2 Reyes 21
21
Judágosode ore eduguéjna cuchábi Manasés gajnarenguipise adode nanique
1Enga Manasés uté guejnanie siquerei 12 nanique uje basája dayé Ezequı́as charidi ome dáringai judágosode ore eduguéjna. Ga chácariji dáringai eduguéjna 55 años iji dedai Jerusalén uté to nanique. Ga Manasés uté daté i tu Hepsiba. 2Enga Manasés uté adode gajnarénguipı́so iji Pangarádejnai edominone nanique. Ga uté jmapié noñánguenie udire jé chopise daniri uté achamisõre bajade uje purása quedéjna ore. Enga purása quedéjnane udore upúsu uje Pangarádejnai chijócãre ore iji israélgosode ore iquei nanique, enga ichajapite israélgosode aja ore uniri uté. Mu Manasés uté iradigode upúsu purása quedéjnane udore aja ore adode. 3Uje Manasés dai casica Ezequı́as chinoningasipise darasade angurenone dupa tágode gajnéone gaserãte udore iji jogate umarone nanique, mu uté ujnacari Manasés e chirópo dai casica ajnangarañane udore aja gatéode rı̃. Ga qué jnopo dasijnaringuéone údi rı̃ ga pésapo daseradéjnane rı̃ ome dangureni dupa quedéjna Baal, ga chirópo dangurené dupa quedéjna oré iji pore pajénique rı̃ uje angurené uaté i tu Asera. Enga Manasés uté isocade udore jé cunguésõripı́si israélgosode ore eduguéjna casicaite isocade uje i tu Acab nanique.
Mu Manasés uté qué doi datéringane ga changureta gaté jogonórone cucha jnese ome re to nanique, chome guedé, guedoside, gúedodie ore. Enga chichaga dagataidie aja jnumi iji udore iquei ome ore úringáringo pisı́gai.
4Pudatı́ngajna nanique enga chiro dangurenone dupa tácho gajnéone gaserãte iji Pangarádejnai iguı́jnai ajei uté rı̃. Mu Pangarádejnai gãreque aro pisocai uté, uje e chojninga icaite:
–A yedu Jerusalén uté jne ujetiga yo yiyaridı́ji uté ome yi úringárique pisı́gai.–
5Enga judágosode ore eduguéjnai Manasés uté chachoque re ome dangurenone gaté jogonóño cucha ponáyo nanique - guedé, guedoside, guédo uásejnanie ore. Enga chiro ore gajnéone gaserãte, ga chicha gaseranone udore aja guesáringa gárode udore uje déji Pangarádejnai iguı́jnai dosadode nanique, ome dangurenone udore úringárique pisı́gai.
6A jé ca Manasés chibéro rome dasoca gajnaréngone ¡jõ! Enga ¡chimo jóroque re! uje doi ga chiquetame dabi ome úringárique pẽrapaite nanique.
Enga jecucha Manasés uté tibágui daijna porode nanique uje udore ore chetingare pujopié noñánguenie isocade. Ga tibágapoi pujopié gajnarénguenie etingarasórone uñane nanique rı̃ uje ore chiraja cucha tocachugode iji piquéode. Que gusu uté isocade udore, mu uté chirócapo daijna quedéjnane aja nanique rı̃ ujetiga ore tibidi togode. Jé aja uje Manasés tibágapoi daijna chagu quedéjnane rı̃ uje chiese irajataguipise ore ome pujopié noñánguenie adode rı̃, ga chiese ore tagúome ayoré togode ore ujopiedie nanique ome date noñángone udore.
Jiépisi judágosode eduguéjnai Manasés uté ate noñánguipı́sode uje jecucha pésu iji Pangarádejnai edominone gatuaque. Enga isocade udore chijnimipise Pangarádejnai ájningamı́e nanique.
