Romános 13

Yocajnecho jnese ujetiga yangácoi peduguéjnane ore iji yocunirone

Dupade upúsu uje ichajapite ore aja ore gajnepídode

1Punirone jnese achamisórone iji ducunirone jnese ore gajnepídi tu ujetiga ore juéga re ome deduguéjnane áyipie quigode udore. Uje Dupade upúsu uje ichajapite pirógode iji gobiérno jnese aja dajnepídode. Enga jé ũré uje que peduguéjnarique uñeque cuse ujetiga jé ca Dupade ichajapite aja charidi. 2Jecute gosi uje tagu gobiérno eduguéjnane uruode aja, enga qui jé u uje uté gosi angoninguite paritigade jé chuságaja Dupade to. Chamáñaje Dupade upúsu uje iroque peduguéjnane ore, jecute gosode uje ore chãraque re ome deduguéjnane áyipie quigode, enga a ore chejnáreque re ome dáringáringo pujuya jne. 3Adójnacho uje gobiérnogosode que ore pésu ayoré ate arégode ore isadodéringane; mu ayoré ate gajnaréngone u uje ore todórasa. ¿Ama apotárasa jetiga arame ua ome basadodéringane iji gobiérno irótique iquei a? Ujetiga bapotigádi u ujetiga ca atodo uté, ga be ga edu cucha arégode úringane pipesucho. Enga a amo jne uje báringai picotaque jogadi u ome gobiérno iroi uté ome basocade udore. 4Uté doi Dupade iroquéode gu, enga gaidi u ujetiga agutíyame uté átajaquéode ome ua. Jé basa ga a apésu cucha gajnarétique ga, jé tiógara ujetiga atodo uté, uje que uté chijna dajnéone cõráchaque bisideque. Jé ũré uje Dupade cho datocaidi iji uté, enga uté oidi u Dupade ájningai aja ayoré ate gajnaréngone ore, jeta jé ore chejnáreque re ome dáringane pujuya. 5Jecute bajnepídi tu ujetiga ajuéga ua ome peduguéjnane ore áyipie quigode ome ua. Mu que gusúrasu uje batodo báringárique pujuya jeta ca apésu. E mu qui jé u to uje baraja iji báyipie ajei uje cucha ũrei tu basocai uté ome Dupade.

6Enga uacáyipiedie qui jé urásu yojningáiso udore to jeta amácho impuéstos oredie. Uje uacajnepídi jé u ome Dupade ujetiga oyo uacoré. Chamáñaje Dupade u uje guẽrate eduguéjnane ore isagode ome ore, enga ore chejna rángaja dasai uté uje ore chajire darasade ore yui gatuaque. 7Jecute ujetiga gobiérno eduguéjnane chiroque uágaja ujetiga oyo uacoré ome uacaplátarigui, beyoi ga amácho uacajnepídode oré iji ore jnese. Jeoga impuéstos u, jeoga impuéstos gajnúone uje i tu "aduána," jeoga impuésto ponáyone ore, mu amácho ore ĩcarane uacoré. Que gusu uté, mu uacajnepídi jé upo rĩ ujetiga uerate uacasocade ome gobiérno irógode ore. Ajuécho uágome ore áyipie quigode, ga jé ca abóyoja ore, mu asíyo ore gai ome ore isagode ome uaque.

Yocajnepídi u ujetiga yimáco yoquíode jnese iji uñeque gari aja guesi

Gusu yoquijnose carubi chojmara uje dérasi yocujórique ayoré gari, enga yoquijnoraquei u uté

8Jé ca uaquéode dérasi gosi gari. E mu uacajnepídi u ujetiga amácho uacajnose carubode aja guesi jnese. Gusu cucha chojmarai u ujetiga uacoyórase uacajnose carubi iji, enga uté u uacajnoraquei ome ñane, jeta jecucha boyo údi gatuaque. ¡A jé ca eruénique cusirase ome pisoca ueradi uté arĩa! Ujetiga gosi isocai jé u ujetiga chopise dajnose carubi iji pijnoraquei uté ome dojórique ayoré gatuaque, enga qui u uje uté gosi e chimate Dupade uru pirosobádode quigode aja guesi jnese. 9Uje adójnacho Dupade garéngone cucha udojo iji Moisés urusarane udore, uje chojninga:

–Jé ca amóji chequé unejángueraque gari;

enga chequé jé ca moji jnani unejátique gari.–

–Ca ajépise bojórique ayoré.–

–Ca oria cucha quedéjnarique.–

–Jé ca ajnari cucha unejátique ome ua.–

Enga Dupade iroquéode uñane jé déji, mu Dupade iroquéode jnese ero u piroqué ibijoi udé, uje chósi te: "Bajnepídi tu ujetiga ajnóra bojórique ayoré, enga bajnoraquei ome uté a jé chopísirase bajnoraquei ome ua." 10Ujetiga jé ũré gosi uje doi pijnoraquei adode, enga a jé ca pésurásu cucha gajnarétique ome dojórique ayoré. Jecute a gosi chijnorapise dojórique ayoré enga jogadi u uje chijnimipise Dupade uru pirosobádode udore quigode jnese aja guesi.

Páblo cho yoquiquique ujetiga yujuco yoquio, ga cuchiyíode u deréjnane udojo, uje e idógosi Jesucrísto diringai

11Jé tiógara ujetiga beyoi pisoca ueradode udojo quigode, ga cuchiyíode u deréjnane udojo. Jecute jé ca oyo mongone, mu ãrijínaño uaquejode gatuaque. E yichago yocanguretigai aja Jesucrísto uté nanique, mu uacamóño uje dirode jé jno arĩa. ¡Ga e chirõre diri uté ujetiga uté chimanipise yógaja re ome yocúringane uté gajneque! 12Enga gajnui u jetiga dejai idájai guesi, ga cási dire. Jecute beyoi ga yichagója ti yui ijnangununie gajnéone pisoca noñácho udore, ga yijmaco yocajnéone cõráchaque aja yoque uje dírecaringuéi gajnecho, ome cucha gajnaréngone úringárique pujnuéngai. Uje yocajnúone u soldádode uje dimane ore ome diri yui.

13Beyoi ga yajnángo cucha uréone jmapiedie iji jnumone, uje dírecaringuéi jogosóño pisocade udore gu. Jecute jé ca yátago yógaja udore ore uje ore doi damoqueréringane, jé aja uje ore chóji dajodé ome dáringane yote pioque josóño. Jé ca yungacója gapu quedéjnaringui rĩ, enga ca pipotiguéode ome cucha gajnaréngone sué yoquibánique. Yicoi enga yiyágo pibotaquéode ome ñane uje yajujo ñane ajéode iji jnumi gu. Enga jé ca yaratáyingome cuchade ome ñane rĩ.

14E mu aracho Yocangarádejnai Jesucrísto uté aja jmapiedie, ga gajnui u ujetiga ajmacho uté ate ueradode aja uaque. Enga jé ca dimánerase uacáyipierigui ome pipotigué ayoréode yui, uje uacajnepídi u gu ujetiga jé ca ajuécho jetiga uacáringai ayoré ipotiguéode cucha chijocásapo uaque rĩ.

Currently Selected:

Romános 13: Ayore

Highlight

Copy

Compare