2 Tesalonicénses 2
2
Páblo chacate ore ome pisijnaringuéone edo jnani adode
1Yocangarádejnai Jesucrísto a di jne enga chamáta yoque jne aja re. 2Jecute yijócha uacajéode údi ujetiga ca ecãcho uacajénique quitique ome cuchade udore yúode. Enga jé ca chajuque uacagutéraque jne ujetiga uñeque pota chãra uágome dacajnaquérique uje chiese acajnaquéode tṍraji Dupade. Jé upo pacajnaqué quedéjnarique uñeque ujetiga ca chajuque uacagutéraque. Ajusópo uaqueo rĩ ome purusãratígo jne rĩ uje chiese tṍraji yoque uje chiese yojnijo: "Yocangarádejnai e di ica erĩ́e." 3Jecute ajusópise uaqueo ujetiga ca paranguipise uaque. Uje cáma Yocangarádejnai di enga, a bajai u jne ujetiga jnanione iji erámi údode jnese ore tagu Dupade uruode quigode aja. Iji dirode udore enga a jnani tocade jne uje pisijnaringuéone edópise uté. U mu, Dupade imanique dimánei jnani uté qui. Enga quique obiréjnai u gajño pioi. 4Enga a uté u jne ujetiga umajo Dupápisi, jé aja ayoréode ore angurenone cucha jnese rĩ iji erámi. Enga diga jno enga chacája Dupade iguíjna cuchábi ajei te jne enga a chopise Dupade iji re jne. Enga a chãra ayoréode ore jnese jne iji erámi.
5¿Ma jé ca ajnusináño uje yugúsiji uacari ica iji uaquedai enga yacate uágome cuchade unojo quigode ica ya? 6Enga uacarajáyo uje pisijnaringuéone edo tuté jnani e igarisṍri cuse iji deréjnane unojo. Enga uté igarisṍri u uje qué chigaru. Gaidi tu gu ujetiga cáma tocade jé aja ujetiga chise Dupade ojningai tuté dire. 7E pijoque jnani uté ipoguiédode dajéo ome dasijnaringuéone iji erámi tuné. Mu cáma uté pijoque to. Amiri tu ujetiga Dupade chijnime uté igarisṍri iji erámi tuné enga jé u ujetiga yore erámi gai jnese. 8Enga ujetiga pisijnaringuéone edo tuté jnani chingo raja erámi, enga jé u jne ujetiga Yocangarádejnai Jesús chiboráta. Enga a chujépise uté jne ome dajñare iyiejnai. Enga chajnangarase aja quedéjnane jne ome dáringai iyiejna iji daríringai. 9A pisijnaringuéone edo tuté jnani garani u Satanás jne. Enga a jé jõra tu dajopiéjnane, dajñangone dacho ujetiga diga di. Enga a pitijabácho átedatéode ome ayoréode ore jne. U mu, ãraque ore ome datuátigade udore. 10Enga pisijnaringuéone edo tuté jnani a chãrapise ore jne ome daringaquédatéode. U mu, a arane u udore jne uje ore quique dimáneo Dupade ujuyaquédatéi yui. Chamáñaje udore que ore chise Dupade uru uréone unétique ica gu ujetiga piquetaque ore ome to. 11Uje ore chetaque Dupade uru uréone enga Dupade noñome ore iji paringaquéode jmainie. Gaidi u gu ujetiga ore changureta purupatáringane gatuaque. 12Jecute a Dupade ujuyápise daru uréone otigayasórone ore jnese jne. Uje ore irasiguipísode u dasijnaringuéone ica gu.
Dupade ajegaite danguresórone uyoque ujetiga piquetaque yoque
13Yocujode Yocangarádejnai ijnorane uaque á, que toc ujetiga yiyágo yacãco Dupade gai ome uaque. Chamáñaje ajegaite uaque nanique gu iji taningápisi ujetiga chiqueta uaque. Enga uaquẽrato u Ujopié Espíritu Sánto uje pésu uacáringai ujñapetac ome Dupade, enga jé jõrai u uru uréone to uje uacanguretáyo to nanique. 14Uje uacamesecho yocacajnaquéode Dupade urúo ica ome uacáringane piquetaque, enga Dupade ajegaite uaque ujetiga uacaninamáni tu Yocangarádejnai Jesucrísto ingoningájnai to iji gaté.
15Jecute yocujode Dupade anguresõre uaque á, uajate uáguiji uacanguretigade gatuaque. Enga ca acadíchoi yocacajnaqué casodica ome uaque uje yugúcoji uacari ica. Enga ca acadíchopói yocacajnaqué casodica ome uaque rĩ iji yocurusarane ome uaque. 16-17Yocajéode u ujetiga Yocangarádejnai Jesucrísto, Yocai Dupade chichagu picasitigai taja uacáyipiedie ajéode, ujetiga uome uacaru quitígo jnese, enga omío uacapesudode cucha jnese to rĩ. Chamáñaje Yocai Dupade u gu uje chosõre yoque enga chingo dajnoraquédatéi aja yoque. Enga a ca dequejnaque Dupade osõraquei ome yoque jne. Enga Dupade chisi ome pirasitigai ome yoque to rĩ ome yocajnéone cucha uome yui iji gaté.
© 2021 Ethnos360