2 Reyes 20
20
Judágosode ore eduguéjnai Ezequı́as ejnarétaque nanique, mu Pangarádejnai chosõre ga chiqueta uté
1Enga deréjnane udore u nanique uje Ezequı́as ejnarétaguipı́se ga dépisi pitoringai gai. Enga proféta Isaı́as uje dayé i tu Amoz e tibágui uté nanique iji úringai ejnarétaque. Enga Isaı́as chojningame Ezequı́as:
–Ezequı́as, Pangarádejnai uruode cuse ome ua ga uruode chósi tome ua: "Be ga abidi bajogasúode ore ga ası́ome baroqué erueminóningo ome ore jeta ore pésu báyipiedie aja quigode jne. Uje a ca ninguira ua jne, mu bejnarei uté a chequésãre ua jne."–
2Ga Ezequı́as jnusiétaguipı́se uje chudute dajnéone Pangarádejnai urúo uje a toi jne, ga jé u uje chumuchase re ga tajia daguı́jnai dosadi pared yui iji dapácadi uté. Quigade enga Ezequı́as chejna daguesi ome dacatecãraitigade ome Pangarádejnai nanique. 3Enga chojninga:
–Pangarádejná, yijócha bajei údi iji de ujetiga jé ca acadı́gui uje ueracho yipesudode cucha iji bedominone. Bamo yu uje yedu ua iji yáyipie ga yajna cucha uréone iji jnumone iji yucuecaringuei.–
Enga jé u uje Ezequı́as básome darai ga popı́siji dejode.
4Udojo quigade ga proféta Isaı́as uté jnoji eduguéjnai Ezequı́as gari ga e chajnésarurásu dayaritique nanique. E mu Isaı́as cáma chisı́pise eduguéjnai iguı́jna cuchábi eruei, uje qué déji guesáringane gatócorominóri iji guesi tiji iguı́jna cuchábi uté. Enga jé u uje Pangarádejnai catecã́ripisi Isaı́as uté, ga chojningame uté:
5–Isaı́as, ajniapója yurasade ore eduguéjnai Ezequı́as gai rı̃, ga ajnerame yuruode udojo ome uté, uje chósi te: "Ezequı́as, Pangarádejnai uyu, báqui casicaite David angureni Dupa uté. Enga e yudute bacatecãraitigade udore ome yu uje bajócha yajei údi que, enga yimópo beducadode udore rı̃. Ga cajire to, uje a yiqueta ua jne. Ga a chise dire gadióguei iji yoquiquei dirome ga a oru cucarãte oroné uaté aja yiguı́jna cuchábi yui jne. 6Ga a yajnerame bacuecaringuei jne, ga siqueredie a chise 15 jne rı̃ iji baquei. Enga a jé ca yujuéga ujetiga abasája ası́riagosode ore eduguéjnai jmainie jne. Ga a yãrácapo Jerusalén ome ası́riagosode ore eduguéjnai uté rı̃. Enga gose yijnoraquei ome yúringai pisı́gai iji Jerusalén udé. Jé upo rı̃ uje yajo yuja yuru uréone udore uje yichagája yiro casicaite David uté yui nanique."–#20:6 Pangarádejnai uru uréone uje chichagája eduguéjnai David yui nanique chósi te: "Yuru quigode u ome bape disi ejórigo ore jeta ore susípise dadode guio ome uyu, ga ca ore chimoque doi yojningane cucha iji yiquei gatuaque ome dáringáringo ũréo. Ujetiga ore chejna dáyipiedie, dáringane ayoré jnese aja uyu, enga a yipésu jne ga a jé ca chimoque bayaripi cuchábi udé charipiésonique jne iji bape disi ejórigo ore ujade gatuaque jne, ome dáringáringo peduguéjna iji israélgosode udore ore ujade." (1 Reyes 2:4)
7Enga jé u uje Isaı́as chajniapója Ezequı́as gai rı̃ ga chajnerame Pangarádejnai uruode ome uté.
