2 Tesalonicénses 3
3
Páblo chutṍri Dupade anguresórone iji ore idai Tesalónica ujetiga ore catecã́ri Dupade ome
1Yocujode Dupade anguresõre uaque á, e idógosi yurusarane unojo eruei, mu acatecãchoi Dupade ome yoque to ujetiga Yocangarádejnai ujnomei jĩraque chise erámi jnese. Enga ujetiga ore chimesẽre yocacajnaquéode to. Isocai tu uje uacamesecho to ica. 2Acatecãchópoi Dupade rĩ ujetiga chãraque yógome jnani áyipie eyúgode, sijnángone ore. Uje uacamóño uje que pangurete Jesús ome ayoréode jnese go. 3Yocangarádejnai que ajéninga darúrique, jecute a chisi ome petotiguei ome uaque jne. Enga a chirodápo uaque jne rĩ ome cucha gajnaréngone jnese. 4Yanguretágo Yocangarádejnai ome uaque ujetiga ajnerañome yocacajnaqué casodica ome uaque gaté. 5Yocajéode upo rĩ ome uaque ujetiga Yocangarádejnai chátaja uaque enga arajayopise Dupade ijnoraquei quigode. Yocajéode jé u to ujetiga adotáyo uágome cuchade, isocai tu Crísto uje chidota re ome cuchade icaite.
Páblo chacate ore uje Dupade anguresórone yocajneque to ujetiga yisago yoquejode
6Yocujode Dupade anguresõre uaque á, Jesucrísto ajéode u ujetiga yingongome uaque ujetiga acayoi quedéjnaringo ome Dupade anguresórone uñeque ujetiga ca pota chisa cucha pisatique, enga ujetiga ca doi yocacajnaqué casodica quigode to ome uaque. 7Uje uacarajáyo yocadode uje yugúcoji uacari ica, ujetiga aracho yoque. Uje que yiyágoji uacari bisideque ica, mu yisago cucha pisagode to ica iji uacari. 8Que yajópo ayorérique potique bisideque ica rĩ jetiga ca yoco oré. Mu yocujuya yóguiji dirode, dejade ore ica uje yisago cuchade ica. Yoquigaidi u gu ujetiga ca yipéco uacuñeque ujuréraque ica ome cuchárique. 9Yocajnei jé u ica mu ujetiga yutágoi uaque enga átayoja yoque ica. Mu jé yisago cucha pisagode ica ujetiga amíningachó yóguiji yocadode enga aracho yoque to aja. 10Yocajéode u ica enga yingongome uaque ica ujetiga gosi ca chisa cucha pisatique enga ca uté gosi taque to. 11Uje ore chingome yoque uje uacuñéngo que chisa cucha pisatígo. Enga ore áyipie jogadípise uje que pésu cuchárique. 12Yoquiroquei tu ome udore ore ujetiga ore cha dedoitigade. Enga ore chucué daquetangóño, enga ore chisa cucha pisatígo to. Uje Yocangarádejnai Jesucrísto jé ajéo ome ore gu.
13Yocujode Dupade anguresõre uaque á, beyoi uacate arégode gatuaque enga ca achóyo. 14Ujetiga uñeque ca doi yocacajnaquéode iji yocurusarane unojo enga adójningachopísa gosode jne. Enga acayoi quedéjnane ome udore gosode jne. Enga diga ore chajéngome dadode udore jne ome raque. 15Mu ca oyo uacamajo iji uté gosi. Mu aquírañome adode uje yocujo Dupade anguresõre gu.
Páblo urusarane eruei tu ne
16Yocajéode u ujetiga Yocangarádejnai uté uje chisi ome pajesereringane ome ayoréode, enga chisi ome uaque to iji dirode jnese. Ujetiga tijode chopo jnángome uaque rĩ iji cucha dacadode ore jnese. Yocajéode upo rĩ ujetiga Yocangarádejnai Jesucrísto déji uacari jnese jne.
17Páblo uyu upúsu uje yurúsãre yirasitigade unojo ome uaque. Enga jé yisocai u uné ome yurusarane jnese. Yigaidi u gu ujetiga jĩraque pirajaque uje yurusaranguipíso. 18Yajéode u ujetiga Yocangarádejnai Jesucrísto chatapísaja uaque. E gusu yurusarane. Amén.
© 2021 Ethnos360