Sálmos 119
119
1Pininaquei gajnengórone u udore ore uje que ore iyoguérique cuse aja dajesúode, ga jé ore chajna Pangarádejnai uru pirosobádode udore quigode iji jnumone.
2Pininaquei gajnengórone u udore ore uje ore susípise uté pijogúsorone daru quigode guio, ga ore chejna dáyipiedie aja uté úringárique pucueque.
3Ga udore que ore pésu cucha noñátique to, uje ore chajna uté jmapiedie quigode gu.
4Baroquei u ome yoque jeta yicoi bajmapié aréguedie udire quigode ga ca yicagóji ti yui ome udore uñeque.
5Yáyipie jogadi jóroque jeta yejna yuja báyipie parénguenie udire úringáringui pipesudei gatuaque.
6A ca cuchárique chinguíra dipoi taja yu jeta yáyipie jogate baroquéode quigode udore jeta yipésu gatuaque.
7A yacãre babai jne ome yicotaqué ũrepísode uje tṍraji yáyipie ũrepise, ujetiga e yiraja barecujate iyiejnanie udire úringanie ũrei quigode.
8A yipésu báyipie parénguenie quigode jne. ¡Jé ca ajíome yu iji te jmete!
9¿Ama jnacánique isocáringome re jeta uerate uté isocárique iji dacuecaringuei? Adi jé urásu jeta gosi isocade jé cunguésõri baruode quigode udore, Dupade á.
10Yucué ua ome yáyipie jnese. Jé ca ajuéga jeta yicai quedéjnarique ome baroquéode udore úringáringo pigaicho.
11Yujuse baruode guio iji yáyipie, uje yigaidi u gu jeta jé ca yipésu cucha gajnarétique ome ua.
12Picotaque Opejã ua, Pangarádejná. Be ga o yiquique ome báyipie parénguenie udire quigode.
13Yibijnani júdode u barecujate iyiejnanie quigode jnese uje tṍraji babijnani.
14Yinína yu ome bapijogúsorone barúo quigode ga yachietaquéode ome baruode udore quigode sué cucha orerane gáyode jnese.
15Yáyipie a jogate bajmapié aréguedie udire quigode jne gatuaque, ga a jé ca yamurase badode udore iji yedomitique aja yajesúode jne.
16Báyipie garénguenie udire u uje érãtique yamurase ome úringanie pajmaránei; enga que toque ujeta yicadígui baruode udore.
17Ajuse baroi uyu guio ujetiga qué yiqueca ga jecucha yi bojningane cucha udore quigode.
18Be ga achẽre yedodie gai, jeta yimo báyipie pirosobádedie udire ueratígajnai.
19Iji yúringai erámi unirísõre udé ga purása quedéjna yu; ga ca acose baroquéode udore quigode ome yu.
20Yáyipie jogate barecujate iyiejnanie úringáringui pirajai iji deréjnai údode.
21Ua u uje banguíra baru dosógode aja dicotárechoquíode udore ore, uje bamangaquéode gajnesórone u, ga udore ore u uje ore cho cutuque ga ore chicáji te yui ome baroquéode udore quigode.
22Ajócãre ore ichietabáitigade, iboyaquéode ore iji yejode. U gu uje e yipésu bapijogúsorone barúo udore quigode.
23Peduguéjna cuchábode ore pésu dajé quigode jeta ore cho yate marínga, jé baroi uyu yáyipie jogate báyipie parénguenie quigode gatuaque.
24Bapijogúsorone barúo gajnui u cucha pajmarátique ome yu. Ga yoquisórone upo baruode udore ore rĩ, uje ore cho payuquetotiguei quigome yu.
25Yáyipie catáji jnupuñúringane udore ome yáyuguhebátigade; atire yucuecaringuei yibai uje jé baru quicho udore ome yu gu.
26Uje yatata yadode ome ua ga bachajnai yu. Acate yu ome báyipie parénguenie udire quigode.
27O yiquigome ujeta yiraja yijmapiéraque ome basoca arégode udore quigode, ga yáyipie a ca jnoji bátedatéode udore jne.
28Yáyuguhebátigade na yáyipie aja jnumi; be ga asíome petotiguei ome yu ome baruode udore.
29Angara dajeque tágode quitique ome yu, ga udore ca cunguésõri yu. Osõre yu, ga acate yu ome báyipie pirosobádedie quigode udore.
30Yajegaidi dajeque u uté uje ũrepise. Yicha barecujate iyiejnanie udire aja yiquei jeta yi quigode.
