2 Reyes 22

Qué disape Josı́as suté uje basája dai casica Amón charidi ome dáringai judágosode ore eduguéjna nanique

1Uje Josı́as uté quene basája dáringai judágosode ore eduguéjna, enga guejnanie siquerei chise 8 años nanique. Enga Josı́as uté chácariji dedai Jerusalén 31 años nanique ome dáringai eduguéjna. Ga Josı́as daté uaté i tu Jedida, enga uaté idai i tu Boscat. Enga jnani bajai Adaı́as uro uaté nanique.

2Enga Josı́as uté pésu cucha arégode iji Pangarádejnai edominone nanique. Ga chijnime dáqui gatei David átegoningáne ¡janipe! iji dı́nique. Enga que cho cutúgome pate arégode udore mu cáputapı́siji jnumi.

Josı́as uté chucué dáyipie iji dajei nanique ujetiga pésapo Pangarádejnai Dupade iguı́jnai úringai uerate aja gaté.

3Uje Josı́as uté guejnanie siquerei e chise 18 años nanique ome dajnepı́di judágosode ore eduguéjna, enga jé u uje Josı́as chiroque daroguipísode uñai uje i tu Safán aja Pangarádejnai iguı́jnai ome daroquéode. Uje Safán uté dayé i tu Asalı́as, ga dáquide i tupo Mesulam rı̃. Enga Safán uté gajnepı́di u nanique uje churúsãre cucha tocachugode iji daniri, jé aja deduguéjnai adode.

Enga Josı́as chósi tome daróguipı́si Safán uté:

4–Bo ga abágui sacerdóteode ore eduguéjnai Hilquı́as uté iji Pangarádejnai iguı́jnai. Ga atṍri uté ujetiga chamáta yocurasade judágoso ore gueranenie plátai aja ñane jne jeta pijoque plátadie batigárique. Yojninganie plátai u pajóningane uje yocurasade jecucha di údi gatuaque iji Pangarádejnai iguı́jnai, uje Pangarádejnai iguı́jna piagoi irodisórone ore chañuru guio. 5Ga ango Hilquı́as uté ujetiga chicha plátadie udire aja capatadie udire jmainie uje ore ajirique Pangarádejnai iguı́jnai uté yui ome úringai pipesudápo aja gaté rı̃. Jé basa ga capatadie a ore gajnepı́di u jne ujetiga ore cho oré itrabajasórone udore uje ore pésu péroringáne iji Pangarádejnai iguı́jna cuchábi uté. 6Enga poridie irábesórone carpintéro u udore uñane uje capatadie a cho ore oré jne, jé aja Pangarádejnai iguı́jna cuchábi orasórone ore uñane. Que gusu udore, mu capatadie a ore chimánapo albañiles rı̃, udore uje ore chirajapise ladrı́llode isocade.

Ga capatadie a ore gajnepı́di tupo jne rı̃ ujetiga ore doi táblade oredie ome plátadie udire, jé aja cucarãte uejade oredie, uje tiroque udore eruéode. Enga a jé u jne ujetiga ore pésu péroringáne iji Pangarádejnai iguı́jnai uté ga a ueradápo jne rı̃.

7Mu jé ca uacuñeque chucué ujetiga capatadie chatatapo dagaitı́go cucha oredie ome uaque gaté rı̃, uje ũrepı́sei capatadie udire gu, ga uajate ore ome plátadie.–

Ga udore u judágosode ore eduguéjnai Josı́as uru quigode ome sacerdóteode ore eduguéjnai Hilquı́as, uje Josı́as iroguipı́si Safán chajnerame ome Hilquı́as uté.

