Romános 12

Jé tiógara ujetiga Jesús anguresórone yẽco uyógome Dupade, ga yedugo uté ajéode ome yoque iji yocucuecaringuei udé

1E uacamóño Dupade icaniratiguédatéi ome uaque, yujode Jesús anguresõre uaque á, jecute yijócha uacajéode údi ujetiga beyoi ga asíñome uacáringane ayoré jnese ome Dupade jeta uté doi dajéode ome uaque iji uacacuecaringuei udé. Enga gajnui u ujetiga cucha pẽrapaite uecai uágome Dupade uje que uacayoguérique cuse ome uté. Pisocai uté jé u gu uje ujñapetai tu ome Dupade. ¡Jecute jé tiógara jetiga beyoi uacasocai uté ome uté úringárique pisígai!

2Enga jé ca ajuécho jeta pijmapiedie iji dé erámi chijocásapo uaque rĩ. Mu beyórasi ga jecucha uacáyipie dérasi Dupade jeta uté chécãre uacáyipiedie ga icha gatuaque. Uje pecãra uacáyipiedie, enga a quene jogadi u ujetiga Dupade ajéode choquípisiji guesi ome uaque iji uacacuecaringuei udé. Yuruode qui u cucha arégode jeta arajáyo udore quigode, jé aja pisocade uje Dupade irasiguipise, jé aja cuchade uje chajnapise uté áyipie ujñapetedie udire quigode iji jnumone.

Yicoi ga yajome Dupade gueranone yoquirajatíga jeta yátagoja ñane, ga a uajate yóguiji Dupade adode gaté jnese jne

3Uje Dupade e guẽrate yúringai apóstol ome yu ome dacaniratiguei uté, jecute yósi te ome Jesús anguresõre chojmara, chojmarane udore jnese iji uacajade: Jé ca dicotare uacuñeque ome dajnéone Dupade iroquéo, mu gosi áyipie ome re chajnárase cucha uréone quigode. Uje Dupade u uje guẽrate panguretigai ome yoque ujetiga yipéco uté ajegaidode cucha ome yoque iji yocúringane uté irócho, ga que tṍraji uyoque gotique.

4Adójnacho pisocai uté iji yocúringai ayoré, uje ayoré chojmara, chojmarane jnese yocaoi chojmarápise, mu yocadode jiéji yoquibai. Enga que yocadode udore isocade chojmara gotique, mu ore cãra re ome ñane. 5Ga adi jé u uté to ome Jesucrísto anguresórone uyoque. Uje jiei yoque marínga, yocaoi chojmarápisiji jnumi gu uje Dupade cháta yógaja Crísto jnese. Enga jé u to uje Jesús anguresõre chojmara, chojmarane ore jnese jé gajnengápo dojode Jesús anguresõre chojmara, chojmarane ore jnese rĩ, ujetiga yagutíyangome ñane.

6Uacamóño uje Dupade gueranone pirajatíga ome yoque basíji ñane yúode. Enga uté e chisíome dacaniratiguei ome uyoque jetiga jé yoco yocajnéone pirajatíga udore. Jecute yicopísi ga yinguírango yoquirajatigade udore aja yocajnéone uté iroquéo. Ujetiga Dupade guerani u ome gosi jeta chajnerame Dupade uru quigode ome uñane ome dáringai Dupade utocaite, ga uté gosi dorási ga chejna daguesi ome dasai uté. Changureta gu uje Dupade u uje chacate áyipie ome atatagode urúo udore.

7Jeoga Dupade guẽrate ome gosi jeta cháta cuchade aja Jesús anguresórone uñane, ga uté gosi doi ga chatapísaja ore.

Jé basa ga Dupade guerani u pirajatigai ome gosi ujetiga pacadisõre ome dojode Jesús anguresõre, ga uté dorási ga chejna daguesi ome dacaditigade iji Dupade uruode uje chacate ore ome quigode.

8Ujetiga Dupade guẽrate pirajatigai ome gosi ujetiga cho uñane quique, enga gosi doi ga nejéru dojode Jesús anguresõre údode jeta ore jnusi rome Dupade adode gaté.

Jeoga Dupade guẽrate gosi úringai canirángome, ga uté gosi dorási ga tẽrája dojórigo Jesús anguresóño ore, enga a jé ca chagutúrasu dacaniratiguei ome ore.

Jé basa ga Dupade guẽrate pirajatigai ome gosi ujetiga déji piquéode ome dáringárique dojode Jesús anguresõre ore eduguéjna, ga uté gosi chóji gaté ome dasai uté jeta pésupúsu aja quigode enga chuse dasocade guio.

Ujetiga Dupade guerani u ome gosi ujetiga chingongara dosongaquei aja udore ore uje cucha dacate gajnaréngone chise ore, ga gosi doi ga chosõre ore, ga irasique re aja dasai uté.