31Yo pimesigode aja bapijogúsorone barúo, Pangarádejná. Ca ajuéga jeta pajegátigai chise yu.
32A yayóna baroquéode udore aja quedéjnane jne, ujetiga yirajatigai jé quérã iji báyipiedie udire.
33Acate yu ome báyipie parénguenie quigode, Pangarádejná; ga yi udire quigode jeta yimánaja jnumi.
34Asíome pirajatigade ome yu jeta yujuse baru pirosobádode guio, ga a yejna yáyipie aja udore quigode jnese jne jeta yi quigode.
35Opísape baroquéode udore gabi quigome yu, uje yajmaránone u udore quigode gu.
36Orei yáyipie iji bapijogúsorone barúo udore yui, mu ca yáyipie jogadípise yamatatígo cucha uáso.
37Orei yedodie iji ti yui ome cuchade uje eruérãcho. Asíome yicaniratiguei ome yu jeta yi bajmapiedie quigode.
38Apésu ga bachagájade barúo tocade ome baroi uyu, uje basocade jé u udore ome ore uje ore dosóñime ua.
39Arame yu ome yajnéone puru dosócho uje yirosóñime udore yui; gu uje barecujate iyiejnanie udire uerate quigode.
40Cajmita to uje yajegaidípiso basoca arégode udore. ¡Báringai ũrepise cuse, ga ẽra yucuecaringuei ome yu!
41Ajuéga bajnoraquédatéi ome yu, Pangarádejná, jé aja báringai Piquetasõre uje e bachaga yoqui ica.
42Ga jé u ujetiga yichajnai ore ujñiequérigo ome yu jne, u gu uje yangureta baru quigode udore.
43Jé ca ajnime dara uréone udore iji yibijnani, uje yangureta barecujate iyiejnanie udire yui ome yu gu.
44A jecucha ga yipésu báyipie pirosobádedie quigode gatuaque jne iji deréjna pitade.
45Ga que cuchárique qué chigarupo yu jne rĩ, gu uje yucuegode u basoca arégode udore.
46A yujúdode u bapijogúsorone barúo udore ome peduguéjna cuchábode ore jne iji ore iquéode, enga a jé ca pinguíra dipótique aja yu jne.
47U gu uje yajmarápusu baroquéode udore quigode, uje yijnóra udore gu.
48Yijosi baroquéode quigode iji gaté, uje yijnóra udore quigode gu, ga yáyipie a jé jogate báyipie parénguenie udire quigode jne.
49Ajnusina baruode uje bango baroi uyu ica, ga udore u uje pésu ga yangureta udore yúode.
50Cuchade udore uje na yu aja jnumi marínga, yáyipie jogadípise baru qui casodica ga udore u uje chisíome yúringai ayoré pujnu ome yu rĩ.
51Pujñiequé noñángone udore chaco yibai gu banguresórojmane udore ore, mu que yorei yáyipie iji ti yui ome baru pirosobádode udore.
52Uje yáyipie déji barecujate iyiejnanie udire uje jé jogate aro erámi nanique, ga udire u uje chejñu yáyuguhebátigadatéode iji yúdode, Pangarádejná.
53Pájningai chĩreta yajei ga gose sijnángone udore ore uje ore noñome báyipie pirosobádedie udire iji te jmete.
54Báyipie parénguenie udire cho pachachagútique ome yu iji yúringai disorãque iji erámi tudé.
55Yáyipie déji bei iji dejade, Pangarádejná, ga jé u uje yipésu baru pirosobádode udore quigode.
56Yajneque bajmangaqué ueradode udore, uje yipésu basoca arégode quigode.
57Pangarádejná, yajneque ua. Yajo yuja yuru quigode ome ua jeta yipésu baruode udore quigode jne.
58Yucué báringárique pátajasṍre ome yáyipie jnese. Be ga osõre yu uje jé baru quicho ome yu ica.
59Uje yáyipie déji yadode, mu jĩraque yorei yúringai urugu iji bapijogúsorone barúo udore yui te rĩ.
60Yiquejnáji baroquéode udore úringáringo pipesucho yui jeta jé ca yãra yu iji cuchárique ome ua.
61Uje ate gajnaréngone udore ore chigaru yu ome enuéjnane udore marínga, que yicadígui báyipie pirosobádedie quigode.
62Dejnínga gatócoro marínga, jé yujnusina ua uje yo cuyuque, ga yacãre babai ome barecujate iyiejnanie udire úringanie ũrepísei quigode.
