Juéces 14
14
Sansón ajegaidépise filistéogotóraque nanique ga pota jeta ore chóji ñane gari
1Iji dirode uñai ga Sansón chicáji filistéogosode ore idai uje i tu Timnat. Ga chimo gapabia iji uté ga ajegaidape gapabia suaté. 2Uje chajníja dayé, daté ore iguíjnai ga chojningame ore:
–Ajuécho ga yisa yacotéraguiji filistéogotóraque uje yise ore idai Timnat ga yajegaidé ore uro déji ore idai tuté. Ga apéso cuchade aja quigode jne ujetiga yimáco jne ga uaté, yisago ñane jeta yójigoji ñane gari.–
3Ga Sansón dayé chojninga:
–¿Gotique uje bapota basa bacotéraguiji filistéogosode ore urodie uje que ore changureta Dupa ujopíerãi gotique to? ¿Enga jé ca amo gapudíe uje déji dángosode yocujade, jé aja yocujode israélgose ore urodie?–
Uje Sansón chajnai dayé uruode ga chojninga:
–¡Mu yajegaidé upúsu gapabia suaté gu! ¡Jecute be ga acatecã́ri dayé jeta juéga uaté ome yu, uje yipota jeta yójigoji ñane gari jne!–
4Mu Sansón dayé, daté que ore chiraja dajnacari ipotiguei quitique. Uje Dupade u uje pésu cuchade udore aja quigode gu jeta diga Sansón chise filistéogosode ore idai Timnat ga jé u jne jetiga Sansón gajma gapu urasade filistéogose ore pésu Sansón ujuredie iji, ga chiborátaja Sansón jocaningai ome ore to. Chamáñaje jecucha filistéogosode ore socárome israélgosode ore gatuaque gu. 5Ga Sansón dayode quene ore chimesẽre dajnacari uruode quigode ga ore chicáji gapua ore idai to uje i tu Timnat. Ga Sansón nóna dayé, daté ore iji ore idai uté to. Uje chise ore idai tuté ejoi ga caraté quedéjna tṍraji ore acadie úva údi ome Sansón. 6Ga Pangarádejnai Dupade Ujopié Espíritu Sánto irágu Sansón údode ga chisi ome cutejmai etotiguei ome ga que Sansón chijnásia dõráchatique iji dajmainie mu qué chajnangarase caraté aja dejode enga chosi áyasa quedéjna ababi iji caraté sijnangue tuaté. Mu que chatatame dayé, daté ore gotique. 7Uje chimate caraté aja jnumi ga quítequigábiji gapabia uje ajegaidape suaté.
8Dirode garósi iji udojo quigade enga Sansón tibágapoi dajmámia gapape jeta quene ore chisa ñane, mu chajire degué casé caraté quedéjna uje qué déji dajmámia idai ejode, mu abéja chacája itóroroi ajei ga chajni ga poringane déji ga chipese dotigade iji degué caraté itóroroi ajei. 9Uje chajni abéja poringane iji degué caraté itóroroi ga chijna dasai ome dayé, daté ore ga ore chipese mu que chatatame ore uje chijnimíji caraté togué itóroroi ajei.