Sacerdóteode ore eduguéjnai Hilquı́as quene chise darujna aode uñane iji Pangarádejnai iguı́jnai ajei uñai uje Moisés urusãracho udore nanique

8Uje sacerdóteode ore eduguéjnai Hilquı́as qué chisa dejode iji Pangarádejnai iguı́jnai uté, mu ¡chimo jóroque re! uje chise darujna aórigo iji ajéode uñai. Ga jé u uje Hilquı́as chojningame eduguéjna cuchábi Josı́as iroguipı́si Safán uté:

–¡Cajirape to! Quene yise Moisés casicaite urusarane Pangarádejna uru pirosobácho iji Pangarádejnai iguı́jnai ajé uñai.–

Ga jé u uje Hilquı́as chisı́ome darujna aode udore ome Safán nanique, ga jé u uje chajiripise aja quigode to. 9Uje Josı́as iroguipísi Safán uté cha Moisés urusarane udore úringane pajiricho ga jé u uje chajnésaru deduguéjnai gai ujetiga chingo cucha dacate tocachugode aja uté. Ga chise uté, ga chojningame:

–Yoqueduguéjná, e baroguipı́sode udore chamáta bojninganie plátai udire aja ñane uje déji Pangarádejnai iguı́jnai uté ajei uté que. Ga e ore chisı́ome capatadie udire uje ore ajirique Pangarádejnai iguı́jnai yui ome úringárique pipesudápo aja gaté rı̃.–

10Mu que gusu Safán uté uruode udore ome deduguéjnai Josı́as uté, mu chingopome uté rı̃ uje sacerdóteode ore eduguéjnai Hilquı́as chisı́ome darujna aórigo ome que. Ga Safán uté doi ga naráraja gai iji eduguéjnai Josı́as iquei.

11Uje eduguéjnai Josı́as chudute Moisés urusarane Pangarádejnai uru pirosobácho udore quigode, enga jé u uje jı̃raque chajnangarase daguidedie iji darobé gai ome dáringai áyuguhebátaguipı́se nanique. 12Ga eduguéjnai Josı́as tibidi daroguipı́sode aja re nanique ujetiga ore tibágui. Enga pijnángaidóde ore ı́ode u udojo: sacerdóteode ore eduguéjnai u uñai uje uté i tu Hilquı́as; Safán ujnacari upo uñai rı̃ uje i tu Ahicam; Micaı́as ujnacari upo uñai rı̃ uje i tu Acbor; Safán upo uñai rı̃, uje uté gajnepı́di u ujetiga churúsãre cucha tocachugode iji daniri, jé aja deduguéjnai adode; jé aja eduguéjna cuchábi iróquegaté uté uje ajiriguipise deduguéjnai uté yúode gatuaque, ga uté i tu Asaı́as.

13Enga eduguéjnai Josı́as chingo dáyipie quigode aja dabijnángaidóde udore ore uje ore chise uté. Enga chojningame ore:

–Boyo, ga abáchoi Pangarádejnai uruode juto uaté jeta chijócha Pangarádejnai ajei údi ome uyu jeta uté áyipieraque pijógome uyu. Mu que gusu ome uyu, mu ome idaité ore to, jé aja judágosode uyoque jnese. Yigaidi tu gu ujetiga Pangarádejnai uté cho daruode udore quigome uyoque uje purusãracho iji yoquiyade darujna ao udore. Uje Pangarádejnai uté cho júruru ome uyoque ome dáringai tagu dejo. Enga gose yocayode jnani bajácho ore bade ome uté, uje que ore dopı́si uru quigode udore jnese uje purusãracho ome uyoque iji yoquiyade darujna ao udore.–

Pangarádejnai angúrome proféta chequé uaté Hulda chatata cucha dacate piqueminórone ome Josı́as uté

14Ga jé u nanique uje Josı́as utocaidı́so udore chicáji ojninga chequé yui uje uaté i tu Hulda, enga Pangarádejnai angúrome proféta uaté. Enga Hulda uaté abai i tu Salum ga uté gajnepı́di u nanique uje chajire sacerdóteode iguidedie yúode nanique iji Pangarádejnai iguı́jnai. Ga Salum uté dayé i tu Ticva, ga dáquide i tu Harhas. Enga proféta uaté iguı́jnai déji ore idai Jerusalén uécha uñai uje ore chı̃́care Bárrio Nuévo aja uaté jogadi uté.