7Enga Manasés uqué jé qué jno dajmapié noñánguenie údi, ga pudatı́ngajna nanique ga chiro dangurené Asera uaté oré iji pore pajei, ga chijna dora uaté aja Pangarádejnai iguı́jnai ajei, uje Pangarádejnai cho puyáguiji daguı́jnai uté mu. Uje Pangarádejnai uru diyajmane chósi te ome israélgosode ore eduguéjna casicaite David jé aja ujnacari Salomón nanique:
–E yo yajnéngu Yiguı́jna Cuchábi udé, jé aja pidai Jerusalén udé, ujetiga jecucha ası́yo yibai iji udé jne. Uje yedójnari tu Jerusalén gu iji israélgosode ore uáguedie jnese ujade jeta yo yiyaridı́ji uté iji deréjna pitade jnese jne. 8Enga a jé ca yijócãrapo israélgosode ore ome dáringane pumajo iji yerani tudé jnupe rı̃, uje yisı́ome ore dáqui cásodicáite udore nanique. Mu gusu ujetiga angoninguite guesaque yurasade israélgoso ome yiroquéode jnese, jé aja ujetiga ore doi yuru pirosobádode quigode udore jnese uje yiro casicaite Moisés chiroque ore aja nanique ujetiga ore pésu.–
9Mu angoninguite pariguipise ore ome Pangarádejnai uru quigode udore. Uje ore eduguéjnai Manasés uté chãra darasade ore ga inejerãte udore aja pisijnaringuédatéode úringane pipesucho gaté, gaté. Ga jé u uje judágosode ore jmapié ejo uaté suépise purása quedéjnane ate gajnaréngone gáyode ome úringane noñánguipı́so. Ga purása quedéjnane udore u uje ore ajningaraque puniri uté nanique, mu Pangarádejnai chejnápise ore nanique uje cáma israélgosode ore cho dajnéngu puniri uté.
Pangarádejnai pésu dáyipie nanique ujetiga chijócãre judágosode ore iji ore dáqui cásodicáite uniri, ga gose ore eduguéjna cuchábi Manasés jmapié noñánguenie
10Pangarádejnai uté tagúome darógode proféta udore ujetiga ore chajnerame uruode nanique. 11Enga Pangarádejnai urúpiso udojo, uje chojninga:
–Judágosode eduguéjnai Manasés uté isocade noñánguipı́some uyu. Ga uté ate gajnarénguipı́sode suépise puniri udé achamisõre bajade, amorréogoso, ore isoca gajnaréngone gáyode jnese. Mu que gusu uje uté pésu pisijnaringuéone, mu jé chuságaja urasade judágoso udore ore to, uje ore eduguéjnai Manasés chiroque ore aja dangurenone ayoré gajnúo adode jeta ore pésu. 12Jecute Pangarádejnai, israélgosode ore angureni Dupa, uruode chósi te: "¡Adójnachopı́sa yuruode é! Uje a yı̃ri cucha dacate gajnarénguipı́sirique údi iji uaquedáidatéi Jerusalén jne, ga a jé chuságaja uacaniri udé Judá údode jnese jne. Ga yirı́ringui cucha dacate gajnarénguipı́si uté a chajuguipise ore agutedie jnese uje ore chudute uacajnomei uté iji uacarosadode jne. 13Uje a yejnápise Jerusalén uté jne, ga a yadi tu yisoca casicaite uje yejnápise israélgosode ore idáidatéi Samária uté nanique. Enga a yinoningasipise Jerusalén idaisórone udore to jne, enga a jé cunguésõri yisoca casicaite ome israélgosode ore eduguéjna Acab ájnape disi ejode udore ore. A yi jne enga a yı̃ropise Jerusalén jne, ga a tita ajei ome idaisórone udore jnese jne. Ga yacãra pidai Jerusalén udé aja bajóraque uje pagapié. Ga gosi básome chagúi ga churu bajo ajei, enga changuñéra dosadode jnese, mu chorei ajei tiji jnumi iji quigade ome úringai ajeguesague. ¡Enga a jé tita Jerusalén uté ajei ome uaque to, judágosode uaque á!"–
14Enga Pangarádejnai uruode udojo quisórone jé upo judágosode ore rı̃, uje chojninga:
–A yijı́ome yurása amirone udore iji te jmete jne. Ujeta ore chapite iji dı́nique, mu a yicha ore aja ore umajosórone jmainie jne ujetiga ore sué ore gai. Ga a ore gajnui tu pugúcha pasitique jne, enga ore umajosórone jnese a chase ore ugúchade udore aja quedéjnane, ome ore úringane pajnoñasóño. 15Enga a yẽra yurasade udore gu uje que ore chibéro rome date gajnaréngone udore uje ore pésu iji yedominone, enga ore chiroque yuja yúringai ájningarãque. Enga jé ore isoca uté gatuaque, jé iji diri uté uje yijnime ore dai bajade iji egı́ptogosode ore josipiedie jmainie nanique. Mu que ore isocai uté chejñu riji ore gotique, ga jé qué chuságaja deréjnai udé to uje ore chiroque yu aja yúringai ájningarãque.–
16Que gusu judágosode ore eduguéjnai Manasés isijnaringuéone udore uje uté inejerãte darasade judágose aja pisijnaringuéone úringane pipesucho iji Pangarádejnai edominone gatuaque nanique, mu pibijnacoro gose uté to ome darasade ore iji dedai Jerusalén uté. Uje que urasade ore bárique cuse, mu a jé chujé ore bisideque iji Jerusalén údode. Ga jiépisi yugode udore ga ore iyojnanie chayója ñane iji ore idai uéchade jnese nanique.
