Santiágo 2
2
Ca angaráño uacasocáringome uacojode Dupade anguresóño, mu jé ore chojmára iji jnumi jnese ome uaque
1Yijorane uaque á, yiraja uje uacanguretáyo Yocangarádejnai Jesucrísto uje sué cuchade gáyode jnese. Jecute aracho uté aja adode. Enga jé ca angaráño uacasocáringome uacojode Dupade anguresóño ore, enga jé ore chojmarápise iji jnumi jnese ome uaque. 2-3Enga socaseti ayoré dacasutéraque chacája Dupade iguíjnai to uje jmanepié óro déji jmané, enga iguidedie ueradéjnapisi. Enga uacojnichome: "Ácariji charipi ueradi gai." Mu socaseti ayoré gajnarétique chacápoja Dupade iguíjnai to rĩ. Enga uacojnichome ayoré gajnarei tuté: "Ayáguena gaté, jeoga ácariji jnumi." 4Ujetiga uacasocade u udore ujetiga ajucho ñane iji jnumi, enga uacasocade udore imoi tu uje e uacáyipiedie noña ome ñane iji jnumi.
5Yujode Dupade anguresóño uaque á, angáchoi yuruode unojo: Dupade ajegaite jmatágode ore to iji erámi tuné. Enga gaidi u gu ujetiga chinoningase ore, enga ataque ore to ome danguretigai. Chamáñaje a ore gajneque Dupade ingoningájnai to jne gu ujetiga diga ore chise dáringane Dupade urása iji gaté. Chamáñaje Dupade jé urúo udore gu ome dajnorasórone ore jnese. 6Jé basa ga uacoyo cucha bisidéguiji ayoré gajnaréngone ore. ¿Ja ca ugucharane u á, uje ore pésu uacajuredie enga ore jno uacádi aja dacasutedie uje ore chaguhéta cuchade uacabáyode? ¿Jecute gotique gu a, uje uacadojnóchoja jmatágode, jé basa uacasíyo ugucharane gáyode? 7Uje yanguretágo Crísto enga ore chĩ́care Crísto anguresórone aja yoque. ¿Mu ja ca ugucharane udore ore u a, uje ore doi enga ore dojnóngaja Crísto uté i ueradéjnai?
8Uacarajáyo uje ore urusarane Dupade urúo déji uje chojninga: "Ajnóra bojórique ayoré, adi tu uje bajnóra báringai tuté ayoré ome ua." Ujetiga ejna udore guesi enga uerate badode. Chamáñaje piroquei tuté u uje sué piroquéode uñane gáyode jnese iji Dupade uruode. 9Jecute ujetiga etácho uacarasade ujáningo, enga e uacasijnaringuéo, enga uacáringane máraque jogadi u ome Dupade uje uacayóyo ojningane cucha gáyode. 10Ujetiga gosi doi, enga doi Dupade ojningane cucha jnese, mu chó ojningai chojmarai gai, enga uté gosi jé iyogué to. Enga gajnui u ujetiga chó ojningane cucha gáyode jnese. 11Dupade upúsu uje chojninga: "Jé ca asa chequé quedéjnaraque." Enga upúsu to rĩ uje chojninga: "Jé ca apota chutígome bojórique ayoré." Ujeta ca asa gapu quedéjnaraque marínga, bajé bojórique ayoré enga pijoque báringai angoninguite parique ome Dupade ojningane cucha. 12Dupade ojningane cucha u uje chisi ome piotiguei ome danguresórone ujetiga ore jnoji pisijnaringuéone jmainie. Enga Dupade a chingo daroquéode udore quigode aja yoque jne ujetiga diga di enga chajire yocadode aja quigode. Jecute uacajnei tu ujetiga ajusópise uacaruode guio, jé aja uacadode guio jnese to. Chamáñaje a pajirique uacadode aja quigode to jne gu. 13Mu ujetiga ca yosṍco yocujórique ayoré iji dirode unojo, enga Dupade a ca chosõre yoque to jne ujetiga chajire yoquipesudode cucha aja quigode. Mu ujeta yosṍco yocujode ayoré iji dirode unojo, enga Dupade a chosõre yoque to jne ujeta chajire yoquipesudode cucha aja quigode. Enga a cho jne ujetiga yujnuéngo yocajnei tuté Dupade ujuyaqueque gai.
Yocanguretigai pijogúsorone u yocadode
14Yijorane uaque á, ujeta gosi chojninga: "Yangureta Jesús." Mu que pésu cucha arétique, ¿ma panguretigai tuté chiquetárase gosi te jne a? 15Ujetiga yocujórique Dupade anguresónique jmáta ome daguidéraque enga que urénga potique cusapo rĩ, enga beyoi enga osṍcho uté gosi. 16Mu ujetiga uacuñeque doi enga chojningame uté: "Bo ga tijode chopise jnángome ua jne, enga ca ajmáta ome piguidéraque, cucha pibotígo ore," mu que uaque gosi chosõre uté ome cuchárique, enga e que cuchárique tõrapísiji uaque gosi uruode udore. 17Isocai jé upo rĩ ome panguretigai. Ujetiga panguretigai ca nóna gosi ipesute omone enga que pitijínaquérique tṍraji panguretigai tuté. Mu gajnui tu cucha totique uje doi te bisideque.
18Jecute a gosi chojningárasa: "Banguretigai cuse ome ua. Jé basa uyu enga yate omone cuse." Be enga angopísa banguretigai taja yu bisideque uje que apésu cucha onique. Enga a yiji enga a yingo yanguretigai taja ua jne, uje a jĩraque pijoque gu jne ome yate omone. Jé basa ga panguretigai bisidétique que pijoque go. 19Banguretigai déji ujetiga angureta uje Dupápisi déji, enga que dupa uñeque déji siñeque. Mu que cuchadatépise udore go. Chamáñaje Satanás irógode changureta udore to, enga pisadodéringai déji ore to ome Dupade yui. 20¿Ga jé ca báyipieraque cuse a? Uje que apota araja cuchade udore quigode: uje que pate omone nóna panguretigai, enga e que cuchárique tõrapísiji panguretigai tuté. 21Dupade chimesẽre yocai jnani bajai Abraham nanique enga cho ayoré ujñapetáguiji. Chamáñaje que chãraque dajnacari Isaac nanique gu uje Dupade chirógaja ujetiga chujé iji gaserani gai. 22Bamo uje quene Abraham anguretigai pijoque nanique uje doi Dupade uruode quigode ome re. Enga quene anguretigai uome uje ate omone tocade iji. 23Enga ore urusarane Dupade urúo tocade uje chojninga: "Abraham changuretapise Dupade, jecute Dupade chimesẽre enga cho ayoré ujñapetáguiji." Jecute yĩ́caco Dupade jõrai aja Abraham uje dopísi Dupade uruode quigode gu.
24E uacamóño uje que gusu uje Dupade irasique ore ome ore anguretigai mu irasigápo ore rĩ ome ore átegoningáne to. 25Adi jé u ome dibéchoquía Rahab to nanique. Dupade cho ayoré ate ujñapeté iji ome ipesudode cucha omío to. Chamáñaje suse jnani bajai Josué irógode guio gu, enga cho ore quique ujetiga ore chajna dajeque uñai uje ore chayome Rahab urasade. 26Yirajágo uje ayoré toi que áyipieraque cuse, jecute que qué chijocásapo re rĩ. Jecute adi jec u panguretigai iji Dupade to. Ujetiga ca pimo pátegoningárique, enga cho to ujetiga toque panguretigai tuté to.
© 2021 Ethnos360