyi, ké wa bĩɛ̀n ma ɖɔ dyi, ké wa dèɛ̀ ma kɔún, ké wa kpaa ma. 35Ké Éézùɖùɛ̀-nyɔ̀ ɓěɔ̀ nyu ɖɛ ɓɛ́ Mózè cɛ̃ ma kà wa gboɛ. Wa zɔ̀ìn ma wa ɓǎto Íjè-nyɔ̀ ɓěɔ̀ séɓàɖà-ɓàɖàà-ɖɛ̀ ɓě kè góò-ɓàɖàà-ɖɛ̀ ɓě ɔ kè mú-po-ɖɔ̀ ɓě. 36Ké Bounɓoɔ̀ nyuɛ ké Íjè-nyɔ̀ ɓěɔ̀ hwòɖǒ pɛ́ɛ̀ ma dyí ɓó Éézùɖùɛ̀-nyɔ̀ ɓěɔ̀ ɖɛ nyí jè. Ké wa nyí ma Éézùɖùɛ̀-nyɔ̀ ɓěɔ̀ ɖɛ kã̀ìn séín wa zɔ̀ìn ma wa kɛ. Kǎà wa nyu ma kà ɓó Íjè-nyɔ̀ ɓěɔ̀ hwuɛ.
Éézùɖùɛ̀-nyɔ̀ ɓěɔ̀ sɔ̀ Íjè-ɓòɖòɔ̀ kɔ̃
37Ti ɓɛ́ Íjè-nyɔ̀ ɓěɔ̀ kúmú ma Éézùɖùɛ̀-nyɔ̀ ɓěɔ̀ kɛɛ, wa sɔ̀ ma ɖé Wàɖàmísì-hwɔ̀ɖɔ̀ɔ̀ mú, ké wa kpá ma hwìè xwíníín, ké wa mu ma ɖé Súkò-hwɔ̀ɖɔ̀ɔ̀ mú. Wa ɓɛ́ìn ma gàa táázĩ̀ìn hɔ̃dɛ̀ɖɛ̀ mɛ̀nɛ̌ìn-ɖò jǔɛ. Màa ɓě kè dyú mɛ́nɛ́ɛ́ ɓě se ɖé kpá. 38Wa kpa ma ɓáɖáá kè wiɖi kè ɓìɖǐ kúɖúú, ké nyɔ ɓě ɓɛ́ wa se Éézùɖùɛ̀-nyɔ̀ ɓěɛɛ ɓáún-ɓáún sí ma wa woɖoún. 39Ké wa nyu ma bɛɖɛɛ̀ ɓɛ́ wa cáìn ma kà, ɓɛ́ wa se ma kà dyáìn-ɖɛ̀ gbo po, ɓɛ́ wa zà ma kà ɖé Íjè-ɓòɖòɔ̀ kɔ̃ɛɛ bɛɖɛɛ̀-kpò se dyá ɓě mú. Ɖɛ kɔ̃̀ jè bɛɖɛɛ̀ɔ̀ se ma kà dyáìn-ɖɛ̀ gbo nìɛɛ mɔ̀ sepóɛɖé Íjè-nyɔ̀ ɓěɔ̀ cṹìn ma wa kɔ̃ún dyi, ké wa se ma ti ɓéɖé ɓɛ́ wa ké ma wa mìɔùn bìì ɖii-ɖɛ̀ pĩ.
40Ti jĩ̀ kà ɓɛ́ Éézùɖùɛ̀-nyɔ̀ ɓěɔ̀ cĩ́ ma ɖé Íjè-ɓòɖòɔ̀ kɔ̃ɛɛ mɔ̀ ma zɔ̃ hɔ̃dɛ̀ɖɛ̀ hĩinyɛ kè kpáɖá-nyɔ ɓaɖa-bùè. 41Wé kɔ̃̀ ɓaɖa ɓɛ́ zɔ̃ hɔ̃dɛ̀ɖɛ̀ hĩinyɛ kè kpáɖá-nyɔ ɓaɖa-bùèɔ̀ hwɛ̀ ma ɖé nyɛ̀nɛ̀ɛ̀ kɛɛ, ɔ mɔ̀ wé kɔ̃̀ ɓaɖa Bounɓoɔ̀ nyɔ séín ɓěɔ̀ xwéɖé-dù ɓěɔ̀ sɔ̀ ma Íjè-ɓòɖòɔ̀ kɔ̃. 42Ɔ mɔ̀ máaún-hwùɖù kɔ̃̀ mú Bounɓoɔ̀ gmɔ̀ ma ɔ nyɔ ɓěɔ̀ dyí, ké ɔ zà ma wa ɖé Íjè-ɓòɖòɔ̀ kɔ̃ɛ. Ɔ jèɛɛ, máaún-hwùɖù nìà kɛ kpá wáká ɓó Bounɓoɔ̀ bìì, sɔ̀ìn dà ké dyúa muɛ. Ɔ mɔ̀ máaún-hwùɖù kɔ̃̀ mú ɓɛ́ Éézùɖùɛ̀-nyɔ̀ séín ɓěɔ̀ ké ɓɛ́ɖɛ́ kɔ̃ nì kɛ.
