2 Reyes 19
19
Pangarádejnai chichaga daru ueradode aja Ezequı́as, urasade ore yui nanique
1Enga Ezequı́as jnusiétaguipı́se uje chudute ası́riagosode eduguéjnai iroguipísi ichietabáitigade ome Pangarádejnai uté, jé aja ojñane jnese. Enga jé u uje Ezequı́as chajnangarase daguidedie iji daróbabia gai ¡jora! ¡jora! ¡jora! Ga jé u uje chacája daguidé, pujnusiétigade gajné uje chichagu ore gáyode ¡teque! ¡teque! nanique. Ga jé u uje jno ga cáputapı́siji Pangarádejnai iguı́jnai ga chacája uté ome dáringai áyuguhebátaque uté.
2Enga Ezequı́as tibidi datocaitı́go ujetiga chiroque ore aja Pangarádejnai angúromei proféta yui to uje i tu Isaı́as nanique, uje Amoz ujnacari uté. Enga Ezequı́as utocaidode u udojo: Eliaquim u uñai uje uté gajnepı́di u ujetiga chajire eduguéjna cuchábi iguı́jnai yúode nanique. Ga Sebna upo uñai rı̃ ga uté gajnepı́di u ujetiga churúsãre cucha tocachugode iji ore uniri uté nanique, jé aja ore eduguéjnai adode. Que gusu Ezequı́as utocaidode udore, mu Ezequı́as chutõrapoi Pangarádejnai irógode sacerdóteo uñane rı̃ uje e choquı́jna ore iji dojode sacerdote ujade. Ga jé u uje Ezequı́as utocaidode ucode jnese chacája daguidé pujnusiétigade gajnenie to uje chichagu ore gáyode ¡teque! ¡teque! nanique. Enga ore nóna ñane aja Isaı́as uté yui, ujetiga ore chajnerame deduguéjnai uruode ome Isaı́as uté. 3Enga ore ajnerámeone deduguéjnai urúo chósi te:
–Isaı́as, yoqueduguéjnai Ezequı́as uruode u yocujúdode udojo ome ua, uje chósi te: "Páyuguhebátigai gose diri tudé, ga cho jeta chuque judágosode yocúdode iji diri tudé, jé aja uje yajéjome erámi. Enga yacãco yógaja chequéraque uje áyuguhebaté uje e dimánerase ujetiga ica base, mu atı́base uaté iji dabi achaminone jmainie. ¡Que yitiójo yocajnéone cucha dacacho gu! 4"Jecute yijócha bajei údi, Isaı́as, ujetiga acatecã́ri Pangarádejnai ome judágosode amirámone suyoque to uje qué yiquecágo iji de. Chamáñaje ası́riagosode eduguéjnai chiroque datocaidi uté aja de gu jeta chietáyime Dupa Uecai uté que. ¡Mu yipésupú ga Pangarádejnai, bangureni Dupa a chidójnangarása ası́riagosode ore eduguéjnai utocaidi uruode udore jne, jõ! ¡Ga yipésupú ga Pangarádejnai Badupade dorási ga cho dajuñame ore eduguéjnai uté ome ichietabáitigade udore uje e chudute ome re, jõ!"–
5Ga udore u Ezequı́as uruode uje utocaidode chajnerame Isaı́as uje e ore chise uté nanique. 6Enga Isaı́as chajnai ore uruode ga chojninga:
–Abáchopói uacarósõri Ezequı́as uté jne rı̃ ga oyósi tome uté jne: "Pangarádejnai chósi tome ua que: 'Jé ca atodo badudigode cucha udore, ası́riagosode ore eduguéjnai iroque cucha bisidégode udore ore ichietabáitigade ome uyu. 7¡Adójnangapı́sa Pangarádejnai yuruode udojo to á! Uje a yijocase ası́riagosode ore eduguéjna cuchábi áyipie jne, ga a chudute dajnéone pijmongaquéo jne. Ga ududigode udore a pésu jeta chajnı́ja danirı́pisi jne. Mu a chise daniri uté ga a jé cachodi tu jne. Uje a yipésu jne enga a urásarique chujé ome daquesérique jne.'"–
Ga udore u Pangarádejnai uruode ome Ezequı́as uje Isaı́as chajnerame Ezequı́as utocaidode, uje ore chajnerápome deduguéjnai gaté rı̃.
Ası́riagosode ore eduguéjna cuchábi Senaquerib dojnóngaja Pangarádejnai Dupade nanique
8Enga ası́riagosode ore eduguéjnai Senaquerib iroguipı́si uté chudute uje deduguéjna cuchábi e jnoji daparúgai pidai uje i tu Láquis. Jecute Senaquerib uté iroguipı́si uté jnoji Jerusalén, enga chise deduguéjnai uté iji jocaningai gai uje cugujnáji libnágosode ore idai uté nanique.