63Yo yijõráji udore ore jnese uje ore dosóñime ua; yojningane u udore ore uje ore pésu bajmapié aréguedie udire aja quigode.
64Bajnoraquédatéi chĩreta jnumi udé, Pangarádejná; o yiquique ome báyipie parénguenie udire quigode.
65Ua u uje batapísaja baroi tuyu, Pangarádejná, uje jé baru quicho udore ome yu ica.
66O yiquique ome bajiritíga uréone udore quigode jé aja pirajatigade jeta obiréjna ome yu, u gu uje yangureta baroquéode udore quigode.
67Uje cáma cuchade na yu aja jnumi, ga yicai te yui ome pate uréone quigode, mu jé iji de ga yujuse baruode udore quigode guio.
68Paraque ua, ga bapesudode cucha ueracho; ga acate yu ome báyipie parénguenie udire quigode.
69Dicotárechoquíode udore ore u uje ore chichaga cuchade aja yu ome darupatáringane, mu ome yáyipie jnese ga yipésu bajmapié aréguedie udire quigode.
70Udore ore áyipie cachi jogate ore, uje érãtique ore chécãre dáyipie quitique, mu ome yu ga yajmarápusu báyipie pirosobádedie udire quigode.
71Jé uerate ome yu uje yejnáreque cuchade isagode; u gu jeta yiraja báyipie parénguenie udire quigode gu udore.
72Ome yu ga báyipie pirosobádedie udire uje tṍraji babijnani, udire u orerenie ome yu, ga jnuéngai óro guebéode jé aja pláta guebéode ore ome dáringane orerã́cho. A udore ore batigárique de jórogui mil dipesérigo marínga, jé báyipie pirosobádedie udire sué gai.
73Bapésu yu ome bajmainie, ga jé u uje bamate yadode jnese iji yu. Asi ome payuquetotiguei ome yu jeta yiraja baroquéode udore quigode.
74Udore ore uje ore dosóñime ua ga jé u jeta ore chimo yu, ga a ore nína re jne; u gu uje yangurenone u baruode udore yui ome yu.
75Yiraja, Pangarádejná, uje bajiritigade udore ũrepise ua ome quigode; ga jé ũrepíso basocade udore uje bapésu yejnaréngone udore isagode ome yu.
76Urénga, omi tu jeta angongara bajnoraquédatéi uté aja yu jeta chinoningase yáyuguhebátigai uté iji yu, uje jé baru quicho udore ome baroi tuyu ica.
77Ajuégaba bosongaquei ome yu jeta qué yiquecape to; u gu uje yajmaránenie u báyipie pirosobádedie udire quigode.
78Yipésupú ga ijoyatade udore chajéngome erámi, jeta ore chinguíra dipoi aja re; uje udore ore pésu yejóporinguéone uje que quitique cuse mu. Mu ome yu, ga yáyipie que jnoji bajmapié aréguedie udire quigode jne.
79Udore ore uje ore dosóñime ua, ga omi tu jeta ore chicai gadoi ujetiga ore chiraja bapijogúsorone barúo udore quigode.
80Apésu ga yáyipie cáputapísiji báyipie parénguenie udire quigode, jeta jé ca pinguíraja dipoi aja yu.
81Yáyipie cho sere ome báringai Piquetangore unerai; yirote baruode yui ome yu.
82Yedominone íjnoque ome baruode udore úringane tocachucho yui. Ga yósi tome ua:
–¿Cho rique jne jeta osõre yu?–
83Uje yajnui tu cucha aórique uje pijoyaque pijoyatique aja, ga pésu topié iji uté uje pióti jogate gu; mu que yicadígui báyipie parénguenie udire gotic.
84¿Díningo cho ringome yu jne a? jetiga baroi uyu jé yirote báringárique yátajasṍre yui. Jé aja jeta ¿dirode cho rique? jeta ajire yumajosórone ore adode aja quigode.
85Ijoyatade udore ore chijócha derugode iji yirípiedie iji yiquéode; udore ore u uje que ore doi báyipie pirosobádedie quigode udore.
86Baroquéode udore ũré quigode jnese; mu jé sijnángone ore cho damajo yu, uje que quitique cusome yu. ¡Ga átaja yu!
87Yajni pĩroque ejoi ome udore ore iji erámi tudé; mu que yi ga yicadígui bajmapié aréguedie udire quigode.
