Provérbios 8
8
Payuquetotiguei acajnaquéode upo udojo ome yoque rĩ
1Bamo uje payuquetotiguei uté narare to. Ujetiga gosi tangaripísi uté ga a uté gosi chudute uruode quigode jne.
2Ujetiga ajire curuté ójo te mu bamóji te rĩ iji ójo. A amopóji dajere ujérodie jne rĩ.
3Jé upo ome ore idáidatéi uté idaisórone ore rĩ uje ore chudute uté uruode to iji ore idai piagode.
4Enga payuquetotiguei uté chojningame dadudisórone: "Yuruode gajnesórone u jnanione uaque.
5Yuruode gajnengórone upo jnacarode uaque rĩ uje cáma apáñañoji cuchade quigode, jé upo jnacare táyipiegode ore to rĩ. Yuruode udojo qui tu jetiga gosi chejna raja jetiga chiraja quigode.
6Angachopísi yuru ueradéjnane udojo quigode. Chamáñaje que cuchárique cunguésõri yuruode iquénique gu.
7Ome yu enga cucha ueradi tu ujetiga jé ca yo yurupatáringa uje que yirasique purupatáringane gu. Enga ũrepíso yuruode udojo quigode jnese.
8Ũrepise yu ga que paringaquérique déji yáyipieraque. Enga que pimo purupatáringa uñatáguiji yuru quigode udojo.
9A yuruode udore obiréjnapiso ome áyipierane udore ore jnese jne uje ũrepíso.
10Qué yijócha uacajéode údi ujetiga acueyoi pirajatigai ome uaque, jé aja uacáringárique pacadique. Chamáñaje udojo suépise uacacueguedie pláta, óro ore gáyode gu."
11Payuquetotiguei suépise cucarané nanganatáguedie gáyode jnese. Que cucarané ueradéraque cunguésõri uté ome úringai cucha uerate orerãque.
12Payuquetotiguei qué jno daruode údi enga chojninga: "Payuquetotiguei, pirajatigai jé yoquijogadi guiguíjna chojmára iji jnumi. Enga payuquetotiguei tu yu uje yiraja ujetiga yo gosi quique ome cuchade, enga yoquigode u cucha arégode ome gosi.
13Ujetiga gosi chojninga: 'Yangureni u Dupade', enga jé chopise ujetiga chojningárasa to: 'Que yise cucha gajnaréngone unétique gotique.' Enga payuquetotiguei uyu yetaguipise ayoré dicotárechoquíode ore adode. Jé chopome josipíerane udore ore to uje yetaguipise ore adode to. Jé upome ayoré ate gajnaréngone udore ore to rĩ uje yetaguipise ore adode to. Jé upome ayoré urupatáquechoquíode ore rĩ, yetaguipise udore ore adode to.
14Payuquetotiguei uyu u uje ayorérique pésu dajequigode iji dajei, enga tocade enga jé upúsu ajei qui casodica. Jé upome gosi te rĩ ujetiga jé ca chiraja dajei quitique ome dapesutique cucha, mu yo quigome uté gosi ga jogadi tu uje uté gosi chiraja dajequitígo ome dapesutígo cucha. Uyu upo rĩ uje yisi ome petotiguei ome jnanione ore jnese.
15Uyu u uje eduguéjnane iji erámone ore chiraja dasocade ome darasade gu uyu, jé upo ome eduguéjnane uje ore churúsãre dáyipiedie quigode ga ore chiraja quigode gu yu rĩ.
16Uyu u to uje dacasutedie iji erámone ore chutṍri yu to ujetiga payuquetotiguei déji ore urasade to ome ore arecujaidie quigode.
17Ujetiga gosi chijnóra payuquetotiguei uyu ga yijnóra uté gosi to. Gosi jeta chucué yu enga yijnóra gosi enga yingongara yu aja gosi jne.
18Uyu u uje yĩreta yijmanáyone ome cucha orerane jnese enga gosi pota yu ga yisi ome gosi jnese. Enga quene gosi chise dáringai pangarate ome darasade gu yeranone cucha udore jnese.
