Sálmos 75
75
Piradé udaque gajnesṍri u piradedie irajasṍripísi.
Asaf uté ipesudé u.
1Urénga, yacãco babai, Dupade á, yacãco babai. Uje idógosi bei ueradi uté, enga bapesudode cucha pitijabácho chatata uté.
2Pangarádejnai uté chojninga:
–A chise yojningárique gajnei dire jne, ga a yácariji yúringai Padode Ajirisõre ome yajiritigade úringane ũréo.
3Ujetiga erámi uté nejñu ñane, jé aja achamisórone udore ore jnese, mu uyu upúsu uje yipésu erámi cutádedie udire úringanie etogue iji gaté.
4Ga yojningame dicotárechoquí uté: "Jé ca asi babai." Ga yojningame sijnángone: "Jé ca ajose ua ome báringai dicase.
5Jé ca ajosi ua iji gaté ome báringai daradaté; jé ca baruode uajácho ome báringai etabite carataque uté."–
6Que gosi úringárique pijosiguíji gaté tṍraji guedé garani, guedé cacadi yúode gotique, jé aja uje que tṍraji erãpetarei iji umusoi garani to gotique.
7Mu Dupade upúsu Padode Ajirisõre Cuchábi. Jeta ajéo ga chosi gosi iji jnumi, jeoga ajéo ga chosi ayoré uñeque iji gaté.
8Uje pijópidi déji Pangarádejnai uté jmanai uté, ga irágu uté ajei. Ga chimera ore jodi aja uje i tu víno ga dajádiji jopidi uté ajei. Ga uté chojne ome víno uté iji dajópidi ga chaningáraja sijnángone udore jnese iji erámi údode jnese, ga ore chiniripise uté ga que ore cho ayé uje ore chibóta uté ajei, ga imoi tu uté ujuyaquei ome ore, jeta chejna ore.
9Mu uyu ga, a jecucha yatata uté adode gatuaque jne iji deréjna pitade; a yirate yicotaqué gajnéringui yiradei ome Jacob angureni Dupade uté.
10Uje Dupade uté chojninga:
–A yaquesu ate gajnaréngone udore ore etotiguei ¡jnaque! jne, mu ome ate arégode udore ore ga a pijosique ore iji gaté ome cutejmane ore etotiguejna.–
Currently Selected:
Sálmos 75: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
