Isaías 11
11
Isaías chatata Isaí uté ájnape disi ejoi Crísto úringai ujnomerã́quedatépise
1Cachi jnani bajai Isaí toi nanique ga gajnua tu pore togué uje cṍraja jnumi.
Mu a chise dínique jne ujetiga ujniéraque suépo rĩ ga uté ájnape disi ejoi a u jne ujetiga ujnomerã́quedatépise.
2Ga Isaí ájnape disi ejoi uté garíjogonóri a u Pangarádejnai Dupade Ujopié Espíritu Sánto jne ga jé Ujopié iyiejna uaté jogadípise gatuaque.
Jecute a uté irajatigade jiépisi jne, jé aja ayuquetotiguéode to rĩ.
Ga etotiguei a ca eruénique cusapo rĩ iji deréjnane jnese.
Ga uté a chirajapise Dupade uruode quigode jnese jne, enga a angoninguite guesaguipise uté gatuaque jne ome Pangarádejnai Dupade.
3Ga a uté nína rome dajnéone Pangarádejnai Dupade iroquéo jne.
Enga a uté ajirique erámi unirisórone adode aja quigode jne, mu a ca chedu dajirigode ore acho, dadudigode ore urúo jne rĩ, mu a chajirápo ore áyipiedie aja quedéjnane rĩ ome dajiritigade udore.
4Enga ayoré jmatátique a jé ca todo iji uté iquei jne uje osorane upúsu jmatágode gu, enga a ca cho dajuñame uñeque bisideque jne.
Eduguéjnane uñane ore chijna pidi ome daquesugode dojo ayoré údode, jé basa ga uté oidode u daru iyiejájnane ome jnani sijnángone ore jnese jne.
Uru iyiejájnane a nóna ujñari taja guesi jne, ga a u jne jeta ate gajnaréngone ore toi ome ujñare cuchábi.
5Ga cho jetiga uté chigui daguidé ueradéjnanie ga aparagádei, ga cho daguidé iji daru uréone, jé aja dátegoningájnane ore.
6Ujetiga uté basája dáringai eduguéjna cuchape iji erámi udé jne enga a cucha ponai tangári uté uruode jnese.
Enga chaquĩ́ra cuchiso sijnángone jne ga chinoningase ore úringáringo sijnácho jne.
Enga caratade, áyasadie a ore moji uñane ejode jne.
Enga cuchiso sijnángone a ore nóna cuchiso parágode aja dajesúode jne.
Ga jé chopome caraté sijnánguenie to rĩ, uje a ore chise aquirájnaringui iji garánique mu que chachẽre ore iji uté.
Ga disi parátagabode a ore cho dachidé iji caraté chagudie jne ga ore chisa etabídode aja quedéjnane jne.
7Ga cuchiso sijnángone ababode a ore canare cuchiso parágode ababode aja dajesúode jne.
Ga cuchiso sijnángone a ore poti tu jnacarai to jne iji ore gachidode cuchiso parácho ujade.
8Ga jé chopome ugade to jne rĩ.
Enga disi parátagabode a canáji uté ejode jne, mu que tagu ore to.
Ga disi parátagatique a chise ugade iji piéraque ajei mu chájĩ mu que tagu jmanai gotique.
9A jé ca pipesute pocaningárique iji yingarai cucarãte údode jnese, enga a ca pipesute ayorérique ujuréraque iji uté to gotique jne.
Chamáñaje a quene erámi unirisórone chirajapise Dupade gu, uje a irágupúsu ore ajéode ome uté uru iyiejájnane quigode jnese jne.
Ga a uté isocai jé u guéode isocai ome yote quedéjnane. Uje guéode tagu yote quedéjnai ga irágu jochai ajei gu guéode.
Ga jé adi tu uté uruode to, a chĩreta erámi unirisórone ore ajéode ome daruode jnese ga quene ore chirajapise Pangarádejna Dupápisi uté to jne.
10Ga Isaí ujnié disi ejo uté a di jne ga chãrai chequécadaté iji gaté ga úringai piquetangore pijógome ore jnese.
Ga jé u ujeta erámi unirisórone jnese ore íjnongaja chequécadaté yui ujeta ore cho dajñaríji uté gari to.
Ga pininaquei jogadi tupúsu ome ore jne.
Currently Selected:
Isaías 11: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