88Atirépo yucuecaringuei yibai te rĩ ome bajnoraquédatéi, ujetiga yimate bapijogúsorone barúo quigode aja guesi uje tṍraji babijnani.
89Pangarádejná, érãtique baruode udore chécãre re iji dirode uñeque ga jecucha jogate gatajnoquei ome dáringane togójma.
90Báringai tuté ũré que eruénique cuse ga jé chuságaja disi ejode ore jnese; bachajapite jnumi uté aja jogadi nanique ga jé charite dayaridi uté gatuaque.
91Uje bapesute cuchade udore iji jogadode nanique, ga jé jogate dajogadode jé iji deréjnane udojo; u gu uje bo baróchoji cuchade udore jnese.
92Ujetiga jé ca yajmára báyipie pirosobádedie udire, ga yejnaréngone cucha a chimanirase yu aja jnumi.
93A jé ca yejñu bajmapié aréguedie udire iji yajénique jne. Batocaidedie u udire ujetiga asíome yucuecaringuei ome yu.
94Bajneque yu, ga aqueta yu; u gu uje yucué bajmapié aréguedie ome yu.
95Sijnángone udore ore chirote yiquei jeta ore chejna yu, mu a jé yidójnangapísa bapijogúsorone barúo quigode jne.
96Yimo cucha ueradode uje ueracho mu eruéode cuse; mu gusu baroquéode quigode uje érãtique chise deruénique to.
97¡Urénga! Yijnorapise báyipie pirosobádedie udire. Ga yáyipie jogadípise udire iji deréjnai údode.
98Baroquéode quigode udore pésu yúringai áyuquetotinguerã́que ome yumajosórone ore, uje jecucha baroquéode quigode udore déji yari gatuaque gu.
99Yirajatigade orocoi ome yacadisórone ore jnese; u gu uje jecucha yáyipie déji bapijogúsorone barúo udore quigode.
100Yirajatigade sué choquíjnane udore ore irajatigade gai; gu uje yujusípise bajmapié aréguedie udire guio.
101Yirídade cãra dajesúrique ome cucha gajnaréngone udore jnese gabode, ujetiga yujuse baruode guio.
102Que yo cutúgome barecujate iyiejnanie udire, u gu uje e bacate yu ome.
103Yibijnani chajmárapúsu baru quigode udore, ga udore sué cutepeque pajmarátique gai ome yarei.
104Bajmapié aréguedie udire u uje yiraja yirajade cucha ome udire, jecute yetaguipise pisoca noñaque tágode jnese.
105Baruode gajnui u pioque papótique ome yirídade ga chijñate yirípiedie gai.
106Yijnime yurúñiejnane ga yajo yuja udore úringáringo pipesucho ome bajiritíga uréone udore quigode.
107Pangarádejná, e jiei uje yejnáreque yu. Ome baruode udore, ga asíome yucuecaringuei ome yu gaté.
108Amesẽre yeranone yicotaqué udojo ome ua, Pangarádejná; ga be ga o yiquigome barecujate iyiejnanie udire quigode.
109Yucuecaringuei isai urique iji cucha dacadode udore jmainie; mu que yamurase báyipie pirosobádedie udire gotic.
110Sijnángone udore e ore pésu dajuyágaidóde cucha iji yiquei, mu que yo cutuque ome bajmapié aréguedie udire quigode.
111Bapijogúsorone barúo u uje yajnecho udore quigode gatuaque; jé ũré uje udore pésu yajéchietaquéi.
112Yorei yáyipie iji báyipie parénguenie yui jeta yi quigode gatuaque, jé aja ujeta yimánaja jnumi.
113Yetaguipise jnanione udore ore uje ore áyipie quigode gare, mu yijnorapise baru pirosobádode quigode udore, Pangarádejná.
114Ua u uje jecucha yacose yu iji barosadi, ga yicha ua aja yiquéode gatuaque. Yangurenone u baruode udore yui ome yu.
115Acayoi siñéngome yu, sijnángone uaque á, uje yipotigádi u Yudupade iroquéode quigode ome yu jeta yañuru udore guio.
116Átaja yu, uje jé baru quicho udore ome yu ica gu, jeta jé yiqueca jne, ga jé ca pajegátigai chise yu ome báringai pangurete.
117Ãraque yu ujeta ca cuchárique chósi tiji yu; enga a jé yajmitápise báyipie parénguenie udire gatuaque jne.
118Ua u uje bajia ti yui ome udore ore uje ore chayo báyipie parénguenie udire gai. Jé ũré uje udore ore pésu jórogu cucha dacadode ome dáringane aringáca.