19Mu yeranone udore cucha ueradípiso ome órodie úringanie ueradei. Udojo uje yingo ua enga suépise pláta nanganatáguedie úringanie orerẽ́ gáyode ujetiga asa ga o bajnenguíji.
20Uyu upo rĩ uje yajnai tu dajeque caputai tiji jnumone gatuaque. Enga gosi ujetiga nóna yu aja dajei tuté ga a yingongara cucha uréone quigode aja uté gosi jne.
21Yigaidi tu gu ujetiga yijnorasórone jé ca ore jmátame dajnéone yugúcha orerane iji yari. Yajegaidi u ujetiga yĩreta ore iguíjnai ajéode ome yẽrapáidode cucha ueracho ome ore.
22Pangarádejnai cho bajágu uyu nanique uje pésu yu to ome dapesute ejode cucha.
23Uje cáma jnumi déji to nanique mu jé yijogate erámi to nanique. Chamáñaje Pangarádejnai cho bajáguiji yu gu.
24Jé chopome yote quedéjna cuchábode, jé aja sibíjnane, tiedie ore, jé upome yote uode to rĩ uje bajaque yu ome udore ore jnese.
25Jé chopome cucaranone, orónenie ore rĩ uje jé yijogate ore iquéode iji erámi tudé nanique. Uje Pangarádejnai pésu yu bajágome ore jnese nanique.
26Bajaque uyu ome Dupade ipesudode puníño udojo jnese to uje pésu yu. Uje Dupade pésu jnupuñúringai nanique ga chimere jnumi ore iji ñane nanique mu jé yijogate erámi to nanique.
27Uje Dupade suru guéode yui nanique iji gaté ga cãra yote quedéjnai jogadi ome guéode nanique, mu jé yijogate udore iquéode nanique.
28Uje Dupade pésu gue abujadie iji gaté nanique enga jé yijogate. Jé yijogadápo to nanique rĩ uje Dupade chuchẽre yote quedéjna cuchábode gáyode nanique.
29Yudúdapo rĩ uje Dupade a ca juégapo guetígome yote quedéjna cuchábode rĩ. Yugúsapóji nanique rĩ uje Dupade pésu erámi tudé nanique ga cho chígome cuchade.
30Iji taningapísi nanique ga jé yijogate Dupade gari nanique. Cho ujetiga disi yu nanique ga uté imanique yu aja gatérique nanique. Jecucha ga yijína uté aja quedéjnane nanique enga que yiramurase uté aja ajesúode. Chamáñaje Dupade que chise yunerotiguérique nanique gu. Enga yajnami su disatique ome uté nanique uje chachoque yu ga cana yibáyode.
31Enga uje e pipesute cuchade nanique ga yingana aja yajesúode iji Dupade ipesudi erãpe ga yirasique yu aja yajesúode uje yimo ipesudi. Cuchiyi tupúsu ayoré taningui nanique uje yirasique yu ome uté.
32Yababode uaque á, beyoi ga angachopísi yarecujaidie quigode udojo jnese. Jé beyoi yijmapié ome yojningane udojo cucha jnese to jne enga a uacarasique uaque gatuaque jne.
33Ujetiga e pacadique uágome cuchade udojo enga ca ajuseque bajnéone pacajnaquéo. Enga be quigode jnese. Enga jé ca ajuseque payuquetotiguei tuté ome ua.
34Pininaquei gajnesórone u udore ore uje ore chirote yi tiji yiguíjna piagoi iji dirode jnese ga ore tangári yuruode quigode.
35Ujetiga e piyaque yu ome gosi ga pucuecaringuei jogadi tu ome uté gosi. Enga uté gosi gajneque Pangarádejnai áyipie ueradedie quigode ome re to.
36Jé basa ga ujetiga gosi cãra daquitígo ome yu enga gosi jé chicáji darosobádi cucha yui. Chamáñaje uté gosi chujã yu gu, enga cho jetiga gosi chojninga: 'Yijnorapise pitoringai ome yu.'"
Currently Selected:
Provérbios 8: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
