Sálmos 140
140
Piradedie gajnesṍri u piradedie irajasṍripísi. Peduguéjnai David iradedie uña u.
1Pangarádejná, angara yijogatique ome jnani sijnángone udore ore; ga ãraque yu ome jõcaratáguebéode udore ore.
2Udore ore u uje ore áyipie déji cucha gajnaréngone úringane pipesucho iji dajei gatuaque, ga que udore ore áyipie jnoji daringarane pocaninga iji dirode jnese.
3Ga udore ore chata darei ga jé chopise uga chagúrique arei; ga udore ore pijnanane jogotodie venéno jé chopise uga chagúode jogotodie venéno udire.
4Pangarádejná, ajuse yio ome sijnángone udore ore jmainie; ãraque yu ome jõcaratáguebéode udore ore, uje ore pésu dáyipie quigode ome yu jeta ore chucuase yuja ta iji yiripie.
5Dicotárechoquíode udore ore pógu dajuyaquéode ome yu, ga ore chungare enuéone udore iji dajuyadie uñanie, uje ore chicháji dajuyaquéode udore iji pipie dosadode ome yi.
6Yósi te ome Pangarádejnai:
–Ua u Yudupa; acha bangoninguini aja gadoi jeta angári yutaqué gajnéone cucha, Pangarádejná.–
7Pangarádejná, Yangarádejnai tu ua, ga ua u uje barame yu ome cutejmai báringa ujopíerãque cuchape. Ua u uje baco yatoi gai ome báringai Parésõre uje yugúsi yijocaningai gai.
8Pangarádejná, ca ajuéga sijnángone ore ipotigádode cucha ome ore; ca ajuéga jeta udore ore áyipie quigode jno dádi, jeta jé ca udore ore chicota re gaté ome cuchade.
9Udore ore uje ore chaparu yibai, ga ore cho darúja yu ome daru noñángone uje tṍraji ore pijnani, apésu ga udore jé ore gajneque dajmongaqué gajnéone cucha udore ome yu, ujeta chaco udore ore gatoi gai.
10Ga ajuéga ga guegueraque ditaguéode yore udore ore gai. Ajuéga ga parãte udore ore aja ejo pipotáraque chaquipie, jeta jé ca ore chisápo guetíguiji rĩ.
11Ca ajuéga jeta jnani jutaréquechoquírique chapite to iji erámi. Ajuéga jeta cucha gajnaréngone chuquéjnai jnani chigócabéi uté ga jĩraque udore sué uté gai.
12Yiraja uje Pangarádejnai chirota udore ore uje ore chejnáreque re ome cuchade uje chipatigase ore, jé aja udore ore uje que ore chimo cucháringome re, ga ũrepise ome ajiritigade ome darotaquéode quigode ome udore ore.
13Que potigayaque ayoré ujñapetade udore ore jeta ore chacãre bei ueradi gai jne. Uréone udore ore u uje a ore ecáji bari gatuaque jne.
Currently Selected:
Sálmos 140: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