Quigade enga Isaı́as chutṍri Ezequı́as irógode uñane ujetiga ore doi poria adie uje i tu hı́go. Enga ore doi uruode ga ore chı̃ro hı́go adie udire iji ñane, ga ore changuñéraja deduguéjnai urõsoringuei uté, ducose parique. Enga quigade ga quene ninguira Ezequı́as uté nanique.
8Mu uje cáma ninguira Ezequı́as nanique ga Ezequı́as pésu dapregúnta ome Isaı́as bajáguiji cucha dacadode udore yui, ga chojninga:
–¿Ama pijogúsonique cucha ome yu jne a, ujetiga yiraja uje jé ũré enga Pangarádejnai chiqueta yu jne, jé aja ujetiga yoru cucarãte oroné uaté aja Pangarádejnai Dupade iguı́jna cuchábi yui iji dire gadióguei dirome?–
9Ga Isaı́as chajnai Ezequı́as uruode ga chojningame uté:
–Pangarádejnai a chisı́ome daruode pijogúsonique cucha ome ua ujetiga araja uje a uté uruode tocade jne uje chichagája bei, Ezequı́as. Enga pijogúsõri a u reloj quedéjnai uté jne, uje pijoque guedé batigárigo iji deréjnai ome uté. ¿Ama ueratigárique a, jeta guedé chichaga raja reloj quedéjnai pidi uté ga uburúdi jı̃raque chajna daquei 10 grádas, Ezequı́as? ¿Jeoga ueradi tu ome ua jeta reloj quedéjnai pidi uburúdi uté chajnésara daquigade 10 grádas?–
10Ga Ezequı́as chajnai Isaı́as uruode ga chojninga:
–Que cucha ibiragome yu ujetiga reloj quedéjnai pidi uburúdi chajna daquei, uje jecucha reloj qui chojmara gatuaque gu. Mu cucha ibirai tu ome yu ujetiga pidi uburúdi chajnésarapo aja daquigade rı̃. Jecute yipotigádi tu jeta pidi uburúdi iji reloj quedéjnai uté chajnésarapo aja daquigade garósi rı̃, enga chise 10 grádas aja daquigade jne.–
11Ga jé u uje proféta Isaı́as chijócha Pangarádejnai ajei údi ome reloj quedéjna pipesudi uté uje ore chı̃́care deduguéjna casica Acaz i aja reloj uté nanique. Ga jé u uje Pangarádejnai tangári Isaı́as ajei jochaquéode ome re ga pésu ujetiga pidi uburúdi iji reloj quedéjnai uté chajnésarapója daquigade garósi rı̃, ga 10 grádas u nanique.
Jecute Ezequı́as chiraja uje dáringai ijoréjna jogadi turásu ome Pangarádejnai isocai uté.
Babilóniagosode ore eduguéjna cuchábi uté chiroque datocaidode aja Ezequı́as yui ujetiga ore taquirı́ji uté
12Enga deréjnane udore u nanique uje purása quedéjnane uje babilóniagose ore eduguéjnai cuse uje i tu Merodac-baladán, ga uté dayé i tu Baladán. Enga babilóniagosode ore eduguéjnai uté chosõripise Ezequı́as ujnomei nanique uje chudute to uje ejnarétaguipı́se que. Jecute churúsãre darusarane ome judágosode ore eduguéjnai Ezequı́as uté, ga utocaidode ore jno urusarane udore údi ome Ezequı́as nanique. Enga que gusu urusarane udore, mu ore chijnapo deduguéjnai guerani regálo aja uté to rı̃.
13Enga Merodac-baladán utocaidode di iji Ezequı́as nanique, ga uneréjna ore yui ome Ezequı́as uté, enga que chuseque ore. Enga Ezequı́as jno ore údi aja cucha orerane jogadi ujetiga ore chajire ugúchade udore. Ga ingoméone ome ore u pláta, óro, cucha ai unérone, jé aja aceite uñai uje uneréjna uté ai to. Que gusu cucha orerane udore, mu Ezequı́as chingopo dõrachade jogadi aja babilóniagosode ore eduguéjnai utocaidode rı̃. Enga que ore chimoque cuchárique iji Ezequı́as añerane cucha orerã́cho jogadode udore jnese gotique jeta jé ca Ezequı́as chingongara aja ore. Mu ore chajire cuchade jnese iji iguı́jna cuchábi ajei, ga jé chuságaja gajnepı́di jnupe jnese to, uje que Ezequı́as pógu cucha uñéngome ore.