9Enga ası́riagosode ore eduguéjnai Senaquerib uté qué déji dajocaningai uté gai nanique ome judágosode ore idai Libna uté, mu chudute dajnéone pijmongaquéo to ome purása uñane. Uje etiopı́agosode eduguéjna cuchábi uje i tu Tirháca jmongarája ası́riagosode ore eduguéjnai, enga e déji dajei ujetiga doi dajocaningai ome uté.
Uje ası́riagosode ore eduguéjnai Senaquerib chudute dajnei pijmongaqué uté nanique ga jı̃raque cho dajocaningai uja ome judágosode idáyode udore. Mu ası́riagosode ore eduguéjnai que pota jeta Ezequı́as jos eti cha pocaningai unerai ome urasade ore. Jecute chirócapo datocaitı́go aja judágosode ore eduguéjnai Ezequı́as yui rı̃ ujetiga ore chajnerame uruode ome uté, jé aja ujetiga ore chijna urusarane aja to. Ga ası́riagosode ore eduguéjna cuchábi uté chósi tome datocaidode udore:
10–Oyósi tome judágosode ore eduguéjnai Ezequı́as ujetiga ajnerañome yuruode ome uté: "Ezequı́as, jé ca ajuéga jeta bangureni Dupa chãra ua uje chojningame ua: 'A jé ca Jerusalén basája ası́riagosode eduguéjnai uté jmainie jne.' 11¿Ama jé ca adúdiráse yocujnoméone to a? ¡Badute arı̃a! Uje jecucha isoca uje ası́riagosode ore eduguéjnane uyoque yinoningácopise purása uñane jnese. ¿Ama aquetárase ua ome uyu a, Ezequı́as? ¡Que toque arı̃a! 12Uje yáquiode eduguéjna ore doi purása uñane nanique ga ore chejna ore ga que ore angurenone dupa gotı́go chãraque gojni ore nanique. Adójnanga ore guejnane pidáyo Gozán, jé aja Harán, jé aja Resef, jé aja bet-edéngosode, uje ore cho dedáji ore idai Telasar uté. ¿Ama ore angurenone dupa chijnime ore iji yáquiode jmainie nanique a? 13Enga ¿déji rique eduguéjnane udore uje ore idáyode u udojo nanique: Hamat, Arpad, Sefarvaim, Hena, Iva ore? ¡Tita erámi ome ore arı̃a!"–
Udore u ası́riagosode ore eduguéjnai Senaquerib ichietabáitigade ome Ezequı́as uté, uje utocaidode jno údi aja uté iji Jerusalén nanique.
Ezequı́as chijócha Pangarádejnai ajei údi ome re, jé aja urasade judágoso udore ore
14Uje ası́riagosode ore eduguéjnai utocaidode chise Ezequı́as ga ore chisı́ome uraque deduguéjnai urusarane ome uté. Ga Ezequı́as chisa dajnéone ası́riagosode eduguéjna urusãracho enga chajire ome re.
Quigade enga Ezequı́as chijnare raja Pangarádejnai iguı́jna cuchábi ajei ga chungare urusarane udore aja Pangarádejnai iquei. 15Enga Ezequı́as chijócha Pangarádejnai ajei údi iji iquei, ga chojninga:
–Pangarádejná, israélgosode yocangureni Dupa yá, e bácariji bayaripi uté gai iji gaté unirisórone udore gai uje ore ujnóngone cuse ga ore i tu querubı́neone.#19:15 Ome Dupade uruode irajasórone jiei ore ga Ezequías uruode qui tu gaté unirísõre orerane udore uje ore déji Pangarádejnai Iguíjna Ajé Puyaguipísi ajei. Ga querubíneone udore charite Dupade uruode pi cajo joride uaté gai iji uté. (Ga adójnacho Éxodo 25:22 jé aja 1 Samuel 4:4 jé aja 1 Reyes 6:23-27.) Dupa ugurui tu ua, enga báringai Pujnuéngaisṍre cuse ome peduguéjnane ore gajnepı́dode jnumı́o iji erámi údode jnese. Ua u uje bapésu gaté, jnumi ore jnese iji taningai. 16Jecute acha bangoninguini aja gadoi ga angáripı́si uyu, Pangarádejná. Enga be, Pangarádejná, ga achẽre bedodie gai, enga adójnanga cucha tocachugode iji de. Angarami ası́riagosode ore eduguéjnai Senaquerib uruode to uje chirógaja gadoi. Uté idojnóngamáni tu ua, uje Dupa Uecai tupúsu ua mu.–
17Enga qué jno, Ezequı́as ajei jochaquéode ome Pangarádejnai, ga chojninga:
–Pangarádejná, bamo uje jé ũrepise Senaquerib ome dagoiguéode ome ası́riagosode eduguéjna cuchábode guejnane punı́ño arı̃a, jé aja ore yugode udore gajnepı́dode jnumı́o. 18Enga que potigayaquérique déji uté igoiguéode to uje ore chãru dejnane punı́ño angurenone dupa gáyode. Mu que dupa ore angurenone udore gotique. Uje cachi erámi unirisórone u uje chiro ore angurenone ayoré gajnu udore iji poridie, cucaranenie ore. Jecute jı̃raque pejnaque ore ome dáringane cucha bisidécho. 19Jecute yijócha bajei údi iji de, Pangarádejná, Yocudupá, ujetiga be gajiné ga ajnime yóguiji ası́riagosode ore eduguéjnai uté jmainie. Yigaidi tu gu ujetiga peduguéjnane iji dajnepı́dode jnupe jnese iji erámi ore chiraja jne uje Dupa ugurui tupúsu ua, Pangarádejná.–
Pangarádejnai uté tangári Ezequı́as ajei jochaquéode ome re nanique, ga chutṍri dangúromei proféta Isaı́as uté ujetiga chajnerame uruode ome Ezequı́as, uje Pangarádejnai a cho dajuñame Senaquerib uté jne
20Iji udojo quigade uje Ezequı́as e cha chijócha Pangarádejnai Dupade ajei údi, enga jé u uje proféta Isaı́as uje Amoz ujnacari uté chiroque daruode aja Ezequı́as yui. Enga uruode udore garani tu Pangarádejnai, israélgosode ore angureni Dupa uté, uje chósi tome Ezequı́as:
–Ezequı́as, uje bacatecã́ri yu ome ası́riagosode ore eduguéjnai Senaquerib uté que, ga e yangári bacatecãraitigade udore ome yu. 21Ga Pangarádejnai uyu, jé yurugaite ası́riagosode ore eduguéjnai Senaquerib uté, ga yósi tome uté:
"Senaquerib á, ore idai Sión gajnua tu gapupita paréraque uje chujnapise ua ga canapise babai ome dajñiequéode ome ua.
Uje chimo ua aja bagajñúraque ga gapua gajnu Jerusalén uaté chijocase dataroi iji baquigade uje chetaque ua gu.#19:21 Sión, Jerusalén ore, jé ore upúsu uñane. Iji versículo udé uje Pangarádejnai chĩ́care gapua gajnu Jerusalén, jé aja gapupita paréraque Sión, mu ojningane udore qui tupúsu idaité ore iji Jerusalén uté, uje Pangarádejnai a chãraque udore ome Senaquerib uté jne.
22¿Ama gosi gajneque bachietabáitigade, badojnóngamátigade udore que a, Senaquerib i? ¿Ama gosi gajneque baru dosógode que a? Uje bejnapúsu baruode udore ga bajire gaté yui ome báringai ijoyataque.
¡Badojnóngamátigade udore gajnesṍri tupúsu uyu, uje Israel Jogosṍri Dupa Puyaguipise uyu!"
23"Senaquerib á, bangúroméone u batocaidode udore dirı́ca uje ore chatata babójatiguéode ome Pangarádejnai uyu dirı́ca. Ga baru querúode chósi te:
'Yajneque guebéquedaté dipeséjnane, pocaningane gajnecho uje que pisecarãte udore, ga yoru yachidi guebéquedaté aja cucarãte umarone ójodie ome yúringai pujnuéngaisṍre. Ga jé yuságaja cucarãte umarejnájnane ójodie to iji ore uniri Lı́bano uje umarejnápise ga sué ujode cucarãte gáyode.
'Ga yaquesu poridie iji cucarãte umarejnájnane udore ójo uje udire i tu cédro ga pore yorı́cojnai yajegaidedie udire ome ujodie pori. Ga yaquesúapo poridie uñanie uje i tu pı́no, ga yajegaidedie iji poridie udire ueradéjnapisi ome ujodie pore úringanie ueradé to. Ga yise cucarani uté ójo eruépisi, uje idájapise iji jnumi mu. Ga yise abué iji uté ójo uje poridie piéjnapı́siji, ga sué abué uñanie gáyode.'"
24"Enga baru querúode qué jno dádi, Senaquerib á, uje baruode chósi te dirı́ca: 'Que gusu yisocade udore, mu yijócha jnumone to iji yejnane pachamite unejácho, ga yise yote unéri iji ga yóji yerugode udore.