119Ayoré sijnángone jnese iji erámi ga bo cucha pasique gajnujna iji udore ore; jecute yijnóra bapijogúsorone barúo quigode.
120Yúdode cho ta-ta-ta uje yitodo ua, jé aja uje yitodo bajiritigade yui to.
121Yipesudode u cucha uréone, cucha ueradode ore; jé ca ajíome yu iji udore ore jmainie uje ore cho dajosipié ome yu.
122Ua upúsu yutocaidi ome yu jeta arodipise baroi uyu; ga ca ajuéga jeta ijoyatade ore cho dajosipié ome yu.
123Yitoji yajirigode gai gu jeta báringai Piquetangore pijógome yu, jé aja jetiga pimanique bojningane cucha ueracho aja jnumi uje bachagája yoqui.
124Jé ca ajuseque baroi tuyu ome bajnoraquédatéi, ga acate yu ome báyipie parénguenie udire quigode.
125Baroi u yu; asíome pirajatigai ome yu jeta yiraja bapijogúsorone barúo udore quigode.
126Deréjnai jé u ome ua, Pangarádejná, jeta jé be bajéningo, uje que ore doi báyipie pirosobádedie quigode gu.
127Jecute yijnorapise baroquéode udore quigode ga yijnoraquei sué óroraque gajnei yijnoraqué gai, uje icota jóroque dáringáraque óro ueradé mu.
128Jecute yajire bajmapié aréguedie udire bajaque jeta jé yirate udire ome úringanie ueradei; ga yetaguipise pigape tágode udore jnese.
129Bapijogúsorone barúo udore pitijabácho, jecute yujuse udore guio iji yáyipie.
130Baru pungarane udore u uje chisíome dírecaringuéi ome yoque; chisiapome payuquetotiguei ome uté gosi uje que urénga irajatigárique cuse mu.
131Yáyipie chejna raja baroquéode quigode udore gu uje yajmarápusu udore unéningai ome yu.
132Ajni yibai ga osõre yu, uje jecucha basocábeque ome udore ore uje ore chijnóra bei ueradi.
133Orei yirípiedie iji baruode yui uje bachaga udore aja gadoi, ga ca ajuéga yu ome cucha gajnaréngone jeta cho daróguiji yu.
134Arame yu ome jnanione udore ore ipesudedie pujurei; yigaidi u gu ujeta jé ca yujuseque bajmapié aréguedie.
135Ajñate baroi uyu yibai ome báringai nanganataque, ga o yiquigome báyipie parénguenie udire quigode.
136Yeducadode doi guesi iji yedodie ga cho tiéraque aja guesi, uje ¡chimo jóroque re! uje jnanione que udore ore chañuru báyipie pirosobádedie quigode guio.
137Pangarádejná, urénga, ũrepise ua enga ũrepise bajiritigade udore quigode.
138Ua u uje bachajapite bapijogúsorone barúo aja jogadode udore ga jé jogate dáringane ũrepíso, jé aja uje érãtique potigayacho udore quigode.
139Yejna yuja yúringai dojigaté ome baruode udore úringáringo pigaicho. U gu uje yumajosórone udore ore chicadígui baruode udore quigode.
140Bachagájadie udire báyipie quicho e petingarãi, mu jé isoca dasocai ome dáringanie ũrei; jecute baroi uyu yijnóra udire.
141Ayoré atĩ́ape yu, ga pichietabaite yu, mu érãtique yicadígui bajmapié aréguedie udire.
142Basoca uréone udore ujñapetácho quigode iji deréjna pitade jnese, jé aja báyipie pirosobádedie udire úringanie ũrei.
143Cucha dacate iménuone na yu aja jnumi ga yitécuna erámi gu udore, mu baroquéode udore u uje yajmára udore quigode.
144Bapijogúsorone barúo udore ujñapetácho quigode gatuac, tuaque. Asíome bayuquetotiguei quigode ome yu jeta yapite jne.
145Yejna yáyipie ome yúringai ugo ome ua, Pangarádejná. Achajnai yu, ga yipésu báyipie parénguenie aja quigode jne.
146Yúringai ugo gajnesṍri tu ua, Pangarádejná. Mu be ga aqueta yu, jeta yujuse bapijogúsorone barúo udore guio.
147Uje yĩriji iji dejaque utataringuemi ga yicha yúringai ugo aja yúringárique pátaja ome ua; yirote baru quitígo yui ome yu.
