Sálmos 118
118
1Acãcho Pangarádejnai gai uje paraguipise uté. Ga uté ijnoraquei jecucha déji gatuaque.
2Israélgosode ore chojningárasa:
–Uté ijnoraquei érãtique chise deruénique.–
3Aarón ájnape disi ejode a udore chojningárasa:
–Uté ijnoraquei érãtique chise deruénique.–
4Udore ore jnese uje ore dosóñime Pangarádejnai, ga ore chojningárasa:
–Uté ijnoraquei érãtique chise deruénique.–
5Yáyuguhebátigade u uje yibidi Pangarádejnai, ga uté chajnai yu ga chijnime yu iji udore jmainie.
6Pangarádejnai déji yari, ga que yitodo. ¿Ore isocáriguiráse ome yu a? uje gusu erámi achamisõre ore.
7Pangarádejnai déji yari, ga Yátajasṍri u uté; ga a yimo yumajosórone udore ore jne ome yúringai pujnuéngaisṍre.
8Ueradi u ujeta yoco Yocãrésõri iji Pangarádejnai ome cucha dacadode jnese, ga jé ca yanguretágo yocujórique ayoré ome udore.
9Omitigai u ujeta yicoi ga yoco Yocãrésõri iji Pangarádejnai uté, enga jé ca yoco yocangureníji peduguéjna cuchábode iji erámone udojo.
10Punirone iji erámone ore chaparu yibai jeta ore socárome yu, mu a yejna udore ore jne ome Pangarádejnai uté i úringárique pĩcaraque.
11Ore chaparu yibai; jé ũrepise uje ore socárome yu, mu a yejna udore jne ome Pangarádejnai i úringárique pĩcaraque.
12Ore chaparu yibai, ga ore cho abéja chóguedíe iji yirosadode; mu udore ore cho pore ojnacúco papóseraque jeta jĩraque erã́ta ore jogadi. A yejna udore ore jne ome Pangarádejnai i úringárique pĩcaraque.
13Ore chucuase yu aja quedéjnane ome dabosode dejo, mu Pangarádejnai chátaja yu.
14Pangarádejnai u yetotiguei ga yachachagúgode gajnesṍri tu. ¡Uté jé u yiquetangóri!
15Pibijnacaraidie chisa dabade iji ayoré uréone udore ore iguíjnane uje ore júdode u daninaquéode ome Pujnuéngaisṍri uté úringai pujnuéngaisṍre. ¡Pangarádejnai ãrachua u uje jnuéngai cuchade jnese!
16¡Pangarádejnai ãrachua cuchadaté ga picota uaté! ¡Pangarádejnai ãrachua u uje jnuéngai cuchade jnese!
17A jé ca yitoi jne mu a yiqueca jne, ga a yo quique Pangarádejnai imaningone cucha udore jne.
18Pangarádejnai chopise dajuñame yu, mu que juéga yu ome pitoringai.
19Achẽre piagode udore gai iji Dupade iguíjnai yui uje ũrepísode u udore, ga yacája ajei jeta yacãre Pangarádejnai uté gai iji uté.
20Pangarádejnai joride u udaque, jeta ũrepísode ore pípidi u jne.
21A yacãre babai jne, uje bachajnai yu gu, ga e yiquetasṍri u ua.
22Ga Yiquetasṍri uté gajnua tu cucarané pichietabade uaté ome guiguíjnai orasórone udore ore, mu nóña ga cucarané ibijogue uaté iji guiguíjnai uté.
23Pimanicho udojo ome Pangarádejnai, ga yitijagópisa udojo.
24Diri tudé u uje Pangarádejnai pésu úringai ibijóguiji, ga yachietágoji jeta yinínango yógome imani uté.
25Pangarádejná, yijóchago bajei údi jeta aqueta yoque; yijóchago bajei údi jeta apésu ga uerate cuchade ome yoque, Pangarádejná.
26Pininaquei gajnesṍri u uté gosi uje di gu Pangarádejnai uté i ueradi. Yamacáco uaque iji Pangarádejnai iguíjna cuchábi uté ajei ome yocuru omone.
27Pangarádejnai u Dupade ga uté u uje chijñate yoquibai. Amátayo ñane jeta ajnáño ijnacojodie iji gatéode iji uacajochai jeta asáchoja ore aseradéjnai uté uje aquirájna ue gajnúone déji gatajidode.
28Yangureni Dupade u ua, jecute yacãre babai; yangureni Dupade u ua, jecute yijosi ua iji gaté.
29Acotáyo Pangarádejnai uté uje paraque gu. Uté ijnoraquédatéi érãtique eruénique erãpe cuse.
Currently Selected:
Sálmos 118: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
