Sálmos 94
94
1Urénga, Pangarádejná, Dupade uje cho dajnutabádu re á, be ga pipañaite ua, Dupa jnutáchá.
2Padode Ajirisṍri á iji erámi údode jnese, be ga ajosi ua iji gaté, ga o dicotárechoquíode udore ore úringai máraque oré jne.
3¿Cho rique díningo iji yui ome ate gajnaréngone udore ore, Pangarádejná? ¿Ama sijnángone udore ore achiétaquéode ome re chuságaja rique jne?
4Darachoqui ore ga puru uajádode garanája guesi tiji ore pijnani ome ore úringane dicotáreo. Ate gajnaréngone jnese ore irágu rome dajoyaquéode ome re.
5Urénga, ore cho dajarotique cucha iji barasade ore, Pangarádejná. Ore cho dajosipié ome udore uje bo bajnenguíji ore.
6Ga ore chujé abai toguedie, jé aja purása quedéjnane ore iji dajade. Ga ore yuque disijádode ore to.
7Ga ore chojninga: Pangarádejnai gotique que chimo, uje Jacob uté angureni Dupa que timíninga gotique.
8Adójnachopísa, gatodepéode uaque iji uacarasade udore ore ujade á, jé aja táyipiegode uaque á. ¿Cho rique ujetiga eso uacáringáringo áyuquetotinguerã́que?
9Uté uje chimate pangoninguini uté aja jogadi, ¿ama jé ca chudute to jne a? Pedodie ipesungóri uté, ¿ama jé ca chimo to jne?
10Punirone ore aquĩrasṍri uté ga ¿jé ca cho dajuñame gosi to a? Uje uté u uje chacate jnanione udore ore ome pirajatigai uté.
11Pangarádejnai uté u uje chiraja jnanione áyipiedie quigode udore, ga chiraja uje que cuchárique tṍraji gotique.
12Urénga, pininaquei gajnesṍri u uté gosi uje baquesu uté údode ujetiga chajni babai, Pangarádejna Puyaguipísi á, uje uté gajneque bacajnaquéode quigode uje garani u baru pirosobádode.
13Enga bajuéga ujetiga uté gosi cho paráguiji dayaritique jetiga dire gajnaréngone e u, jé aja ujetiga pijochaque sijnángone udore ore gajnei eruque.
14Chamáñaje Pangarádejnai a jé ca tṍra darasade udore ore jne. A jé ca toc ujetiga noñome udore ore iji te jmete jne uje e cho dajnenguíji ore.
15Pajiritigade a jé chajnésarapója dáringane pajiritíga ũréo. Enga áyipie arégode udore ore jnese a ore chajna udore quigode iji jnumone.
16¿Gosi u jne ujetiga cháguena sijnángone udore yui jeta uté gosi chirota yu ome udore ore? ¿Gosi u jne ujetiga cháguena ate gajnaréngone udore yui ome yu a?
17Ujeta ca Pangarádejnai chátaja yu diríca ga a jĩraque yejode chorase jõ iji pitoringai jogadi.
18Uje yibite ga yósi te:
–¡Yuchiejnane cho caru, caru!–
Mu bajnoraquei chisa yu aja gaté, Pangarádejná.
19Uje yáyuguhebátiga dipeséode chacája ñane iji yáyipie, mu báringai posõrasõre chajni udore ga jé u uje yáyipie tijínapo rĩ.
20¿Ama piyaripi cuchátique charipísõri peduguéjna uje cho daríbidíji pate noñángone, ga dorási ga cháta raja ua ya, Dupade á? Uje uté pésu darecujate iyiejnanie uje gajnarénguei, uje gaidi tu jeta pate gajnaréngone chõre re.
21Uje ore chimate dáyipie josipíerénie ome ate arégode udore ore yui, ga ore chisíome pitoringai ome udore ore uje que ore bárique cucha cuse mu.
22Mu Pangarádejnai uté e cho poragadé yorícoraque ome yu, uje que toc ujetiga piyaque yuji uaté. Enga Yudupade uté gajnua tu cucaranéraque ome yu uje chãraque yu.
23Pangarádejnai uté a pésu jne jetiga sijnángone ore isijnaringuéone udore chajni ore gai, ga a uté chejna udore ore ome ore úringane cucha gajnaréngone ipesusóño. Jé ũré uje Pangarádejnai, Yocangureni Dupa, a chejnápise ore ga chatéta ore jogadi jne.
Currently Selected:
Sálmos 94: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