'Enga ası́riagosode ore eduguéjnai Senaquerib uyu ga yise Egı́pto to ome yijocaningane nanique ga yuchiéjna Egı́pto jongotodie tié nanique ome yirı́da ajã́ronie ga e ı́jnoque yodi tiji tiedie udire jnese, uje e ore nóña ga jnupe cajnore.'
25"Mu e Pangarádejnai uyu yósi tome ua, Senaquerib á:
'Ua u uje basi babai ome punirone udore jnese úringane pejnacho, mu ¿jé ca adute to a? uje yáyipie ao tu ujetiga cucha dacadode udojo tocade. Pangarádejnai uyu upúsu uje yipésu yáyipiedie ome cuchade udojo úringane pipesucho. E yiroque cuchade udore aja dáringane tocachucho, enga que yáyipie uñáraque toja. Jecute bajnangarase bejnane pidáyo ujuyaquéode aja bejode uje chaparu ore gáyode, ga urúpisiji jnumone. Enga gose uyu, uje yujuegabate ga yisı́ome betotiguei ome ua.
26"Enga jé u uje bejnane udore pidáyo idaisórone que ore uajatiguérique cuse iji bajmainie. Ga pisadodéringai irágu ore ajéode ga banguı́ra dipoi taja ore. Ga ore gajnaminie su ugarabidie uje suéji garáijnai, ga ı́jnoque udire etotiguei ga serẽrája. Ga ore gajnaminie su ugarábabía rı̃ uje suésiji guiguı́jnai ójo bisideque, uje cáma areque mu jı̃raque beta iji guedé ojodie jmainie.'
27"Mu ome ua, Senaquerib á, érãtique yimoque bajmapiéraque: Yirajapise bayaridode, baquigode ore jnese, jé aja ujetiga esápo bajogadi rı̃. Ga yiraja báringai júruru ome Pangarádejnai uyu to. 28Enga e yipésu yáyipie ome ua, ga gose babijnacóro ome yu, jé aja uje yudute baru querúode udore, uje bajosi ua iji gaté ome uyu. Jecute a yi ua, ga a yanire yajné ojnaquéro ocórorãtágaja bajunane jne, Senaquerib á, enga a yanı́rapo buricade erã́sori gajnui aja babijnani rı̃. Ga a jé yiroque ua aja arorai, ga a ajnápo bãrapi casé dajeque jne aja baniri uté."–#19:28 Asíriagosode ore jmapié upúsu ome dasagode ayoré ore ujetiga ore chanire ojnaquéro ocórorãtágaja ore ujunane jeoga ore pijnanai. Enga gatuaque ore chanírapo buricade erã́sori gajnui aja dasagode ore pijnani rĩ, ujetiga ore chiroque ore aja daruode úringane pipesucho. Pangarádejnai chĩ́care udore ome Senaquerib, uje cho ujetiga Pangarádejnai chatire uté isocai gai. Uruode qui tu uje Pangarádejnai chorase dasaguíji Senaquerib uté, jecute a jé ca toguírase ujetiga uté ca doi dasasṍri uruode quigode.
29Ga quigade ga proféta Isaı́as ajnerámeone Pangarádejnai urúo chósi tome Ezequı́as nanique:
–Ezequı́as, yuru uréone udojo pijogúsõri u udojo ome ua: Jé iji siqueré udaque enga a ca acáyo uacacatı́go cucha jne mu uacabotı́go cucha a u cucha ujnı́erãtigo árigo jne. Enga jé isocai upome siqueré ejo rı̃, ga uacabotı́go a upo cucha ujnı́erãtigo árigo jne rı̃. Mu siqueré ejogaté uje e chise siqueré gadióguei jne enga quene acáyo cucha ajñúringui iji siqueré uaté, jé aja úvadie jogadode rı̃. Ga a quene siqueré omé jogadi tu jne, ga a aráño uacacatı́go cucha jne, jé aja uacacárigui úvai to rı̃, ga a acho udire adie iji siqueré gadióguei uaté jne.
30Enga qué yajnerame Pangarádejnai uruode udojo ome ua, Ezequı́as, uje déji yoquiquei. Uje judágosode amirámone sudore uje ore ecáji pocaningai a ore quérãpo jne rı̃, ga a jiépoi ore jne rı̃. Ga a ore gajnúone u cucha pacatique aja gaté jne uje erode idájai guesi, ga árigo jiéji. Enga a jé u jne ujetiga jiépoi amirone iji uacague Judá uaté rı̃. 31Chamáñaje pocaningai juségode a jé ore déji uacarasade judágose ujade jne iji cucarani Sión udé. Yuruode udojo qui tu uje judágosode amirone uñane a qué déji uaquedai Jerusalén udé jne.#19:31 Ore idai Jerusalén, cucarani Sión uté ga jé ore upúsu ñane. Enga udore a ore chajnerame re jne iji uacaniri Judá udé údode.
