Sálmos 34
34
David ipesudé Sálmo udaque iji deréjnai uté uje cho ũruso iji re iji Peduguéjnai Abimelec iquei, ga pijócãráque David uté ome dasocade udore, ga jno.
1A yacacãre Pangarádejnai ome yuru omone jne iji deréjna pitade jnese. Ga a jecucha uté gajnéone yicotaquéo tṍraji yibijnani jne ome Pangarádejnai uté.
2Yo dicotárerique ome yirasitigade iji yáyipie, mu gusu yáyipie uaté isígai tu Pangarádejnai uté isocade ome yu. Ayoré áyuguhebátade a ore chudute udore ga ore nína re jne.
3Beyoi ga yoquicotaquéode cho ñane ome Pangarádejnai úringai iménu uté, jé aja ujetiga yijocoi uté i ueradi iji gaté jnese.
4Yucué Pangarádejnai uté ome yu, enga uté chajnai yu ga chirame yu iji yitódode cucha jnese jmainie.
5Udore ore uje ore chajire Pangarádejnai uté yui, ga uté idírecaringuéi pijóguiji udore ore edodie, ga que toc eti ore chaco dedodie gáyode ome dáringáringo dipócho.
6Jnani jmatai udé uje chácari te ¡paque! ga tibidi Pangarádejnai, enga uté chudute uté pijnane; ga chiqueta uté ome dajnéone cucha dacate gajnarécho udore jnese.
7Pangarádejnai iroi gaté unirísõre chaparu darosójmasórone udore ore gai ome dáringai irodicáca, ga chiqueta udore ore.
8Urénga, etingacho Pangarádejnai uté ga amóño uté cutejmai unéningai ome uaque. ¡Pininaquei gajnesṍri tu jnani uté uje chicha danguretigárique aja Pangarádejnai uté ome úringai Pãrésõre!
9Atõroráñoja Pangarádejnai iquei, uaque jnese uje uté cho dajnenguíji uaque, uje a jé ca cuchárique chona udore ore jnese uje ore dosóñime uté.
10Caraté ucatóguedie a ore potique cucha chona ore, ga ore chejnáreque dayaguhénique, mu que cucha onique chona udore ore gotique uje ore chucué Pangarádejnai ome re.
11Abáchoi uyu, pabode, pabidie uaque á; angachobi uyu ga yacate uágome cucha dacadi ujeta arajáyo Pangarádejnai úringárique pitote to.
12¿Ama gosi iji uaque chijnóra dacuecaringuei iji erámi udé? ¿Jeoga gosi ipotigádi tupúsu ujetiga umare gajnéone dire udore, ga pota chimo cucha dacate ueradode ome re gatuaque?
13Uté gosi gajnei tu ujetiga chidota dabijnani aja ñane jeta jé ca uru gajnaréngone udore tṍraji. Enga jé ca purupatáringárique chácariji uté pijnanane gatuaque.
14Ajíome cucha noñángone iji te jmete. Mu apésu cucha arégode aja quigode. Acué pajesereringai gatuaque, ga ajna uté jeta jé ca amoque uté quigode.
15Pangarádejnai uté edodie chajire ate arégode udore ore yui, ga uté angoninguinone guesa ome udore ore icatecãraitigade yui to.
16Jé basa ga Pangarádejnai enochai chísajame pisijnaringuéone ipesusórone udore ore. Uje gaidi tu gu ujetiga chinoningase udore ore enga que páyipie gaidápo ore iji erã́tique rĩ.
17Jnani uréone udore ore tibidi dejode, ga Pangarádejnai chudute udore ore, ga chijnimápo udore ore iji ore gajnenie pujuré jmainie rĩ.
18Pangarádejnai idógosipísiji udore ore uje pajnangaráña ore áyipiedie aja quedéjnane, enga uté chiqueta udore ore uje cuchade na ore áyipiedie aja jnumi.
19Jnani ũrépitique ujuré gajnéone cucha jiépisi marínga, Pangarádejnai u uje chajuque cuchade udore jnese iji gai.
20Ga uté charanguipise jnani ũré uté ajnoquéode úringáringo pimocherãcho iji uté údode, ga que juéga chojmarárique gotique jeta pimocherãque.
21Jnani sijnángone udore jé ore guejnaque re ome dasijnaringuéone uje ore isijnaringuéone chajni ore gai. Ore u jnese jeta ore chetaque jnani ũrei ga udore ore chise dáringane pujuya jnese.
22Pangarádejnai uté chiqueta darógode udore ore ucuecaringuei, enga a ca pujuya udore ore jne uje ore chicha danguretigai aja uté.
Currently Selected:
Sálmos 34: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
