Hebraeˊ 5

1Peue jhawpˊ rit keuting naˊ ce ku peue leuk ce ri neum peue naˊ ce. Ce pun ri tangˊ ri uinˊ ri meuh nang kaw yeuh kanˊ toˊ ri Peucawoˊ Eun pun peue. Ce tan lapsawngˊ maeeˊ hk'eung tan naˊ pun mapˊ naˊ. 2Peue jhawpˊ rit keuting naˊ kopti ce ku kawlˊreng kloe yeut, ce kaw kah ri tukyak ri peue unˊ yawng maeeˊ peue kleucˊ hk'aˊ ri naˊ ce. 3Kop awnˊ na, peue jhawpˊ rit keuting naˊ ce ku kaw kah ri tan kuˊ tan pun mapˊ ri naˊ meun seunˊ mapˊ ce peue seubu naˊ yeut.

4Aˊnhawˊ hkuinˊ cang yeng ri ti anˊnya kueˊ munhpungˊ aenˊ a meuh isˊ ti. Eun kaw kah ri meuh kuˊ Peucawoˊ klawng Eun ri ti naˊ seunˊ Aron rap eun ri ti naˊ. 5Kop awnˊ na, saecˊ meuh Hkrit Eun hkuinˊ tangˊ tuˊ ri naˊ lhungˊ keuting ri rap Eun ri ti munhpungˊ ka meuh peue jhawpˊ rit keuting naˊ. Daecti Peucawoˊ Eun lahˊ a ri Heun,

“Meuh Mi Konˊ aiˊ Uiˊ.

Seunyaenˊ, meuh Uiˊ Kuiingˊ Mi hawcˊ.#5:5 Aˊkoˊ tuilˊ Uiˊ Mi keutˊ hawcˊ.”#5:5 Sukˊseunˊ 2:7

6Ton seubu naˊ Eun lahˊ,

“Meuh Mi peue jhawpˊ rit cotˊcu

seunˊ Melhkisedekˊ eun koˊ.”#5:6 Sukˊseunˊ 110:4

7Yam Yesuˊ utˊ Eun pang bhenˊ keuteˊ naˊ, Eun tan leukahˊ hk'oˊ munˊ maeeˊ leukahˊ hk'oˊhk'ang ri naˊ ri sengˊ lawsˊ ri maeeˊ leuumˊ ngaiˊ hk'uicˊ ri naˊ ri Peucawoˊ Cawoˊ cang teumˊkawm Eun pon hk'aˊ yeum naˊ Eun. Kopti Yesuˊ leuceng Eun ri ti Peucawoˊ Eun hk'aˊnaee vang hkopyawmˊ yumyamˊ ri naˊ, Peucawoˊ Eun leuceng leukahˊ Eun naˊ. 8Eun saecˊ naˊ meuh Konˊ aiˊ, Eun ku rin ri pun kaw leuceng ri ti naˊ ri hk'aˊ tukhka hk'eupˊ ri naˊ. 9Kopti Peucawoˊ yeuh Eun Yesuˊ Eun htonnuk hawcˊ naˊ, Yesuˊ Eun ku meuh Cawoˊ htut cotˊcu pun ce peue leuceng ri ti Eun naˊ ce gawmˊeucˊ. 10Peucawoˊ Eun tangˊ ri uinˊ Eun meuh peue jhawpˊ rit keuting seunˊ Melhkisedekˊ eun koˊ.

Tuilˊ sati kaw unˊ kleucˊ hk'aˊ ri

11Lheuˊ uiˊ ri kuˊ kaw lahˊ ri lawng aenˊ na, daecti kopti yak rin peˊ ri pun a naˊ, a nyhapˊ ri ris peˊ mhawngˊ a nyawkˊ. 12Neumneum ka naˊ koˊ, lingˊlangˊ a peunawˊ hawcˊ naˊ htukˊ peˊ ri meuh seuraˊ hawcˊ. Daecti kawnˊ kaw peˊ loˊ peue sangsawnˊ lawng kleumˊ ka leukahˊ neumneum Eun Peucawoˊ gawmˊeucˊ naˊ ri peˊ baee. Htukˊ peˊ ri kawnˊ nyui leuumˊ pui, unˊ meuh kuˊ hk'a cenˊ naˊ. 13Aˊnhawˊ lawn kawnˊ nyui leuumˊ pui naˊ koˊ, kawnˊ meuh eun oˊngak. Eun unˊ nang huengˊ lawng sangsawnˊ ka leukahˊ leupaws seumeuˊ naˊ. 14Daecti kuˊ hk'a cenˊ naˊ meuh ka pun ce nang keuting kuˊ hkvuikˊ ri gvah kuˊ chakˊ kuˊ unˊ chakˊ naˊ ri tuˊ ri naˊ meun laleung naˊ ce.

Currently Selected:

Hebraeˊ 5: blrPL

Highlight

Copy

Compare