Sálmos 86
86
David uté icatecãraitigade u ome Dupade.
1Urénga, acha bangoninguini aja gadoi, Pangarádejná, ga achajnai yu, uje áyuguhebátaque yu ga yijmáta ome cuchade.
2Be ga arote yucuecaringuei udé ejode, uje ũré yu uje yedupise ua ome yu. Urénga, Yudupá, aqueta baroi udé uje changureta ua.
3Be ga osṍrape yu, Pangarádejná, uje yibidi ua iji deréjnai údode.
4Apésu ga baroi tudé áyipie chachietáji re, Pangarádejná, uje ua u uje yorei yáyipie iji bari iji uté.
5Pangarádejná, paraque ua, ga ua u uje e dimane ua ome pisijnaringuéone úringáringo pĩrocho. Ga bejna bajnoraquei aja udore ore jnese uje ore chutṍri ua ome re.
6Be ga bangoninguini guesája ome gadoi, Pangarádejná, jeta angári yicatecãraitigade. Ga ajire yibijnane yui uje yijócha bajei údi jeta osõre yu.
7Iji yajnéringui pujuré dire a yibidi ua jne, u gu uje a achajnai yu jne.
8Iji dupárigo udore ujade que dupa uñeque déji jeta cho ua, Pangarádejná. Ga que cuchárique déji jeta cunguésõri bamaningone udore.
9Urénga, Pangarádejná, bapesudode puníño udore jnese a ore doi ga ore tibágui ua jne jeta ore chichaga dagataidie aja jnumi iji baquei, ga a ore chisi bei ueradi gai jne.
10¡Chamáñaje cuchadatei tu ua ga bapésu cucha pitijabádode! Dupa dugai tu ua ga que uñeque déji.
11Angongara bajesu ũrei aja yu, Pangarádejná, ga a yajna baru uréone quigode iji jnumone. Apésu ga yáyipiedie jnese tojmara iji jnumi ome bei ueradi tuté úringárique pitote.
12Urénga, a yicota ua ome yáyipie jnese, Pangarádejná, Yudupá. Ga a jecucha yijosi bei ueradi iji gaté iji deréjna pitade gatuaque.
13Uje cuchadaté bosõraquei ome yu. Enga bajnime yucuecaringuei uté iji jnaropié gatérique uje idájai guesi.
14Jnani ijoyatade udore ore chéngame re jeta ore chachẽre yu, Dupade á, enga jnani josipíerane ore uague chucué yúringai chuque; ga que ore chicha ua aja daquei gotique.
15Mu ua, Pangarádejná, ua u Dupa osõrataque paráguejnai uté. Que jĩraque o júruru gotique, enga pijnoraquei irágu ua, jé aja basoca uréone udore ore.
16Ajia gadoi, ga osṍrape yu. Asíome betotiguei uté ome baroi udé, ga aqueta barogué uaté abi uté.
17Be ga asíome bapararinguei uté pijogúsonique cucha ome yu, jeta yumajosórone udore ore pañaji uté, ga jé u jeta ore chinguíra dipoi aja re. Chamáñaje ua u, Pangarádejná, uje bátaja yu ga bapésu jeta yujnusi yu ome cuchade.
Currently Selected:
Sálmos 86: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
