Juéces 15
15
1Uje Sansón que chudute dacoté casica ujnomei to uje chisa jnacare uñai ga Sansón áyipie déji jeta chajmitape. Enga Sansón quene tibágui dacotábia suaté uje ore chinásu dacade cucha uje i tu trígo. Enga chijnásia dachidábia áyasa quedéjna abape ome uaté. Uje chise ore iguíjnai ga chojningame uaté dayé ore:
–A yacája guijnatajei ga qué yajirape yacotábia casica iji suaté mochápie.–
Mu que Sansón iyoquíjnai juéga jeta chacája guijnatajei. 2Enga Sansón iyoquíjnai chojninga:
–Yijos eti bayague ica gu, jecute yijnája bojoi jnacare ica. Mu uaté nerámia cusosi ga omepísabia su ome dataté enga apota ga ójisi suaté gari.–
3Ga ájningarãque Sansón ga chojninga:
–Filistéogosode uaque u uje uacapesudei pujuredie enga uaque u uje máraque uaque. Que uyu gotique jetiga yo yiba yatique jne ome yijocaningane iji uacajade. Uaque u jeta oyo uacaba yijocaningane udojo jne.–
4Enga Sansón doi erapujnánguenie ga 300 u ore. Enga chigaru erapujnánguenie udire carigode aja ñane ga garaja ñane. Enga chicha dajnani aja cari uté gatócoro uje chigaru erapujnánguenie udire aja ñane. 5Uje e chimate ore aja ñane uje 300 u ore jnese ga chadia dajnaningone aja ore carigode jnese, enga jé u uje chiroque ore aja doi jeta ore chicáji filistéogosode jutícabidie jnese ga ore chãru ore acade trígo gáyode aja dajesúode uje ore chisa dabade aja dagajñunie. Ga ore chãru úvadie gai to, jé aja poridie uñanie uje udire íode u olívo. Uje ore pésu trígo unucódedie iji jnumone mu pioi chejna gai jnese. 6Uje filistéogosode ore chimo udore ga ore chojninga:
–¿Ga cuchárique apóso gáyode a?–
Ga filistéogosode quene ore chiraja uje Sansón u uje pésu udore gu uje iyoquíjnai chijna acoté aja ujoi jnacare ga chugúa udore uje jnusi dacoté. Ga ore chicáji timnátgosi uté, Sansón iyoquíjnai, enga ore chãru uté gai iji iguíjnai ajei, jé aja uro uaqué to. 7Uje Sansón chudute to uje ore chãru iyoquíjnai, acoté casé ore gai ga ájningarángome filistéogosode gaté enga chojningame ore:
–A yo yujnutabádu yacoté casé, dayé ore jne uje uacãcho ore gai diríca. Ga a yo yujuñame yu jne jeta yo yijocaningame uaque jeta ga yejna filistéogosode uaque.–
8Ga Sansón cho dajocaningame filistéogosode udore ore ga chujé ore ga chibéropise ore ajnoquéode ga uru ore ajnoquéode iji Sansón jmainie. Ga Sansón jno ga cho darengúji cucarã́tedó uje déji cucarani ójo. Ga cucarani uté i tu Etam.
