Sálmos 33
33
1Beyoi ga ajñecachója Pangarádejnai ome uacaninaquéode, ayoré ujñapetade uaque á; uje jé tiógarapísa jeta ate arégode udore ore chicota Pangarádejnai uté gu.
2Acãcho Pangarádejnai gai ga ajéyo uaquetígo udore uje i tu árpa, jé aja uaquetígo cucha jocarãtácho uñane uje carubode chejna yijmanáyone, ga ejnáño uágaja uté úringai picotaque iji uacajñecade ome uté.
3Aracho uacaradé icha ome uté. Ga ajusópise uacasocade guio ome uaquetígo cucha jocarãtácho úringáringo chuque jeta uerate jocarane, enga anguíraño uacabijnanone aja uaquejode ome uacaninaquei.
4Pangarádejnai uruode ũrepíso, ga ũré uté ome ipesudode cucha jnese.
5Cuchade uje uerate quigode, jé aja uje ũré cuchade ga Pangarádejnai chijnóra cuchade udore. Ijnoraquei querújnapise enga pijoque iji erámi údode jnese.
6Gaté, jogonórone cucha jnese, ga Pangarádejnai imanicho udore jnese ome daruode. Chimate guédo dipesedie udire ore jochaguéjnai ome dajñari uje chubúchu ¡pu!
7Uté chimáta tié cuchábedie jogonórone yote aja ñane ga pésu damatade yocho udore uné, ga chijmare yote quedéjna ajedatéode udore aja dayaridode ome dáringane pañeracho.
8Jnumi jogosórone cucha jnese ore dorási ga ore tõrorásaja Pangarádejnai iquei. Jé aja erámi achamisórone jnese, jeta ore toji uté úringai pitijabate gai jnese.
9Uje uté narare ga jĩraque uruode tocade; ome uté iroquéode ga cuchade etóguiji dayaridode jnese.
10Pangarádejnai chinoningase purása quedéjnane udore ore áyipie gaidode dapesute cucha iji garanone. Uje erámi jogonórone a ore áyipiedie de jórogui cuchárique, mu uté chãraque, ga que udore tocade gotique.
11Pangarádejnai uté áyipie quicho udore jé jogate iji deréjna pitade jnese, uje uté chicha dáyipie aja cuchárique ga áyipiedie udire jé chuságaja disi ejode ore ájnape disi ejórigo ore jnese.
12Pininaquei jogadi tu ome pachamini uté uje cho dangureni Dupa iji Pangarádejnai uté. Pachamini uté uje Pangarádejnai ajegaite uté ga pininaquei gajnengórone upúsu uté idaisórone ore uje uté cho dajnenguíji udore ore.
13Pangarádejnai uje chácariji dedai iji gatajnoquei ga chajire erámone unirisórone ore aja quedéjnane iji jnumi tudé.
14Iji dayarite dajogadi uté ga timíninga jnumi achamisórone ore jnese aja quedéjnane.
15Uté u uje pésu jnanione jnese jeta ore áyipiedie cuse, jé aja uje chidójnanga ore ipesudode quigode jnese iji ore.
16Que peduguéjna cuchátique déji jeta chiqueta re gu uje isoldádode jiépisi ore. Jé aja jnani jõcaratáguebetique uje que doi ga chiqueta re ome detotiguejnai.
17Pichajapidi jóroque panguretigárique aja buricárique uté uje que doi ga chiqueta gosi iji pocaningárique. Ujetiga etoguipise buricai uté marínga, que chiqueta gosi.
18Mu Pangarádejnai edodie chuse udore ore guio uje ore dosóñime uté, ga udore ore u uje ore changureta uté osongaquédatéi yui ome re.
19Uje uté chijnime udore ore iji pitoringai jmainie, ga chuse ore ucuecaringuei guio ujeta chaguhedatéode yore ore gai, ga ore ecame uté.
20Yoquirodi tu Pangarádejnai uté, uje yanguretágo uté yui ome yoque. Uje uté u Yocátajasṍri, ga Yocãrésõre uté to uje ichajaque raja yoqui ome cuchade jnese.
21Yocáyipiedie nína re ome Pangarádejnai uté. U gu uje yichago yocanguretigai aja uté i pirosobádi ome yoque.
22Urénga, Pangarádejná, ajuéga jeta bajnoraquédatéi chácariji yoquibai, ga jé chirate yoquirodítigai ome ua, uje yocanguretigai jogadi tu bei ome yoque.
Currently Selected:
Sálmos 33: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
