Sálmos 139
139
Piradedie gajnesṍri u piradedie irajasṍripísi. Peduguéjnai David iradedie uña u.
1¡Pangarádejná, badójnangapísa yu, ga e barajapise yu!
2Barajapo yisocade rĩ; jeoga yácare, jeoga yiyague. Idája ua iji yu, mu jé baraja yáyipie gaidode cucha jnese.
3Barajapo yiriguítigade jnese jé aja uje yiterẽtáji yiyaridi rĩ. Érãtique amoque yijmapiéraque.
4Urénga, uje cáma yuruode tocade iji yibijnani, mu e baraja, Pangarádejná.
5Bagúsi yibai jnese, yiquei jé aja yiquigade, enga bacha bajmanai aja yibai.
6Barajatígadatéode udore érãtique yijnime ãrírique jeta yiraja quitique; uje jnoropiei iji jnumi gu, ga yirajatigai chiságui.
7¿Jé yicárasiji rique jeta yayome bajopiédaté? ¿Ja jogatique déji a ujetiga ca agúsiji to, ujetiga yicárasiji uté?
8A yorúrasu gatajnoquei marínga, jé bagúsiji to. A yicárasiji jnaropié marínga, jé bagúsiji to rĩ.
9Ujetiga yijínarása diri aja yote quedéjna cuchábi uéchamitó,
10mu bajmanai jé chorei yu iji quedéjnane iji uté. Bãrachua érãtique chirame yu gotique.
11A yojningárasa:
–Ajuéga jeta ijnangunu uegue base yibai. Écãre dírecaringuéi uté iji yibai ga nóña ga utataringué.–
12Mu utataringuei uté que juduque gotique ome ua, ga dejai uté nanganataque ga jé cho diri uté; u gu uje utataringuei uté jé chopise dírecaringuéi ome ua.
13Ua u uje bapesute yajei jogonórone cucha udore jnese. Uje qué yugúsiji ité ajei, mu jé bamanique yadode jnese iji ité ajei.
14Yicota ua ome bapesudode yacho uje cuchadatéo bapesudode udore ome yu. Bamaningone cucha udore ueradípiso ga obiréjnapisome yu.
15Que pipoguiécho yajnoquéode gotic ome ua uje pipesute yu iji yibié ajei, mu que pimo yu ome uñeque. Uje yiquérã iji ité ajei ga yajnui tu dajugupeque atíãtique uje pugagája ñane.
16Bapáñaji yu uje qué pujningaqué yu. Ga e purusãracho yadode, yajnéone dire udore jnese iji begode darujna ao uje cáma udore uñeque tocade ome yu mu.
17¡Cucha oreranguipise báyipie quigode udore ome yu, Dupade á! ¡Érãtique udore ore eruénique cuse!
18A yipota yisecãru jórogurásu báyipiedie udire marínga, que pejnai, uje qué sué ungaréjnai ãri uté ujnaminie gai. Uje yo cuyuque, ga jé yugúsiji bari.
19Urénga, Dupade, ueradi urásu jeta ajnime sijnángone udore ore ucuecaringuei iji ore. Ga angaráño uacajogadi ome yu, ayoré yusṍreméone uaque á, uje uacapótayo yiyoi úringai pijnimique.
20Uje udore ore dojnóngapísaja ua, ga bamajosórone udore ore chimoringare bei bisideque.
21Pangarádejná, ¿Ama jé ca ũré a? uje yetaque udore ore uje ore chetaque ua. ¿Ama jé ca yagu yejode ome udore ore uje ore chosi riji gatéode ome ua ya?
22Yujnapise udore ore jnese ga que yetétigai chise deruénique ome ore; yo yumajosórone iji udore ore.
23Adójnangapísa yáyipie, Dupade á, ga acué yáyipie gajnarétigai iji yu. Etingare yu jeta jé ũrepise yu, ujeta uerate yáyipie quigode ome bajéode.
24Ajmitápise yu jeta araja yiyoguérique iji yu, ga ajñaque yu aja dajeque togójmai uté.
Currently Selected:
Sálmos 139: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