Sansón cho dõráchaguiji cabáyu quedéjnarique ajui ome filistéogosode ga yugode iji jnanione ore chise 1.000 nanique
9Filistéogosode ore chucué Sansón nanique. Ga ore chicáji judágosode gajnei jnupe ga ore chicha darengúi taja uté. Ga ore chicáji ore idai uje i tu Léhi, ga ore chajnose idaisórone ore iji te. 10Enga judágosode ore chojninga:
–¿Gotique gu a uje uacapótayo uacoyo uacajocaningame uyoque?–
Ga ore chojninga:
–Yocucuei u Sansón jetiga cho oré dapesudi casodé cucha oré ome yoque uje pésu yocujuredie diríca.–
11Uje judágosode chudute udojo ga jnanione chimáta uñane aja ñane ga ore chise 3.000 nanique jeta ore chicáji Sansón jeta ore chisa ga ore tẽrame filistéogosode ore. Ga ore chicáji cucarani uje i tu Etam enga ore chise Sansón iji dajogadi cucarã́tedó uaté uje pógu re iji. Ga ore chojningame Sansón:
–¡Sansón á! ¿Jé ca araja to a uje filistéogosode ore sué israélgosode ore yoquibáyode ome badode gu uje bapésu ore ujuredie ome bapesudode cucha udore diríca?–
Ga Sansón chojninga:
–Ore adode gajnarécho ome yu diríca ga jé yiji ore adode oré ga yipésu oré to diríca ga oredie jé u ñane.–
12Ga ore chojningame:
–Sansón á, yoquigaidi u jeta yisago ua ga yisígo ua ome filistéogosode jeta ore cha dajei dotáningane ome yoque.–
Ga Sansón chojningame ore:
–A yujuéga yu ome uaque jne jeta asayo yu ga asíñome uacaru iyiejájnane ome yu uje a jé ca uaque u jne gu jeta ajéyo yu.–
13Enga ore chojninga:
–Gusu jeta yigaco ua ga yisígome ua ome filistéogosode ore jne.–
Enga judágosode ore chacája cucarã́tedó ajei enga ore chigaru Sansón iji ome enué ichade uje gare. Ga ore jno údi aja guesi.
14Enga filistéogosode ore tuangóa judágosode iji ore idai Léhi dosadi. Enga ore tibidi iji Sansón ejode uje ore irasique rome jeta ore cho dajuñame jne. Enga Pangarádejnai Dupade Ujopié Espíritu Sánto basája Sansón gai enga chĩreta ome cutejmai etotiguei. Enga chaquesu enué icháiso iji dajmanecade, jé aja dajmanáyone. Enga enuedatéo mu cho jetiga Sansón chejñu enuéone udore aparanátigui ¡janip! iji dajmanecade.
15Ga jé u uje Sansón chisa cabáyu quedéjnarique toi ajui uje qué upo úringai toque ga cho dõráchaguiji cabáyu ajui ome filistéogosode. Enga yugode iji jnanione ore chise 1.000 ome doidi uté cabáyu quedéjnai aju. 16Enga Sansón chigójna degode filistéogose ore gai ga chósi tome dachachagúgode:
"Cabáyu quedéjnai ajuape diríca mu jé cabáyu ajuábi pésu danucodé chojmarámia, jeoga garósi.
Enga cabáyu aju poidábi suté ojningai jé u yi uje uyu u uje yujé udore ore que, ga yigode garósi iji ore. Gusu uje chise 1.000 yigode iji filistéogosode ucode ore que."
17Uje Sansón cha chigójna degode filistéogose ore gai ga chisa ore erã́sori cabáyu quedéjnai aju ga jé u uje tṍra uje cha dáringai cõraque. Ga basája cototé ejoi. Ga jé ore cho 'Cabáyu Aju Basui' aja cototé uaté. Ga i u Ramat-léhi ome israélgosode ore uruode nanique. 18Udojo quigade ga ãre chejnápise Sansón ga cajnóriji. Ga Sansón chutṍri Dupade ome re, ga chojningame:
–Pangarádejná Dupade á, ¡chimo jóroque re uje bẽra yúringai pujnuéngaisṍre ome yu que, mu que asi yu iji yotique ga a yitoi ome yuyaga gajiné iji betesórone udore ore ejode iji de!–
19Ga Dupade chuchẽre parurébia gai iji Sansón ejoi. Ga yodi tṍraji ga Sansón chóji yodi uté enga úringai tuqué ãre pose jĩraque jno. Enga yodi uté jé jogate gatuaque iji ore idai Léhi ejoi. Ga ore pésu yote tocachui uté i ga ore chojningame 'Dupade Utaisṍri Chimo Dataidi Yote Tiji Dejoi'. Ga uté i tu En-hacore ome israélgosode ore nanique.
20Sansón guejnanie siqueré chise 20 años nanique uje chajire israélgosode ore adode aja quigode uje qué ore déji filistéogosode ore jmainie nanique.
Currently Selected:
Juéces 15: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