Iji cucha dacadode jnese ga yoquijnoraquei a jé pijoguirase ome ñane

9Jé ca ẽ́cacho uacajnoraquei ome ñane bisideque, mu ũrepise uágome uacajnoraquei uté, ga jé ca paringaquérique chimere riji gotique. Etachopise cucha gajnaréngone jnese, ga ca ajuécho uágome gotique; jé basa ga ajóyo uágaja cucha arégode, ga boyo uacátegoningáne údi gatuaque. 10Ajnóraño ñane ga uacajnoraquei ome ñane gajnui tu ujetiga uacáringai cucherãque chojmara iji jnumi ga hermanopise uágome ñane. Enga etingacho jeta ajnuéño ñane gáyode ome uacáringane pajnotácho ome ñane uje uacoyo bajágu uacajorane ore ome cuchade, ga qui tu uje uacasíyo ore gáyode.

11Jé ca ducutaque uacuñeque, mu ójiyoi gaté ome uacáringane chaguesío uje uacabeyopísi uacajnéone Yocangarádejnai iroquéo ome Dupade Ujopié etotiguei uté. 12Beyoi ga anínañopúsu uágome uacangurenone cucha yúode, uje uneréjnapise Dupade áyipiedie yui ome uaque. Ujetiga cucha dacate gajnarétique guiyaque uaque marínga, beyoi ga adotáyopisa uágaja ome udore. Jecucha ga ajóchayo Dupade ajéode údi ome uaque gatuaque, enga ca ayáyo uacangoroné ome yui ujetiga chátaja uaque. 13Beyoi ga átayoja uacojode Jesús anguresóño ga asíyo ore iji uacajnéone cucha pagutíyabácho, ujetiga cuchade chonapísa ore. Enga dimánerase uaque gatuaque to ome ayoré díode ore yui. Enga jé ca ajusécho ore jeta ore chise uaque.

14Beyoi ga asíñome uacaru ueradode ome udore ore uje ore cho dajosipié ome uaque. Enga jé ca uacáyipiedie qui urásu ujetiga Dupade urugaite ore ome ore isoca gajnaréngone udore. E mu ajóchayo Dupade ajei údi ome ore ujetiga chátaja ore. 15Ujetiga uacojórique ayoré nína re, beyoi ga átayo uágaja uté ga anínañopúsu uaque to. Jé basa ga uacojórique ayoré po, enga beyoi ga átayo ugoi aja uté to. 16Beyoi ga Jesús anguresórone uacáyipiedie jé chojmarápisiji jnumi jnese ome uacáringane pajnotácho ome ñane. Enga jé ca uacáyipierigui chichaga re aja uacáringáringo ujnomerã́cho ome dajorane ore. E mu átayo uágaja ayoré gajnaréngone udore ore uje que urénga ore ujnomérique cuse gotique. Iji uacáyipiedie, ga jé ca oyo irajatáguiji uaque ome uacojórique ayoré ore.

17Ujetiga uacojórique ayoré atígo gajnaréngaja uaque marínga, jé ca aracho ore aja ore isoca gajnaréngone udore to. Mu apéso uacáyipiedie jetiga uerate uacasocade ome ore, ga a apijóchome uacáringane ũréo iji uacojode ayoré udore ore edominone jnese. 18Uacamóño uje yingarángo yocáyipiedie ome ñane ome pisocade uñane iji erámi tudé, mu ajuso uacadode guio ujetiga jé ca pujuredie tṍraji uaque ome uacangaranguenie páyipiei udire. E mu ujetiga uacasocárique déji ga etingachopise jetiga pajesereringane déji uacojode ayoré, uágome ñane jnese.

19Yijnoránguipísode Jesús anguresõre uaque á, jé ca oyo uacajnutabádu uágome uacojórigo ayoré ore isoca gajnaréngone ome uaque iji dínique. E mu ajíoñome ore iji Dupade jmainie, jeta uté doi dajéode ome ore úringáringo pujuya jne. Chamáñaje Dupade uruode udojo purusãracho icaite, uje chojninga: "Pangarádejnai uyu, yósi tome uaque: 'Yedugáta yu ome yúringai jnutaque, uje gusu yu ome yajnepídi uté gu jeta yo ayoréode ore ate gajnaréngone oré jne.'"#12:19 Pangarádejnai uté uruode udojo quigode déji Deuteronómio 32:35. 20Jecute obiréjna uje que uacajnepídi u gotique jeta oyo uacajnutabádu uaque, mu qui tu ujetiga beyoi Dupade uruode quigode, uje chósi te:

"Ujetiga bamajósonique chejnáreque dayaguhénique ga be ga asíome potígo ome; jetiga cajnóriji enga asíome yotígome, ga chóji to.

Enga gajnui tu ujetiga ajé guegueraque uecade aja uté ójo enga uté a chajéngome dadi casodica ome ua uje bosõre."

21Jé ca ajuéga jetiga gosi ate gajnaréngone chijnime bãrírique, enga ca atire gai. E mu ajnué uté gosi ate gajnaréngone gai ome bate arégode úringane pipesucho jne.

Currently Selected:

Romános 12: Ayore

Highlight

Copy

Compare