Sálmos 109
109
Piradedie gajnesṍri u deyade ore ijñai uté. Peduguéjnai David iradedie uña u.
1Urénga, Dupade á, yicotaquéode gajnesṍri á, jé ca o paraque.
2Uje jnani sijnángone ore chedo yu ome dáringane urupatáquechoquío; udore ore arei u uje que chacho dáringai aringácachoquí, ga jno yúringai pedoque údi aja sona.
3Ga udore ore chaparu yibai ome daráñiejane udore. Uje que yatique gajnaréngome ore mu ore chisa yu pórecajna.
4Yijnoraquei ome ore oré tu yúringai pijmongarája ome ore, mu yicatecã́ri Dupade ome udore ore to.
5Paraque yu ome ore mu ore cho yúringai paraque oré ome date gajnaréngone. Ore cho yijnoraquei oré iji detétigade ome yu.
6Atṍri juez ate gajnaréngone udore uñeque jetiga chajire yumajósõri uté adode aja quigode. Enga apésu ga uñeque chácariji yumajósõri uté ãrachua ome dáringárique paguhétajasṍre.
7Jeta Padode Ajirisṍri juez uté chajire jnani sijnai uté adode aja quigode ga apésu jetiga chojningame uté:
–Máraque ua,– ga jé máraque. Ga uté ajei jochaquéode udore doi ga Dupade cho cucha dacate noñánguipísiji márai tuté icatecãraitigade quigode.
8Yipésupú ga uté jé ca chisína dacuecaringuei iji erámi udé jne. Ga uté ujode ayoré uñeque chácariji charidi ome gajnepídi uté, jeta cho dajnéngu uté gajnéone cucha erase.
9Jé upo rĩ jeta uté abode ore chise dáringane disijácho iji uté; jé basa ga uté acoté nóña ga chequeca iji uté.
10Ga uté abode ore chisṍriji erámi údode bisideque jne, jeta ore chutai dojode ayoré aja dajesúode; ga ueratigai u jeta pijócãráque udore ore iji ore iguíjnai uje e guiguíjna ao uté gu ome úringai arímeque.
11Ga uté oidode déo iji dojode ayoré gari ga ore chijnime gari jogonórone cucha jne gu uté ijnose carubode udore; jé aja uje uté chejna daguesi ome dasagode dejo jeta ugúchade déji, mu ore chijnáji gari uje purása quedéjna udore ore ome uté gu.
12Ga uté que chimópo dáringárique posorángome dojórique ayoré jne rĩ; ga uté isocai jé chisa abode ore to uje que ujórique ayoré chosõre ore jne iji dáringai disijate uté.
13Ga uté ájnape disi ejórigo ore a erã́ta erámi ome udore ore jne; ga jé ca páyipie gaidápo uté i to jne rĩ iji erã́tique udé.
14Enga Pangarádejnai que chamurase udore ore dayode ore isijnaringuéone gotique; jé aja ore daté ate gajnaréngone jeta jé ca pĩroque udore to jne.
15Yipésupú ga Pangarádejnai a jecucha chicha udore ore ate gajnaréngone aja denominone jne, jeta ca chicadígui udore, ga ca pujnusinápo udore ore jne rĩ iji erã́tique udé.
16U gu uje jnani sijnai uté etéquetí posongaquérique déji ajénique, mu áyipie gaidode u dajmongaquéode ome dojode ayore jmatácho jé aja ore uje que ore chimo cucháringome re, jé aja uje pota chui ome udore ore uje cuchade na ore áyipie aja jnumi.
17Uje uté irasique uje chamacãre dojode ayoré ome daru uajádode jeta cucha gajnaréngone chise ore, ¡ga omi tu jeta cucha gajnaréngone udore doi ga yore uté gai! Que uté ajegaite puru ueradode to ome dojode ayoré; ¡jecute ueradi u jeta puru omone udore ore jé aja pacacãrátigade ore idájapise udore iji uté!
18Ga uté jé cho daguidé gajnujna iji damacaqué noñángone udore. Ga jé tiógara ujeta udojo chacája uté aoi ga cho yotique ome uté; jé basa ga chacája uté ajnoquéode ga cho asétique iji uté ajnoquéode udore.
19Jé tiógara ujetiga uté chaco dabai ome daráñiejnane ga cho pepeque piguidíji udore. Ga jé chidota udore aja re ga chome pigarutique uje pidotája piráraque gatuaque.
20Jé tiógara ujeta Pangarádejnai cho oré udore aguhétajade cucha udore yibai ga oredie jé u udire, jé aja udore ore uje ore ipesudode u pejóporinguéone ome yu.
21Mu ome ua, Pangarádejná, Yudupá, be ga jé ca ajuseque yu ome yĩcarai uté bei; ga arame yu gu uje bosõraquédatéi uté uerate.
22Jé ũrepise uje jmataque yu, ga cuchade chona yu, ga yáyipie cho pajnangóngueraque ome cõráchatique jõ.
23Yiji ga yajnui tu purútique uje cho jnipe aja dajesui iji guedéjnoringárique. Jé yajnui tupo caríchatíque rĩ, uje jĩraque parãte uté aja jnumi.
24Yigataidie cho ta-ta-ta gu uje que jé yagu yibotique, ga yaoi toja yajnoquéode gai.
25Yugúsi gu ome udore ore jeta ore chujñieta yu; uje udore chimo yu, ga ore chijninguese datoidie ome yu.
26¡Pangarádejna Dupá, Yangureni á, be ga átaja yu! ¡Aqueta yu ome bajnoraquédatéi!
27Apésu ga udore ore chiraja uje bajmainie u uje chiqueta yu. Ua upúsu uje bapesute udore, Pangarádejná.
28Ajuéga jeta udore ore chamacãre yu ome daru gajnarétigo, mu ua ga acacãre yu ome baru ueradode. Apésu ga yijmongarájasórone udore ore inguíraja pajegátigai aja re jne. Mu jé basa ga baroi uyu a yinína yu jne.
29Jé tiógara jeta yaguhétajasórone udore ore cho daba daguhétajade cucha udore ome yu gatuaque. Jé aja pajegátigai ga uté cho pepeque piguitique ome udore ore.
30Mu ome yu ga yachietaquéode garani u yibijnani ome Pangarádejnai ujeta yacãripise gai jne. A yicota Pangarádejnai iji ayorébuode udore ore edominone jne.
31Pangarádejnai chácariji jmatágode udore ore ãrachua ome dáringai Parésõre. Gaidi u gu jeta chiqueta udore ore ome udore ore ijmongarájasórone ore ijmongaquéode.
Currently Selected:
Sálmos 109: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
