Sálmos 76
76
Piradé udaque gajnesṍri u piradedie irajasṍripísi. Ga ore chujé degode cucha jocarãtácho uje ore chirate udaque. Asaf uté ipesudé tu.
1Iji ore uniri Judá uté ga ujnomerãque Dupade uté. Ga uté i ga cuchadaté iji Israel uté.
2Uté iguíjnai cárpa déji pidai Salén uté ajei to uje i uñai tu Jerusalén, ga uté cho dayaridíji Sión uté.
3Iji jogadi uté ga Dupade chibéro pichogarané docojo ditaguedie udire uje ore tṍraji docoji uté, jé aja paróbedie gajnei guebecho udore, jé aja queségodogóde, jé aja docõrácha poidébecho ome pocaningane yúode.
4Urénga, Pangarádejná, báringai nanganataque cuchape uté chaparu babai. Ga báringai ijningueñataque sué cucarãte cuchábode udore ore gai uje cucha chagúode déji udore.
5Ayorédaté dicaséode ore moji jnumi ome dáringane pajnoñacho. Mongone udore ga ore moque erueminóri tu iji ore cachodode udore; que jõcaratátique udore uñeque déji jeta chãrai dajmanecade iji gaté.
6Urénga, ome baru dosógode, Jacob angureni Dupá, ore oruti guebéquedaté uté jé aja buricai ore jnese parãte ore aja moque cuchábi uté uje pitoringai u.
7Ua, enga gusu ua, uje batiógara báringai pitote. ¿Ama gosi urásu ujetiga doi ga cháguenarása benominone iquei jeta ájningarãque ua?
8Báringai dara tṍraji bayaridi iji gaté ga bapésu jeta bajiritigade udore pudududique; jnumi tudé todópisa ga cho paráguiji jnumi,
9Uje bayague ome báringai Padode Ajirisõre, ujetiga aqueta pijosipiedie gajnesórone udore ore jnese iji erámi.
10Jé ũrepise uje jnanione ore ájningamíe a nóña ga doi ga chicota jóroque ua jne uje baroque ore aja gu. Ome pájningai uje qué déji ga a agarúja ua ome báringárique õrácharã́que jeta o bajuñame ore.
11Asíñome uacaru iyiejájnane ome uacangureni Pangarádejnai Dupade uté, enga amácho uacaruode udore aja guesi jnese ome uté. Udore jnese uje ore déji uté dosadode jnese ga ore dórasi, ga ore quejnárasome dẽratígo cucha jeta ore tẽrája Cucha Pirosobádejnai uté.
12Uje uté a chaquĩ́ra peduguéjnane udore ore ujñari jne. Cucha Pirosobate uté ome peduguéjna cuchábode udore ore iji erámi údode jnese.
Currently Selected:
Sálmos 76: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