Enga que toc ujetiga jé ca Pangarádejna Pujnuéngaisṍri uté áyipiedie tocade ome judágosode amirone sudore jne. Chamáñaje chijnorapise ore ome re gu, jecute chicha amirone aja diri ga a pésu ore iquéraningai jne.–
32–Jecute Pangarádejnai uru quigode chopósi tome ası́riagosode ore eduguéjnai rı̃:
"A jé ca ası́riagosode ore eduguéjnai uté chacája Jerusalén udé jne, enga a jé ca chicho Jerusalén gai ome dojo chojmaráraque jne. Enga a jé ca chisa paróbedie gajneque guebeque jne jeta chicha darobé yui jne ome Jerusalén yui. Enga a jé ca uté chirópo dachiejnane iji Jerusalén ujuyaquei dosadode jne rı̃ ujetiga ore choru dorai uté ga cugujnápoji ore idai te rı̃.
33Mu uté ajnai tuté dajeque aja Jerusalén a chatirépo uté aja daniri jne rı̃. Pangarádejnai uyu ga yijáro yuruode iji jnumi ome uté: ¡A jé ca ası́riagosode ore eduguéjnai uté chacapója Jerusalén ajei jne rı̃!
34Mu a yãraque Jerusalén udé, enga a yiqueta jne. Enga gose yijnoraquei ome yúringai pisı́gai iji uté, jé aja yuru ueradode udore uje yichagája yiro casicaite David uté yui nanique."–#19:34 Pangarádejnai uru uréone uje chichagája eduguéjnai David yui nanique chósi te: "Yuru quigode u ome bape disi ejórigo ore jeta ore susípise dadode guio ome uyu, ga ca ore chimoque doi yojningane cucha iji yiquei gatuaque ome dáringáringo ũréo. Ujetiga ore chejna dáyipiedie, dáringane ayoré jnese aja uyu, enga a yipésu jne ga a jé ca chimoque bayaripi cuchábi udé charipiésonique jne iji bape disi ejórigo ore ujade gatuaque jne, ome dáringáringo peduguéjna iji israélgosode udore ore ujade." (1 Reyes 2:4)
(Enga udore u Pangarádejnai angúromei proféta Isaı́as ajnerámeone Pangarádejnai urúo ome Ezequı́as nanique.)
Ası́riagosode ore eduguéjna cuchábi Senaquerib uté jnoji judágosode ore ejode nanique ga chise daniri uté mu cachodi jé u nanique
35Enga dejai uté jé upúsu uje Pangarádejnai chiroque daroi gaté unirı́sõre uté aja ası́riagosode ore apáringaméi darengu iji Jerusalén ejátique nanique. Ga Pangarádejnai iroi uté chujé ası́riagosode ore isoldádode uñane iji dejai uté nanique, ga yugode batigai chise 185.000. Ga chise direjnı́mei nanique ga ası́riagose uecárigo chajire dejode, mu ¡chimo jóroque re! uje ore chimo darása togode ore jnese iji dejode nanique.
36Uje ası́riagosode eduguéjnai Senaquerib uté chimo cucha dacadi uté ome re nanique, ga jé u uje chijnime riji darengu casé uté. Ga jı̃raque jno enga chajnésara dedáipı́si Nı́nive, ga chácariji uté.
37Mu chise diri nanique uje ası́riagosode ore eduguéjnai Senaquerib quene chise dagachodi. E chicáji dangureni dupa quedéjna iguı́jnai ome úringárique pisı́gai, uje angureni uté i tu Nisroc. Enga Senaquerib uté e chichaga dagataidie aja jnumi iji dangureni Nisroc iquei ome úringai pisı́gai, mu ujnacare gáningo ore chise iji gai nanique enga ore chinguı́ra daqueségodogóde aja uté enga ore chimate dai uté aja jnumi. Ga Senaquerib uté ujnacarode udore ore ı́ode u udojo: Adramelec, Sarezer ore. Uje e ore chujé dayé nanique enga ore chayo ga ore chijna dagajñua taja pachamite uñai uje i tu Ararat. Enga Senaquerib uté ujnacarode uñai chácariji dai charidi nanique ome úringai ası́riagosode ore eduguéjna, ga uté i tu Esarhadón.
Currently Selected:
2 Reyes 19: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
