2 Coríntios 5

Dupade a chisíome yocao ichai ome yoque jne iji Dupade idai

1Yirajágo uje yocao ayorei tudé gajnui tu guiguíjna pipesutique ome pijmanéringui. Uje jĩraque íjnoque. Enga yirajágo rĩ ujetiga toque yoque, mu e dimane yocao icha ejórique ome yoque iji gaté. Yocao ichai tuté gajnui u guiguíjna pipesutique rĩ, mu e que cho ayorérique ipesutique go, mu pimanique ome Dupade jmainie. 2Jé ũrepise yu uje qué yugúcoji yocao ayorei udé ga yirañíngome cucha ponáyone ome yoque. Enga unere yui ujetiga e yugúcoji yocajnei tuté guiguíjna uje Dupade a chisi ome yoque jne iji gaté. 3A ca yoco poré gatéraque jne mu Dupade a chisi ome yocao ichárique ome yoque jne iji gaté. 4Uje qué yugúcoji yocao ayorei tudé ga yirañíngome yocajnenie pujurei ome yoque. Que yipótago ujetiga yitogoi ga yecãco jóroque yocao ayorei tudé. Mu unératái tu yocao ichai tome yoque. Ga yocao ayoré toguébei bijna ome yoque. 5Jecute Dupade qué chingo cuchade quigode ome yoque ujetiga dimane yógome yocao ichai tudé yui to. Enga noñome Dajopié Espíritu Sánto iji yocari ujetiga ca potigayaquérique déji yógome yocao ichai tuté yúrique.

6Jecute dicase yógome Dupade adode iji deréjnane jnese. Mu uje qué yugúcoji yocao ayorei tudé ga cho ujetiga yugúcoi quedéjnaringo ome yoquiguíjnapisi. Yojningai u uje cáma yugucopísiji Yocangarádejnai gari iji gaté. 7Uje que yimóngo uté, mu jé yichago yocanguretigai taja. 8Jecute dicase yógome yoquitoringai yui ujetiga yijíñongome yocao ayorei tudé to. Enga yoquipotigádi upúsu ujetiga e yugúcoji Yocangarádejnai gari to iji gaté. 9Jeoga qué yugúcoji jnumi tudé, jeoga e yugúcoji gaté, mu yocucuei tu ujetiga uerate yocadode ome Yocangarádejnai iji deréjnane jnese. 10Chamáñaje a chise dínique jne ujetiga Crísto chajire yocadode aja quigode jnese. Enga a ayoré chojmara, chojmarane a jé gajneque dapesutígo quitígo jne, uje pésu iji dáringai ayoré nanique. Ujetiga uerate atígo nanique enga jé gajnecho. Ujetiga gajnarécho atígo ga jé gajnecho to rĩ.

Dupade e chutṍri yoque to ujetiga yatatago pajesereringai adode

11Yirajágo pisadodéringai ome Yocangarádejnai yui, jecute yicoi enga yinejeco jnanione uñane údode to ujetiga ore tangári Dupade to. Ga Dupade chiraja uje yoquisocai u uté. Enga yiroco diri ujetiga arajáyo yoque to. 12Ca ajoso ati e yicotagopo yoque rĩ, mu yingongo yocadode ome uaque ujetiga pirasitigai déji uágome yoque to. Yoquigaidi tupo rĩ ujetiga arajáyo yocadode quigode ga ãraracho yoquibai to jne ome dicotáreode udore. Uje cachi udore ore chicota gosi ujetiga aoi uerate, jé basa que ore chicota gosi ujetiga áyipie omé. 13Uje ore chojningame yoque: "Ũruso." Mu yoquibai u Yocangarádejnai Dupade. Mu ujetiga oyo omi iji yoque, enga a omitigai tu uté ome uaque. 14Que toc ujetiga ca yicoi Crísto áyipiedie quigode. Chamáñaje ijnoraquei uásejnapise ome yoque gu. Yirajagopise uje uté toi ome yoque jnese. Enga e yipatíorango uté jnese iji itoringai. 15Crísto toi ome yoque jnese gu ujetiga ayoré uecade uyoque ca yedugo yocáyipie ayoredie ome yoque. Mu gaidi tu ujetiga yedugo uté áyipiedie ome yoque. Chamáñaje uté u gu uje toi ome yoque nanique enga nijiápo iji datoringai ome yoque to rĩ. 16Jecute que yimíningacópo ayorérique rĩ ujetiga cuchadaté, jeoga ayoré gajnareque iji erámi tudé. Mu iji taningai enga yedugo yocáyipie ayoredie ome Crísto to nanique, mu e yiyágo yocáyipie ayoredie udire ome. 17Jecute ayorei uje e chisa Crísto ome dáyipie ga e ayoré icha uté. Enga cuchade e chécãre re ome, uje ate bajade jnese e bijna ome. Enga e doi date ichade.

18Enga Dupade ipesucho cuchade udore jnese. Enga u to uje angúromei u Crísto nanique ujetiga yico yocúringáringo uomome ñane, Dupade uyoque. Enga e chiroque yoque to ujetiga yucuegoi uñane ujetiga ore chise dáringáringo omío to ome Dupade; chamáñaje yocumajo ñane nanique, Dupade uyoque iji jnumi. 19Ga Dupade angúroméone u uyoque ujetiga yingongo ore uje Crísto toi nanique ujetiga chimate erámi unirisórone yocúringáringo omío ome dayé Dupade, ujetiga Dupade, uyoque yocajéode chopo sere ome ñane rĩ. Enga que qué Dupade áyipieraque dépoi yoquisijnaringuéone rĩ. Ga Dupade e chutṍri yoque to ujetiga yatatago pajesereringai adode ome yocujode ayoréo, ga ore chiraja quitígo to. 20Jecute yibájoi uaque gu uje Crísto e cho yóguiji re. Enga jé u uje yoquinejequéode ome uaque garani upúsu Dupade. Jecute yinejeco uacádode. Mu qui tu uje Crísto upúsu uje nejé uacádode. Enga yocósi te ome uaque: ajuécho uágome Dupade ga pajesereringai dépoji uágome Dupade to rĩ. 21Yirajágo uje Crísto que pésu cucha gajnarétique nanique. Mu Dupade cho ayoré sijnánguiji uté nanique. Gaidi u gu ujetiga cho daba yoquisijnaringuéone. Jecute uje yanguretágo Crísto ga yocúringáringo omío a u jne iji quigade. Chamáñaje Dupade potapísa yocúringáringo omipíso ome re gu.

Currently Selected:

2 Coríntios 5: Ayore

Highlight

Copy

Compare