Sálmos 27
27
Peduguéjna David iradedie uña u.
1Dírecaringuéi u Pangarádejnai ome yu, ga yiquetasṍri u uté. ¿Ama gosi urásu ujetiga yitodo? Pangarádejnai u yucuecaringuei gãrésõri. ¿Ama uñeque dorási ga chṹra pisadodéringárique aja uyu a?
2Yumajósõre sijnángone udore ore chisína yu, ga ore ajé jóroguio jeta ore cho daboti cucha iji yãrione, uje yetesórone udore ore chachẽre yu, mu ore guídogorodíe cho sebeque, ga ore cṍraja jnumi.
3Ujetiga soldate dipesérigo ore chaparu yibai, marínga, a jé ca yimo paguté joráraque ome yu gotique jne. A dimane uñane ore ome yúringárique pachẽraque ome dajocaningárique, marínga, que yanguretigai uté doi jnutique.
4Gusu cucha chojmarai uje yutáji Pangarádejnai, ga a jé yucueguipísi tu uté jne ome yu. Ga u ujetiga yugúsi Pangarádejnai uté iguíjna cuchábi ajei gatuaque jé iji dirode jnese uje qué yiqueca iji erámi. Ga a yitoji Pangarádejnai uté ingoningájnai gai jne, ga a jé yucué uté ayuquetotiguei quigode ome yu iji iguíjna cuchábi uté to jne.
5Ujetiga pujuredie yore yibai iji díningo jne, mu a uté pógu yu iji dacárpa uburúdi ga a jé ca cuchárique chósi tiji yu iji uté jne. A uté chacose yu iji dacoyapídi iji daguíjna cuchábi ajei; a ichajapite yu aja cucarané cucháberaque gai to jne, uje idájapísiji jnumi cucarané uaté.
6Enga a e pijosique yu iji gaté jeta yugúsi yumajosórone ore gai jnese jne uje udore ore chaparu yibai. Jecute a yẽra yẽrapáitigo cucha ome uté iji uté iguíjna cuchábi ajei, uje yinínaquéode quicho udore. A yijñecare jne, ga a yirate yicotaqué gajnéringui yiradei ome Pangarádejnai uté to jne.
7Angarami yúringai dara ujetiga yibidi ua, Pangarádejná. Ga osõre yu ga achajnai yuru quigode.
8Uje bojninga: –Acué yenochai ome ua.– Ga jé u uje yáyipie chojningame ua: –Benochai jé u, Pangarádejná, uje a yucué ome yu jne.–
9Be ga jé ca apógu benochai ome uyu. Jé ca ajócãre baroi tuyu ome báringai ájningarãque. Ua u uje yimo báringai Yátajasṍre ome yu gatuaque. Enga ca ajíome yu iji te jeta gusu yu iji, Yiquetasṍri Yudupá.
10Ujeta iapade, ité ore tṍra yu, marínga, Pangarádejnai u jne jeta chajo yu aja re.
11Acate yu ome basoca uréone, Pangarádejná. Ajñaque yu aja dajeque caputai ujetiga obiréjna ome yu, u gu yumajosórone.
12Jé ca ajuéga yu ome yetesórone udore ore áyipie noñánguenie quigode, enga jé ca ore tocade jne. Uje udore pijogúsõre tágode e ore chéngame re ome dasingarane yate tácho gu, ga udore ore ijmongaquéode irágu ore ajéode.
13Mu yanguretapise yui jeta yimo Pangarádejnai uté átegoningáne ome yu iji uecade ore jogadi udé erãpe.
14Be ga arodape Pangarádejnai uté yui ome ua. Ajnusi ua ome cuchade, enga uté a chisíome picasitigai ome báyipie. ¡Ejẽ́, be ga arodape Pangarádejnai uté yui ome ua!
Currently Selected:
Sálmos 27: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
