Sálmos 97
97
1¡Jnumi, anína ua! Jé aja ajã́ro dipesedie iji erámi údode, ¡anínaño uaque! Uje Pangarádejnai Dupade u Eduguéjna cuchábi.
2Guei abujadie jé aja ijnangunu cucháberaque u uje chicáji uté ejode jeta chaparu uté gai. Cucha uréone jogadi u uté charite ueradéjnai; uté upo rĩ uje cho daríbidíji udore ga pijógome uté úringai ũré.
3Ga pioi jé jogate uté iquei jeta tagu uté umajosórone ore gai uje ore chaparu uté gai.
4Ga uté úringai ajnorátaque u uje chijñate erámi údode gai ome dáringai jnare. ¡Ga jé u uje jnumi tãrara iji uté uje chimo!
5Cucaranone udore dejñu ñane iji Pangarádejnai uté iquei; ga cho cutepeque piyagárique uje guedé ojodie chicho ga que chisapo ñane rĩ iji jnumi gajnesṍri Pangarádejnai uté iquei.
6Gatajnoquei tujua uté úringai ũré, ga ayoré ponáyone ore pañaji uté úringai ingoningarãque.
7Udore ore jnese uje ore catecã́ri ayoré gajnúone jeoga dupa quedéjnane, ga jé ore inguíraja dipoi aja re. Uje dicotare udore ore ome ayoré gajnúone udore ore uje chiese ore angurenone chátaja ore. ¡Mu dupa quedéjnane udore ore chichaga datajidi aja jnumi iji Dupapísi uté iquei jnese!
8Urénga, Pangarádejná, Sión chudute ga nína re, uje Sión uté íode uñai u Jerusalén; jé aja Judá idáyode ore to uje ore nína re ome bajiritíga uréone quigode.
9Mu ome ua, Pangarádejná, Gatajnoquei Achamisṍri á, bagúsi jnumi udé jnese gai ome báringai pujnuéngaisṍre, ga ua u uje bajnuépise dupa quedéjnane udore ore gai jnese.
10Uaque uje uacajnóraño Pangarádejnai, ga etácho cucha gajnaréngone úringane pipesucho, uje Pangarádejnai uté chusípise ayoré uréone ore ucuecaringuei guio. Ga uté chijnime ayoré ate arégode udore ore iji cucha gajnaréngone ipesusórone udore ore jmainie.
11Dírecaringuéi chichaga raja ayoré ate arégode ore, enga pininaquei gajnesórone u ayoré uréone udore ore.
12¡Anínaño uágome Pangarádejnai uté, ayoré ate arégode uaque á, ga acãcho uté i pirosobádejnai gai!
Currently Selected:
Sálmos 97: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