Gma ɓě ɓá Zĩ̀ìn-Kɔ̃in-hwɔ̀ɔ̀ jè dyíɛ
43Wé kɔ̃̀ ɓaɖa Bounɓoɔ̀ zà ma kà Éézùɖùɛ̀-nyɔ̀ ɓěɔ̀ ɖé Íjè-ɓòɖòɔ̀ kɔ̃ɛɛ, ɔ cɛ̃ɛ ma Mózè kè Eɖóún gbo, ké ɔ ɖá, “Gma ɓě ɓá Zĩ̀ìn-Kɔ̃in-hwɔ̀ɔ̀ jè dyíɛɛ, wa kɛà kɛ̀. Ɖíà ɖò ní ɖá ɓɛ́ ɔ ké ɖò ɖi. 44Gǐì ɓɛ́ ɓě dɔ̃ wíɖí múɛɛ mɛ ɖi ɖò, kɛɛ ɓě ɓéɖé ɓɛ́ ɓě ké ɔ sàà ɖáɓá hwɛ̀. 45Kɛɛ nyɔ ɓɛ́ ɔ dyi ɖé ɓěɛ̀ ɓóɖóɔ̀ kɔ̃ cĩ́ìn ɓó ti wè mú pūɛ ɔ kè kũ̀à-nyu-nyɔ̀ ɓɛ́ ɓě kpɔ̃ dyi, ké ɔ se ɓě ɖòɛɛ mɛ ɓɔ́ ɖò ɖiɛ. 46Ɓě mɛ ɖìɛ̀n ɖé gbǒǔn. Nyɔ ɖò ní ɖá ɓɛ́ ɔ ké suaɖɛ̀ɔ̀ ɖò píé síìn, ké nyɔ ɖò ní ɖá ɓɛ́ ɔ ké suaɖɛ̀ɔ̀ kpá ɖò wa. 47Ɓě séín mɛ pa hwɔ nìà kɛ. 48Ɔ jǔ ké ɖíà ɖò dyi ɖé ɓě hwìɛ̀ cĩ́ɛń nì, ké ɔ dyi ní Zĩ̀ìn-Kɔ̃in-hwɔ̀ɔ̀ paa mɔ́ ní, nìí, ɔ ɓéɖé ɔ ké gàa-dyù séín nì ɖé ɔ taàɔ̀ múɛɛ sàà ɖáɓá. Ɔ ɖǎ ná nìǐn, nìí, ɔ ɓɛ́ìn hwɔɔ̀ paa kà ɓě ɖò nìà kɛ. Gàa ɓɛ́ ɔ se sàà mɛ́ɛ mɛ ɓɔ́ ɖò ɖiɛ. 49Gma nìà kɛ nì ɓó ɓě mɔ̀ Éézùɖùɛ̀-dyù ɓěɛ kè ɖíà ɓě cĩ́ ɖé ɓě hwìɛ̀ kɛɛ bìì.” 50Ké Éézùɖùɛ̀-nyɔ̀ ɓěɔ̀ nyu ma ɖɛ séín ɓě ɓɛ́ Mózè kè Eɖóún cɛ̃ ma kà wa gboɛ. 51Ké ɓó wé déínɔ̀ ɓaɖaa, Bounɓoɔ̀ zà ma Éézùɖùɛ̀-nyɔ̀ ɓěɔ̀ xwéɖé-dù ɖò-ɖò séín ɓěɔ̀ ɖé Íjè-ɓòɖòɔ̀ kɔ̃.
Currently Selected:
Ɛ́séɖɔ̀ 12: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