Judágosode ore eduguéjnai Manasés toi nanique
17Enga cucha dacate amirone jnese iji Manasés uté úringai eduguéjna, jé aja ipesudode cucha jnese, jé aja uté isijnaringuéone udore uje pésu nanique, ga purusãracho udore iji darujna aode uñane uje ore churúsãre judágosode ore eduguéjnane adode iji udore nanique.
18Uje Manasés uté e toi nanique, enga ore jno údi aja acárigui pori jogadi iji iguı́jna cuchátique ejórique nanique, ga ore chijóchame iji uté. Ga uté ode jogadi uté i cuse nanique, ga i tu Úza.#21:18 Que ore chijóchame Manasés uté iji judágosode ore eduguéjna cásodicáite ore ódedie jogadi uté nanique.
Iji Manasés quigade nanique, ga ujnacari Amón basája charidi ome dáringai judágosode ore eduguéjna.
Iji Amón uté úringai judágosode ore eduguéjna, enga adode chopise dai Manasés ate gajnaréngone nanique
19Enga Amón uté guejnanie siquerei chise 22 años uje quene basája dáringai judágosode ore eduguéjna nanique, enga chácariji dáringai eduguéjna 2 años iji dedai Jerusalén uté. Enga Amón uté daté u Mesulemet nanique. Ga uaté idai i tu Jotba. Enga jnani bajai Haruz uro Mesulemet uaté nanique.
20Enga Amón uté pésupúsu date gajnaréngone iji Pangarádejnai edominone nanique, ga jé jmapié chopise dai casé Manasés jmapié uje pésu pisijnaringuéone iji Pangarádejnai edominone ica. 21Uje Amón uté chirate dai casica aja adode jnese ga que chuchı́e ti yui ome uté guı́piedie udire. Ga uté jé isı́gayode jé upúsu dai casica angurenone dupa quedéjna, enga chichaga dagataidie aja jnumi iji ore iquéode, ga tẽrája ore nanique. 22Enga jé u uje Amón uté noñome Pangarádejnai uru iyiejnane iji te jmete, uje uté dáqui cásodicáite ore angureni Dupa u uté mu. Enga que dopı́si Pangarádejnai uru pirosobádode udore quigode gotique.
Judágosode ore eduguéjnai Amón chise dáringai chuque nanique
23Mu chise diri nanique uje ore eduguéjnai Amón iróquegatéode ore cháta dáyipiedie aja ñane ome deduguéjnai úringárique chuque yui. Ga ore chujépise uté iji iguı́jnapísi ajei nanique.
24Mu judágosode jı̃raque jnutaque ore nanique ome ore eduguéjnai yungórone. Ga ore doi yungórone ore, jé aja ore jorane jnese uje ore cháta dáyipiedie aja ñane ome uté úringárique chuque yui, ga ore chujé ore jnese. Ga jé u uje ore patı̃́ora dei tuté nanique. Quigade enga judágosode ore doi Amón uté abi nanique ga ore chicháji dai charidi ome úringai judágosode ore eduguéjna. Ga Amón uté abi uté i tu Josı́as.
25Enga Amón adode uñane jnese uje pésu iji dáringai eduguéjna, purusãracho udore iji darujna aode uñane uje ore churúsãre judágosode ore eduguéjnane adode iji udore nanique.
26Enga ore na Amón uté aja gajné ode iji acadie pori jogadi uté uje i tu Úza.#21:26 Que ore chijóchame Amón uté iji judágosode eduguéjna cásodicáite ode jogadi nanique, mu ore chijóchame uté iji dai casica Manasés ode ejoi iji acadie pori jogadi uté uje déji eduguéjna cuchábi iguíjnai ejoi.
Enga jé u uje Amón abi Josı́as uté basája dai charidi ome dáringai judágosode ore eduguéjna.
Currently Selected:
2 Reyes 21: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