14Iji babilóniagosode eduguéjnai utocaidode udore quigade ga jé u uje Pangarádejnai angúromei proféta Isaı́as tibágui Ezequı́as uté, enga chojningame uté:
–Ezequı́as, ¿Ama jnanione udore tṍraji rique que a? ¿Cho rique ore uruode quitı́gome ua que a?–
Ga Ezequı́as chajnai Isaı́as uruode enga chojninga:
–Ore tṍraji punire idájai uje i tu Babilónia.–
15Ga Isaı́as chojninga:
–¿Ore imone cucha gotı́go iji baguı́jna cuchábi uté ajei que a?–
Enga Ezequı́as chajnai Isaı́as uruode ga chojningame:
–Que ore chimoque cucha uñeque iji yiguı́jna cuchábi ajei, ore chimo jnese. E yingongara yañerane cucha orerã́cho jnese aja ore, ga que yipógu cuchárique ome ore.–
16Enga jé u uje Isaı́as chajnerame Pangarádejnai uru quigode ome Ezequı́as nanique, ga chojninga:
–Ezequı́as, angáripı́si bajnéone Pangarádejnai uru quicho udojo ome ua. 17Uje Pangarádejnai chósi te ome ua: "Adójnanga uje a chise dı́nique jne ga babilóniagosode a ore jno baguı́jna cuchábi jogonórone cucha jnese údi aja daniri Babilónia jne. Mu que gusu bagúcha ueradode udore, mu a ore jnopo bañerane báqui cásodicáite ore ugúcha orerã́cho jnese údi aja Babilónia to jne, uje pañeracho udore jnese jé aja diri tudé. Ga a ı́jnoque bagúcharigo iji baguı́jna cuchábi ajéode jnese jne. 18Mu que gusu bagúchade jeta ore jno údi jne mu a ore jnopo bape disi ejórigo uñane údi to jne rı̃ aja daniri Babilónia uté. Enga a ore chijnime bape disi ejórigo curẽ́tigo jne, ga babilóniagosode ore eduguéjnane a chopise daróguiji ore jne ga ore chácapı́siji eduguéjna cuchábi iguı́jnai jne ome dáringáringo abéracho."–
19Ga Ezequı́as chojningame re iji dáyipie:
–A cucha dacate gajnaréngone udore tocade jne iji yiquigáningo, mu ome uyu ga cáma chise yu iji deréjnane udojo; mu a qué pajesereringai déji yoque iji yúringai tudé ueca, ga a ca cuchárique chósi tiji yoque.–
Ga jé u uje Ezequı́as catecã́ri Isaı́as enga chojninga:
–Jé uerate batatagode Pangarádejnai urúo udore quigode ome uyu.–
Ezequı́as toi nanique ga abi Manasés chácariji dai charidi ome dáringai judágosode ore eduguéjna
20Enga cucha dacate amirone udore iji Ezequı́as úringai eduguéjna, jé aja uté uajatiguei jnese, e purusãracho udore jnese iji darujna aode uñane to uje ore churúsãre judágosode ore eduguéjnane adode iji darujna aode udore. Ga ore churúsãre Ezequı́as isocai uté to uje ipesute yodi aja ore idai Jerusalén ajei nanique. Uje Ezequı́as chiro tánquedaté, ga chichaga cáñone aja dora tánquedaté uaté ga jé u uje chorei yodi iji ore idai Jerusalén uté ajei ome cáñone udore. #20:20 Adójnacho 2 Reyes 18:27, jé aja nota de pié iji versículo uté, uje chatata Ezequías isocai ome dora tánquedaté uaté nanique.
21Mu chise diri nanique ga Ezequı́as chirate dai bajade aja toi to, ga abi Manasés basája dayé charidi ome dáringai judágosode ore eduguéjna.
Currently Selected:
2 Reyes 20: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