10Sansón dayé uté tibágosi gapabia to jeta ore pésu cuchade aja quigode ome dajnacarabi, dacaria ore uje a ore nóna ñane jne. Enga Sansón pésu ore ininaquei uje jecucha jnacarode ore isoca uje ore nóna dacotedie. 11Mu filistéogosode ore ga ore chiroque dajnacarode uñane aja ore ininaquei jogadi uté to ga ore chise 30. Ga ore cho Sansón jõrai iji raque, mu aringáca ore ome Sansón jeta ore chajmita adode. 12Sansón chojningame daríjogonórone udore jnacare uje 30 u ore:
–A qué yingo cuchárigaja uaque jne ga jé ca arajayope gotique jne. Acueyoi uté quicho jne aja dirode jeta gare iji ti uje qué yugúcoi yoquininaquei gai, ga gosi chiraja ga chingome yu. Ujeta gosi chiraja jne enga a yisi ome piguidé ueradedie ome uaque jnese jne uje tejnuringane gajnei, ga pipesudei udire iji ore acai líno. Que gusu piguidedie uje udire batigai u 30 ome uaque, mu a yátapója piguidé ueradedie ome ayoré chojmara, chojmarane uaque jnese jne rĩ uje ore ajñaminone gajnei piguidedie udire.–
13Ga Sansón chopósi tome ore rĩ:
–Mu jeta ca arajáyo quitique jne enga a uaque u jne jeta asíñome piguidé paredie udire ome yu uje 30 ore batigai jne jé aja piguidé ueradedie uje ore ajñaminone gajnei. Ayoré chojmara, chojmarane uaque u jne jeta asíñome yojninganie udiji ome yu jeta jé ca arajáyo quitique.–
Ga ore chojningame Sansón:
–Be ga atata gotique ome yoque, ga a yangácoi ua jnese.–
14Ga Sansón chatata dapoguiédedie dáyipiei quicho ga chojninga:
"Uje cucha chagu diríca, mu cucha piboti tṍrapóji rĩ.
Ga cucha uajádejna, mu jé cucha pajmaráni tṍrapóji to rĩ.
Ga ca arajayope gotique yojningai."
Uje dirode e gadiógome Sansón ipoguiédi casé cucha ga que ore chiraja gotique. 15Uje dirode e gagájni ga ore tibágui Sansón acotábia ga ore chojningame:
–Angome babai ga chingo dojningai casé cucha quitígaja ua ga angome yoque to jne. Ja seca jé ca bei yocuru quigode udojo ga a yãco babai jne, jé aja bayé, baté ore. Sansón a tibidi yógaja uacajñamini diríca ujeta chijna yoquiguidedie iji yocari ¡jõ!–
16Enga jé u uje Sansón acotábia tibágui Sansón enga chojninga:
–Ise mu ca ese yunétique jõ. A etaque yu. Enga bapógu baru quigode ome yurasade, mu que angome yu uje bacoté yu mu.–
Enga Sansón acoté poji Sansón ejode. Mu Sansón chojningame gapabia:
–Que yingo iapade, ité ore gotique to. ¿Ama ajos eti yingorása ua ya?–
17Ga Sansón acotábia suaté jecucha pósi uje que Sansón chingo dapoguiédi quitígaja gotique. Uje e dirode gare iji ti ome ore ga dire erueminóri e u uje cáma guedé jnosi enga quene Sansón chatata dapoguiédi casé quigode ome dacotábia. Ga jé u uje uaté chayóji darasade jnacare ore yui ga jĩraque chingome ore. 18Iji dire garijitia ga filistéogosode ore quítequigája Sansón uje guedé cáma jno. Ga ore chojningame:
"¡Sansón á! Que cucha pibose unénique déji jeta sué cutepéode unéningai gai.
Ga que cucha uñeque déji rĩ jeta cho caraté quedéjna ome etotiguei rĩ."
Enga Sansón pésapo dapoguiédode cucha rĩ, mu obiréjnapise quigode ome ore. Ga chojningame ore:
"Gosi uje toria aquirájna ababía ga chĩrase, ga jé u uje chĩrase dajutícabia ome suaté etotiguei.
Uje gosi canáji dajõrai acoté ga chĩrase, ga chĩrase suaté gotábia irajatigai ome cuchárique quitique to."
19Enga Sansón chejna daruode udore aja guesi ga Pangarádejnai Dupade Ujopié Espíritu Sánto basája Sansón gai ga chĩreta ome cutejmai etotiguei. Enga Sansón chicáji ore idai uje i tu Ascalón ga chujé filistéogosode uñane iji uté uje ore chise 30. Enga chijna ore iguidedie enga chisi ome udire ome jnacarode ucode ore uje 30 u ore uje ore chiraja ipoguiédi cucha gotique gu. Ga Sansón chajni aja dayé ore iguíjnai ga ájningaránguipíse uje chajni. 20Udojo quigade enga gapabia dayé chijnásia darábia aja Sansón ujoi jnacare uñai, ga suaté chóji uté gari nanique.
Currently Selected:
Juéces 14: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
