Santiágo 3
3
Dacarei ijnimique cucha gajnaréngone, cucha omone ore jnese
1Yijorane uaque á, ca oyo pacadisõre iji uaque jnese. Chamáñaje que cucha iyieque pacadisórone ore gu. Chamáñaje pacadisórone a ore upúsu jne gu ujetiga Dupade chajiripise ore adode aja quigode. 2Yirajágo uje yoco paraque jnese gatuaque. Mu ujetiga gosi chiraja ujetiga susípise daruode guio enga ujñapetai tu uté gosi, enga chiraja to ujetiga susípise deo ome cuchade jnese. 3Uacarajáyo to uje yaníco buricade erã́sori aja pijnani, enga yoquigaidi tu ujetiga buricade tangaripísi yoque, enga yijnángo ore aja yocajegaipídode erámio. 4Cajicho gojni cuco cuchábode isocade to: uje querújna ore, enga úyujna cuchábedie chumúchungará, mu cucoi ijocayasṍri jé choréji dajegaipídi erãpe. Uje erásorami atíãpe múñi. 5Adi jec u to ome yocarei. Uje ajámape yocarei to, mu chejna raja ipesudode cuchadatéo. Adi jé upo pioque dijnírataque rĩ. Uje dijnírape, mu a chejnárase erã́tique gai ujetiga tagu gai. 6Enga yocarei gajnui tupúsu pioque dequejnangóri. Enga cucha gajnaréngone jnese gãrapipísi u yoquibai ayoré jogonóri tuté yocareque. Jecute ipesute yocúringai tuné ayoré iñoñaringuei. Jecute cho ujetiga piotique tõrapísiji gajño pioi ome yocarei enga basája iji taningai nanique. Jecute pioi tuté que toi gotique jé aja yoqueruei. 7Enga ayoréode chiraja dasocade ujeta ore pésu cuchiso ponáyone úringáringo parácho. 8Mu que ayorérique déji ujetiga chiraja dasocáringome darei. Chamáñaje cucha sijnanguipise uté gu. Jecute chetaque ujetiga pipesute úringárique parac. Enga cho ujetiga venéno tṍraji yocarei enga chequésãre yocujórigo ayoréo. 9U mu, yocarei uté jé u uje yicotágo Yocai Dupade ome. Mu yocangúromei jec upo yocarei tuté to rĩ uje yoco yocuru noñángone ome yocujode ayoréo, uje Dupade ipesute ore nanique múñi ujetiga jé ore cho dapesungóri tuté. 10Jecute yimóngo uje picotaquéode ome Dupade, jé aja puru noñángone ome yocujode ayoréo ore garani jé chojmára. Jecute yijorane uaque á, que pisoca uté go ome Dupade anguresórone uyoque. 11¿Ma yote unéri, yote derocoi ore garãtique chojmára ya? Úngare. Que garãtique chojmára go. 12Adi jec u, que toque ujetiga erejnárique áraque tṍraji pojnaque. Enga adi jé upo rĩ, que togápo rĩ ujeta pojnaque áraque tṍraji erejnárique rĩ. Yijorane uaque á, jé adi tu to, que toc ujeta yote unénique, yote derocótique ore tṍraji simíjna chojmarárique. Jecute yicoi enga ca yimecóa dara gajnaréngone iji yoquibijnani, enga gusu yocuru pajnotágode ome.
Pirajatíga ũrei garani tu Dupade ome yoque
13Ujetiga irajatátique, jeoga áyipierã́tique déji uaque enga uté gosi doi enga chijna enga doi pisoca arégode ome re iji uacajade ujetiga pijógome uaque. Enga ca doi enga dicotare, mu doi enga pajnotaguipise. Uje áyipierane ore isocai u uté gu. 14Mu uaque gosi ujetiga qué charatáyipísome cuchade ome dojode ayoréo, jeoga jnaripísi cuchade ome re, uté gosi ca chichaga raja ayoré irajatátique. Chamáñaje a taque uté gosi ujetiga cho irajatáguiji re, enga chicha cucha uréone aja ti yui. 15Yirajágo uje pirajatigade uñane que garani u Dupade go. Mu uñane garanone u erámi tuné, jeoga páyipie ayoredie, jeoga garani u Satanás. 16Ujetiga jec ũré ajnáchoi cucháringome uaque, enga aratáyiñome cuchade ome uacojode ayoréo, enga a jogadi tu uté jne ujetiga ducañerájma cuchade jnese iji uacajmainie, enga uacapéso cucha gajnaréngone ome ñane jnese. 17Mu ujetiga uacarajatigai garani upúsu Dupade enga a apijochopise jne ome uacáringane ayoré omipíso. Enga uacacuei a u pajesereringai ome ñane jne. Enga a caniranguipise uágome ñane to. Enga a anejénaño ñane údode to jne rĩ. Enga a osõrataque uaque jne ome ñane. Enga uacáyipiedie a jogadípise cucha omone quitígo jne ujetiga apéso. Enga a eduyo uacaru uréone gatuaque ome ñane. Chamáñaje ũrepise uaque gu. 18Uté gosi ujetiga chucué pajesereringai ome re, enga doi enga chedupísiji dajei. Enga diga pajesereringai iji uté gosi ajei tṍra cucha omone aja guesi iji uté gosi ajei gatuaque jne. Enga úringai ate omi pijógome ore jnese.
© 2021 Ethnos360