Sálmos 95
95
1Boyóji te, ga yijñiecaco ome Pangarádejnai uté. Beyoi ga yejnángopúsu yocuruode ome yocachietaquéode ome yocúringane piquetacho guẽrasṍri uté uje gajnua tu yocãretóraque cucarané.
2Beyoi, ga yacágoja uté charidi iji edominone iquei jeta yacãco uté gai, ga yibicoi uté ome yoquininaquédatéode uje yiraco Sálmonie ome uté.
3Chamáñaje Pangarádejnai u Gosójningai Dupa uté. Peduguéjna Cuchape ga sué dupa pangurenone gai jnese.
4Jogadode iji erámone uje idájapísiji guesode, mu uté chicha udore aja dajmana ajã́ro, ga uté gajneque cucarãte yoricode ore ójodie to.
5Uté jé gajneque yote quedéjna cuchábi uté, uje imanique uté gu. Enga uté chinguíra jnumi aja dajmainie uje chimate jnumi cajnóningai nanique.
6Boyóji te, ga yisígo uté gai ga yibérogo yógaja jnumi. Beyoi, ga yichajo yoquigataidie aja jnumi iji Pangarádejnai Yoquimanisõre uté iquei.
7U gu uje Yocudupade u uté, enga uté urasapísode u yoque, ga uté cho dachidedie áyasai iji yoque uje déji uté gajnei garai. Yoco áyasa posedie iji uté jmainie ome uté úringai Yoquirodisõre.
Ujetiga adúcho uté úringai dara iji diri tudé, enga jé beyórasi quigode,
8Uje uté chojninga:
–Ca ajároyo uágaja ome yuru quigode, enga ca oyo uacayode ore uje ore áyipiedie uajádei iji pajmini uje i tu Meríba icaite, ga ore isocai upo rĩ iji pajmite uñai uje i tu Masah iji diri tuté iji erãpetarei.
9Ga uacáquiode ore chetingare yu iji uté ga ore chachóguina yu ome yipesutígo cucha, uje ore chimo yipesudode udore mu.
10Siqueredie chise 40 años nanique uje yujnapise udore ore uje ore charite erãpetarei iji siqueredie udire, enga yojninga: "Ayoréode udore ore áyipiedie chicáji quedéjnane ome yu, ga que ore chiraja yijmapiedie."
11Jecute yo júruru ome ore nanique, ga yajo yu aja yurúñiejnane udore, jeta jé ca ore chacája yerani punire ujetiga ore cho paráguiji uté.–
Currently Selected:
Sálmos 95: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
