Provérbios 7
7
Udojo ojningane u chequé amanachugué dipotedie ome jnani quedéjnane
1Mu yababi á, yacajnaquéode ca jnoji bajénique. Enga be yacajnaquéode udojo quigode.
2Bamo uje que acási ati cuchárique chacája bedóraque uje bajusípise bedodie guio gu, ga jé be basocade udore to ome yacajnaquéode ujetiga ca aramurase ore iji báyipie. Enga ujetiga be udore quigode enga a aqueca gu udore quigode jne.
3Agaru yacajnaquéode iji bajmainie, jé aja báyipie.
4O bẽro iji payuquetotiguei tuté enga nóna ua aja quedéjnane. Jé cho pirajatigai, o bajõrai iji uté gatuaque.
5O bajõrai iji payuquetotiguei, pirajatigai ore enga a ore chijna ua iji chequé amanachugué dipotedie udire ore gari jne. A ore dejéna ua aja daquigade ome daru noñatígo jne, mu a ca toque jne ujetiga ore jno bádi. Chamáñaje baríjogonórone u pirajatigai, payuquetotiguei ore gu.
6-7Yababi á, yajire yiguíjnai bocadi diríca ga yimo jnacarode iji ti diríca uje ore chicáji yoquiguíjnai dosadi. Enga yojninga: "Ore chimo jóroque dagaitique gajneri." Yimo udore ore uje boquerac uec ore ga que ore chiraja cuchárique. Mu uñai déji ore ujai uje boqueraguipise ome dajorane ore. Enga yimíninga uté aja ajesúode.
8Yimo uje jnacari uté chaquesu dajei iji ajidé enga quítequiguí chequé dago iguíjnai.
9E tota erámi, enga e idógosi jeta dejaque.
10Yimo uje chequé tuaté doi guesi tiji daguíjnai ga chachai jnacari tuté iji garani. Uje chequé mu cho gapu iji re rĩ enga pésu re ga uerate adode enga doi gapudíe jmapié ome jnacari tuté. Ga gajnua tu gapu dibéchoquíraque.
11-12Mu chequé tuaté que chimo pajegátigáringome re uje pésu daboqueréringane iji penominone enga chacája ñane iji dajéredie iji guidai údode jnese, ga ucuegode u jnacarode ujetiga tungarája ore iji udore. Enga que pota jetiga chácariji daguíjnai. Pota jetiga chimo gosi jetiga bajagája re enga jĩraque chigaru gosi.
13Jecute uaté uje chachai jnacari uté ga chise ga chucu uré te ga topísiji edodie gai uje catecã́ri.
14Enga chojninga: "Yo yisijnaringuéone oré ome Dupade iji de que, ga yẽrájame cuchisoi tudé mu qué garósi déji yari ujetiga yajo gajneri.
15Uneripise bei ome yu que jetiga yimo ua to ga yajóbiji ñane gari iji yiguíjnai. Yáyipie déji ua que, ujetiga yucué ua enga yimomírase ua to, mu yajire ti mu e bãri.
16Ga ueradípise yimochápi uté uje yanire gaminóri taja uje borapeque uerate ga i tu líno uje ore gaidi iji ore uniri nanique uje i tu Egípto.
17Enga yanire cucha ai unérone aja uté rĩ uje íode u mírra, áloe, canéla ore.
18Be, ga yoquijnoraquei gajnua tu ore jopitique uje gosi chóji enga chajmárapúsu ga chiniripise ga irasique rome. Be, ga yinínango yoque jé aja direjnímerique.
19Uje que yabai déji yari iji yiguíjnai gu. Jno diríca ga chicai toniñeque ome dagaidode cucha.
20Uje ujuyai daplátadie ica ga a cáma di jne jeta guedoside dai mu cáma chajni."
21Mu que chequé, jnacari tuté chacája chequé iguíjnai míraque. Mu uaté dejéna uté aja daguíjnai ajei ome daru ueradode udojo, ga jé u uje jnacari chacája ajei.
22Jnacari tuté gajnui tu aquirájnarique ujetiga yusṍremétique chigaru iji daquigade aja dagachodi yui. Jé adi tupo rĩ ome jnacari tuté uje gajnua tu erámoro quedéjnaraque jeta basája pujuyáraque ga cachodi tu ome ujuyasṍri.
23Gajnui jé upo ayorérique rĩ ujetiga chicho gosi arobé ga chichopise iyobié gatócoro ga chajuque ga gosi cachodi tu. Gajnui jé upo chugúpenique rĩ uje que chiraja dajnei pujuyaqué gotique enga chacája ajei ga cachodi jé u.
24Mu adi jé u ome ua to, yababi á, jecute angaripísi yuru quigode udojo to.
25Ca acunguésõri uaté iguíjnai to enga ca báyipieraque déji úringa pimochápasa. Enga ca amíninga uaté aja ajesúode. Chamáñaje bagachodi a u to jne gu jeta amóji uaté gari.
26Chamáñaje cho ujetiga chequé dago tuaté yugode jiei iji jnanione uje chimate ore aja jnumi.
27Ujetiga abágui uaté iguíjnai tuté to jne enga e bacáji pitoringai yui to.
Currently Selected:
Provérbios 7: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
