2 Coríntios 4

Yujnucoi yógome yocajnéone Dupade iroquéo, enga gose uté icaniratiguédatéi uje chingongara aja yoque

1Jecute que yoco jṍro ome Dupade iroquéode iji deréjnane jnese. Chamáñaje Dupade chosõre yoque ga chisi ome picasitigai ome yoque ome daroquéode. 2Jecute e yetajopise pate gajnaréngone uje pipoguiécho. Cachi chinguíra dipónguerãi taja ipesungórone gu. Mu uyoque ga que yecãco Dupade uruode quitique go, enga que yarangopo yocujórique ayoré rĩ. Enga ũrepise yógome yocojñane jnese. Enga yujuco yocadode guio ome yocujode ayoréo. Yoquigaidi tu gu ujetiga yocujode ayoré ore chimesẽre yoque to. Yoquigaidi tupo rĩ ujetiga Dupade irasique re to ome yocadode. 3Mu ujetiga yocacajnaquéode ome Crísto adode ca pirajachome angarásonique ga imoi tu uje uté gosi qui tu Dupade ujuyaquei. 4Udore ore uje que ore changureta yocacajnaquéode ga pijoque uje ore cho dadupáji Satanás iji erámone udojo. Enga Satanás uté u uje suru ore áyipiedie gai, jecute que ore chiraja yocacajnaquéode quigode ome raque. Chamáñaje Satanás ipotigádi tu ujetiga ca ore chimo dírecaringué cuchátique ome raque to. Enga ca ore chiraja yocacajnaquéode úringai ueradéjnapíso uje yacaco ore ome Crísto ingoningájnai. Chamáñaje yocojñane gajnengóri Crísto u uje dayé Dupade chopise re iji nanique ome yoque iji erámi tudé. 5Uje yacaco uaque gajneri, yocujúdi u Yocangarádejnai Jesucrísto adode. Jé basa ga que yujúgo yocatígo go. Chamáñaje que cuchadaté yoque go, mu yocajnui tu ujetiga uacaroque yoque enga agutíñañome yoque to. Enga yipéco udore gu yoquijnoraquei tome Jesús. 6Dupade u nanique uje ipesute dírecaringuéi ujetiga chijñate ijnangununie gai. Enga jé u to uje chijñate yocáyipiedie gai to. Pésu udore gu ome yoque ujetiga pijoque ingoningájnai ome yoque to. Enga Dupade idírecaringuéi tuté u uje dépisiji Jesucrísto to.

Páblo chatata uje yocajnai tu Jesucrísto, uje toi ome yoque; jecute yipótagopísa ujetiga Jesús uecai pijoguipísiji yocao ayorei tuté gu uje yoco yoquiba adode, enga yoquigaidi tu ujetiga yimáco uñane aja pucuecaringué eyúgojmai to

7Yirajágo uje cucha orerã́quedatéi déji yocao ayorei ajei. Yirajágo mu uje que cuchárique tṍraji yocao ayorei tuté. Mu gajnua u pĩraca docoráraque iji jnutique. Jecute obiréjna uje yocaríjogoto pujopiédaté que garani u yoque go, mu garani u Dupade. 8Jecute pujuredie tṍraji yoquibai tome yoque jnese, mu jé yico uéchade. Páyuguhebátigade dépoji yoque to rĩ, mu que chijnápisa yógaja jnumi go. 9Ducañerájma yoque mu Dupade jé jogate yocari. Que noñome yóguiji te go. A ore chinguíra yógaja jnumone marínga, que toc ujetiga pajnoque yoque. 10Jecucha dimane yógome pitoringai yui iji yocajesúode erámio. Chamáñaje yocajnai tu Yocangarádejnai Jesús gu, uje toi ome yoque to. Yoquigaidi tu gu ujetiga yipijójo ome erámi uje Jesús uecai tuté dépisiji yocajéode to. 11Uje qué yiquecágo iji jnumi tudé ga jecucha pijmongarápi yoque iji deréjnane jnese ome yocatatagode Jesús acho. Yirajágo uje yocao ayorei tudé eruei cuse, mu yipótagopísa ujetiga Jesús uecai pijoguipísiji yocao ayorei tuté gu uje yoco yoquiba adode. 12Jecute yugúcoji pijmongaquéode ajei mu yoquigaidi tu ujetiga yimáco uágaja pucuecaringué eyúgojmai to.

13Dupade uruode chojninga: "Yangureta cuchai ga yatata adode." Ga isocai jé u ome yoque uje yocanguretigai déji to ome yocangureni cucha. Uje yanguretágo ga yatatago adode. 14Yirajágo uje Dupade chiringare Yocangarádejnai Jesús nanique iji itoringai. Ga a adi jé u yoque to uje a chiringare yoque to jne. Ga a cháta yógaja uaque jne enga a chijna yoque jnese jne aja dedai ujetiga yácagoji gari. 15Yibade u uaque gu uje yejnáreque yajnéone petingaquéo, páyuguhebátigade ore jnese. Mu jé tiógara uje yucuei tu uacomitigárique. Yipota gu ujetiga jiei yimanitígo aja guesi ome Dupade. Ga a jiépoi uñéngo jne rĩ ujetiga ore chacãre Dupade gai ome icaniratiguédatéi ome yoque. Enga a ibijóquedaté Dupade ome yoque jne.

Jé ca yejnángo yocáyipiedie taja yoquimone cucha iji jnumi tudé, mu yicoi ga yejnángo yocáyipiedie aja cucha pibojmane yui iji gaté

16Jecute que yoco jṍro ome Dupade adode. Chamáñaje ayoré uyoque yoquiqui tu jnumi yui jnese gu. Jé basa yocáyipie u uje chiro re iji deréjnane, ga chicai gaté ga que toi go iji deréjnane jnese. 17Yirajágo uje pirarã́itigade chise yoque iji jnumi tudé mu jĩraque jnopo rĩ, jnopo rĩ iji yoque. Mu ujetiga yimáco yógaja udore uéchai ga yocajneque cucha eyúgojmane iji Dupade idai ueradéjnai tuté. Enga yocucuecaringuei tuté a suépise yocucuecaringueque baja casé iji jnumi tudé. 18Jecute ca yicoi ga ca yejnángo yocáyipiedie taja yoquimone cucha iji jnumi tudé, mu yicoi ga yejnángo yocáyipiedie aja cucha pibojmane yui iji gaté. Chamáñaje yoquimone cucha iji jnumi tudé jĩraque íjnoque gu. Jé basa ga cuchade udore uje cáma yimóngo to udore u uje a ca íjnongapo jne rĩ iji deréjnane jnese.

Currently Selected:

2 Coríntios 4: Ayore

Highlight

Copy

Compare