148Iji dejai údode, mu yitoji yajirigode gai uje érãtique moi doi yedodie, u gu jeta yáyipie jogadípise bachagájade baru quicho udore aja yu.
149Angári yibijnane ome báringai ijnorataque cuchape. Urénga, Pangarádejná, ajuse yucuecaringuei guio ome bajiritíga ũrepísode udore.
150Udore ore chirõre yu uje yumajosórone u ore ga ore eteque yúringárique pañeraque; mu idájapise ore iji báyipie pirosobádedie udire quigode.
151Pangarádejná, uja ua aja de, ga baroquéode udore quigode ũrepíso jnese.
152E iyajmaque uje yiraja bapijogúsorone barúo quigode uje bachajapite udore aja jogadode, jecute jé jogacho dajogadode iji deréjna pitade údode.
153Ajire cucha dacadode uje na yu aja jnumi, ga ajnime yu iji udore jmainie, uje que yáyipie jnoji baru pirosobádode udore quigode.
154Be ga acha ua aja yi ome báringai yadode ajirisõre ũré, ga arame yu. Asíome yucuecaringuei ome yu gu uje jé bachagája yi ica.
155Udore ore úringárique piquetaque idájapísiji sijnángone udore ore. U gu uje que ore chucué báyipie parénguenie quitique.
156Cuchadaté bosongaquei, Pangarádejná. Asíome yucuecaringuei ome yu jeta jé cunguésõri bajiritíga uréone quigode.
157Jiei yajnasórone ore, jé aja udore uje ore cho damajo yu, mu que yicai siñéngome bapijogúsorone barúo udore quigode.
158Yajire udore ore uje íjnoque ore anguretigárique iji ore ga yujnapise ore, uje que ore doi baru pirosobádode quitique gotique to.
159Adójnangapísa uje yijnorapise basoca arégode udore. Añuru yucuecaringuei guio ome bajnoraquédatéi.
160Uje pisecarãte baru quigode udore, mu jé ũré quigode jnese, ga bajiritíga chojmara, chojmarane ore jnese ujñapetácho udore quigode, ga que eruénique erãpe cuse.
161Peduguéjna ibijógode chajna yu aja quedéjnane, uje que yipésu cucha dacatique mu; mu yáyipie tijapísa re iji baruode udore iquei.
162Yinína yu ome baru quigode udore, ga yajnui tu ayorérique uje chise cucha orerã́tigo.
163Yetaguipise purupatáringane ga yujnapise udore, mu yijnorapise báyipie pirosobádedie udire.
164Yicota ua ome bajiritíga uréone quigode, ga gare iji ti iji deréjna chojmarai gatuaque.
165Pajesereringai irágu udore ore uje ore chijnorapise báyipie pirosobádedie udire; enga que cuchárique doi ga chucuase udore ore.
166Pangarádejná, yirodi u báringárique piquetangore uté yui, ga yipésu baroquéode udore aja quigode.
167Yáyipie jnese chusípise bapijogúsorone barúo udore quigode guio; yijnoraquei que chajire re ome udore gotique.
168Yi bajmapié aréguedie, bapijogúsorone barúo udore ore quigode; u gu uje baraja yipesudode cucha jnese iji benominone.
169Ajuéga jeta yibijnacaraidie chise baquei, Pangarádejná. Asíome payuquetotiguei ome yu jeta jé cunguésõri baruode udore quigode.
170Ajuéga jeta yutaidode udojo chise ua iji bajogadi; ga arame yu, uje jé baru quicho udore.
171Yibijnani a irágu jne ome picotaquéode uje qui tu ua; u gu uje báta báyipie parénguenie quigode aja yu.
172Yarei a jé ca chacho ijñiecáca jne ome baru quigode; u gu uje baroquéode udore quigode ũrepíso jnese.
173Be ga acha bajmanai aja gadoi jeta chátaja yu, u gu uje e yajegaite basoca arégode udore quigode.
174Yajegaidípise báringai piquetangore, Pangarádejná, jé aja báyipie pirosobádedie udire, uje yajmarápusu quigode.
175Ajuéga jeta yiqueca ga yicota ua jne; ga bajuegádi urásu bajiritíga uréone udore jeta chátaja yu.
176Yajnua tu áyasa bijnángueraque uje chicai te yui; be ga acué baroi uyu, uje érãtique yicadígui baroquéode udore quigode.
Currently Selected:
Sálmos 119: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