Uje Josı́as utocaidode udore chise chequé uaté iguı́jnai nanique, enga ore chingo deduguéjnai uru quiso aja, uje pota chiraja Pangarádejnai áyipieragome re jé aja urasade ore jnese. Enga sacerdote Hilquı́as u udore uñai uje tibágui uaté, enga jorane u Ahicam, Acbor, Safán, Asaı́as ore.

15Ga Pangarádejnai angúrome proféta uaté chajnai ore uruode, ga chojninga:

–A qué yatataba Pangarádejnai, israélgosode ore angureni Dupa, áyipie quigode ome uaque. Enga uté uruode chósi te: "Ajnerame yuruode ome jnani uté gosi uje chiroque uágaja gadoi. 16Ga ósi tome uté jne: '¡Adójnanga Pangarádejnai yuruode udojo á! Uje a yiroque yujuyaqué noñángone aja uaquedai Jerusalén udé, ga a jé chuságaja idaité ore jnese jne, uje a ore chejnáreque re ome dáringane pujuyagaite. Enga cucha dacate tocachugode udore ajnai tu yuruode udore uje purusãracho iji darujna aode udore uje judágosode uaqueduguéjnai chajire que. 17Enga yojningáiso cucha dacate gajnarécho udore a tocade jne gu uje yurasade e ore noñome yu iji te jmete, ga ore chãru cucha ai unérone inciénso ome dangurenone dupa quedéjna. E ore chijnimipise cutejmai yajei dotáninga ome ore ipesudode ayoré gajnúo uje ore chiro ome dajmainie. ¡Enga a jé ca paquı̃raque yu jne ome yúringai júruru ome yurasade ore!'"–

18Mu proféta Hulda uaté qué chajnerapome Josı́as uté gajnéone Pangarádejnai urúo ome utocaidode ore gaté rı̃, uje chósi te:

–Angoño yuru ejode udojo aja judágosode uaqueduguéjnai uté uje iroque uágaja de uje pota chiraja Pangarádejnai áyipiedie udire quigode ome re. Ga ojnichome uté: "Pangarádejnai, israélgosode ore angureni Dupa, yuruode udojo júdi tu badudigode yurúo uje ore naráraja baquei dirı́ca: 19'Josı́as, yimo ua dirı́ca uje serẽrája báyipie ome uyu. Ga bajosi ua iji jnumi iji yiquei uje badute cutejmai yijmongaquéo udore ome Jerusalén, jé aja idaité ore jnese, uje a yo yujuyágaidóde iji jerusaléngosode ore ga a yı̃ropise yurasade udore iji erámi jne.'"–

Enga Pangarádejnai uruode chopósi tome Josı́as rı̃:

–Josı́as, uje yipáñaji báyuguhebátigai uje babo iji yiquei, ga bajnangarase baguidedie iji barobé gai dirı́ca, enga jé ũrepise uje yangári ua. 20Jecute, adójnanga yuruode á: uje a jé ca apáñaji yojningáiso cucha dacate gajnarécho udore ome bedodie uje yı̃́care ome bajogadi udé, mu a ore tocade jne iji baquigáningo. Enga a yujuéga ga bajnei pajesereringa uté a jé chuságaja bagachotique jne, jé aja ujetiga ore chijóchame ua iji bode uaté.–

Ga jé u uje Pangarádejnai uruode juto uaté cha dajúdode Pangarádejnai urúo ome eduguéjnai utocaidode udore. Ga jé u uje ore chajni deduguéjnai gai, ga ore chingo gajnéone Pangarádejnai urúo ome uté.

Currently Selected:

2 Reyes 22: Ayore

Highlight

Copy

Compare