1 Kɔ̀ɖéíntĩ̀ɔ̀ 16
16
Nyíí-ɖɛ̀ Kɛ́ɖɛ́ì ɖeín-sí-nyɔ̀ ɓě ké tòɛɛ jè
1Ɓá wíɖí ɓě ɓɛ́ ɓě ké kpɔ̃ ɓó Gèɖèpɔ́ɔ̀-nyɔ̀ ɓěɔ̀ bììɛɛ, ɔ jè ɖɛ ḿ mu cɛ̃ìn nyɛɛ, ɔ kɛ̀. Ɓě mɛ nyu ɖɛ ɓɛ́ ḿ cɛ̃ ma cɔ́cì-nyɔ̀ ɓě nì ɖé Gàɖézìà-ɓòɖòɔ̀ kɔ̃ɛɛ gboɛ. 2Ɖɛ ḿ cɛ̃ maa, ɔ mɔ̀, ɓě ɖò-ɖò ɓě mɛ po wíɖí ɖò wáká ɓó wíkì séínɛ̀ wé kĩ́ín-kĩ́ínɔ̀ ɓaɖa. Jĩ̀ kà ɓɛ́ ɓě mu dyéìn nyɛɛ, ɖéɛ̀ ɓě mɛ zà ɖò, ɓɛ́ ɓě kéɛ dyi dè, ɓɛ́ ḿ dyié dyiɛń nìǐn, ɓě ké se wíɖí ɖò kpɔ̃ ɖe. 3Ḿ dyié dyiín, ní mu gàa ɓě ɓɛ́ ɓě hwòɖǒ dèàìn múin nyɛɛ Jùɖúsɛ̀ɖɛ̀ìn-hwɔ̀ɖɔ̀ɔ̀ mú tòùn, ɓɛ́ wa ké ɓěɛ̀ nyíí-ɖɛ̀ ɓě ɓɛ́ ɓě muà tòùn wɛ̃ɛ ɖé kpa. Ní mu wa céè-ɖɛ̀ ɓě xwa dèìn. 4Ɔ dyi dyíin nɔ̀mɔ̀, ɓɛ́ ḿ ké mu ɖekè ní, nìí, ḿ kè wa mu muùn.
Pɔ́ɔ̀ dyí-sɔ́-ɖɛ̀
5Ḿ dyi Màsèdónìà-ɓòɖòɔ̀ kɔ̃ zĩ̀ìn ní, nìí, ní mu ɖé ɓě gbo dyiìn, sepóɛɖé ḿ nì ɖé Màsèdónìà-ɓòɖòɔ̀ kɔ̃ zĩ̀ɛ̌n muɛń. 6Ti ɖòɛ̀ ɓaɖaín, ní mu ɖé ɓě gbo ti goun nyuùn. Ké ti ɖòɛ̀ ɓaɖaín, ní mu ɖé sɔ̃̀ɔ̀-tì gànáɔ̀ nyuùn. Pūín, ḿ kè ɓě mu cuòìn, hwɛ̀ ɓɛ́ ḿ ké dɛ̀ ní muà muùn wɛ̃ɛ mu. 7Sepóɛɖé ḿ se mɔ́ ɓɛ́ ḿ ké ɓě dyé, ɓɛ́ ḿ ké zi pū. Kɛɛ ní mɔ́ ɓɛ́ ḿ ké ɖé ɓě gbo hwèɖèìn goun, ɔ jǔ ké ɔ dyi Bounɓoɔ̀ mɔ́ɔ́-ɖɛ̀ jǔǐn.
8Kɛɛ ḿ ɖǎa hwìɖǐi poìn, ɓɛ́ ḿ ké nɔ̄ Ɛ́fɛ́sà-hwɔ̀ɖɔ̀ɛ̀ mú nì, ɓɛ́ Pɛ́nɛ́kɔ̀-wèɔ̀ ké dyi. 9Hwìè ɖò ɖǎ ḿ bìì kaà, ɓɛ́ ḿ ké kũ̀à vɛ̀nɛ̀ ɖò nyu, ɓɛ́ kũ̀àɔ̀ ké ɖɛ ɖò nyu. Ké nyɔ ɓáún-ɓáún nìɛ̀ gbo vɔ̃uń.
10Tímétè dyié ɓě gbo dyiín, ɓě mɛ nyuɛ ɓɛ́ ɔ ké se fã̀à peɖe, sepóɛɖé ɔ nì Bounɓoɔ̀ bìì kũ̀à nyuɛń kà ḿ nìà nyuɛń nyɛ. 11Ɓěɛ̀ nyɔ ɖò ní ɖá ɓɛ́ ɓě ké ɔ zùǔn zàìn. Ɔ dyiá ɖé ɓě gbo sɔ̀ǔn nìǐn, ɓě mɛ cuò ɔ ɖé gìɖìǐ mú, ɓɛ́ ɔ ké nɔ̄ ḿ gbo ɖe dyi, sepóɛɖé ḿ nì ɔ kè à ɖíí ɓěɔ̀ dyi jèɔ̀ hwìɖǐi dèɛ̌n.
12Ɓá à ɖíí-gàà Àpɔ́ɖè jè dyíɛɛ, ḿ cɛ̃ɛ ɔ gbo kóɖó-kóɖó, ɓɛ́ ɔ kè à ɖíí tɔ̀ɔ̀ ɓěɔ̀ ké ɓě gboi té. Kɛɛ ɔ se mɔ́ ɓɛ́ ɔ ké dyi kàǔn. Ɔ dyi tiɔ̀ ɓéɖéín, nìí, ɔ mu ɖé dyiìn.
Wuɖu hwɛ̀ìn-gbɔɔ̀
13Ɓě mɛ nì ɓɛ́ɖɛ́ kɔ̃. Ɓě mɛ nyànà dyi gãun-gãun ɖé ɖɛ hwìɖǐǐ-taɓa-taɓa mú. Ɓě mɛ ɓéɖé gàa hwòɖǒ-dyùà. Ɓě mɛ ku dyi. 14Ɖɛ séín ɓě mu nyuùn wɛ̃ɛ, ɓě mɛ nyu wa ɖé ɖɛ̀ɓɛ̀ǐn-ɖɛ̀ɓɛ̀ǐn mú.
15Ɓě dyuò Sɛ́ɖɛ́fínà kè ɔ ɓíɖí-gbǒ-xwíníín-nyɔ̀ ɓěɔ̀ jè. Wa mɔ̀ ma nyɔ kĩ́ín-kĩ́ín ɓě taɓa ma Kɛ́ɖɛ́ì hwìɖǐǐ ɖé Àkédyà-ɓòɖòɔ̀ kɔ̃ɛ. Wa ɖǎ wa mìɔùn tò cá, ɓɛ́ wa ké Gèɖèpɔ́ɔ̀-nyɔ̀ ɓěɔ̀ gbo kpá. 16Ḿ ɖíí ɓě, ní ɓaà ɓě, ɓɛ́ ɓě ké nyɔ ɓě nìà kà kɛ ɔ kè nyɔ ɓě kè wa nyuà kũ̀à dyúáɖò kɛɛ xwíɖíi nì.
17Ḿ kpá múàǔn ɓó Sɛ́ɖɛ́fínà kè Fɔ̀tùnétà ɔ kè Àkéékà dyi jè. Wìì ɓɛ́ ḿ kpá ma kà mú, sepóɛɖé ɓě se ma nɔ̄ nì jèɛɛ, waà dyi-dyiɔ̀ ɖǎa nyu ké ní wììɔ̀ ɖǎ múà mú zɛ̃̀ìn. 18Wa ɖǎ ní hwòɖǒɔ̀ dyi dè kà wa nyuà ɓě nììn hwòɖǒɔ̀ dyi dèɛ̀ kɛ. Ɓě mɛ kpɔ̃ nyɔ nì kà ɓěa jè dyi.
19Cɔ́cì-nyɔ̀ ɓě nìà ɖé Ésìà-ɓòɖòɔ̀ kɔ̃ɛɛ zà ɓě nyíɔún. Àkúɖà kè Pìɖìsíɖà ɔ kè cɔ́cì-nyɔ̀ ɓě poìn kà dyí ɖé wa ɓíɖí-taún teeɛɛ zà ɓě nyíɔún mìɔ ɖé Bounɓoɔ̀ mú. 20À ɖíí séín ɓě nì nɔ̄ kɛɛ zà ɓě nyíɔún. Ɓě zaìn zàìn nyíɔún ɖé wɔ̃-nyá-nyá mú ɓó dyí-sɛ́ɖɛ́ìn-kà.
21Mɔ̄ Pɔ́ɔ̀, ḿ mìɔùn nì ɓě nyíɔún-zà-zà nyɔà gbo céèɛ̌n cá.
22Nyɔ ɖò se Bounɓoɔ̀ mú ɖɛ̀ɓɛ̀ǐn, gboò-wùɖù nì ɔ kɔ̃. Bounɓo, dyiáo!
23Bounɓo Jízɛ̀ɛ̀ mana mɛ nì ɓě kɔ̃.
24Ní ɖɛ̀ɓɛ̀ǐn-ɖɛ̀ɓɛ̀ǐnɔ̀ nì ɓě séín kɔ̃ ɖé Kɛ́ɖɛ́ì Jízɛ̀ mú.
Currently Selected:
1 Kɔ̀ɖéíntĩ̀ɔ̀ 16: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
